HESHIISKA JIBUUTI,BILOWGA HALGAN CUSUB!!
Dad badan ayaa ku jaho wareersan sida wax loo wado iyo halka ay
wax ku danbayn doonaan, Su’aalaha ugu badan ee soo noqnoqonayana
wxaa ka mid ah:-
· Yaa galay Heshiiska?
· Qolyaha galay heshiiska waa ayo dadka ay metelaan?
· Maxay samayn ah oo ay ku yeelan kartaa Muqaawamada gudaha?
· Garabka galay heshiiska Muqaamada 100kiiba imisa ayey ka
yihiin?
· Malaga yaabaa in Qolyaha kale ay ku soo biiraan hanaankaas?
· Qolyaha wax isku darsaday dhankooda wax ma ka socon karan?
· Waa maxay raadka fooxsha xun ee uu reebi karo heshiiskani?
· Maxay tahay inay sameeyaan Muqaawamada gudahu?
· Waa maxay doorka Culimada Masaalixada ee xiligan?
Baarlamanka ka kooban 550ka iyo malaha 100 Wasiir oo kale ma
yihiin ku wixii wax samata bixin lahaa? Hadaba Su'aalahas iyo
kuwo kale ayaan ku falan qayn doonaa Maqaalkeena.
Intii qaban qaabadiisa lagu jiray Shirkan hada u muuqda
gabangabada ee ka soconaya Caasimadda Wadanka Jibouti, Rag badan
gaar ahaan Madaxda garabka Asmara ayaa iyagu afka labadii la
yeerayey in garabka Shariifku waxa ay u dig iyo dam leeyihiin ay
tahay sidii ay wax ugu darsan lahaayeen TFGda oo loo haysto soo
gelinta Ciidamada Itoobiya ee xasuuqa foosha xun,barakaca iyo
bur-burkaba ka gaystay gudaha Somalia, Hase yeeshee dad badan
ayaa jiritaanka sheegashadaas ku soo baraarugay marka ay arintu
soo gaartay heer awood qaybsi.
Sida laga wada war hayo kooxda heshiiska gashay ee uu Shariifku
Madaxda u yahay waxay ahaayeen Islaamiyiin,qurba joog , bulshada
rayidka iyo raggii Wasiirada ka soo waayey Dowladii Cali geedi,
kadib markay ansixiyeen soogalinta Ciidamada cadawga dalka, ee
iskaga carooday Barlamankii ay ka tirsanaayeen, kuwaas oo
samaystay Isbahaysi lamagac baxay Dib u xoraynta Somalia,Kasokow
dhaliilo badan oo loo jeedinayey wax isku darsiga Cilmaaniyiinta
iyo Islaamiyiinta hadana Shariifka iyo koox ay isku aragti
yihiin ayaa dhabbadii loo aas-aasay isbahaysiga ee ahayd in aan
xabadda lajoojin inta wadanka laga xoraynayo islamarkaasna aan
wax wadahal ah lala furin raga dhiiga gacmaha ku wata ka
weeciyey,Waxayna go’aan aan horay loo sii ogayn ku gaareen in ay
wadahadal ku dhamaanaya wax isku darsi ay la furaan TFGda iyadoo
marka hore dadka lagu maaweelinayo in lala xaajoonayo beesha
Caalamka, oo la rumaysantahay in ay tahay tan iyadu dhegta wax
aan la ogayn ugu sheegtay kooxda shariifka.
Arintaasi waxa ay ka dhigtay garabka Sheikh Shariif kuwo ka
maran taageerada Muqaawamada iyagoo lumiyey kalsoonida qaar
badan oo ka mid ah Ururada ka dagaalama gudaha Wadanka, kadib
markii uu Shariifku ugu baaqay Muqaawamada inay xabadda
joojiyaan hubkana iska dhigaan,waxayna kaloo soo dadajisay kala
shaki iyo Ururo kala samaysasho iyadoo sharafta magacii Midowga
Maxkamadahana uu dhulka galay oo uu noqday mid laga kala cararo,
maadaama qaar badan oo Muqaawamada ah ay ka xanaqsanaayen in uu
wali kursigasi ku fadhiyo Sheikh shariif oo isku bedelay Siyaasi
waji cusub la soo baxay.
