SI AAN HASHA DHIIG LOOGA MAALIN!!!!
Soomaalida qaarkeed qoladii ay nacaan waxay ku habaaraan “Tiih iyo tala
waa!!”. Inkastoo aananan luqad-yahan ahayn, haddana waxan u malaynayaa in
“tiihu” yahay marka qofku uusan si dhab ah u ogeyn meesha laga haysto, “tala
waaguna” yahay inuu qofku qaato go’aan khalad ah, oo qiima badan ugu kaca, waqti
aysan jirin fursad lugu saxo. Ma ihi caalim ehel u ah inuu rayigiisa iyo xujadiisa ku “af-tiro” dadka
kale, mana ihi qof jaah iyo sumcad dugsanaaya oo ra’yigiisa ay u dhag
raaricinaayaan taageerayaal uu leyahay, ama af-maal suugaan macno fog leh wax ku
soo jiidan kara. Sidaa darteed ma filaayo inuu maqaalkeygu wax badan dooriyo
kumanaanka maqaal ee is-garbinayasa iyo afkaaraha kala jeeda ee ku xardhan
saxaafadda soomaalida. Haddaba anigoo ka mid ah caamada Muslimiinta
Soomaaliyeed, dhacdooyinkuna saamayn toos ah iyo mid dadban igu leeyihiin waxaan
arkay inaan qoro waxa ii muuqada, anigoo ka rejeynaaya akhriste kasta ee uusan
farax gelin qoraalkeygu inuu ii cudur daaro ogaadaana inaan wanaag u jeedo. Waxay dad badan oo wax qori jirey ku siganyihiin inay qalmaantoodu guraan oo
inqaastoodu qallasho waxaana ugu wacan wareerka qaddiyadeed ee haysta shacabka
Muslimka ah ee soomaaliyeed iyo tala-waaga lugu imtixaamay dadka isu xil-saara
inay metelaan. Ku dhawaad laba sano ka dib markii aan qorey maqaalkeygii “Muqdisho, Dhadhanka
ciidda iyo shiirka gumaysiga” kaasoo aan kaga warramay sidii aan u weynay
farxaddii ciidda Carafo markay gaaladu na qabsatey, Waxaan maanta jeclaa inaan
wax ka qoro dhacdooyinkii aan anigu shakhsiyan shaahiday. Waxaa fiicneyd inaan is bar-bardhig ku sameeyo farqiga u dhaxeeya Xabashida iyo
madiidinkooda berigii ay soo galayeen Xamar iyo Jubboyinka, islaweynidii iyo
shaafeertankoodii iyo manta oo markaad wejiyadooda aragto aad moodayso in loo
wado tiirka toogashada. Waxaa bilneyd inaan cabbiro, niyadda birta ah ee Mujaahidiinta Soomaaliyeed iyo
sida ay ugu qoslaan mar kasta oo gumaysiga iyo shaqaalohooda ay fariin
caga-jugleyn ah soo diraan. Waxaa wacneyd inaan ka sheekeeyo qisooyinka kuwii
shahiiday, kuwa goostay inay shahiidaan, iyo kuwa diyaarka ah. Waxa habooneyd
inaan sawiro dhibkii soo gaarey shacabka, hooyooyinkii gablamay, caruurtii
agoontowday, kuwii sida xoolihii meel lugu xareystay ee lacag la siistey, kuwii
xoolohooda iyo dhiigooda la bannaystay, kuwii sharaftooda meel looga dhacay ee
dhaawacdayada waayen jirkooda iyo dareenkoodaba loo geystay. Waxaa habboneyd inaan caddeeyo dharaandhirin iyo saafid taxaddar leh ka dib, in
Shacabka Soomaaliyeed uu yahay birlab aan la sahal lugu loodin karin balse ay
duruufuhu ka hilliyeen. Waxaan wanaagsanayd inaan ku digto kuwi laga harsan waayey oo kibirka iyo
akhlaaq-xumada isku suntey, sidii qaarna dacar-ta loo leefsiiyey gaarna ay
kabahooda uga carareen, qaarna ay hoos-kooda iska ilaaliyaan. Laakiin …. !! waxaa jira xanuun aan wax badan la taxarsaneyney oo waxaasoo dhan
na illowsiiyey…hadii waranka cadawgu naga asiibey wadnaha, waxaa jira mid aan
qarsanayno oo nooga taagan “xabaysta!” iyo meel aan dadka la tusi karin. Hadii
cadawgu naga jebiyey daanka iyo shanshada, waxaa jira sokeeye na jebiyey kubka
