Wararkii: Apr 21, 2007
- Deegaanka
Tortooroow Ee Gobolka Sh/hoose Oo Uu K a Dillaacey
Cudurka Shuban Biyoodku.
- Wadada Isku Xirta
Af-gooye Iyo Muqdisho Oo Ay Ciidamada Xukuumada Ethiopia
Xireen, xilli dambena dib u fureen
Deegaanka
Tortooroow Ee Gobolka Sh/hoose Oo Uu K a Dillaacey Cudurka
Shuban Biyoodku.
Deegaanka Toortooroow oo ka tirsan Degmada Awdheeglle ayaa
waxaa ka dilaacey shuban Biyood aad u daran, sida uu sheegey
mid ka mid ah dadka degan tuulada Caligublle oo ka tirsan
degaanka Toortooroow, Xasan Macallin Gaaboow oo nala soo
xiriirey ayaa sheegey in asbuucan Gudihiisa ay dhinteen dad
Gaaraya 20 qof oo iskugu jira dad waaweyn iyo Caruur.
Sidoo kale Xasan ayaa sheegey shuban biyoodku uu isku si ugu
dhacey dadka Tuulooyinka degan ee Beeraleyda iyo dadka Xoolo
dhaqatada ah,waxaa hadda cudurkaas la il daran dad gaaraya
40 qofood oo aan haysanin wax daawo ah oo lagu dabiibo,
waxayna daadsan yihiin tuulooyinka deg sisin, Mooyinoow,
dhaqane buulo jeeb iyo kuwo oo u dhow tuulada Caligublle.
Ninkan oo khadka talefoonka nagaala soo xiriirey ayaa dadka
Soomaaliyeed iyo hay’adaha samafalka ka codsadey in lala soo
gaaro kaalmo Daawo ah oo degdeg ah, wuxuuna ku calaacaley
inay dhamaadeen milankii fuuqbaxa celinaayey ee ay ka
gadanaayeen farmishiyeyaasha yaryar ee ku yaalla
Tuulooyinkooda.
Sidoo kale Xiriir aan la sammeeyney Toortooroow ayaa sidan
oo kale waxay ka cabanayaan shubanka badan ee dadka ku
laaynaya miyi iyo magaalo si isku mid ah,waxayna Hay’adaha
gargaarka ka codsadeen in lala soo gaaro kaalmo
Bani’aadanimo oo degdeg ah.
Sidoo kale waxaa shuban Biyoodkani saameyey tuulooyin badan
oo hoos taga Degmada Qoryooleey oo u dhow deegaannada Hoose
taga Toortooroow; horey ayaa shuban biyood aad u darani
wuxuu fara ba’an ku hayey dadka ku nool deegaannada Afgooye
iyo dhammaan Gobolka Shabeellada Hoose oo dhan,iyadoo wax ka
qabashada hay’adaha gargaarku ay yihiin kuwa aad gaabis u
ah.
Wadada Isku Xirta
Af-gooye Iyo Muqdisho Oo Ay Ciidamada Xukuumada Ethiopia
Xireen, xilli dambena dib u fureen .
Wadada isku xirta Muqdisho iyo Afgooye ayaa gabi ahaanba la
xiray subaxnimadii Jimcada, iyadoo aan loo ogolayn dhaq-
dhaqaaqa gawaarida isaga kala gooshi jirtay muqdisho iyo
gobolada ku xeeran ee isticmaali jiray wadadan iyo weliba
baabuurta gaarka loo leeyehayba
Arintan ayaa ka dhalatay ka dib markii maalinkii shalay
gelinkii dambe ay xeradii hore ee taliska ciidanka asluubta
soomaaliyeed uu ka dhacay qarax aad u xoogan islamrkaana
holaca iyo uuro qiiq ka samaysantay ay ka go,day halkaas oo
ay degan yihiin ciidamada ugu badan ee xukumada ethiopia iyo
weliba wadada isku xirta afgooye iyo muqdisho oo gaari Ural
ah oo ay lee yihiin ciidamada xukumada Ethiopia uu isna ku
qarxay.
Sidoo kale waxaa guud ahaanba istaagay Gaadiidka ka
howl-gala wadadaas isku xirta muqdisho iyo afgooye iyadoo
wadadaas lagu arkayo ciidamada xukumada ethiopia oo ku
hubaysan taangiyada dagaalka iyo hubka cul-culus.
Waxaa wararku tibaxeen in
dib loo furan mar dambe dib loo furay wadada isku xirta
Afgooye iyo Muqdisho.
Khamiistii galab gaabkeedii ayay ahayd markii qaraxan oo aan
ilaa iyo hada la ogayn waxa uu ka kacay ka dhacay xarunta
ugu weyn ee taliskii hore ee ciidanka aslubta soomaaliyeed
oo ay degan yihiin ciidamada ugu badan ee xukumada Ethiopia
islamrkaana uu qaraxani dhacay iyada oo ay xeradaasi
gelayeen xiligaas kolonyo baaburta ciidamada Ethiopia oo uu
qaraxaasi ka dhex kacay .
