GABAY::: AADAN CABDULLE CUSMAAN

SICIID SH CUMAR…..
siciid71@yahoo.com

INNAA LILLAAHI WA INAA ILEYHI RAAJICUUN.
KULLU NAFSIN DAA’IQATUL MOWD. 

BISMILLAAHI RAXMAANI RAXIIM, KAHOR INTAANAN U GUDA-GALIN GUNDHIGGA MAQAALKA, WAXAAN MARKA HORE JECELAHAY INAAN UMMADDA SOOMAALIYEED UGA TACSIYEEYO, GUUD AHAAN IYO GAAR AHAANBA, GEERIDII KU TIMID AABBEHEENNII IYO MADAXWEYNEHEENNII HORE AADAN CABDULLE CUSMAAN. 

Waxba ka sheekeyn uma baahna Aadan Cabdulle, oo wuxuu ahaa madaxweyneheennii koowaad.  Balse waxaa asaga ka duwaayo madaxda kale ee Afrikaanka ah_ kadib marka laga soo tago waxqabadkiisii muddadii uu madaxweynaha ahaa_ waa madaxweynaha kaliya ee doorasho xilka ku qabtay hogaamiyennimada, ugana degay.  Taasoo ay u sii dheer tahay inuu si muwaaddininnimo leh kadib markii uu xilka ka degay ugu sii noolaaday waddanka waardiye la’aan, taasoo muujinaysa ama la dhihi karo waa nin aan cidna eel ka galin intii uu xilhayaha ahaa. 

Waxaan ka xasuustaa oo ay dadka taariikhdiisa aruuriya yiraahdeen, in la arkay asagoo maalin saf ugu jira bangiga dhexe ee soomaaliya, kadibna ay gabadhii bangiga u shaqeynaysay ka aqoonsatay halkii danbe ee uu safka uga jiray, markaasay waxay dadkii u sheegtay in la soo gudbiyo madaxweynaha oo safka laga soo saaro si looga hormariyo dadka, balse, uu diiday yirina “waxaan ku faraxsanahay inaan dadkeyga la mid ahaado, kana mid ahaado”.  

Mar labaad, waxaan ummadda Soomaaliyeed uga tacsiyeynaayaa geeridii naxdinta lahayd ee ku timid madaxweyneheennii hore ee Soomaaliya, gaar ahaanna reerkiisii iyo xigtadiisa kuwa dhow iyo kuwa fogba, waxaanna leeyahay, ALLAHA IDINKA SABARSIIYO, ASAGANA JANNADII FARDOWSO ALLAHA KA WARAABIYO…AAMIIN.  

Intaas kadib, waxaa dhacday muddo ku dhowaad saddex bilood laga joogo ayaa waxaa Ilaahay I haleeshiiyay inaan abwaan ka mida abwaaniinta Soomaaliyeed oo la yiraahdo Maxammad Gacal Xaayoow ka codsado inuu noo tiriyo gabay ku saabsan Aadan Cabdulle Cusmaan, anigoo aan soomaalinnimo ka sokow wax xiriir ah oo gaar ahi inoo dhexeyn Allaha u naxariistee madaxweynaha, isla mar- ahaantaasna aan wax war ah ka hayn meesha iyo xaaladda caafimaad ee uu ku sugan yahay, taasoo uun iga ahayd xushmad iyo tabid aan tabay madaxweyne sidiisoo kale ah ama hoggaamiyeba.  Waxaana ilaahay mahaddiis ah in uu abwaanku iga yeelay, fuliyayna, dhowr maalmood kadibna annagoo waliba ku kala nool labo qaaradood aan ka helay gabaygaan.  Waana kan Maxammad Gacal Xaayoow oo inoo tiriya gabaygii……. 

