Shir ay isugu yimaadeen beelihii ku dagaallamay deegaanada Wabxo, Goobo iyo
Maxaas ee Xawaadle iyo Murusade oo go'aanno laga soo saaray
Shirkan oo lagu qabtay hotelka Naasahablood ee magaalada
Muqdisho ayaa waxaa ka soo qeyb galay in ka badan 50 xubnood oo ka kala socday
beelaha Murusade iyo Xawaadle.
Shirkan oo dabasocday shir hore loogu qabtay magaalada London ee
waddanka Ingiriiska oo ay soo qaban qaabisay jaaliyadaha ku dhaqan halkaasi ee
labada beelood ayaa labada beelood waxay wakiisheen min labo qof si ay uga
akhriyaan heshiiska ay isla gaareen labada dhinac.
qabashada shirkaan ayey gacan weyn ka geysteen jaaliyadaha ku
dhaqan caro ingiriis sida ay sheegeen qaarka tirsan qabanqaabiyayaasha shirka .
Shirkan ayaa waxaa codsaday in la qabto beesha Xawaadle, halka
beesha kale ee Murusade ay iyagu gogosha dhigtay.
Islow Daahir Cabdi Kulmiye Ugaas "Waxaan isugu yimid shir ka
dhacay Hoteelka Naasahablood ayaanu isugu nimid labadeena beelood ee Xawaadle
iyo Murusade annagoo ka wada hadalnay dagaalka ka dhacay gobollada Hiiraan iyo
Galgaduud qaasatan Maxaas iyo Wabxo, waxaan ku heshiinay labada beelood wixii
dhex mara in lagu dhameeyo wada hadal iyo maskax iyo caqli oo aan wax lagu
qeybsan xabbad iyo kala aargoosi" ayuu yiri Islow Daahir Cabdi Kulmiye Ugaas oo
ka socday beesha Murusade oo intaa raaciyay
"Waxaan ku heshiinay inaan shir deg-deg ah oo aan qaadan muddo
24 saac ka badan aan isugu nimaadno, oo aan dirno wafdigii aadi laheyd goobaha
ay dhibaatadu ka dhacday.
Dhanka kale Nabadoon Cismaan Afraxow Guure oo u hadlayay beesha
Xawaadle oo kulankaasi ka hadlay ayaa ku dheeraaday dhibaatada colaadda ah ee ka
dhex aloosan labada beelood ee walaalaha ah.
Nabadoon Cismaan Afraxow Guure "Anigoo ka tiiraanyaysan ka xun
waxaan u soo jeedinaynaa dadkaasi inay walaaloobaan hubkana iska dhigaan,
go'aannada aan gaarnay waxaa ka mid ah in sida ugu dhaqsiyaha badan xabadda loo
joojiyo, ciidamada laga kala qaado, in sida ugu dhaqsiyaha badan loo diro wafdi
labadaasi beelood xabadda joojinteeda iyo ciidamada kala qaadisteeda hubiya,
suga in sida ugu dhaqsiyaha badan loogu diro goobaha ay colaaduhu ka socdaan, in
labada beelood ee Murusade iyo Xawaadle sida ugu dhaqsiyaha badan ay dib isugu
soo laabtaan una diraan wafdiga halkaasi aadi lahaa" ayuu hadalkiisii ku soo
gabagabeeyay nabadoon Cismaan Afraxow Guure.
Intaa kaddib ayaa waxaa hadalkii qaatay Nabadoon Aadan Sheekh
Nuur Sheekh Maxamed (Aadan Qooje) oo sheegay inuu ayidsan tahay odayaasha ka
horreeyay wixii ay sheegeen dhammaan, ayna yihiin go'aan ay wada gaareen labada
dhinac, wuxuuna sheegay in loo wada dhan yahay baaqaas, isagoo u soo jeediyay
ummadda Soomaaliyeed iyo beesha caalamkaba inay taageeraan baaqaas iyo
wadahalkaas ay gaareen labada beelood,
sidoo kale waxa uu u soo jeediyay dadka walaalaha ee xidid iyo
walaalo ah inaysan dhiig dambe iska daadin oo ay wixii horena ka towbad keenaan,
inta dambena ka qoomameeyaan, isagoo u sheegay dadka labada beelood ku abtirsada
ee dibadaha jooga ee ka xumaaday ee mar walba na soo wacay waxaan u sheegaynaa
inaan qaadanay taladoodii, walaalaheena kalena aan u gudbineyno oo waqooyi jira,
annaga oo xamar joognana aan halkaasi u ambabixi doono mar dhow.
