“Ari Qayilay oo Dhurwaa Shaah u Karinaayo”
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi
Muxamed korkiisa ha ahaato.
Ari Qayilay oo dhurwaa shaah u karinaayo! Oraahdaas waxay ku jirtay
majaajillo uu duubay C/hi-Dhoodaan. Marna isma oran waa arrin dhici kara
oo suurtogal ah ee waxaan iskaga haystay sheekooyinka lagu yaqaan
hal-abuurrada oo qaarkood waaqici ahayn ama aan la fahi karin waxay ka
wadaan. Ma hubo in Dhoodaan u danlahaa in dadka Soomaaliyeed saas ku
dambeyndoonaan iyo in kale laakiin anigu waxaan yaqiinsaday in
hadalkaasi ku jeedo ummadda Soomaaliyeed khaasatan markii Meles Zenawi
Xamar iyo Soomaaliya qabsaday dabadeedna noqday qofka koowaad ee xalka
Soomaaliya laga sugo ama hadalka ugu horreeya ee arrimaha Soomaaliya
leh.
Ilaahay baan idinku dhaarshee shacabka Soomaaliyeedoow, dadka
xildhibaannada sheeganaya ee Baydhabo ku xareysan iyo kuwa leh
dowladdaan u sarreynaa ee Zenawi martida u ah maka duwanyihiin ari
daroogeysan oo dhurwaa shaah ka sugaya?
Waxaan dhici karin ma aha in mar mar la arko wax sida dhurwaaga iyo
ariga isku ah oo mar meel wada jooga iyagoon is dhibeyn arrimo soo
kordha awgood. La yaab maaha in madaxweynayaal Soomaaliya iyo Itoobiya
ka socda kulmaan ama heshiis gaaraan laakiin waxa hal-abuurku cabbirayo
isagoo sawiraya masawir iska cad oo qof kasta fahmi karo ma aha taas.
Soow Xayle Salaase Xamar ma imaan? Musiibo dabiici ah waa isku
keenikartaa dhurwaayo iyo ari. Tusaale ahaan haddii dab ka kaco ama biyo
maasheeyaan degaan waxaa dhici karta in dugaag iyo xoolo ay saacado isku
dhexjiri karaan iyagoo raadinaya dariiq ay dabkaas ama biyahaas uga
badbaadaan. Laakiin oraahda Dhoodaan ee ariga iyo waraabuhu waa mid
marqaameed. Waa mid arigu doorbiday in waraabe u khidmeeyo. Hal-abuurka
waxaad mooddaa inuu leeyahay waxyaalaha arrintaas gacanta ka geystay
waxaa ka mid ah:
- Maandooriye. Waxa meesha yaal waa daroogo/qaad oo keentay in
arigu u yeerteen cadowgoodii koowaad ee dhurwaa. Yeerasho keliya
maaha ee waxay leeyihiin dhurwaayoow noo khidmee! Soow ma aha
hadalkaan ka maqalno madax-ku-sheegga Soomaalida,
xildhibaanno-ku-sheegga iyo shacab badan: Tigreegu wuxuu Soomaaliya
u qabsaday iney dowlad noo dhisaan?! Muxuu yahay faraqa u dhaxeeya
ariga iyo dhurwaayada iyo dadkaas iyo Meles Zenawi? Ilaahay baan ku
dhaartee dadkaasaa ka xun! Sabab? Arigu wuu ka garasho yaryahay
dadka marka sawirkaas Dhoodaan waxaa ka yaab badan dadka aaminsan in
Zenawi iyo Tigree horumar la rabo Soomaaliya. Maandooriyahaas ariga
iyo dhurwaaga isu keenay laftiisa baa u sahlay in la arko Zenawi oo
u khidmeynaya shacabka Soomaaliyeed? Jaadku qeybaha ugu weyn buu ka
geystay in Tigreegu Soomaaliya qabsado maxaa yeelay wiilal badan oo
jirri ah waxba arigaas kama duwana. Maandooriyaha kale waa qabiilka
oo keenay in dadka qaarkiis uu gaarsiiyo meel ay lumiyeen miisaanka
garashada. Shaki ma leh in dadka Soomaaliyeed is gaarsiiyeen
waxyeelo aan ka yareysan tan hadda Tigreegu ku hayo Soomaaliya
laakiin faraqa u dhaxeeye wuxuu yahay markuu mooryaanku waxaas
falayey waxay ka ahayd qabiil ama waalli ee dan kale oo fog oo uu
lahaa ma jirin halka Zenawi rabo inuu diin, dal, iyo dadba na
dhaafiyo.
- Tan labaad hal-abuurku ma oran dhurwaagu wuxuu ariga usoo
gurayey ama siinayey caws ama caleen ee wuxuu yiri wuxuu u karinayaa
shaah! Shaaha ama kookadu waxay sii kordhinayaan in jaadku si fiican
u saaqo jirka. Xitaa haddii dhurwaagu ariga caws usoo gurilahaa
isagoo uga dan leh hakuugu naaxeen waxaan shaki lahayn in arigu ay
dani ugu jirto cawskaas wax kastoo hadhoow yimaada. Waxaa dhici
karta in la samata bixiyo ari cayilan oo caws helay laakiin maxaa
laga soo gaaraa ariga daroogeysan? Zenawi Soomaaliya ha qabsadee
sidaas oo kale buu wuxuu sii abuuray isku dir qabiil iyo inuu
Koonfur iyo Waqooyiba isku diro shacabkii Soomaaliyeed. Sida ariga
daroogeysan aysan waxba u fahmeyn ayuu Zenawi ka dhaadhiciyey shacab
ay qabyaalad iyo qaad isku darsameen in qabiillada kale ay cadow u
yihiin. Markaasey ku soo baxeen ari qayilsan oo shaah ka sugaya
waraabe.
