Haatuf            

2007-01-31 Borlänge, Sweden 

Waxaa tiriyay

Mohamed-Deeq Abadi-madar ”Haldhaa” 

haldhaa35@hotmail.com

---

Maansadan waxaan tiriyay 31kii janaayo 2007. Sababtuna waxay ahayd waxaa isoo wacay 28kii janaayo sanadkan 2007 nin ananu saaxiibbo nahay, lakaiin ananu arrimaha siyaassada ku kala aragti duwanahay. Wuxuu igu yiri taniyo markii aakhirkii desember laga saaray muqisho iyo koonfurta Soomaaliya Maxaakiimtii Islaamka, wax wara waa lagaa waayay oo maqaaladdii iyo weerarkii kululaa ee ada Itoobiya ku qaadi jirtay, waa lagaa waayay ee maxa akugu dhacay.

Isagu wuxuu igu durayay in ay dani i aamusisay oo haddii qoladii aan ka soo horjeeday ay xoog ku qabsadeen Soomaaliya. Waliba in ana cabsaday oo ay cabsi i aamusiisay. Wuxuuna u arkayay in aan ku qasbanahay in aan hadda taageero ama aan isaga aamuso ceebayntooda.

Waxaan ku iri;- saaxiib sidada wax u fahantay maahan. Anigu markii horaba waxaan taageerayay jiritaanka Soomaaliyeed. Waxaana ka soo horjeeday Xabshi iyo cid kastoo aan jeclayn jiritaanka iyo midnimada Soomaaliyeed.

Runtii kumuusan qancin. Laakiin waxaa markiiba igu soo dhacay maansadan. Markaas ayaana qalinka u qaatay. Marka akhriste adna ila arag dareenkayga. 

1. Raggii uu hareedku
2. Haaneedka u fuulay
3. Markay hab cadeenee
4. Hilfaha loo qaaday
5. Xamar ka huleeleen
6. Darbaa nafta hiifay
7. Ka haayiray guusha
8. Ilaahay hodanaa
9. Inuu hagranaayo
10. Haabka ku qaatay
11.  
12. Anoo harsanaaya
13. Hareer gurigayga
14. Haatuf nin sheegay
15. Wuxuu yiri hoogtay
16. Ninkii hebel maatid
17. Maxaa ku haleelay
18.  
19. Haldhaa lagu waayee
20. Heeso qoraalka
21. Hooyaalada maanso
22. Heelada jiibta
23. Waxaad hurgufaysay
24. Maxaa helay maanta
25.  
26. Waxaan iri haaka
27. Miyaanan hawaasoow
28. Deyrtii horeeto
29. Adoo harka jooga
30. Hagoogtay go’aaga
31. Luqunta hogaanshay
32. Afkaa ka hadlaynin
33. Habaasku ku aasay
34. Intaan hab  kusiiyay
35. Hayinka ku saarin?!
36.  
37. Miyaanan halgaadda
38. Axmaar hardankiisa
39. Intaan hooto tuuray
40. Halboowlaha gooynin?!
41.  
42. Miyaan hiddidiida
43. Melez habareeyga
44. Huurada qurmuun leh
45. Intaan hargo waaxay
46. Ka soo qubin hoorta?!
47.  
48. Miyaanan horseedka
49. Heeraha guuray
50. Halkuu naqu yaalo
51. U sii hor kacaynin?!
52.  
53. Miyaanan hayaanka
54. Beesha hugmays
55. Habeynkii gudaysa
56. Hangoolka u jiidin?!
57.  
58. Miyaanan haboowga
59. Hayjad anbanaaya
60. Hillinka aqoonin
61. Intoow gacan haadshay
62. Haloosiga keenin?!
63.  
64. Miyaanan horweynta
65. Haleelo irmaanta
66. Hashayda Cadduura
67. Haaneed lisiddeeda
68. Haruubka ka buuxsan?!
69.  
70. Miyaanan habsaanka
71. Hurdada ku raagay
72. Hawshiina ka daahay
73. Inta hoonka yeershay
74. Hanbaabirka toosin?!
75.  
76. Miyuusan hadhiinka
77. Dheemman ku haysta
78. Hareerta isbigga
79. Karaawil u hiilin?!
80.  
81. Miyaanan hadimo
82. Hoggaa la qodaayo
83. Dadkayga ku hoobtay
84. Intaan hor istaagay
85. Hareer uga leexin?!
86.  
87. Miyaanan herdida
88. Haraati lugeedka
89. Tigree hiijo qaaday
90. Inta god ku huurshay
91. Ku heerin dagaalka?!
92.  
93. Miyaanan heybta
94. Qabiil isku hiifka
95. Hilib u colloowga
96. Waryaa hakiyaayda
97. Intaas ku harraadin?!
98.  
99. Miyaanan hillaada
100. Dadkaa la hafraayo
101. Dawladda haysan
102. Anoon hagranaynin
103. Hareerta ka joogsan?!
104.  
105. Miyaanan hugunka
106. Hirkaa sare gaaray
107. Anoon xil ka haynin
108. U sii hunguryoonin?!  
109.  
110. Miyaanan hadeerto
111. Haddaayay shalayto
112. Markii had kastaaba
113. Ninkii la hallaago
114. U hiillin aqoonin?!
115.  
116. Miyaanan hayaayda
117. Colkaas la horjoogo
118. Intaan rag hubeeyo
119. Hawser la qaadan?!
120.  
121. Miyaanan hillaaca
122. Dhankaa bari hooray
123. Harooyin biyoobay
124. Dadkaygaan harraadsan
125. Haamaha u aroorin?!
126.  
127. Miyaysan hiloowga
128. Dhulkii aabbe hooyo
129. Ka soo hijro dhoofay
130. Laabtu ii huraynin?!
131.  
132. Miyaanan higgaada
133. Carruurta hadaaqa
134. “H” “W” iyo siinka
135. Intaan hadh galbeedka
136. Looxa hareeri
137. Anqaasta hadiga
138. Ka so hil-hillootay
139. Qur’aanka aan hoorshay
140. Hagaag ugu sheegin?!
141.  
142. Anoon hadalkiiba
143. Wax saasa hanbeynin
144. Wuxuu hiyigaygu
145. Laabta ku haayo
146. Halkaan wax la  doono
147. Anigoon hallaynin
148. Rabaa ii hagaajin.

Mohamed-Deeq Abadi-madar ”Haldhaa” 
Borlänge, Sweden
haldhaa35@hotmail.com

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | Feb 2, 207