Khilaafka Madaxweyne Yuusuf iyo Ra,isulwasaare Nuur
Cadde, Iyo itoobiya oo la safan Nuur cadde, Maxayse tahay sababtu?.
By: Daahir Faarax Afdheere.
Madaxweynaha DFKMG ah Cabdulaahi Yuusuf Axmed ayaa
waxaa ay horey isu khilaafeen Ra,isulwasaarihii hore Prof: Cali Maxamed
Geeddi.
Waxaana uu khilaafkoodu sababay in Geeddi uu shaqada
isaga tago oo uu is casilo.
Muddo yar kadib ayuu madaxweynuhu soo magacaabay Col:
Nuur Xasan Xuseen (Nuur Cadde) oo ah nin aan da, ahaan waxba ka yareyn
Col: yuusuf, kaasoo ah isla beesha ee Cali maxamed Geeddi.
Haddii aan usoo laabto ujeedada qoraalkaan ayaa waxaa
maalmahaan dambe soo shaac baxay Khilaaf soo kale dhaxgaley Madaxweyne
yuusuf iyo iyo Ra,isul wasaare Nuur Cadde kaasoo ah hadal haynta ugu
badan ee baryahaan la isla dhex marayo.
Waxaa hadaba maalmihii tegay uu Raisul wasaaraha Nuur
cadde uu xil ka qaadis ku sameeyay Gudoomiyaha gobalka Banaadir Maxamed
Cumar Xabeeb ( Dheere), Isagoo talaabadaan u arkayay mid dhaxalgal ah
kadib markii Maxamed Dheere ay shacabka reer Muqdisho horey oga
muujiyeen cabashooyin isla markaana ku eedeeyeen inuu wax ka qaban
waayay xaaladda cakiran ee magaaladda muqdisho, waxaana talaabadaas ay
shacabku ku soo dhaweeyeen Caleemo qoyan iyagoo si aad ah ugu
faraxsan.
Talaabadaan uu qaaday Ra,usul wasaare Nuur Cadde ayaa
ah midda ugu weyn ee sababtay in uu cirka isku shareero Khilaafka kala
dhexeeyo madaxweyne Yuusuf. Waxaana la xaqiijiyay in madaxweyne yuusuf
uu aad oga carooday talaabada uu qaaday raisul wasaaraha Nuur Cadde
Taasoo uu ku tilmaamay mid aan sharcigga waafaqsanayn, Sababtoo ah buu
yiri Ra,isulwasaaruhu waxuu leeyahay soo jeedin oo kaliya ee malahan
awoodda xil ka qaadidda. Madaxweyne Yuusuf ayaa talaabada nuur cadde
uu qaaday u arka mid seef la boodnimo ah isla markaana ah mid lagu
quursanayo oo xad gudub ku ah awoodiisa madaxweynonimo.
Sida caadiga ah madaxweynaha iyo Raisulwasaarahu
waxaa ay kale leeyihiin xaduuddo qaanuuni ah oo aan midba kan kale usoo
gudbi Karin.
Inkastoo madaxweyne yuusuf ku saxsan yahay in
raisulwasaaruhu
Uu leeyahay soo jeedin oo kaliya, Ayaa hadana
talaabada uu qaaday Nuur cadde aanay ahayn mid lagu mushquulo oo sababi
karta Khilaaf saas u weyn oo xargaha goosta,haddii aanay siyaasad kale
ku hoos jirin. Waxaana ay taageerayaasha Nuur Cadde talaabadaan ku
micneeyeen inay tahay mid xaq ah Maadaama uu raisulwasaaruhu uu u
dhashey gobalka banaadir isla markaana uu isagu garanayo Dantooda.
Warar la xaqiijiyay ayaa sheegaya in ay fashil ku
dhamaadeen isku day iyo dadaal laga dhex waday in lagu hishiisiiyo
labadaan masuul. Waxaana la sheegay in midba midka kale uu u arko inuu
ka saxsan yahay taasoo keentay in uu xaalku noqdo MINDI MINDI KU TAAG!.
Si kastaba ha ahaatee labadaan masuul ee sar sare
waxaa midba midka kale uu dusha oga tuuray eedaymo isagoo midba kan
kale ku eedeeyay inuu isticmaalayo awood uusan lahayn.