Ama aan rabno ama dhibsannee waan ognahay in maanta qofka ugu
horreeya ee hadal ka oran kara arrinta Soomaaliyeed yahay Zenawi! See ku
dhici kartaa innagoo nool inaan halkaas gaarno? Waa uun ari daroogeysan
arrintiis.
Dhibta ugu daran waxay tahay Dhoodaan iyo halabuurrada Soomaaliyeed
intooda badan meel loo raaco ma leh. Anigu waxaan aaminsanahay iney ku
jiraan dadka Soomaaliya kuwa ugu liita ee ka gaabiyey waajibkii saarnaa.
Waa kuwii tirinjiray intaas oo hees ama gabay ee ka soo horjeedda
Itoobiya. Maanta marka laga reebo dhallinyaro u badan kuwo cusub ma
hayno meel ay ka baxeen. Xaggee qabteen kuwii magacooda ay yaqaanneen
Soomaali oo dhan? Waxay ka helaan in la yiraahdo kaalaya oo Addis Ababa
ka sameeya bandhig-faneed. Imisa jeer aragnay “hal-abuurro ama
fannaaniin” gabay ama hees ka tirinaya Addis Ababa? Ma kula tahay dad
Zenawi ka sugaya casuumad iney wax ka sheegi karaan isaga? Ma filayo in
Soomaaliya ay soo martay maalin ay maanta ka liidato marka ninkii ama
haweeneydii hal-abuur ah ee maanta aamusa/aamusta waxaan filayaa inaan
la isku halleyn karin. Inkastoonan rabin inaan u gefo hal-abuurrada
haddana Dhoodaan iyo saaxiibadiis meel loo raaco ma leh.
Goormuu dadku noqdaa ari ama xoolo? Yaa garanaya cid Ilaahay ka
badisa dadka? Diintu waxay sheegtay in gaalanimada iyo diin la’aantu
keento xoolonimo. Rumeyso ama ha rumeysan waxa Soomaaliya ku dhacay kama
suuroobi karto cid kale. Qof qof dhabodhilif ah la arag laakiin weligeed
lama sheegin ummad intaas le’eg oo dalkooda cadowgii koowaad ku soo
dhoweysay. Akhri waxa kala raacay gumeystayaashii qabsaday Shiinaha iyo
Kuuriya. Akhri kuwii Hitler qabsaday dagaalkii labaad. Marna ma dhicin
in dad gaalo ah ay waddankoodu ku casuumeen cadowgoodii koowaad. Laakiin
qof muslim ah hadduu diinta Ilaahay la dagaalo wuxuu noqonayaa xoolo
waxaana ka suurtowda wax aan gaaladu sameyn karin. Waxaan hubaa in
shacabka Itoobiya aysan ka suurtoobin waxa Soomaalidu ku sameysay
dalkooda.
Marar badan baad maqleysaa dad leh: hebel ama hebla maqaalkooda kuma
sheegaan waxa xalku yahay! Dadkaasi waxay xal u arkaan waxa dhegahoodu
jecel yihiin iney maqlaan. Marka qofkii raba inuu xoolonimo ka baxoow ku
dheg diinta Ilaahay.
Maxaa xiga marqaan? Soow seexasho ma aha? Ka warran ari uu awalba
waraabe soojeedka uga adkaa oo intuu jaad siiyey u seexday? Soow inuu
dabarjaro maaha? Arrintaas darteed baa Zenawi u rabaa inuu Koonfurna uu
qabiil iskugu diro sida hadda socoto isagoo xitaa sheekada soo gelinaya
Kismaayo. Soow hadda ma aragtid in gaalo iyo maangaabka Soomaaliyeed
bilaabeen: in argaixiso laga biilo dekedda Kismaayo? Sidoo kale hadda
Zenawi wuxuu furay furun cusub oo ah inuu isku diro Puntland iyo
Somaliland. Marka xoolahaasi isku daalaan buu sida ariga hurda rabaa
inuu ciribtiro.
Arigaas waxaan ku la yaabay waxay tahay ma ogola in orgidoodu ay
horboodaan. Soow dowladdii hore iyagu ma ridin? Orgidu inkastoo aysan
ariga kale wax u ogoleyn waxay dhurwaaga uga duwantahay in ay ari kale
yihiin oo aysan dani ugu jirin in arigu marto. Sidoo kale orgi maanta
qoor ah ayaa berri laga badinayaa oo mid kalaa ku soo baxaya laakiin
fursadda ah in ari dhurwaa ka adkaado si kasta oo dhurwaagaasi u tabar
daran yahay waa mid aan horay loo maqal.
Waxaan ugu necbahay oon makhaayadaha la fariisto ku nacay inaan arko
ari kale oo ku haya orgigii ina helbood ahaa (inta qabiilkiisa sheegaan)
iyo ridii ina heblood ahayd ayaa waraabuhu wuxuu u magacaabay jago
(wasiir)! Ariga dibadaha jooga waa ka sii caqli xun yahay kuwa
Soomaaliya jira oo marqaansan. Kuwa Soomaaliya jooga qaarkood cawskii
baa u gooyey (bariiskii) laakiin kuwayaga halkaan jooga origigii ama
riyidii aan daaq (shaqo) tagi karin waxaa cawskiisa/cawskeeda (ceyrta)
qaaday dadka ay u carareen. Belaayo haku dhacdo xoolo u qaba in xoolo
kale oo Zenawi xero ugu jira kheyr keenayaan.
Afeef: Micnaha maqaalku ma aha in qof kasta oo Soomaaliyeed xun yahay
laakiin intaanna badan waxaynu nahay xoolo.
cabdulwaxid@hotmail.com