BAAQ KU
AADAN NABADDA IYO DIB U HESHIINTA SOOMAALIYA
Kadib
wadatashiyo muddo socdey oo ay wada yeesheen Xarumaha Nabadda ee
kala ah Center for Peace and Democracy (CPD) & Center
for Peace and Co-existence (XORIYO), kana kala dhacay dalka
gudihiisa iyo dibeddiisaba, loogana hadlayey xaaladda Soomaaliya
meesha ay maanta mareyso, gaar ahaan dhinacyada Nabadda, Dib u
heshiisiinta iyo sida wax looga qaban karo,sarana loogu qaadi
karo wacyiga ku aaddan arrimahaas iyo weliba kaalinta ay ku
yeelan karaan Ururada Bulshada Rayidka Soomaaliyeed; ayaa waxey
labada Xarumood si wada jir ah u soo saareen baaq Nabadeedkan:
- Waxaan FURSAD WEYN U
ARAGNAA shirweynaha Qaran oo dib u heshiisiinta Soomaaliya
ee la qorshaynayo in lagu qabto gudaha dalka Somalia,
iyadoo ay ka qeyb qaadanayaan, Dowladda Kumeel Gaarka ah,
Bulshada Rayidka iyo dhamaan dhinacyada ka biyo diidsan
hanaanka Siyaasadeed ee ka jira dalka. Waxaan u aragnaa in
ay tani noqon karto fursad lagu soo afjari karo xaaladda
colaadeed ee dalka ka jirta isla mar ahaantaana albaabada u
furi karta xasilooni, nabad waarta iyo soo celinta sharciga
iyo kala dambeynta.
- Si loogu KALSOONAADO, eyna
miro dhal u noqdaan howlaha Dib-uheshiisiinta waxaa muhiim
ah in Dawladda ku-meelgaarka ah dhowrto, si weyna ugu
dhaqanto nuxurka Axdi Qaraameedka ku meelgaarka ah, iyadoo
Axdi-Qarameedku uu ahmiyad gaar ah siinayo dib u
heshiisiinta.
- Waxaan ku BAAQEYNAA in
xaaladda deg deg ah ee Dowladda Ku-Meel Gaarka ah ku soo
rogtey dalka aan loo adeegsan ku tumashada xuquuqda iyo
xoriyadaha asaasiga ah ee Muwaadinka Soomaaliyeed.
- Waxaan ku BAAQAYNAA in
ciidamada Ethiopia si deg deg ah u dhameystiraan ka
bixitaankooda Dalka Soomaaliya, taasoo qeyb weyn ka qaadan
doonta dib u heshisiinta, is-aaminaadda iyo Nabad kuwada-
nolaashaha Dawladaha iyo Bulshooyinka deriska ah.
- Waxaan SOO JEEDINAYNAA in
Ciidamada Nabad Ilaalinta ee ka socda Midowga Afrika (AU)
loo arko kuwo taageeraya kana qeyb qaadanaya soo celinta
nabadda iyo kala dambeynta, isla markaana ku howlgelaya
hanaan waafaqsan shuruucda iyo qawaaniinta caalamiga ah.
- Waxaan ku BAAQEYNAA in
dhinacyada isku haya Siyaasadda Soomaaliya ay u
DHEGO-NUGLAADAAN baaqyada Nabadeed ee ka soo yeeraya gudaha
iyo dibeddaba, si loo joojiyo dhiiga qubanaya isla mar
ahaantaana ay miro dhal u noqdaan dadaalada Dib u
heshiisiinta iyo Nabad soo celinta.
- Waxaan DHIIRIGELINEYNAA in
Bulshada Rayidka u guntato sidii ay kaalin mug leh uga
qaadan lahaayeen hanaanka dib u heshisiinta isla mar
ahaantaa ay la xisaabtamaan cid kasta oo ku howlan Nabadda,
Dib u Heshiisiinta iyo Horumarinta dalka.
- Waxaan DHALEECAYN culus
usoo jeedinaynaa dilalka iyo fal-dambiyeedyada lagula kaco
dadka rayidka ah ee aan waxba galabsan, kuwa u ololeeya
Nabadda iyo Xuquuqul Insaanka. Waxaan cambaaraynaynaa, si
wayna uga so horjeednaa in qof loo dilo ama loo dhibaateeyo
Haybta uu yahay, Fikirka uu aaminsanyahay iyo Shaqada ama
Hawsha uu bulshada u hayo, waxaan si gaar ah u
cambaareyneynaa dilkii naxariis darada ahaa ee loo geystey
marxuum Esse Abdi Esse - oo kaalin weyn kaga jirey Bulshada
Rayidka Soomaaliyeed.
- Waxaana beesha caalamka ka
CODSANAYNAA in ay Bulshada Rayadka Soomaaliyeed ku
taageeraan gudashada waajibaadkooda ku aadan Dhowrista
Xuquuqda Aadana, Dhisidda iyo soo celinta Nabadda, Dib u
Heshiisiinta iyo Dib u dhiska dalka, maadaama ay ka madax
banaan yihiin garabyada isku haya Siyaasadda Soomaaliya isla
markaana ay u taagan yihiin sare u qaadida wacyiga bulshada
ee ku aadan Nabadda, Maamul wanaaga, Wadatashiga, Dhowrista
Xuquuqda iyo Xoriyadaha Asaasiga ah ee qofka.
- Waxaan Bulshada Caalamka
ugu BAAQAYNAA in ay kaalmo deg deg ah la soo gaaraan dadka
ku tabaalaysan gudaha dalka gaar ahaan kuwa ku barakacay
dagaalada iyo colaadaha sokeeye ee ka jira Soomaaliya.
- Waxaan ugu HAMBALYAYNAYNAA
Maamulka Soomaliland guulaha uu ka soo hooyay dhinaca
Nabadda iyo Xasiloonida, anagoo ku dhiiri-gelinayna
Dowladda Ku-meel Gaarka ah in ay la furto wadahadal Nabadeed
oo ku dhisan is-faham iyo wada-xaajood.
Nabadbaa
Naruuro Iyo Horumar Leh
Bukhaari Maxamad Axmed
Xoghayaha Guud ee Xarunta Xoriyo
dheeg2002@hotmail.com
Faafin: April 1, 2007
|