AADAN CABDULLE CUSMAAN 

1. Afrikana nin doorka u dhashee dib u xusuus dheere
2. Yay ku dagan dabeylaha is baddala door ku soo maraye
3. Dadku kugu yaboohaad siddaa duhur dharaareede
4. Dusha ku xijiyaan damac hunguri daaqad kaa ridine
5. Dadaal muuji duul baraka qaba waa u darartaahe
6. Ha ku deeqo Aadan Cabdulloow dalagga beertaadu
7. Dallacaadda iimaanka iyo laabta daahirahe
8. Daa’in kugu yaboohaa danbigi daafta kaa mariye.
9.  
10. Dafe boobta ma ahayn bangiga daynna ka amaahde
11. Door shariifahaad uga jirtaa dulucda taariikhda’e
12. Diiwaanka qarankana ku qoran dacalka koobaade
13. Dadka iyo dalkaba waxaa anfaca geesi daacadahe
14. Damaashaadka Luuliyo bishii loo dabbaaldegayay
15. Bishii laysku daray labadii calan dayaxi soo baxaye
16. Dubka saarnaye Aadan Cabdullaan dayro ka imaane
17. Daldallaansi baa jiray ragbaa dacar abuuraaye.
18.  
19. Dagaal laguma dayin doorashay uga lib dooneene
20. Markow todobo daawoo is xigay deyr walbo u jiiray
21. Gobannimadi lagu diirsadoow deebta ka afuufay
22. Haddii doonnigoow waday nin kale dacaygi loo dhiibe
23. Daadka raacay dibutaatiyaal diiddan baa helaye
24. Doorashadi ku dhacay waa ka degay siima dabageline
25. Dadaalkiisi waa loo darsaday waana dagi wayday
26. Dariiqaan rabnaan mari jirnaya nabad ku daanyoosho
27. Gabbalkeedi goortow dam yiri waa la kala dudaye.
28.  
29. Darajiyo ammaan nimaan lahayn uma ducaynayne
30. Daryeelkaadi Aadan Cabdulloow inaan ku deelqaafne
31. Ku dudurinne doqonkaaba oge doobbogoray weeye
32. Dibusocod dabbiyo xeel bartaye jeelka kuu diraya
33. Kii ka daba dukaayiyo asagu wax isma doorshaane
34. Afrikana wax u daran ma’oga iyo waxuu danehe
35. Daa’inkaan wixii laga dalbado deyn ku jirihayne
36. Dallaallaale iyo caafimaad inow ku deeqsiiyo
37. Dinbidhaafna kuu raaciyaa duco sokeeyaahe
38. Diintaad ku kala duwan tihiin duqa Mandeellaahe
39. Dadnimadase ways kala egtihiin libin u doodkaahe.
40.  
41. Dacwo furan nin doorkaan dibdhigin dowga ku habboone
42. Damiinkaan waxgaran looma diro xaajo dalableeye
43. Nin doolaalo dheer doonbirkow dabin ku arkaahe
44. Dalka u-gaara Aadan Cabdulliyo duulka kala haysta
45. Diiwaanka Unadoow ku qoray damac nin waayeele
46. Aqoon lagu dabbaqay waa dugsigi macallinka kuu doore
47. Darsigiisa kuu meeriyee qalin dawaaddiisu
48. Daruurta u egtahay kuugu qoraad dib ugu aaydaahe
49. Dagaalyahanka Aadan Cabdullaa howl ku-dayasho lehe
50. Dadka lagu dawaadshoow na baray waa la daafmaraye.
51.  
52. Dalka Xamarya Daafeedya Cigo daginka Boosaaso
53. Dooloow iyo Wajeer iyo ku dare daginka Ceelwaaqe
54. Dooxada Lughayiyo dushaan Saaxil ka aqaanno
55. Damalse buur ku yaal geedahow ugu da’weyn yahaye
56. Daafaha Wajaalana dadkii aniga igu hayste
57. Daandaansi igu maagayee hawadu doojayso
58. Dabeyshana ku liitoow intaan doontu kula ciirin
59. Soo dardaaran tiri Aadanoow duubay gogoshiiye
60. Duq ribeeyay doqon quursataa waa ku dagantaahe
61. Dakaddaa Jabuutina diggool inow ku daanshoodo
62. Dib u haysto Aadan Cabdulloow kaama daadagine.
63.  
64. Gabar timaha dabataye xarrago doc ula liiceeyda
65. Duuduubna laysugu tidcaye deelka loo simaye
66. Hadday dagato duudkiyo garbaha daah u noqonayda
67. Daymo aragtideedana sidii ubaxi deyreeda
68. Ku diirsaday cadceed kulul u egee baal dillaacsadaye
69. Oon dagdagine duunyada markay subax dareeraydo
70. Dooxa roob ku da’ay iyo markay dahan ku oodqaadde
71. Doog iyo naq lagu soofiyeey darar ka maashaahe
72. Hadday darata haaydiyo haddii weer dugdhabadeeyo
73. Gabar diris u haasaaw taqaan kama difaacdeene
74. Darrooriyo Awaariyo degmaday ariga daajaydo
75. Dadka kama dhexeydee dalkay joogto anigaa leh
76. Dooddeeda Aadan Cabdullaa daaqadda u furaye
77. Dushaan kala wareegee iska daa waa war doqoneede.
78.  
79. Doonniga hartiya owr dikane dabar ku seetaysan
80. Ee dowda loo wabax naqee duhato jiilaala
81. Afar gocayo loo kala dajiyee wiil dibjira dhaansho
82. Doobbadana labo daan ka ridee biyaha daabbulaya
83. Degmadoow ka guuxiyo dalkoow joogo anigaa leh
84. Afrikana wax iiguma darroo diinta iyo dhaqanka
85. Duulaan isugu soo dhawaan dumarna kala guursan
86. Dagalkiisa nimaan sheega karin iyo dadka u jooga
87. Dufu waa ku taal dabo kurteed loogu darimaahe
88. Nin-door waaye Aadan Cabdullee wayska daafmaraye.
89.  
90. Dugsi macallimoow leeyahaye inow ka diinqaado
91. Dadaalkiisu nimoow seejiyee doorasho u taagan
92. Ayadoo dahsoon Aadanoow dacayo baarkaagi
93. Nin ku diimayaa maalintaa dibadda soo bixiday
94. Dacayga uga bidayoo ku kacay dayro ololkeedi
95. Nin-darraagu waxow soo dumeey doqontu boobtaahe
96. Dan how galine Aadan Cabdulloow dowladnimadeyni
97. Adigoow dagaalayoo ka diray doob-candhoolihiye
98. Dalluuntoow gumeysigu ku riday duhur ka-soosaare
99. Daacaddii garsoorkiyo la waay dood caddaaladahe
100. Dulmanuhu xaqiisii ku helay duudsan laga yeele
101. Dadku kuma illoobine ducaan kugu yaboohnaahe
102. Daa’inkeey ha kaa wada hodmiyo labada daaroode.

AAMIIN.....AAMIIN…..AAMIIN…..AAMIIN…..AAMIIN…..

diyaariye

SICIID SH CUMAR…..
siciid71@yahoo.com

Afeef: Aragtida qoraalkan waxaa leh qoraaga ku saxiixan