iyo biixi aan kabis lahayn!. Lama yaqaanno si loo sheegto iyo si looga aamuso toona. Inkastoo aan wax badan
manuunsannay oo aan hadda billownay inaan hirmacno, waxaa muuqata in cadawga iyo
sokeeyaha labadaba ay ka go’antahay inay suuskooda si waafi ah nooga beegtaan,
iyagoon kala jeclayn inaan qosolno iyo inaan oyno! Dad badani waxay ku doodaan in dhibaatada na haysata ay sababtoodu ku
koobantahay cadawga gumaysiga ah ee na qabsaday, iyo luggoyada ay weligooda reer
Bariga iyo reer galbeedku nala daba socdeen, hase yeeshee waxaa xaqiiqo in wax
badan oo ka mid ah ay sabab u tahay annagoo marka hore is-moogeysiinna inta ay
arrimuhu hoos u qodan yihiin, annagoo aysan noo caddayn cidda aan dagaalka kula
jirno, iyo saamaynta ay yeelan karaan hadalladeenna , ficilladeenna iyo hab
dhaqankeennuba.
Kacdoonkii Maxkamadiihii Islaamiga ee 2006 wuxuu abuurey fursad ay dadka
wanaagga jecel ay wax uga qabtaan dhibaatada ragaadisey koonfurta Soomaaliya,
hase yeeshee waxaa jirey “talo-waa” la kowdsay markii ay soo baxeen, iyagoo ku
guul darreystay inay si mideysan u sheegaan waxa ay yihiin, cidda ay la
dagaashan yihiin, ujeeddadooda. Sababihii keenay inay maxkamadihii Islaamku dagaalka uga adkaadaan isbhaysigii
argaggaxa waxaa ugu muhiimsanaa taageeradii xagga tababarka iyo ciidanka ee ay
ka heleen dhaq-dhaqaaqa Al-shabaab oo ahaa awoodda runta ah ee maxkamadaha, iyo
aqbaladdii ay ka heleen qaar ka mid ah culimada, wax garadaka iyo inta wanaagga
jecel ee shacabka soomaaliyeed. Halkaas waxaa mudan in hoosta laga xarriiqo in
Al-shabaab iyo kooxaha kale aysan midkoodna awoodi lahayn inay soo hooyso
guulihii ay ku gaareen isku duubnida. Inkastoo ay ahaayeen iftiin soo baxay loogana diirsaday dhulkii ay gaareen,
loogana hanaqal taagey meelaha aysan weli gaarin, haddana waxay la mid ahaayeen
hal jir oo ay ”dhowr nafood” kujiraan, oo midba dhinac u jiidanaayo, taas ayaana
keentay in marar badan wax lagu fasiro la garan waayo hab-dhaankooda kala
duwanaa iyo kala hadalkoodii joogtada ahaa. Waxaa jirey ”is-kahsi” xagga
habdhaqanka ah, waxaana si aad ah u caddaa inay yar tahay kalsoonida laysku
qabo, laakiin waxaa la aaminsanaa in la heli doono fursado dheeraad oo waxaa
jira laysugu caddeeyo, iyadoo la door biday in loo korto inta ”keynta gubanaysa”
laga baxaayo, laakiin taas waxaa ka soo hormaray qaddarta Alle iyo bur-burkii
deg-degga ahaa ee ku yimid maxaakimta (sabab kasta ha lahaadee). Waxaa ka hoosbaxday talo muhiim ah markii ay ku guul darreysteen inay kala
doortaan laba dariiq iyagoo doortay inay wax qar-qariyaan. Labada darqiiq waxay
kala ahaayeen (1) In Golihii Maxaakimtu uu qeyb ka noqdo Jihaadka Caalamiga ah
ee ay reer Galbeedka kula jiraan Musliminta kale ee dulman ee caalamka sidaasna
wax lugula qeybsado mujaahidiinta kale ee ku hawllan arrimahaas. (2) iyo in
ujeeddadoodu ay ku koobantahay inay nidaam iyo kala dambayn ay ku soo celiyaan
waddankaan dhibaatadku ku raagtay iskuna xukumaan shareecada Islaamka. Taladaas
dayacantahay waxay keentahay ina lakala hadlo, la kala dhaqan duwanaado, ugu
dambayntiina qolo walba ay raadsato cid ay ku kaashato taageeridda aragtideeda.
