Wararkii: July 31, 2007
-
Cali Max’ed Geedi
oo muujiyey in uu kalsooni weyn ku qabo Xidhibanaada
Baarlamaanka
-
Iska hor imaad
ciidamada Dowladda ku dhex maray Laanta Buuro
-
Magacyada xulka
qaranka 17-ka jirka Soomaaliyeed
-
Wabar C/llaahi
Orey “Beesha Cayr kama qaybgalin shirka dib u heshisiinta
qaranka”
-
Siminaar
saxafiyiin ka kala socotay gobalada dalka uga furmay Naasa
hablood
Cali Max’ed Geedi oo muujiyey in uu
kalsooni weyn ku qabo Xidhibanaada Baarlamaanka
Wararka ka imaanaya
Magaalada Baydhabo waxay sheegayaan in Ra’isul Wasaaraha DFKMG Cali
Max’ed Geedi uu kalsooni ka heli doono kulanka Xildhibaanada
Baarlamaanka ee haatan ka socda Magaalada Baydhabo. Saacadihii ugu
dambeeyey ayaa Ra’isul Wasaaraha DFKMG Geedi sameeyey dadaalkii ugu
badnaa isagoo kulamo la yeeshay inta badan xildhibaanada
Baarlamaanka oo qaarkood u ballanqaaday in ay codsiga kalsoonida
siin doonaan. Geedi waxa kale oo uu kulan la qaatay Gdudoomiyaha
Baarlamaanka Sheekh Aadan Max’ed Nuur (Sheekh Aadan Madoobe), waxa
uuna kulankaasi qaatay mudo dhowr saacadood ah, waxaana Geedi la
arkayey isaga oo ay ka muuqato farxad iyo reynreyn.
Warar ayaa waxay sheegayaan in Ra’isul
Wasaaraha DFKMG Geedi uu taageero badan ka helayo Xildhibaanada
Baarlamaanka, hase yeeshee warar ka imaanaya Baydhabo waxay
sheegayaan in laga yaabo in wax xoogaa ciriir ah kala kulmo dhinaca
tirada xildhibaanada gaar ahaan codka loo baahan yahay. Ra’isul
Wasaaraha DFKMG Geedi oo shalay kulamo isdaba joog ah ka dhacayeen
hoyga uu ka degan yahay Magaalada Baydhab ayaa waxaa la filayaa in
maanta Ra’isul Wasaaruhu hor tago kulanka Baarlamaanka si uu
halkaasi uga jeediyo waxqabadkii Dowladda Federaalka.
Xildhibaan Muuse Suudi Yalaxow ayaa mar
uu ka hadlay Baarlamaanka waxa uu sheegay in waqtigaan aan loo
baahneyn in lala xisaabtamo Xukuumadda, hase yeeshee Cabdi Cabdulle
Siciid Jini Boqor ayaa qaba in haatan ay tahay waqtigii ugu fiicnaaa
ee loo baahan yahay in si cad loola xisaabtamo Dowladda uu madaxda
ka yahay Ra’isul Wasaaraha DFKMG Geedi. Xildhibaanada Baarlamaanka
ayaa la sheegay in midkiiba la siiyey lacag dhan 4-kun oo Doolar,
lacagtaas oo la sheegay in ay tahay mid mudo badan ka maqneyd
Baarlamaanka, waxaana la arkayey Xildhibaanada Baarlamaanka oo iska
bixinaya daymankii lagu lahaa intii ay joogeen Baydhabo.
Ra’isul Wasaarre Geedi ayaa dhowr jeer
ka badbaaday in Xukuumaddiisu kalsooni weyso, balse haatan ayaa dad
badani saadaalinayaan in Xukuumadda Geedi ay kalsooni ka heli karto
Baarlamaanka, iyadoo uusan meesha ka marneyn dadaalka ay Dowladda
Itoobiya taageerada ugu fidinayaan Dowladda, kadib markii Geedi iyo
Melez Zenawi isla qaadeen sidii loo dhameyn lahaa khilaafka u
dhexeeya xukuumaddiisa iyo Baarlamaanka.
