Wararkii: Feb 23, 2008
- Magaalada Muqdisho oo laga xusay maalinta Afka Hooyo ee Soomaaliga, iyadoo
xafladda lagu xusayay....
Shirkadda Isgaasiinta ee Telcom Somalia oo loo magacaabay Agaasime cusub,
iyadoo howlaha shirkadda...
Magaalada Muqdisho oo laga xusay maalinta Afka Hooyo ee Soomaaliga, iyadoo
xafladda lagu xusayay....
Xaflad lagu xusayo maalinta Afka Hooyo ee Soomaaliga ayaa maanta lagu qabtay
Magaalada Muqdisho, waxaana xafladda lagu xusayay afka Hooyo soo qabanqaabiyay
Laanta Koonfurta Somalia ee Naadiga Hal-abuurka iyo Qorayaasha Soomaaliyeed
[Somali Speaking Pen].
Xafladda oo ahayd mid ay kasoo qaybgaleen dad Soomaaliyeed oo fara badan iyo
martisharaf ka socotay qaybaha kala duwan ee waxbarashada dalka, sida
jaamacadaha, iskuullada, macaahidda, abwaaniinta, qorayaasha iyo saxaafadda ayaa
waxaa hadallo ka jeediyay xubno kala duwan oo kala duwan.
Ugu horreyn; waxaa hadalka qaatay xoghayaha laanta koonfurta ee Somali Pen Mr.
C/naasir Yuusuf Macallin, wuxuuna soo dhaweyn kaddib sheegay in xuska maanta la
qabanayo uu qayb ka yahay xusaska in ka badan 6-kun oo quuladood oo dunida looga
hadlo.
Xoghayuhu, wuxuu sheegay in Laanta Koonfurta Somalia ee Somali Pen intii ay
jirtay ay qabatay howlo badan oo lagu horumariyay afka Somaliga; wuxuuna sheegay
in howlahaas oo dhan ay noqdeen kuwo lagu guulaystay horumar la taaban karana
laga gaaray.
Sidoo kale, waxaa hadal ka jeediyay xafladdaas Prof. Mustaf C/llaahi Cali
(Dheeg) oo bare ka ah Jaamacadda Muqdisho, isagoo si weyn ugu dheeraaday Afka
Soomaaliga iyo muhiimaddiisa, wuxuuna sheegay in afka uu kasoo uskumo; Hooyada,
dhulka iyo Dadka.
"Afka Soomaaliga, wuxuu ka mid yahay afafka Dowliga ah ee dunida ka jira,
wuxuuna ka mid yahay afafka Kushitiga ah ee looga hadlo dalalka Bariga Afrika,
isagoo weliba ah afka ugu baaxadda weyn, maadaama uu yahay af leh maamul dowli
ah oo loo shaqeeyo xafiisyada iyo howlaha kale ee Somalia" ayuu yiri Mustafa
Dheeg.
Mar uu ka hadlay khatar sababi karta inuu afka Soomaaliga noqdo mid gabi ahaan
baaba'a ayuu sheegay inaysan taasi muuqan, qarniyada soo socda xitaa uusan ku
imaan karin afka Soomaaliga burbur, maadaama afka Soomaalig uu yahay luuqadda
labaad ee Luuqadaha bariga Afrika, isagoo sheegay inay ku hadlaan 25-milyan oo
qof.
"Dadka ku hadla Afka Soomaaliga waa kuwo ku firirsan dalalka Somalia dariska la
ah sida, Jabuuti, Ethiopia iyo Kenya; waxaana sii dheer intaas dadka Soomaalida
ah ee ku nool dalalka ku yaalla shanta qaaraddood ee Dunida" ayuu yiri Prof.
Dheeg, oo sidoo kale ku boorriyay saxaafadda inay cusleyska saaraan sidii Afka
Soomaaliga uu ku noqon lahaa mid horumar intaan ka badan sameeya.
Mudane Yuusuf Cali Cusmaan oo ah guddoomiyaha Golaha Suxufiyiinta Qaranka iyo
Maxamed Ibraahim Isaaq (Pakistan) oo ka mid ah xubnaha NUSOJ iyo xubin ka tirsan
INSI ayaa si wadajir ah u sheegay in afka Somalia uu yahay mid horumar sameeyay,
isla markaana laga doonayo saxafiyiinta inay horumarka Afka Soomaaliga ka
shaqeeya.