Haddaba maanta waxaa mar kale nala gudboon talo, waxaana loo baahanyahay inaan
sidii horey u dhacday uusan dhinac kasta wax ku xugmin xamaasaddiisa, carada,
jacaylka iyo nacaybka uu u qabo dhinac kale. Waxaan filayaa in dhinac kasta uu
qabtay hawl aad u dhib badan oo ah in la huro naf iyo maal loona babac dhigo
cadaw arxan daran oo ay dhab ka tahay inuusan laf iyo hilib toona reebin. Hase
yeeshee waxaa muuqata inay ku guul darraysn doonaan arrin kaas aad uga fudud oo
ah inuu qofku xamaasaddiisa iyo dareenkiisa xakameeyo, dul-qaato, dadka kale ku
dhegysto “dhego laab u daloola”. In badan oo ka mid ah dadka wax qora waxay hiwaayad u ah inay si daran u
naqdiyaan (oo meyd garaacaan),qolyaha dowladda naanaysta ka dhigtay, iyo kuwa
taageera, iyagoo kasoo qaadaya in dadaka xabashida la dagallamaya ay ceeb ka
saliim yihiin ama aan la gaarin waqtigii wax laga sheegi lahaa, haddaba taasi ma
aha caddaalad, waxaanna hubaa in kooxaha mujaahidiinta iyo muqaawamadu aysan ka
khalad yareyn, cadawga muuqda iyo midka qarsoon, saxaafadduna si ay runsheeg u
noqoto loo baahanyahay in ay si isku mid ah u iftiimiso. Waxaa madax lasoo baxay sheydaankii oo ku guuleystay inuu qolo kasta u qurxiyo
khaladkooda. Waxaa cod dheer lugu maqlayaa sheegashooyinkii dhalnteed-ka ahaa ee
qolo walba ay dadka u sheegi jirtey inay iyaga oo kaliya ay u dagaallamaayaan
ilaahay dartiis, inta kalena ay ku dagaallamayaa “raayo” mugdi ah iyo dariiq
khaladan oo uusan Ilaahay ka raalli ahayn. Waa jidkii ay weligoodba mari jireen Islaamiyiinta oo tii ugu geesa-weynaata ay
billabi jirtey inay geedaha kala baxdo kuwa kale ilaa ay iyada iyo dugaaggu isu
soo haraan! Waxay billaabeen is-yasiddii, kooxaysigii, yooyoontankii, waxa
harayna waa in mid dhur daran (Sida kii boqna jarey hashii Nebi saalax) uu dilo
mid ka mid ah dhinaca kale, halkaasna ay cagta saaraan waddadii halaagga, sidii
dhacday markii la diley hoggaamihii Jabhadda Salifiyiinta ee Afgaanistaa Sh.
Jamiilurraxmaan (Ilaahay ma qaddaree)!!
Sh. Xasan iyo Sheekh Shariif
Walaalayaal ma rabo inaan ku dheeraado dhacdooyin hore, iyo inaan idiin kala
garqaado, oo aan idin kala xukmiyo sidii ay yeelaan dadka wax qora barkood.
