War saxaafadeed ku saabsan Qarax lala beegsaday dad rayid :
Isbahaysiga dib u xoreynta Soomaaliya wuxuu cambaareynayaa qaraxii
loo geystay dadkii rayidka ahaa ee aan waxba galabsan shalay oo
taariikhdu ahayd 03/02/2008 Magaalada Muqdisho.
Waxaa falkaasi ka dambeeyey Itoobiya iyo daba dhilifyadeeda oo
caadeystay inay dilaan, dhacaan, bartilmaameedna ka dhigtaan goobaha ay
ku nool yihiin dadka rayidka.
Waxaa wax laga xumaado ah in falalka noocaas oo naxariis darrada ah
oo lala beegsanaayo had iyo jeer dadka aan waxba galabsan.
Siyaasadda Isbahaysiga waxay ku qotontaa in loo gargaaro, gacanna la
siiyo dadka rayidka, sidaas darteed Isbahaysigu wuxuu cambaareynayaa fal
dembiyeed kasta oo lala beegsanaayo dadka rayidka ah.
Ugu dambeyntii Isbahaysigu wuxuu tacsi u dirayaa guud ahaan shacbiga
soomaaliyeed, gaar ahaanna ehellada iyo qaraabada dadkii ku baxay
qaraxaas ka dhacay shalay Magaalada Muqdisho, una rajeyneynaa intii ku
dhaawacantay inuu ilaahey ka bogsiiyo dhaawacooda.
Asmara 04/02/2008
Abaaro Ba'an oo ka tagaan Gobolka Galgaduud
Degmooyinka iyo tuulooyinka gobolka Galgaduud qaarkood ayaa waxaa ku sii
fidaya abaaro iyo biyo la’aan baahsan, iyadoo qiimaha Biyaha lagu iibsadana uu
gaarey halkii ugu saraysay, kadib markii la waayey labo xili roobaad oo si wayn
looga sugayey gobolkaan.
Roobabkaan sida wayn looga sugayey gobolka Galgaduud ee aan mudada labada sano
ahi ka da’in, ayaa waxa ay sababeen biyo la’aan baahsan iyo daaqii xoolaha oo
gabaabsi noqda, dhanka kale waxaa cirka isku shareeray qiimaha Biyaha lagu geeyo
tuulooyinka iyadoo fuustadii biyahana ay gaartey inta u dhaxaysa 50,000 Shilling
Somali ilaa 100,000 Shilling Somali taasina ma ahan mid ay dadka dhamaan wada
iibsan karaan.
Arinkani ayaa saamaynku yeeshay dadka ku dhaqan degaanada iyo tuulooyinka
gobolkaan qaarkood oo horey u haysatay dhibaatooyin xaga nolosha ahi, hase
ahaatee xaalada biyo la’aaneed iyo jiilaalka kululi ee ka jirta gobolka
Galgaduud ayaa ka sii daraysay kadib markii gobolkaan ay ku soo barokaceen
kumanaan qoys kuwaasi oo ka soo cararay rabshadaha ka soconaya magaalada
Muqdisho.
Si kastaba ha ahaatee ma jiraan wax gargaar ah oo la soo gaarsiiyey qoysaskaan
ku dhibaataysaan gobolka Galgaduud, marka laga reebo hay’ada CARE oo mucaawino
ka qaybisay degmada Guriceel iyo tuulooyinka ku hareersan, taasina ma ahayn mid
kaafi karta noloshooda laakiin waxaa la dhihi karaa waa mid ay aad ugu
baahnaayeen dadkaasi.
Abdulkarim Mohamed Jim'ale (Muxsin)
Somalitalk.com
Guriceel
KULAN DHEX MARAY SAFIIRKA SOOMAALIYEED EE INDONESIA IYO GUDDOOMIYAHA
BAARLAMAANKA INDONESIA
04 February 2008, Safiirka Jamhuuriyadda Soomaaliyeed ee Indonesia, Md.
Maxamuud Colow Barow, waxa uu xafiiskiisa ku booqday Guddoomiyaha Baarlamanka
Indonesia Dr. Agung Laksono, oo xilliga hadda madax ka ah Ururka Baarlamaanada
Adduunka iyo Baarlamaanada Asia – Africa.
