Gabay Uganda sug
Umada Soomaaliyeed
marna kama aysan liidan waqtigan imika lagu jiro,
cadeyn waxaa kaaga filan marka ay tiri xalkeygu
ciidan Uganda ka yimid baa hayee ayaga ha lasugo;
dee meel ciidan ugaandheys ah xal laga sugayana
idinba waad ogtihiin inaan aaytiin jirin sababtaas
ayuuna gabaygu kula baxay magaca ah UGAANDHEY
SUGEYSAAYO WAA AAYOTIIN MALAHE. Wax sheeg kaloo
wacdi iyo waano iyo ducaba leh waad ku arkeysaa
Taariikhdu waxay aheyd 27/2 /07 Anigoo ah Mubashir
sh C/laahi. Waxay tiri maansadii Uganda sug.
Ifka laguma waaroo naf nool way ajalantaaye
Aduunyada intaad joogtidbaa la is ogaadaaye
Marse hadii iliilaha qarbiga iilka lagu seexsho
Aakharo warbaa yaala aad la anfariirtaane.
Isticmaarkan soo duulayee yimid ardaageena
Istaraajiduu soo dhigtiyo aarsigiyo boobka
Afgooyiyo Kismaanyaba dadkii lagu ihaaneeye
Xamarna waa umulodoox hadhii lays arjumayaaye
Amaankaan sugeynaadu waa maato erigaase
Alteleriga guuxiyo waxbay nagu afuufeene
Sidii eyro geel bey bulshadi ka ololsiiyeene
Amxaarana ninkii kaashaday adhaxda goysaaye
Axsaan laawayaal beysu tagay ubudka laayaaye
Amuurahan socdaa waa midaan cidi ilaaweyne
Afartaa sidii oday cimriyay eersi ma usheegay
Ma itaalay maansada danbaa ku ogaleysiine
Aflagaado iiguma baxdee erey kalaan raacshay
Imikiyo ayaan hore halkiyo aadan iyo xaawo
Sidii dunida udubkeeda iyo ubaxan loo joojay
Axmaarooy waxaan soo aheyn rag isyaqaanaaye
Askartii guray baan aheyn inamadoodiiye
Kuwii adari kuudiiday baan ehel wadaagnaaye
Oonbaasta nimankii kubaray anaga weeyaane
Maantase adoomaanu nahay amarka qaataaye
Arji baana kuuwada qornaa kugu amaanaaye
Alalaaska naaguhuna waa aragtidiinaase
Ayaamihii adkaa uunkibey kala irdheeyeene
Abaarahan dhacaayiyo arsuqa la iska soo owday
Aafadiyo colaadaha dartood leysma aamino e
Afartaana sidii oday cimriyay eersi ma usheegay
Ma itaalay maansada danbaa ku ogoleysiine
Aflagaado iiguma baxdee eray kalaan raacshay
Ugaadhowday Soomaali oo ururba meel aadye
Ninwalbana ilmo adeeradii aradka soo dhoobye
Axad wali ujeed iyo dangaar owr usoo raraye
Astaanteeda gaarka ah hadaad yara sii eegto
Ifafaalo dheeriya markaan kuu odoreyseyno
Ugaandey sugeysaayo waa aayotiin malehe
Afrikadan madow ee indhaha ooda laga saaray
Ameerikada buush heysto iyo ubadka sheydaanka
Dar iimaanki laga qaaday bey nagu asqeeyeene
Olalihii uqubadaan gallaa leys abaal marine
Inkiraad mafiicnee runbaa lagu arooraaye
Arligaanu fasahaadiniyo aaski baa qodane
Afartaana sidii oday cimriyay eersi ma usheegay
Ma itaalay maansada danbaa ku ogoleysiine
Aflagaado iiguma baxdee eray kalaan raacshay
Bal inaan iniin nahay sidii ukun la dhowraayo
Utumaha shisheeyiyo intaan oofta nala taaban
Aramida sokeysaaba waan alaladeynaaye
Alahayow Islaam baan aheyn sida ogaalkeye
Ardo looxa dhigataan aheyn alifka diimeede
Ashahaado diid baan maqliyo jees inkaarqabo e
Indhowbaa ileys noobixiyo aalad qeyr badane
Indhowbaan aqoonlaawe iyo diidnay edeb gaabe
Indhowbaan shareecada laheyn inamo doonaaye
Awoodbaana loosheegtay iyo aarmi xoogbadane
Iskaashatiyo cadow baa diliyo dar u adeegaaye
Imana meysio maxkamadii hadii aad ilmeysaane
Afartaana sidii oday cimriyay eersi ma usheegay
Ma itaalay maansada danbaa ku ogoleysiine
Aflagaado iiguma baxdee eray kalaan raacshay
Asalraaca ay sheegayaan malaha aasaase
Argagixiso loogama sokeyn niman Israa'iile
Waana wixii Iraaq lagu qabsaday arinka beentaaye
Nimanyahow aqbaar kama sugtaan aqalki naareede
Irdihii cadaabkaan dhamaan wada ag-jiifnaaye
Istaaqfurulaah keenii damcow wey ajibantaaye
ILaah towbadii furan ninkii odhan karaayow e
ALahayow dulqaadkaagu waa midaan idlaaneyne
ALahayow nasoo wada hadee dhaafnay idankiiye
ALahayow nabad udgoonoo aadanahya gaadha
Arligana ku waasaca nasii lagu amaah waaye
ALahayow sidii adhigi ciid iibsi baan nahaye
ALahayow karaamada markale nagu ekeysii
Aqbal iyo haday ducadayadu tahay mid aamiin leh
ALahayow qalbiga noo asturi waan aradanaaye
AAMIIN AAMIIN AAMIIN AAMIIN AAMIIN AAMIIN AAMIIN
EEBOW ILAAH KALE MA JIRO ADIGA MOOYAANE
EEBOW ILAAH KALE MA JIRO ADIGA MOOYAANE
EEBOOW ILAAH KALE MA JIRO ADIGA MOOYAANE
mubashir506@hotmail.com
Afeef: Aragtida
qoraalkan waxaa leh qoraaga ku saxiixan
Faafin: SomaliTalk.com | March 11, 2007
Daabaco
Boggan | Print
ARAGTIDA/MAQAALLADA
DADWEYNAHA EE MAANTA