Haddii horey laydiin dhihi jirey “ Culimada daaya”, maanta waxaan laga maarmayn
in wax laysu caddeeyo. Haddii sida aad ku socotaan aydan dhaqso uga soo laaban, waxaad ku dambi tihiin
Xabashida, hadii aydan ka dabmi badnayn. Taariikhdu waxay qori doontaa in iyadoo
ay iska dhicinta cadawgu mareyso meel aad u rajo wanaagsn, aad u qasadeen inaad
dantiinna shakhsiga ah raacataan ama aad dareenkiina qofnimo ama danaysi kooxeed
aad ka doorateen midnimadii. Waxaa diiwaanka geli doona in sidii ay dadka
soomaalyeed idiin soo eegaayeen ay ogaadeen in halkii ay khery ka sugaayeenna ay
shar maliiqan kasoo butaacdey. Walaalayaal kolley ma filaayo inuu midkiin
tanaasulo kan kale, laakiin hadii aad tiinna raacateen joojiya sheegashada
masuuliyadda dadka dhiiggooda daadinaaya, si ay hoggaankooda u doortaan, si
arrinku uusan saamayn ugu yeelan jabhadda gudaha, khaladkiinnunu uu u noqdo mid
idinka idinku kooban. Ilaahey ma wuxuu idin amrayaa inaad dad ay duqeyn iyo xasuuq kusocdaan oo
masaajidda lugu gawracaayo aad idaacdaha uga baahisaan tafaraaruq iyo kala tag?
Ilaahay ma amro foolxumo ee fadlan isu noqda haddii ay wax wanaag ihi idinku
hareen, hadii aydaan sidaas yeelin, kolley Ilaahay jid ayuu noo furi doonaa,
taariikhduna ma naxariisan doonto waxaadna ka geli doontaan meesha ay ka galaan
kuwa kale ee xumaha fala. Waxaa lala dhakafaarsanaa khilaafka idinka iyo Al-shabaab intii aad isku dayi
lahaydeen inaad kaas xallisaan, side naftiinu ugu raalli noqtay inaad intii kale
kala dirtaan?? Fadlan kusoo noqda waddanka oo taga meel aad idinkoo xor ah aad
ku wada hadli kartaan. Sh. Xasan ma waxaad leedahay Efawarqi iyo Xuseen Caydiid dhexdooda ayaan dowlad
Islaami ah kasoo wadaa?? Waxaa fahmi waayay sababta ay reer galbeedku kuu
dhahaan waa wadaad mayal adag!! Fadlan ku soo noqo dariiqii lugu ballamay ama
sida qeyrkaaba yeelay iska naso hadii aad caajistey adigoo aan masuuliyad
sheeganayn. Sh. Shariif, gartu Ilaaheed ayay taqaan adiga si gaar ah ayaa fartu kuugu
gudantahay, waxaa muuqata inaad ka dallacday dadkaaga oo aad ku tashanayso wax
kolley aad adigu ogtahay. Haddii aad arrinka Jabuuti kheyr ka raadinaysay, waxaa
caddaatey inuu shar yahay, hadii aad tan dambe lafteeda u qasadday, uma horreyn
doontid nin isagoo nool xijaabtey, waxaanna kaaga digey ciribtii Yacquubkii
Masar!. Fadlan hadii dariiqu kugu dheeraaday inta kale ha niyad jebin ee ama
kusoo noqo ballantii aad dadkaaga u qaaddey ama iska nasoo adigoo aan masuuliyad
sheegan, dadkana kala qeybin, xoogana kala dhantaalin.
Sh. Cumar Imaan
Marna ma isweydiisay waxay ay soo kordhinaayaan fatwooyinka aad usoo ridayso
sidii wiil dhallinyaro oo qori deegta u saran dhawr xabbadood ka riday isagoo
aan u aaba yeelin meesha ay ku dhacaayaan, cidda dhibsata iyo cidda ku faraxda?
Maxay fatwadaadu ku soo kordhinaysaa dad aad awalba iskhilaafteen???. Maxay
taraysaa fatwo uu adiga waaqicaagu burinaayo? Fatwada sheeku waxay qiima ku leedahay in ay wax u caddeeyaan dad masalo doon ah
oo aysan fatwooyinka ka qiimaha laga qaadin lagana dhigan aalad laysku difaaco.