Iska hor imaad ciidamada Dowladda ku
dhex maray Laanta Buuro
Wararka naga soo Gaaraya
Laanta Buuro ee Gobalka Sh/hosoe waxay sheegayaan in maalintii
shalay ahayd halkaasi uu ka dhacay iska hor imaad aad u xoogan oo la
isku adeegsaday hubka noocyadiisa kala duwa, waxa uuna iska hor
imaadkaasi u dhexeeyey ciidamo ka wada tirsan Dowladda Federaalka oo
ku wada xareysnaa xeradaasi.
Wararka ayaa waxay
sheegayaan in dagaalkaasi uu ku geeriyooday askari ka tirsan
Dowladda Federaalka , halka ay lix kalana ku dhaawacmeen.
Warar kala duwan ayaa ka
soo baxay waxa dhaliyey iska hor imaadkaasi, qaar waxay sheegayaan
in uu ka dhashay askari lagu dilay habeen hore xeradaasi, warar kale
ayaa waxay sheegayaan in iska hor imaadkaasi uu ka dhashay markii ay
ciidamadu u kala qaybsameen kuwii horey ugu suganaa xeradaasi iyo
kuwo laga keenay Garoonka Balidoogle.
Ma ahan markii ugu
horeysay oo ciidamo ka tirsan Dowladda Federaalka uu iska hor imaad
dhex maro, dhawaan ayay ahayd markii Magaalada Muqdisho iska hor
imaad dhex maray ciidanka Booliiska iyo kuwa Milatariga markii ay
isqoomeen.
Dhinaca kale ciidamo ku
jiray xerada Carmo oo ka tirsan maamul Gobaleedka Puntland ayaa
iyana halkaasi ka sameeyey gadood, kadib markii ay ka cabdeen
daryeel la’aan iyo mushaar la’aan.
Magacyada xulka qaranka 17-ka jirka
Soomaaliyeed
Iyadoo xulka qaranka
Soomaaliya ee da’doodu ka hooseyso 17-ka bisha soo socota uu ka
qaybgalayo tartanka xulalka qaranka ee bariga iyo bartamaha Afrika
ee da’doodu ka hooseyso 17-ka ayaa waxaa xulkaasi maalmahan u socday
tababar xoog leh, waxaana tababarkaasi siinayey tababare Max’ed
Cabdulle Faraye, waxa uuna aakhiritaankii soo xulay ilaa iyo 27
cayaartooy, iyadoo markii hore ka koobnaa ilaa iyo 35 cayaartooy,
waxaana la filayaa in 27-kaan laga sii xulo ilaa iyo 20 cayaartooy
oo si rasmi ah uga qaybgaleysa tartankaasi, cayaartooyda la xuleyna
waxay magacyadooda kala yihiin.
Tahliil Maxamuud Max’ed,
siciid Max’ed Sheekh Bootaale, Khaalid Cali Mursal, Xasan Cabdi
Max’ed, C/maalik Shariif Cali, Muxiyadiin Axmed Max’ed, Max’ed
Xaashi Siyaad (Duufaan), Qaasim Siidow Xuseen (Baaruud), Ibraahim
Axmed Jamadaar, Bardi Axmed Macallin, C/raxmaan Max’ed Maleele,
Anwar Saadaal Ibraahim Max’ed Cabdi Cayr, Nuune Cabdi Abtidoone,
Max’ed Xasan Kaahin (Wardi), C/wali C/qaadir Barre (Jakay), Saacid
Jilicow Xuseen, C/casiis Max’ed Cali, Anwar Macallin Aadan, C/waaxid
Max’ed Mahad, C/llaahi Yuusuf Cusmaan, Saadaq Caraaye Siyaad,
C/raxmaan Muuse Weheliye, Tahliil Xasan Cali, C/kariin Abuukar Nuur,
C/raxamaan Cali C/raxmaan.