Lama oga Khasaaraha dhabta ah ee ka dhashay halkaas waloow
ay dad ka ag dhowaa halkaasi oo ay saxaafadu la xiriirtay ay
sheegeen in qaraxani uu ahaa mid weyn oo aan hore uga dhicin
caasimada muqdisho iyo agagaarkeeda islamrkaana loo
malaynayo inuu gaystay Khasaaro baaxad weyn taasoo xalay
ilaa shalay gaabkii qaraxa kadib ay baaburta wadadan
isticmaalayey ay ku xayirnaayeen halka qaarkoodna ay qarda
jeexeen wadooyin ka samaysmay gaadiidka loo isticmaalo
baadiyaha sida gaari dameerada iyo weliba raadka xoolaha
islamrkaana ay halkaas kaga talaabeen halka dadka qaarkiisna
ay lugtooda maaleen waloow ay dhibaatooyin badani kasoo
gaareen .
Dadka badaanaba gawaarida saaran ayaa badankoodu u badnaa
haweenka caruurtoodii kaga soo tegey deegaanada loo qaxay ee
ceeasha biyaha ,lafoole ,carbiska ,siinka dheer ,baar xaraf
iyo weliba meelo kale oo ay magaalada muqdisho usoo adeeg
doonteen islamrkaana ay xayiraada kala kulmeen tacadi xoog
badan oo ay qaarkood ahaayeen umulo caruurtoodu ay naaska
nugayaan.
yaasiin maxamed cali (faytin)
yaasiinfaytin@hotmail.com
Faafin:
SomaliTalk.com | April 21, 2007
Wararkii: Apr 20, 2007
-
Qarax lala beegsaday Xarun ay ku sugnaayeen Ciidamada Itoobiya
- Dagaal Xooggan oo
ka dhacay Muqdisho
- Gaari Militari oo
Laga Qarxiyey Ciidanka Itoobiya
Qarax lala beegsaday Xarun ay ku sugnaayeen Ciidamada Itoobiya
Dad goobjoogayaal ah ayaa sheegay in qarax gaari lala beegsaday xarun ay ku sugnaayeen ciidamo Itoobiyaan ah oo gaaraya boqolaal, xaruntaas oo ku taal cirirfka magaalada Muqdisho.
Axmed Maxamed Shardi, oo ah dareewal wadey
gaari bas ah, waxa uu sheegay in uu arkay in gaari ka dambeeyey uu ku leexday meel xarun u ah ciidamada Itoobiya oo 30 mile Koonfur ka xigta Muqdisho, kaddibna uu gaarigii qarxay.
"Qiiq badan ayaa aagga qariyey," ayuu yiri Axmed Maxamed Shardi oo khadka telefoonka kula hadlay hay'adda wararka ee AP, waxana uu intaas ku daray "Aniga iyo dadkii rakaabka ahaa ee baska saaraa waa argagaxney. Ma garanayn meel aan aadno."
Wararku waxa ay sheegeen in halkaas oo xarun u ahaan jirtey ciidamadii Qalabka sidey ee Soomaaliya 16 sano ka hor, in hadda gudeheeda sida caadiga ah ay ku xereedaan toban gaari oo ah nooca pickup ah oo ay saaran yihiin qoryo culus, waxa kale oo xaruntaasi
ay hadda ku qalabaysan tahay qoryaha uu ka dhaco hubka culusi, ayey tiri AP. [Waa
xaruntii
ciidanka Asluubta
Soomaaliyeed ee ku dhow Ex Control Afgooye.] Salaad Cali Jeelle oo ah ku xigeenka wasiirka Difaaca DFKMG waxa uu qaraxa gaariga ku eedeeyey Al-Qaeda, waxana uu sheegay in dadka dhintay ay yihiin oo keliya kuwii gaariga saarnaa. Laakiin Aljazeera waxay sheegtay in dad goobta
ka ag dhowaa ay arkayeen askar itoobiyaan ah oo dhaaca ah. Warka Aljzeera waxa uu intaas ku daray Boqolaal Itoobiyaan ah ayaa halkaasi xarun u tahay.
Dagaal Xooggan oo ka dhacay Muqdisho
Dhanka kale waxaa kale oo Khamiistii magaalada Muqdisho ka dhacay dagaal aad u culus oo aan si rasmi ah loo ogeyn inta dad ah ee ku dhintay.
Hay'adda AP waxay werisey in dagaalkii Khamiistii ee dhexmaray ciidamada Itoobiya iyo kooxaha Muqaawada in uguyaraan 12 qof ku dhinteen.
Axmed Warsame oo ah Ganacsade waxa uu sheegay in uu maqlayey madaafiic ku soo dhacaysey dhanka Koonfor-Galbeed ee Magaalada. Waxana uu intaas ku daray in uu
arkay siddeed qof oo meyd ah oo dariiqa yaal.