Madaxweyne yuusuf oo aaminsan in raisulwasaaruhu ku
xadgudbay awooddiisa ka sakoow ayaa lasheegay in raisulwasaare Nuur
Cadde uu isagana madaxweeynaha ku eedeeyay arimo fara badan oo ay ka mid
yihiin in madaxweynuhu uu carqaladayn ku hayo xukuumadda nuur cadde,
taas oo la sheegay in col nuur cadde aaminsan yahay in madaxweynuhu ka
dambeeyo iscasilaada dhawr wasiira ah oo ka soo jeeda beesha daarood ee
Cabdulaahi Yuusuf. Arintaan ayuu uu raisul wasaarahu u arkaa mid uu
madaxweynuhu kaga jawaabayo talaabadii uu nuur cadde shaqada oga
eryay maxamed dheere.
Waxaa kale oo la sheegay in raisul wasaare nuur
cadde madaxweynaha ku eedeeyay in uu maleegayo mooshinno lagu mijo
xaabinayo xukuumaddiisa, taasoo uu raisul wasaaruhu sheegay in
madaxweynuhu mar kasta ka dambeeyo xildhibaanada caadeystay inay
markasta abaabulaan mooshinno ka dhan ah xukuumaddiisa . Kuwaasoo la
sheegay in xukuumadda nuur cadde ay ku eedayeen dambiga ah khiyaano
qaran!
Eedaymaha uu raisul wasaaruhu ka tirsansanayo
madaxweynaha oo aad u badan ayaa waxaa ka mid in Ra,isulwasaaruhu ku
eedeeyay madaxweynahu inuu ka shaqaynayo fashilinta hishiiska ay
dhawaan DFKM ah iyo isbahaysiga dibu-xoreynta ee garabka shariifyadda ku
gaareen magaalada jabuuti.
Waxaa ilaa hadda aan jirin wax waan waan ah oo laga
gaaray khilaafka soo kala dhexgaley labadaan masuul, hase yeeshee waxaa
ay dad badan is weeydiiyaan, Maxaa sababay in xukuumadda itoobiya ay
saaxiibkoodii hore ee Col Yuusuf kala saftaan nuur cadde? !
Kadib markii uu soo shaac baxay khilaafka labadaan
masuul ayaa waxaa la sheegay in madaxweyne yuusuf looga yeeray magaalada
Adis-ababa, taasoo sida la sheegay uu madaxweynuhu ka dhega adeeygay,
waxaana bedelkiisi si dhaqsa ah looga yeeray Adis-ababa taliya
ciidamada Itoobiya ee ku sugan soomaaliya Gen: Gabre Dile, Si uu wada
tashiyo ula soo sameeyo madaxdiisa ka saraysa, Khaasatan
ra,isulwasaaraha Itoobiya Metles Zenawi.
Ku soo laabashada Gabre ee magaalada muqdisho waxaa
ay daboolka ka qaaday Mowqifka siyaasadeed ee xakuumadda itoobiya ee ku
wajahan khilaafka soo kala dhexgaley masuuliyiinta sarsare ee DFKMG ah
col: yuusuf iyo col nuur cadde. Waxaana mowqifku sida la sheegay uu
yahay in xakuumadda itoobiya ay aad ula dhacsan tahay siyaasadda nuur
caade sidaa awgeed ayaa isla markiiba la xaqiijiyay in uu Genaral Gabre
uu madaxweyne yuusuf si cad ugu sheegay inuu faraha kala baxo nuur cadde
iyo hawlihiisa.
Tallaabadaan ayay dad fara badan ku micneeyeen in
General gabre uu fulinayo amar laga soo faray xaruntiisa Adisa-baba,
waxaa kale oo ay dadka siyaasadda Oddorasa ay arintaan ku tilmaameen
in itoobiya qudheedu ay fulinayso amar sare oo ay soo siisay dawladda
maraykanka oo ah midda ciidamada itoobiya ku haysa soomaaliya.
Dad farabadan oo horey u ogaa in in xukuumadda
itoobiya uu saaxiibkooda kowaad yaha Cabdulaahi Yuusuf ayay filanwaa ku
noqotay mowqifka cusub ee ay itoobiya ku taageerayso Nuur Cadde.