Garabka uu hoggaamiyo Sheikh Shariif waxaa hubanti ah in anay ka
gadmi Karin siyasadoodu Dalka Somaliya, oo hadiii si kale loo
dhigo ay islaamiyiin magacyada soo bedeshay ay dib u qabsadeen,
kuwaas oo dhammaan tood ka soo wada horjeeda waxa ka socda
Jamhuuriyadda Jabuuti.Tusaale ahaan Marka an ka hadlayno
Koofurta Somalia oo ah halka uu dhibka ugu badan uu ka taagan
yahay, ka soo bilow gobolka gedo intiisa badan haddii aan la
dhihin isaga oo dhan waxaa gacanta ku haya xoogaga Al-shabaab,
Jubbada hoose iyo jubadda dhexe wxaa gacanta ku haya
Raaskanbooni iyo Al-shabaab iyadoo la rumaysan yahay in Sheikh
Hassan Turki uu oday u yahay, Gobolada Bay iyo Bakool marka laga
reebo Baydhaba oo ah xarunta Barlamanka TFGda waxaa gacanta ay
ugu jirtaa Al-shabaab iyadoo meelaha qaarna ay joogaan Jabhadda
Islaamiga Soomaaliyeed(Jabiso).Gobolka Shabeelada hoose wuxuu
gacanta ugu jiraa xoogaga Al-shabaab,Gobolka shabeelada dhexe
waxaa wada jooga Maxkamadaha garabka Shariika,Garabka Asmara iyo
Al-shabaab,Gobolka Hiiraan sidoo kale wuxuu gacanta ugu jriaa
xoogaag ka kala tirsan Gabarabyada Maxkamadaha, Al-shabaab iyo
Jabiso, Gobolka Galgaduud Wuxuu gacanta ugu jiraa Xoogaga
Al-shabaab iyo garabka Asmara,Gobolka Mudug Marka laga reebo
Galkacyo waxaa siwayn u jooga xoogag Islaamiyiin u badan
Al-shabaab.Muqdisho Waxaa ka dagaalama xoogaga Al-shabaab,
Raaskanbooni, Jabiso,garab la tuhunsanyahay inay u janjeeraan
dhanka Shariifka oo aad u dhimay weeraradoodii iyo Maxkamadaha
ka madaxa banana 2bada garab ee Isbahaysiga.
Marka aan Qiimayno garabka Sheikh Shariif waxa ay taageerayaal
la dhihi karo waa hareeraysanyihiin(waxan ujedaa dhanka tiro
yarida)ay joogaan meelo ka mid ah Gobolada Shabeelada dhexe iyo
Hiiraan.Mana muuqato rajo laga qabo in garabyada kale ee
Muqaawamadu ku soo biiraan haanaanka shariifku hor boodayo,taas
badelkedase waxaa muuqanaysa in halgan cusub iyo dib-u-xorayn
hor leh midiyaha loo afaysanayo.Hadaba Sheikh Shariif iyo
kooxdiisa ma dhici kartaa inay isbedel ku keenaan xaaladda
wadanku uu hadda marayo, mise dabkii ololayey unbaa basin lagu
sii shubi??