C/laahi Xasan Cali oo ah arday dhuigta Jaamacadda
waxa uu sheegay in madaafiic kusoo dhacayeen Guryaha dhanka Woqooyi-Bari ee magaalada Muqdisho. Waxana uu sheegay in uu afar meyd ah ku arkay hal guri.
Gaari Militari oo Laga
Qarxiyey Ciidanka Itoobiya
Dhanka kale waxaa qarax lala beegsaday gaari militari oo ay leeyihiin ciidamada Itoobiya oo marayey cirifka magaalada Muqdisho.
Qof joogey aagga gaariga lagu qarxiyey waxa uu sheegay in uu maqlay gaari Itoobiyaan ah oo qarxay kaddib markii uu dhaafay meel farmashiye ah. Gaarigaasi waxa uu ka mid ah labo gaari oo sidey ciidamo Itoobiyaan ah
oo kusii jeedey dhanka koonfureed ee Soomaaliya.
Yuusuf Cusmaan waxa uu sheegay in uu arkay gawaaridaas Itoobiya oo sii dhaqaaqaya,
laakiin daqiiqadoo gudahood waxa ay maqleen qarax, waxayna arkeen hal gaari oo holcaya. Waxana uu sheegay in uu u malaynayo in dhammaan askartii gaarigaas saaraa ay dhinteen.
Cali Xuseen Maxamed, oo dariiqa wax ku gada, waxa uu AP u sheegay in uu arkay 10 askari oo Itoobiyaan ah oo dhaawac ah oo dariiqa yaal.
Yuusuf Osmaan waxa uu sheegay in markii qaraxu dhacay
uu askartii saarnay gaariga labaad ee Itoobiyaan ahay rasaas ku fureen gaari bas
ah oo meesha marayey waxana uu sheegay in uu arkayey laba qof oo dhaawacmay, laakiin ma sheegi karin dadkii baskaas saaraa
in ay qaybi dhimatey iyo in kale.
Dhinaca kale ee magaalada qof hay'adda AFP waxay
sheegtay in qof ka ag dhowaa uu sheegay in siddeed qof ay dhinteen kaddib markii madfac ku dhacay meel boosteejo ah oo basaska laga raaco oo ku taal koonfurka magaalada.
Dagaalkii Bishii Maarso ee sannadkan ee ka dhacay
Muqdisho waxaa lagu qiyaasay in ay ku dhinteen 1,000 qof, sida ay sheegtay Aljazeera.
Hay'adda AP waxay sheegatay in ciidamada Itoobiya intii ay soo galeen Soomaaliya in ay dagaalada ku dhinteen boqolaal qof.
Hay'adda Qaramada Midoobey qaybta u qaabilsan
qaxootigu waxay sheegtay in ilaa bishii Febraayo ee sannadkan in Muqdisho ay ka qaxeen
dad lagu qiyaasay 200,000 oo qof.
Itoobiya oo Loo Sheegay in ay Soomaaliya ka baxdo,
haddii kale waxay la kulmi doontaa Dagaal aan hore loo arag
Sheikh Shariif, Sharif Xasan,
Xuseen Caydiid oo ka hadlayey shir saxaafadeed,
Casmara, Eritrea, Apr 18, 2007 |
Itoobiya waa in ay ka baxdo dalka Soomaaliya si degdeg ah
haddii kale waxay l akulmi doontaa "dagaal aan ciidan is hortaagi karin", waxaa digniintaas Arbacadii bixiyey saddex hoggaamiye Soomaaliyeed, sidaas waxaa warka ku bilowday hayadda AFP.
Saddexdaas hogaamiye waa xubin sare oo ka
mid ah Maxkamadaha Islaamiga Sheikh Shariif Sheikh Axmed, iyo Sharif Xasan Sh. Aaden guddomiyihii hore ee baarlamaanka DFKMG iyo Xuseen Caydiid oo jago ka haya Dawlada
FKMG ee Soomaaliya, kuwaas oo kulan ku yeeshay caasimada Eritrea.
Xuseen Caydiid waxa uu sheegay in Soomaalidu u midoobi doonto
ka soo horjeedsiga ciidamada Itoobitya ee ku jira Soomaaliya.
"Ilaa hadda waxaan isku deyeyney wadahadal in aan kaga saarno iyaga laakiin haddii ay wadashaqaynta diidaan... wax kasta dhinac ayaan dhigeynaa si aan Itoobiya annagu u saarno"
ayuu yiri Xuseen Caydiid oo warfidiyeenada la hadlayey.
"Boqolkiiba 10% wax ka yar oo ciidamadaya ah ayaa hadda la dagaalamaya Itoobiyaanka. Waxaan idiin sheegayaa in wax ciidan ah oo is hortaagi karaa aysan jirin waxa soo socda," Ayuu yiri Xuseen Caydiid.
|