Tusaale ahaan hadii lagu wediiyo su’aashaan oo kale waxaa laga yaabaa in ay
dadka qaarkii wax ka faa’iidaystaan (maadaama ay aad ugu murmaan): Tee ayay ku jirtaa maslaxadda dadka, diinta iyo dalka Soomaaliyeed: In loo dhiso
dowlad la mid kuwa ka jira waddamada wadaaddo badan ay qoysaskooda geysteen (oo
reer galbeedka u nacamleysa) iyo in ay iska samraan inta uu ka guulaysanaayo
jihaadka caalamiga ah ee lagala soo horjeedo reer galbeedka, dunidana ay ka
hareyeyso caddaaladda Islaamka, si qofkii geeriyoodana uu shahiid u noqdo kii
noolaadana uu sharaf ugu noolaado? Ma noo saafi kartaa mowduucaas, marka aad xor
noqoto ka dib??
Garabka Jabuuti
Sh. C/raxmaan Jinaqow, Dr. Daahir Geelle, Prof Sh, Ibrahim caddaw…. aaway
cod-karnimadiinnii, aaway fasaaxadii uu ilaahay idin siiyey oo aad xaqa ku
caddayn jirteen? Maxay tahay sababta aad laba kelmadood oo lugu qanco isugu
xijin la’dihiin? Maxay tahay sababta aad geedaha isuguu aadinaysaan? Jawaabtu
waxay tahay waxa cod-karka ahi waa xaqa iyo runta!! Walaalyaal xaqu waa bariiranyahay, baadilkuna waa silloonyahay. Waxaa muuqata
inay wax idinka khaldanyihiin. Waxaan dhici karta in arrinka jabuuti idinka
yahahy xujo fur aad u samaynaysaan reer galbeedka sidaasna aad u kabateen
dacartii(heshiiskii) ay walaaqeen. Laakiin waxaa muuqata in waxa laydiinku
xujeeey ay yihiin “dhunkaal” lugu dhinto oo wax dawo ah aysan ku jirin. Walaalayaal arrinka “Mustacmaradda” Jabuuti ka socda wuxuu jahawareer ku riday
dadkii idinka amar qaadan jirey oo raayadiinna ka hoos dagaallami jirey, wuxuu
ciidankiinni ka dhigay agoon waxayna ku khasban yihiin inay dhinacyo kale ku
biiraan ama ay hhubka dhigaan oo madax ciidda gashadaan. Haddii ay taasi idin
danqinayso waxaa laydinka sugayaa inaad soo noqtaan, hadii aydaan kala jeclayn,
malaha kuwaan moodnay ayaadan ahayn!. Walaalyaal waxaa adag in la kala garto qofka wanaagga kuugu naseexaynaaya iyo
kan jeesjees iyo jaa’ifo u jeeda, laakiin runtu waxay tahay inay wax badan iska
kiin beddeleen, Xitaa waxaa isbeddelay wejiyadiinna!! Ma aha wax aan tebaayo
cimaadadihii madax idiin saarnaan jirey, ama inaan qoonsaday luqun-xirka aad
isku merjiseen. Ilaah baan idinku dhaarshee is daba qabta, haddii aad wanaag u
jeeddeen aniga waxay ila tahay inaadan dariiqiisi haynin, hadii aad wax kale u
jeeddeena, ma ihidiinn dadkii laga malaysan lahaa. Fadlan mar uun ku soo noqda
sidiinnii, si ka fiicanba ha joogtee! Sida muuqata Ilaahay fursad aad ku soo noqotaan ayuu idin siiyey maadaama wixii
la weday ay iska burbureen, fadlan haka daahinnina inaad waxaas ka beri noqotaan
waddankana aad ku soo noqotaan si aad u dhaydaan boogihii ka dhashey
khaladkiina, una badbaadisaan wixii kumanaanku u shahiideen, u dhaawacmeen ama u
barakaceen.
Garabka Asmara
Walaalayaal anigu runta ahaantii waa ogahay waxa u dhaxeeya Al-shabaab iyo
maxkamadaha intooda kale ama alshabaaab iyo isbahaysigii dib-uxuraynta, laakiin
anigu iima muuqdo farqi weyn oo idiin dhaxeeya idinka iyo qolyaha Jabuuti.