Ma jecli inaan saadaal xun oo rajo beel ku keenaysa dadkii u
hanqaltaagayey dhaq-dhaqaaqa Shariifka ka bixiyo, hadana runta
muuqata waxay tahay in ay halkaas ka soo bixi doonto Dowlad ka
tayo liidata tii C/laahi uu hoggaanka u hayey. Tausaale:- 275tii
Xildhibaan ku sheeg ee ansixiyey soogalinta Ciidamada cadawga
wali wa ay soo taaganyihiin,Mushaarkooda ayaa lala'aa marka waa
la laban-laabay(Malaha ceel shidaal ayaa Somalia laga
helay!)Waxaa jiray Gobolo taageero u haya marka laga hadlayo
TFGda sida Gobolada Puntland, taageeradaasi ma noqon doonto mid
ay hesho Dowlada-isbahaysigu Waayo marka laga soo tago iska
horkeenka iyo isku jebinta Muqaawamada hadana Shirkani wuxuu
ahaa mid loogu dhamaynayey Odayga lagu soo shaqaystay ee la sugi
waayey inta uu waqtigiisii ka dhamaysto,tiiyoo aanu waxba ka
qaban balan qaadyadii uu u sameeyey dadka reer Puntland.Dad
badan ayaaba is waydiinaya tolow Xarunta Dowladda-isbahaysigu ma
waxay noqon doontaa Feer-feer Magaalooyinka laga
taageersanyahayna Hawase,Addis ababa, Shashamane, Soodare iyo
Nasared?
Meesha markasta u dahnayd Soomalida waxa la tuhunsanaa inay
tahay Culimada,Raadka foosha xun iyo cirib xumada uu ku keeni
karo Ummada heshiiskaasi waa in la arko wax aan horay loo arki
jirin oo ah Wadaado Waranka isu haysta oo midiba kan kale
gaalnimo ku xugminayo,Dabcan tan is xugminta horay ayeyba u
socotay oo waan maqlnay heshiiskanina wuxuu u muuqdaa mid arinta
u bedelaya ficil,arintaas oo noqonaysa Musiibadii ugu xumayd ee
Soomalida lasoo gudboonaata ebed(Ilaahay ma qadaree)
Waxaan akhriyey bayaan ay Culimada Masaabaxadu ka soo saareen
Heshiiska Jabuuti, Waxay ku tilmaameen mid aan waafaqsaneen
Diinta Islaamka Waxayna dhanka kale muujiyeen sida anay raaliga
uga ahayn in lala dagaalamo raggaasi,Hadaba Culimada musaalaxada
waxaa la gudboon in si aan ganbad lahayn farta ugu fiiqaan
shaqsiga ama shaqsiyadka qaldan si bulshadu uga feejignaato
iskagana qabato shartooda, illayn lama wada saxsana garina laba
nin kama wada qoslisee,Waxaana looga baahanyahay Culimada inay
kalimadooda labac-labaclaynta ka ilaaliyaan,Fatwo sharci ahna ka
soo saran waxa socda.
Somalidu waxay ku Mahmaahdaa war lahelaa talo la helaa…Qolyihii
ogaa halka dhaanku ku furan doono iyo kuwii shakisanaaba maanta
xaqiiqda ayaa u wada muuqata iyo halgankii in uu ku idlaaday
kursi doon lana jeclaaday magacyada wasaqaysan ee sabanka sida
Mudane Xildhibaan iyo Mudane Wasiir!!Sidaas darteed looma baahna
in Muqaawamada guduhu ay ku mashquulaan fakir badan iyo bal
maxaa xigi doona ee wixii laga fishaaba waa iyaga oo ku dhaqaaqa
talaabooyin ay ka mid yihiin:-
· . In si deg-deg ah ay iskugu yimaadaan Shirwayne.
· In ay doortaan Hogaan adadag,laguna kalsonyahay.
· In khilaafaadka yaryar xal loo helo.
· In ay ku dhawaaqaan Maamul Islaami ah,maadaama wadanka intiisa
badan uu hada iyaga gacanta ugu jiro.
W/Q:MMGaraad. E-mail:-
garadsom@hotmail.com ama stethy1@live.com
Afeef: Aragtida qoraalkan waxaa leh oo uu u gaar yahay qoraaga ku saxiixan
Faafin: SomaliTalk.com |
December 3, 2008
|