McDonald’s oo u dabaal degtay sanad
guuradii 40-aad ee ka soo wareegatay Rootigii Sare u qaaday
Dhaqaaleheeda.
W/D: Yaxye Yuusuf Khasaaro
e-mail address:
yaxyekhasaaro@hotmail.com
Maalintii shalay ahayd ayaa
shirkadda weyn ee ku caanbaxday sameynta Cuntada Fudud ee laga
leeyahay dalka Mareykanka ee McDonald’s waxa ay u dabaal degtay
sanad guuradii 40-aad ee ka soo wareegtay markii ay si rasmi ah u
soo bandhigeen Rootiga weyn ee loogu magac daray “Big Mac” ee sabab
u ahaa sare u qaadidda magaca Shirkaddani.
Maqaayaddani ayaa waxaa la
aas-aasay 15-kii May 1940-kii, waxaana aas-aasay Laba Wiil oo
Walaallo ah oo lagu kala magacaabo Dick iyo Mac, waxaana xaruntii
ugu horreysay ee Maqaayaddani ay ka fureen magaallada San Bernardino
ee California, halka waxyaabihii lagu soo bandhigay Maqaayadaasina
ay ka mid ahaayeen Dooro Duban (Chicken), Rooti la dhex geliyay
Hilib caadi ah iyo Mid Doofaarba (Hamburger), Baradho la jar-jaray
isla markaana la kariyey, French Fries, Quraac iyo Cabitaan fudud.
Aas-aaseyaasha Baarkan aadka u
weyn waxa ay ku fikreen wax ay kaga duwanaan karaan Goobihii kale ee
lagu cunteyn jiray waqtigaasi, waxaana markii ay isku darsadeen
ra’yigooda u soo baxay in Rootiga ay ka gooyaan saddex qaybood, isla
markaana laba qaybood la dhex dhigo Hilib iyo khudaar, waxaana
rootigaasi ay u bixiyeen (Big Mac), halka Rootiga kale ee caadiga ah
ee shirkaddanina uu u jaran yahay laba Qaybood isla markaana dhexda
kaga jiro cad Hilib ah, waxaana loo bixiyay (Small Mac).
Muqddo sanad gudaheeda ayaa
shirkani waxa ay ku yeelatay magac aad u weyn gudaha dalka
Mareykanka, iyadoo ganacsigeedana markii dambe ka dhigtay mid weyn
oo ku faafa Adduunka oo dhan, waxaana hadda McDonald’s ay xarumo
gaaraya 31,000 ku leedah Dunida dacaladeeda, waxaana maalin walba
booqda xarumeheeda dad ka badan 54-Milyan oo macaamiisheeda ah.
Diana Brood oo ku hadlaysay magaca
Shirkadda McDonald’s Qaybteeda Chicago ayaa waxay tiri “Haa waa Run,
waxaan si weyn ugu kalsoonaanay Rootigani weyn (Big Mac) si uu u
kordhiyo dhaq-dhaqaaqeenna, run ahaantiina maanta waa shayga ugu
weyn ee shirkaddani soo geliyay dakhliga ugu faraha badan”.
Waxaa kordhay Xarumihii
shirkaddani iyadoo marba marka ka dambeysay Xarun cusub ka
furanaysay goob ka mid ah dalalka Caalamka, waxaana meel walba can
ka noqotay Astaanta shirkaddani iyo hal ku dhigeeda ah “I’m lovin’
it”, iyadoo Dhakhli sanadeedkii shirkaddani sanadkii 2005 lagu
qiyaasay 2.602-Billion oo Dollarm, sidoo kale shaqaaleheeda ayaa
iyana isla sanadkaasi lagu qiyaasay 447,000-shaqaale.
Dhinaca kale horumarka Shirkadda
cuntada iyo cabitaanka fudud ee McDonalds oo mararka qaar ka
tarjumaya qaab nololeedka dadka Reer Mareykan ayaa horumarkeeda
waxaa daba yaalla mar walba dhaliillo iyo cambaareyn fara badan oo
ka imaanaya dhinaca Warbaahinta, iyadoo maalintii shalay ahayd Dr.
Marion Nastel oo ah Macallin qaabilsan dhinaca Cuntada ee Jaamacadda
New York uu yiri “Haa, Big Mac aad buu u macaan yahay…, laakiin waa
in aanan hilmaamin in Rootigaasi gudihiisa laga helayo 30gm oo
waxyaabaha lagu cayilo ah, anigu mucaarad kuma ihi in ay dadku
cunaan Rootigani, laakiin waa in aan ka digtoonaanaa inaan joogteyno
cunistiisa”.
Aas-aaseyaasha Maqaayadda
McDonald’s ee kala ah Richard (Dick) oo dhashay February 16, 1909,
geeriyoodayna 14-kii July 1998-kii iyo Maurice oo isna magiciisa loo
soo gaabin jirey “Mac” waxa uu dhashay 26-kii November isagoo
geeriyooday 11-kii Bishii December1971-kii, waxaana ay asal ahaan
labadani nin ka soo jeedeen Magaallada Manchester, New Hampshire,
waxaana qoyskoodu oo asal ahaan ka soo jeeda Irish ah ay degaan
Scotland.
Geba-gebadiina baaritaanno fara
badan oo la sameeyay ayaa waxaa lagu ogaaday in Rootiga McDonald’s
uu sabab u yahay cayilka faraha badan ee shucuubta Dunida, haba ugu
badnaadeen kuwa Mareykanka, waxaana daraasad hore oo ay soo saareen
koox khubaro ah oo u dhalatay dalka Mareykanka ay ku soo bandhigeen
in Carruurtu ay yihiin kuwa ugu badan ee Rootigani uu saameynta
ballaarani ku yeeshay, iyadoo la sheegay in inta badan carruurta
Mareykanku cayilkoodu saa’id yahay waxaana la arkay carruur 10-jir
ah oo Culeyskoodu gaarayo 100kg ama ka badan yahay.
W/D: Yaxye Yuusuf Khasaaro
e-mail address:
yaxyekhasaaro@hotmail.com
yaxyekhasaaro@gmail.com