Sababtu waxay tahay Al-shabaab ma aqoonsana wax la yiraahdo Beesha Caalamka,
qaramada midoobay iyo xuduudaha ay gaaladu calaameeyeen. Laakiin adinku inta aan
ka war qabo waxaad aqoonsantihiin waxaas aan soo sheegay. Anigu ma fahmin koley
hadii farqigiinnu uusan ahayn wax weyn sababta aad ugu yaraa midnimada kelmadda
u ilaalin weyseen oo aad ugu ekaysan weydeen inaad diidaan wax ay wadaan inta
layska soo gaaraayo? Waxa aad isku haysaan sow maaha hala hadlo iyo yaan lala
hadlin?? Taasi ma u qalantaa in loo gawraco midnimada iyo wada jirka, si jaha
wareer iyo niyad jab loo geliyo shacabkii isku kiin hallaynaayay?? Ma waxaa wax kasta idinkala weynaaday inaad raalli gelisaan dowladda aad martida
u tihiin oo la hubo hadii ay teeda idinku gaarto inaysan qaddarin doonin
taageerada aad siiseen mowqifkooda.? Fadlan waddanka ku soo noqda.. waxaa laga
yaabaa inay wax kasta fududaadaan markii la tago meel xor la yahay.
Maxaakimta Gudaha
Walaalayaal waxaa Ilaahay iyo addoomadiisuba ay marqaati ka yihiin inaad hawl
weyn oo dawladaha qaarkood aysan qaban karin qabateen, cadawga soomaaliyeedna
aad xanuunjiseen, dhiiggiinna qaaliga ahna aad hurteen, hase yeeshee muuqata
inuu idin soo wajahay jahawareer weyn oo su’aal gelin kara hadafkiinna. Waxaa
idinkula talinayaa inaad yeeshaan sidaa: (1) Inaad ku dhawaaqdaan hogaan ku meel
gaar ah muddo cayiman leh (2) Inaad muddo u qabataan hoggaankiinna kala
qeybsamay ay kusoo galaan waddanka gudihiisa (maadaama ay duruuftu saamaxayso).
Haddii midkood idin Ajiibo aad isaga caleema saartaan. Haddii ay idn wada
ajiibaan waa sidii la rabay ee khaladaadkii dhacay wada saxa. Hadii ay idin ajiibi waayaan waxay ila tahay inaad 2 arrimood mid samaysaan: (1)
Inaad ku dhawaaqdaan hogaan cusub oo raga gudaha ay ku mideysan yihiin. (2)
Inaad la midowdaan garabyada kale ee mujaahidiinta sida Alshabaab iyo Jabhadda
Islaamiga. Maxaad uga caroonaysaan hadii la yiraahdo maxkamadaha waa burbureen?
Yaa idiin amiir ah? Yaad hadafkooda fulineysaan ma Jabuuti mase Asmara?? Haddii
aad ku tala jirtaan inaad labada u dhaxaysaan, waxaa yaraan doona inta aad socon
kartaan ee si aysan taasi u dhicin fadlan go’aan qaata. Arrinka ugu khatarsan ee idinku soo socda waa in qaarkiin loo isticmaalo in lugu
socodsiiyo arrimo aysan oggolayn garabyada kale ee muqaawadada, kaasoo ah hadii
aad aqbashaan meesha ay ku halaagsami doonto diintiinna iyo sharaftiinna, waxaan
rejeynayaa inaad ku adkaysan doontaan mowqifkiinna wanaagsan iyo ixtiraamka aad
kula hadashaan walaalihiinna kale ee aad aragtida isku diidan tihiin. Heshiiska Jabuuti hadda wuxuu ku egyahay inuu wax qariib ah oo aan la fahmi
karin, laakiin wuxuu isu beddeli doonaa musiibo weyn marka laysku dayo in adinka
laydiin isticmaalo ku sandullaynta dadka kale. Idinkuma ogi inaadan dhug la’hayn
laakiin waa iga xasuusin.
Soomaalida Wax Bixisa
Walaalayaal Ilaahay ha barakeeyo xooggiinna iyo xoolihiinna. Waxaad ku jirtaan
laba Jihaad oo dhinacna waxaa la idinkaga baahanayahay inaad bixisaan xoolaha
cadawga lugula dagallamo dhinacna aad u gargaartaan dadka uu cadawgu
barakaciyey, agoonteeyey, ama dhaawacay. Waad arkaysaan sida uu xaal yahay.