Wabar C/llaahi Orey “Beesha Cayr kama
qaybgalin shirka dib u heshisiinta qaranka”
Qoraal uu na soo
gaarsiiyey Wabarka Beesha Cayr Wabar C/llaahi Orey Caraale ayaa waxa
uu daboolka ka qaaday in shirka dib u heshiisiinta Beelaha
Soomaaliyeed aysan beesha Cayr ergo u dirsan, isla markaana kuwa ka
qaybgalaya ay ka qaybgalaya ay yihiin kuwo isgood u tagay, isagoo
sheegay in wixii ka soo baxay aysan quseyn Beesha Cayr sax iyo qalad
midna.
“waxaan maqalnaa iyadoo
dad shirka jooga leeyihiin waxaana la xiriirnay Ugaas Xasan Ugaas
Max’ed ‘Ugaaska Beesha Cayar’, waxaana soo ogaaday in warkaasi uu
yahay waxba kama jiraan” ayuu yiri Wabar C/llaahi Orey oo ku soo
gebagabeeyey qoraalkiisa “Beeshu shirkaasi waxay u aragtaa 20-shilin
oo loo niyeestay 2-kun”
Qaar ka mid ah Beelaha
Soomaaliyeed ayaan ku qanacsaneyn qaabka uu u socdo shirka dib u
heshiisiinta Soomaliyeed, waxayna qaarkood sheegeen in shirkaasi aan
loo dhameyn, hase yeeshee Guddoomiyaha Shirka Cali Mahdi Max’ed ayaa
waxa uu sheegay in ergeyda ka qaybgaleysa shirka tiradoodu ay ku
gordhiyeen isagoo sheegay in taasi ugu wacan tahay sidii loo qancin
lahaa beelaha Soomaaliyeed
Siminaar saxafiyiin ka kala socotay
gobalada dalka uga furmay Naasa hablood
Waxaa shalay Hoteelka
Naasa-Hablood ee Magaalada Muqdisho saxafiyiin ka kala socotay
qaybaha kala duwan ee Warbaahinta Gobalada Soomaaliya uga furmay
simaar loogu magac daray ‘Saxaafadda dareesan Shaqooyinka” iyo
waliba sidii loo xalin lahaa Jawareerka dhanka saxaafadda.
Siminaarkaan ayaa waxaa
soo qabanqaabiyey Hay’adda Eastern Africa Media Institute (EAMi-
Somali Chapter), waxaana maalgelinayey Hay’adaha USAID iyo CARE,
waxaana cashiro ku aadan maareynta shaqaaqoyinka halkaasi ka bixiyey
Macallin C/qaadir Maxamuud Walaayo oo ah guddoomiyaha Hay’adda
EAMIs, waxa uuna si aad ah ugu dheeraaday waxyaabaha keena
shaqaaqooyinka, doorka ay saxaafaddu ku yeelan karto shaqaaqo meel
ka dhacday iyo waliba qaybta saxaafadda kaga aadan xalinta
khilaafaadkaasi, waxa uuna sheegay Macallin Walaayo in looga baahan
yahay Weriyaha in qalabkiis warbaahineeda u isticmaalo heer nabadeed
iyo waliba ka talinta horumarka dhan kasta, waxa uuna sheegay in
weriyaha looga baahana yahay in uu noqdo mid aan cabsan xaqiiqda
runta ahna gudbin kara, isagoo yiri “haddii aad ubax dooneysid in
aad ka dhex goosato meel qodxo badan, ha kaga baqanin qodoxda ee
ubaxa gooso”. Siminaarkaan ayaa waxa uu soconayaa mudo shan maalmood
ah, waxa uuna shalay halheyska siminaarku ahaa (Intii aad noqon
lahayd qofka ugu horeeya ee qaldan, noqo midka labaad ee saxsan”
W/D; Amiin Yuusuf
Khasaaro.
E-Mail:
amiinkhasaaro@hotmail.com
Faafin: SomaliTalk.com | July 30, 2007