Iyadoo lagu soo bandhigay xafladda joornaallo kasoo baxay gudaha Somalia tan iyo
intii afka Soomaaliga la qoray, lana hirgeliyay, iyagoo si weyn ugu
nuuxnuuxsaday in horumarka afka Soomaaliga uu yahay mid mas'uuliyadi ay ka
saaran tahay qof walba oo Soomaali ah.
Xoghayaha Maaliyadda ee Somali Pen Qamar Salaad Cumar iyo ku simaha guddoomiyaha
Somali Pen laanteeda Koonfurta Somalia Dhicisoow oo hadal ka jeediyay hadalkaas
ayaa waxay u mahadceliyay kasoo qaybgalayaasha iyo cid walba oo gacan ku siisay
Somali Pen horumarinta Afka Soomaaliga.
Suugaanley kala duwan ayaa waxay xafladda kasoo jeediyeen erayo suugaaneedyo ay
ku cabirayaan horumarka Afka Soomaaliga; waxaana abwaannadaas ka mid ahaa: Barre
Maxamed Bangaladesh, Saynab Sheekh Maxamed, Cumar C/llaahi Guure iyo kuwo kale.
Shirkadda Isgaasiinta ee Telcom Somalia oo loo magacaabay Agaasime cusub,
iyadoo howlaha shirkadda...
Xaflad loogu magcaabayay agaasime cusub shirkadda Isgaarsiinta ee TELCOM SOMALIA
ayaa maanta lagu qabtay Hotelka Shaamo ee Magaalada Muqdisho.
Xafladda oo ay kasoo qaybgaleen shaqaalaha shirkadda Telcom iyo marti-sharaf
kale ayaa waxaa loogu magcaabay agaasimaha cusub ee shirkadda Telcom Mr. Xasan
Sheekh Maxamuud oo ka tirsnaa shaqaalaha Hay'adda CRD.
C/llaahi Maxmed Xuseen oo ahaa agaaasimihii hore ee shirkadda Telcom oo hadal ka
jeediyay xafladda ayaa sheegay inuu xilkaan isaga wareejiyay si mutadawacnimo
ah, uuna soo hayay muddo 1-sano, isagoo ku wareejiyay mas'uulka cusub qoraallo
ka tarjumaya mas'uuliyaddii uu ka hayay shirkadda Telcom Somalia.
Agaasimaha oo xafladda ka hadlay kaddib markii xilkaas lagu wareejiyay ayaa
sheegay inuu ka codsanayo shaqaalaha shirkadda iyo madaxda kale ee shirkadda
kala howlgalaysa inay garab ku siiyaan howlaha culus ee dusha laga saaray.
"Waxaan ahaan jiray nin ka shaqeeya howlaha samofalka, balse waxaan hadda
dareemayaa inaan ahay mas'uul loo dhiibay howl laga rabo macaash, inkastoo ay
howshaan qayb ka tahay howlaha samofalka ah ee loo hayo Bulshada Soomaaliyeed"
ayuu yiri agaasimaha cusub ee Telcom Xasan Sheekh Maxamuud.
Agaasimaha cusub, wuxuu daboolka ka qaaday in howsha loo dhiibay uusan ka soo
bixi karin haddii uusan garab ka helin howlwadeennada kale ee shirkadda, wuxuuna
ka dhigtay hal ku dhig, gacmo wadajir bay wax ku qabtaan.
Maamulaha Shirkadda Isgaarsiinta ee Telcom Somalia Max'ed C/llaahi Sheekh oo
hadal ka jeediyay xafladda ayaa sheegay inuu si weyn u soo dhaweynayo xilka lagu
wareejiyay mas'uulka cusub ee noqonaya agaasimaha Shirkadda Telcom Somalia.
"Shirkaddu Telcom Somalia waa shirkaddii ugu horreysay ee dalka ka furta
isgaarsiin ay Somalida gudaha iyo kuwa dibaddu ku wada xiraan, waxaana lagu
billaabay afar madax oo lagu shubayo lacagta, balse maanta waa shirkad aad u
weyn oo shacabka Soomaaliyeed u qabtay howlo isgaarsiineed oo baaxad weyn" ayuu
yiri Maxamed C/llaahi Sheekh Madaxa Shirkadda Telcom Somalia.
Waxaa soo tebiyey Amiin Yuusuf
Feb 23, 2008