Waxaad arkaysaan in raggii hoggaanka u ahaa maxkamadihii islaamiga ay doorteen
in mid waliba ama geed cidlo ah jiridda ka qaniino ama uu la yimaado wax la
inkiro. Waxaa laydinkaga baahan yahay inaad hubisaan waxa xoolihiinna lugu
samaynaayo. Waxaa loo baahanyahay inaad heshaan dariiq aad wixiinna ku
gaarsiisaan dadka dhimbisha gacanta ku haaya. Fadlan indhaha ku haaya waxa
gudaha waddanka ka dhacaaya, yaan xoolihiinna lugu gumaysanin dadka cadawga
hortaagan oo hadii ay ka wareegaan ay dalkeenna, diinteenna iyo sharafteennuba
ay “baylah” noqonayaan. Waxaan idiin soo jeedinayaa haddii ay maxaakimta guduhu
ay go’aan qaataan inaad go’aankooda aad ku taageertaan, wixii karaankiinna ahna
aad iyaga iyo walaalohooda kale ee mujaahidiinta ku tartaan.
Sh. Xasan Turki
Sheek xasanow waan ka xishoonayaa inaan afkayga kugu taago, maadaama aad tahay
sheikh heybad leh, sababna u ah inaan yeelanno miciyo aan cadawga isaga celino.
Ma filayo in qoraalkaygu ku soo gaari doono, ama hadii uu ku soo gaaro wax ku
qaadan doonto, laakiin maaadama aad saxaafadda Isticmaashey, waxaa u jeedaa in
dadka ra’yigaaga dhegeystay ay siyaabo taada ka duwan ay wax u arki karaan. Waxaa tahay nin kelmaddiisa la maqlo dad badanna ay ixtiraam u haayaan gaar
ahaan qeybaha kala duwan ee mujaahidiinta. Waxaad ku hawlaneyd inaad wax isku
keento, laakiin waxaad ku dhawaaqdey kala dirid aan isu soo noqosho lahayn!.
Waxaan dhegeystay inaad gaalaysiisay Sh Shariff. Sidoo kale waxaad meel khatar
ah gaarsiisey Ibrahim Shukri iyo Sh. Xasan Daahir. Yaad ku tala gashey inaad
heshiisiiso?? Haddii aad aaminsantahay in dadkaasi ay taageera beeleen oo la
gaaray waqtigii xargaha iyo heeryada laga furan lahaa waxaan kuu sheegayaa inaad
khaldantahay, waqtiga ayaana kuu bayaanin doona. Wareysi aad BBC siisyey dhowr maalmood uun ka hor, hadlkaagu kaas aad ayuu uga
duwanaa oo waxaad lahayd “laba Sheekh inay ilaahey u tooban keenaan oo soo
noqdaan baan rejeynayaa”, maxay tahay gaalnimada dhowrka maalmood gudahooda
cirka ka soo boodday?? Maxay tahay ujeeddada laga leeyahay in lagaa tufo
fatwadaas ka dibna laga duubo?? Maxaa swirkaaga loogu arki waayay website-ka
kataaib, fatwadaas ka hor? Waxyaabaha aad ku gaalaysay waxaa ka mid ah inuu Shariif aqoonsanyahay waxa la
yiraadho “Beel caalam” iyo inuu la shirey. Haddii gaalo lala shiro ay gaalnimo
tahay, waxa filayaa in la gaaloobay markii uu jirey nidamkii maxaakimta ee aad
ka tirsanayd iyadoo ay shirarka qaar ka qeyb geli jireen qaar ka mid ah madaxda
Al-shabaab. Marka ma wuxuu ku gaaloobay inuu la gooni noqday? Haddii aanan khaldanayn, waxaad ugu baaqdey Soomaalida qurbaha inay xoolohooda
ku bixiyaan Jihaadka, haddaba maxay ku la tahay inay aqoonsan yihiin beesha
caalamka, la shiraan la deggan yihiin una shaqeeyaan, abaalna u haayaan? Ma
gaalada ayay soo gelaayaan mase muslimiinta? Mase arrinku wuxuu khuseeyaa dadkii