Safiirka, wuxuu taariikh kooban ka siiyay Guddoomiyaha taariikhda dhaqan ee soo
jireenka ah ee ay wadaagaan labada shacab iyo tan siyaasadeed ee labada
xukuumadood, wuxuu sidoo kale Safiirka u sharaxay marxalada adag ee uu shacbigu
marayo iyo sida ay dawladda Indonesia uga qeyb qaadan karto dib u dhisida iyo
horumarinta hannaanka siyaasadeed wadanka Soomaaliya, iyadoo Indonesia ay mug
siyaasadeed iyo mid dhaqanba ku dhex leedahay shucuubta caalamka gaar ahaa,
Ururka Islaamka, Ururka NAM, Asia –Africa, UN iyo hayado kale oo caalami ah.
Safiirku wuxuu ka codsaday in Baarlamaanka Indonesia uu gacan ka geysto tayo
gelinta Baarlamaanka KMG ah hadday noqon lahayd dhanka sharciyada federaalka,
doorashooyinka, xawl maalmeedka Guddiyada iyo dhanka hawlwadeenada Maamulka
Baarlamaanka oo u baahan koorsooyin iyo dhisid tayo hawleedkoodaba.
Kulankaas ka dib, ayaa waxa labada masuul ay saxaafadda siiyeen go’aamada
kulankaas, waxa uuna tibaaxay guddoomiyuhu in uu gaarsiinayo dawladda Indonesia
dhambaalka safiirka, wixii khuseeya Baarlamankana uu si deg deg ah ugu hawl gali
doono sidii ay gacan uga geysan lahaayeen haddii ay noqon lahayd is dhaafsi
khibradeed ama tababaro loo fidiyo hawl wadeenada Baarlamaanka iyo haddii ay
noqon lahayd in uu codkiisa gaarsiiyo Baarlamaanada kale si iyagana gacan uga
geystaan dhiirigelinta iyo horumarinta adeega uu Baarlamaanka KMG ah hayo oo
xilli adag ku jira. Guddoomiyaha wuxuu hoosta ka xariiqey in loo baahan yahay in
la garab istaago Baarlamaanka KMG oo ku shaqeynaya duruufo adag, wuxuu ka
cudurdaartay inuusan hore u haysan macluumaad badan, balse haddda wixii ka
dambeeya uu talaab u qaadan doono sidii boogahaas loo dhayi lahaa.
Ka dib, hadalka Guddoomiyaha ayaa isna Safiirku saxaafadda u sheegay inuu aad
uga mahadcelinayo Guddoomiyaha waqtiga uu siiyay inuu ka dhageysto xaaladda adag
ee uu ku jiro shacabka Soomaaliyeed marayo iyo sida uu u ballan qaaday inuu
taageerayo Baarlamaanka KMG ah ee Jamhuuriyadda Soomaaliyeed.
Kulanka wuxuu ku soo gabagaboobay jawi aad u wanaagsan, waxaana lagu tilmaamay
inuu ahaa kulan miro dhal ah.
Safaaradda Jamhuuriyadda Soomaaliyeed ee Indonesia Jakarta
Embassy of the Republic of Somalia
Jl Permata Hijau Raya Block T No. 8
Kebayoran Lama, Jakarta Selatan 12210
Telp. 0062215321920, Fax: 0062215494730
Email: somalirep_jkt@yahoo.com,
molow2000@yahoo.com
Faafin: SomaliTalk.com | Feb 5, 2008
Isbahaysiga dib u xoraynta oo Canbaareeyey shir Madaxeedka Tobonaad ee
Midowga Afrika 2008.
.Puntland oo loo soo bandhigay Dastuur Cusub
.Qarixii labaad oo ay dadku dhinteen oo ka dhacay muqdisho
Wararka oo dhan akhri... |