Maxaa loogu le'anayaa Badda u dhaxeysa Yemen iyo Soomaaliya
?!!
Tahriibayaal u badan Soomaali oo ay tiradoodu la ekayd 64-ruux ayaa dhowaan
geeriyooday ka-gadaal markii ay qallibantay Doonnidii ay la socdeen oo iyadu
ahayd kuwa sida dhuumaalaysiga ah ku daad-gureeya Tahriibayaasha, loona yaqaan
Laashash.
Ciidanka Badda iyo Kalluumaysato u dhashay Yemen ayaa sheegaya in ay
49-ruux Meydkooda ka soo saareen Doonnida qallibantay hoosteeda, halka ay
22-kale dabaal ku soo gaareen Xeebaha Gobolka Shabwa ee Yemen, meeshaas oo ah
deegaanka ugu badan oo ay ku soo caariyaan Meydadka ay Baddu soo tufto,oo
badankood u dhashay Soomaaliya.
Dadka Meydkooda la soo saaray ayaa waxaa ku jiray 7-haween ah iyo
3-Caruur ahaa.
Masuul ka tirsan Qunsuliyadda Soomaaliyeed ee Cadan ayaa Saxaafadda u
sheegay in maalmahan ay 3-doonyood maalintii la arkaba timaaddo Xeebaha
Yemen,kuwaas oo tahriibayaashii ay wadeen badankood ku hafta Badda u dhaxaysa
labada dal.Waana dhibaato si xiriir ah u dhacda sanooyinka intaas la eg, dadkuna
aysan ka waantoobayn
Doonyuhu inay qallibmaan oo kaliya ma aha tan keenta dhimashada, ee sida
lala socdo dadka badankiis Badda ayaa si ula-kac ah loogu tuuraa iyaga oo nool,
sababta oo badanaaba ah Kuwa Doonyaha wata oo ka baqaya in la qabto haddii ay ku
soo dhowaadaan Xeebaha Yemen, wallow ay dadka qaarkiis tibaaxayaan in ay jiraan
sababo kale oo dadka loogu tuuro Badweynta.
Sida ay sheegayaan Warbixinnadu tan iyo bilowgii Dagallada Sokeeye iyo
wixii ka dambeeyay 1991-kii, waxaa sannadkiiba Badda u dhaxaysa labada dal ku
halligma tiro 5000-Tahriibayaal u badan Soomaali, kuwaas oo uu hilibkooda iyo
dhiiggoodu ka dhergo Libaax-badeedka aadka ugu badan halkaas.
Saraakiil ka kala socotay Xafiisyada:-“Danish Refugee Council” ee
Nairobi iyo Xafiiska “IOM” ee Yemen oo dhowaan Sanca kula kulmay Odayaal ka
tirsan Qaxootiga Soomaaliyeed ee Yemen ayaa weydiiyay Su’aalo ay ka mid
ahaayeen: Maxay Soomaalidu ugu baaba’aysaa Badda u dhaxaysa Yemen iyo Soomaaliya
?!!.
Arrintan waa ay soo socotay tan iyo 1992-kii, waana ay sii kordhaysaa,
oo hadda waxaa Yemen ku sugan kumaan-kun Qaxooti Soomaaliyeed ah, wallow ayan
badankood heysan nolol wanaagsan, dantuna ay ku kalliftay in ay Baabuurta
tirtiraan, Adeegtanimo ku shaqeeyaan ama tuugsadaan.
Inkastoo ay dadka badankiis ka soo firdhanayaan dagaallada sokeeye iyo
darxumooyinka la xiriira ee sanooyinkaanba ka jira dalka Soomaaliya, haddana
waxay dadka qaxayaa qaarkood ujeeddadoodu tahay dhaqaale iyo shaqo doon. Waana
kuwa u sii tahriiba Xagga Sacuudiga ama dalalka kale…Waxaase xaqiiqo ah in
dagaallada ka jira Soomaaliya oo daba-dheeraaday, cawaaqib-xumana dhaliyay uu
yahay kan ugu weyn oo keenaya in ay dadka isku soo biimeeyaan khatarta Badda,
kuna fekeraan in ay meel un u baxaan.
Shaki wuxuusan ku jiran in ayan Tahriibidda iyo isku soo biimaynta baddu
ayan joogsanayn, ilaa ay joogsadaan Dagaallada sokeeye, degganaansho darrida iyo
dacdarrada ka jirta Soomaaliya, wallow aya hadda Xukuumadda Yemen iyada oo
kaashanaysa Dawlado kale ay u tafaxaydatay ka hortagga kuwa wax tahriibiya iyo
Burcad-badeedda Soomaliyeed. tallaabadaas oo la filayo in ay wax weyn ka tarto
mashaqadan.
Hase yeeshee Masuuliyiinta iyo Wax-garadka Soomaaliyeed ayay tahay in ay
iyagu ka fekeraan, ka welwelaan una guntadaan xal u helidda dhibaatada
Soomaaliya iyo joojinta dhiigga Soomaaliyeed ee qubanaya.
Dadka Badda isku soo tuuraya naftooda, waxaa la gudboon in inta ayan soo
dhaqaaqin ay is barbar-dhigaan waxa ka soo horreeya ,waxa ay la kulmi karaan
iyo waxa ay ka soo firdhanayaan; iyaga oo dhega-furan u yeelanaya waxa loo
sheegayo iyo waanada loo soo jeedinayo.
M.M.Kaalmoy,Sanca/Yemen -
kalmoi@hotmail.com
Faafin: SomaliTalk.com | Nov 27, 2007
Soomaalida oo Loogu
Baaqay in ay Qaadacaan Diyaarada Ethiopian
Airlines, iibsana Qaadka Itoobiya
Kulan Hadaladii ka Soo Baxay Loo
Riyaaqay oo ka Dhacay Minneapolis, oo ay Soo Qaban
qaabiyeen Ururka Midowga Qurba Joogga Soomaaliyeed..
Akhri...