Waxaa sidoo kale halkaasi ka hadlay Nabadoon Max'ud Cali Nuur
(Dhagnaas) oo ah guddoomiyaha golaha dhaqanka ee beesha Xawaadle ayaa sheegay
inuu ku waafaqsan yahay baaqan iyo nabadeyntan labada beelood ay isla gaareen,
"Shirkan waxaa soo jeediyey beesha Xawaadle una soo jeediyay beesha Murusade
inay is arkaan maalinta Khamiista ee na soo dhaaftay, waxaana uga mahad
celinaynaa sida ay nooga aqbaleen,
waxaana maanta gogosha dhigay beesha Murusade" ayuu yiri
Nabadoon Maxamuud Cali Nuur (Dhagnaas) oo intaasi ku daray "Nimanka jaaliyadaha
ee dibadaha jira ee ka dhashay labada beelood ee isu tagay ee la hadlay meelihii
ay ka dhaceen dagaalada, annagana nala soo hadlay aad baan ugu hambalyaynaynaa,
waxaana ka ranaynaynaa inay meeshooda ka sii wadaan howsha ay u hayaan ummadda
ay ka dhasheen si arrintaasi loo dardargeliyo, annagana waxaan ku waafaqsanahay
lana diyaar nahay inaan si dhaqsi ah u baxno"
Dhanka kale waxa uu Nabadoon Max'ud Cali Nuur (Dhagnaas) sheegay
in dadka walaalaha ah ee deggan labada meelood ee ay wax ka dhaceen, walaalo
inay yihiin isu sheegi mayno, waan soo soconaa, odayaalna waa leedihiin, aqoonna
waa leedihiin, wixii dhacayna waad ka qoomamaynaysiin, aan isa soo gaarno, dhib
dambe yuusan dhicin, ciidanka ha la kala qaado, ka bacdi markaan isu nimaadno oo
aan goob xaarano, geesna fariisano ayaa laysu sheegi doonaa wixii eed la kala
qabo, "waxaan idiinka codsanaynaa inaad nagu sintaan sii qabataan, sii
dedejidaan nabad gelyada heegan gelisaan" ayuu ku soo gabagabeeyay hadalkiisa
Nabadoon Maxamuud Cali Nuur (Dhagnaas).
Shirkan ayaa waxaa laga soo saaray baaq nabadeed oo ku aaddan
heshiis ay isla gaareen labada beelood maanta oo ay taariikhdu tahay 26/08/2007
ayaa waxaa shir isugu yimid hotelka Naasahablood ee magaalada Muqdisho xubno ka
tirsan beelaha Murusade iyo Xawaadle oo dhowaan dagaal qaraar uu ku dhex maray
deegaannada Wabxo, Goobo iyo Maxaas.
Labada beelood ayaa soo wakiishay min 25 xubnood oo isugu jira
odayaal iyo waxgarad ka socda labada beelood oo ay colaaddu horay ugu dhex
martay gobollada Hiiraan iyo Galgaduud gaar ahaan deegaanada Wabxo iyo Maxaas,
waxayna isku waafaqeen qodobada soo socda:
1. In si degdeg ah xabbadda loo joojiyo, lana kala qaado
labada ciidan ee is horfadhiya.
2. In si degdeg ah loo diro odayaal iyo waxgarad guddi
ah, iyagoo kaashanaya waxgaradka deegaanadaas.
3. In wada hadal lagu dhameeyo wixii khilaaf ah ee jira.
4. In ay shir degdeg ah isugu yimaadaan waxgaradka si ay
u ambaqaadaan guddiyadii u bixi lahaa deegaanadaas.
Baaqa waxaa soo wada jeeday dhinaca Xawaadle Islaan Daahir Cabdi
Kulmiye, Nabadoon Cismaan Afraxow Guure halka dhinaca Murusadena ay ka soo
jeediyeen Islow Daahir Cabdi Kulmiye Ugaas iyo Caaqil Aadan Sheekh Nuur (Qooje)
Xubnihii ka soo qeyb galay ayaa waxay kala ahaayeen dhinaca
Murusade
-
1. Maxamed Nuur Gacal
-
2. Sheekh Max'ed sheekh Axmed (kashka)
-
3. Max'ed Axmed Yalaxow
-
4. C/laahi Axmed Garabey
-
5. Aadan Sheekh Nuur (Qooje)
-
6. Max'ed Cali Jimcaale
-
7. Cabdi Maxamed Maxamuud
-
8. Sheekh Cali Yuusuf Sabriye (Gacamey)
-
9. Axmed Cilmi Maxamed
-
10. Islow Daahir Cabdi Kulmiye Ugaas
-
11. C/laahi Axmed Saruurow
-
12. Cali C/laahi Xayle
-
13. C/laahi Ibraahim Dhagey
-
14. Nabadoon Ibraahim Fagaareeye
Halka beesha Xawaadle ay ka mid ahaayeen:
-
1. Maxamuud Dhaqane Nuur
-
2. Nabadoon Cismaan Afrax Guure
-
3. Maxamuud Axmed Xashow
-
4. Xasan Sh. Ibraahim
-
5. Cilmi Takar Barre
-
6. Siyaad Aadan Ibraahim
-
7. C/laahi Dhimbil Warsame
-
8. Xuseen Cadow Cali
-
9. Ibraahim Guure Cali
-
10. Xaamud Guure Kulmiye
-
11. Cismaan Nuunow Guure
-
12. C/laahi Caddow Bulaale
Faafin: SomaliTalk.com | Aug
28, 2007