La yaab malahan in dad fara badan ay u qaataan in
itoobiya ay is bedashay oo haatan ay waddo danta soomaaliyeed, Nuur
caddana uu yahay samo-wade loo soo diray bulshadda, Hase yeeshee xaalku
waa mid ka duwan sidaa, Sababtoo ah Itoobiya waa uun itoobiya! waxayna
markasta ilaashanaysaa danaheeda guracan ee ay ka leedahay soomaaliya,
Nuur caddana waa uun mid ka mida shaqaalaheeda oo ay
waliba haatan aad ula dhacsan yihiin. Wax farqi ah oo uu dhexeeya
majiraan Col:Nuur cadde iyo Col: Cabdulaahi yuusuf, waayo labadooduba
waxay saaran yihiin Baabuurka shacabka ku dul socda ee magaciisa la
yiraahdo EMBAGATI. Kaasoo uu darawal ka yahay Col:Yuusuf, Shukaantana
uu Fadhiyo Nuur cadde, Khilaafkooduna wax kale ma.ahan ee Baabuurkii oo
raba inuu dhaqaaqo ayuu nuur cadde Hand-break-gga u jiiday, ujeeddada
nuur cadde ma, ahayn in uu Baabuurka joojiyo oo kaliyee ee waa in markii
uu baabuur istaago uu hadhoow u bedelo Tareen cusub oo shacabka dul
mara.
Sababtoo ah waxaa Nuur cadde lagu eedaynayaa in
hawlaha uu isagu ugu yeero DIBUHISHIISIINTA ay yihiin kuwo ay usoo
igmadeen shisheeye dano gaar ah leh, Waxaana ay dad badan ay aaminsan
yihiin in col: nuur cadde uu ku guuleystay kala qaybintii Isbahaysiga
Dibu-xoreynta Soomaaliyeed, kadib markii uu qayb libaax ka qaatay
abaabulka shirkii jabuuti ee lagula shiray garabka Shariifyadda ee ay
Dawladda cadawga ee maraykanku u taqaan QUNYAR SOCODKA. Taasoo keentay
in isbahaysigu u kale jabo laba garab oo iska soo horjeeda, waxaana ay
Taasi tahay guul usoo hoyatay cadawga soomaaliyeed.
Haddii aan usoo laabto Jawaabta Su,aasha ah Sababta
ay haatan xukuumadda Itoobiya u taageerayso nuur cadde ayaa dadka
siyaasada indha indheeya ku tilmaameen Dhawr arimood kuwaasoo ah:-
1): Waxaa aan shaki ku jirin oo iska cad in ciidamada
gumaysiga xabashidu ay ku fashilmeen soomaaliya, Isla markaana ay aad
ugu riiqmeen haatana ay u muuqdaan kuwo quus ah oo raadinaya waddo qurux
badan oo ay ku baxaan, si aan marnaba loo soo hadal qaadin tacaddigii
iyo gaboodfalkii ay ka geysteen shacabka soomaaliyeed, Sidaas awgeed
ayay xukuumadda itoobiya Nuur Cadde u aragtaa midka isugu u xaarayo
wadaddii quruxda badneyd ee ay cagta saari lahaayeen.
2): In dawladda Cadawga ah ee maraykanka oo markii
horaba itoobiya soomaaliya ku haysay ay lafteedu ku fashilantay oo ay
doonayso inay qaab kale wax u wajahdo.
3): Waxaa kale oo ay dadka siyaasadda u dhuun daloola
qabaan in haatan ay xukuumadda itoobiya ay doonayso in dambiyaddii ay
soomaaliya ka geysataey ay oga siibato Col; Cabdulaahi Cuusuf oo ay
eedda isaga dusha ka saarto, Sababtoo ah waa caadada gumaysiga ina aanu
kala jeclayn kii u shaqeeyay iyo kan kasoo horjeeda mar haddey soomaali
wada yihiin.
4): Arinta kale ee loo badinayo in itoobiya ay
saaxiibkood cabdulaahi kala saftaan nuur cadde ayaa ah; iyadoo haatan
ay xukuumadda itoobiya u aragto Cabdulaahi yuusuf inuu yahay Macangag
aan laga fujin Karin wixii uu qabsado, kaasoo aan lahayn Diblomaasiyad
iyo siyaasad furfuran. Sidaa awgeed uusan sii wadi Karin danahooda,
iyagoo ka cabsi qaba inuu fashiliyo hawlaha ay u igmadeen.
Isku soo wada duuboo Khilaafka iyo is marinwaaga
labadaan masuul ee sar-sare ayaa sababi kara in Dawladda lagu
meelgaaray ee farqaha ishaysata ay u kala jabto laba garab isla markaana
ay dhici karto in dadka soomaalida ah ee ay qabyaaladdu dar-dartey ay
lakala saftaan, taasoo shacabka masaakiinta ah ee daalan ku ah dhabarjab
aad u wayn.
Daahir Faarax Afdheere.
Email: gulan1969@yahoo.co.uk