aad beri wada socoteen?? Waxaa kale oo aad ka dhawaajisey in la qabtey oo lasii daayey. Ma kaa dhabaa
inay taasi yaab kula tahay? Miyaanay gaaladu soo daynin dad ay geeyeen
Guantanamo oo ugu horreeyo Mulla C/salaam Daciif? Miyeysan iska sii deyn Wakiil
Axmed Mutawakil? Miyaaney Pakistaan ka qabanin Mujaahid Carraale(Allaha soo
furtee) iyagoo ninkii ay la qabteenna u dhaadhiciyey Guantanamo? Miyeysan sii
daynin kuwo ay ka qabteen Jubbooyinka? Miyaadan adiga laftaadu ogayn in Shariif uusan weligii sheeganin inuu khatar
toos ah ku yahay reer galbeedka? Markii Guddoomiyaha aad u dooranayseen ma wuxuu
idiin sheegay inuu reer galbeedka la collaytami doono? Miyaysan istiraatiyadda
gaalada ka mid ahayn inay cadawyadooda kala hormariyaan iskuna dayaan inay kala
shaki geliyaan? Tusaale ahaan, adiga meel loo tiriyo inaad ka taliso ayaa laga
abaabulay weeraro loo geystay danaha reer galbeedka, adiguna waxaad qirtey inaad
ku faraxday, maxaa la yaab ka dhigay in adiga iyo Shariif siyaabo kala duwan
laydiinla dhaqmo? Sheekhow ma galaaysiineysaa qofkii aan caqligiisa iyo fekerkiisa aan ku jimaynin
kaaga?? Arrinku miyuusan ku koobnayn inay meel aan xal jirin xal ka raadinaayaan
loona baahanyahay in guntiga la qabto, ama aayar laga tashado? Sh. Xasanow hadii Shirkii Jabuuti uu Albaabada u furey tafaraaruq iyo dhabar
jab, fatwadaadu waxay irdaha u ballaqaday arrin ka khatarsan, taasoo ah inaad
bananaysay dhiiggooda, rag arrinkaas wax ay ku sharciyeystaan la’aana aad saxiix
iyo tiimbare u saartey. Arrinku hadda wixii ka dambeeya waxaa weeyaan cidda lugu
billaabi doono, ciddda loogu aari doono, inta uu galaafan doono iyo inta uu ku
ekaan doono!!! Allaahumma Sallim!!. Fadlan ka laabo arrinkaas, hadii aadan sidaas yeelin, si fiican u xanjeero si
uusan dharkaaga kaaga gaarin dhiigga gondahaaga kusoo butaaci doona, haddii
uusan adigaba ku galaafan!
Al-shaabaab
Walaalayaal ilama aha inay sheeg-sheegis u baahantahay kaalinta aad ku leedihiin
Jihaadka barakaysan ee ka socda guud ahaan dhulka Soomaalida. Caddayn uma baahna
in Xarakada Al-shabaab ay ahaayeen laf-dhabartii maxaakimta, inay ahaayeen
nudihii ay kasoo bilaabatey dubaaxashada dib-usoo noolaanshaha jabkii weynaa ka
dib. Inaad tihiin kuwa dhiiggooda iyo dheecaankooda u daadiyey Jihaadkuna uu
dhab ka yahay. Laakiin sida bani’aadam kasta uu marna u khaldamo marna u saxmo,
waxaa ii muuqata arrimo aan isleeyahay waxay u baahan yihiin fiiro dheeri iyo
taag-taagsi si aysan arrimo badan isugu milqin. Walaalayaal, cid kasta waxbaa loo sheegi karaa, dhaliishooda ayaa laga hor
caddeeyaa marka laga reebo adinka. Sida aad ogtihiin (lagana yaabo inaad ku tala
gasheen) qof kasta oo ku hadla wax kasoo horjeeda rayigiinna wuxuu u cabsadaa
naftiisa. Waxaa muuqata inaad is cajabiseen oo aadan u aaba yeelayn dareenka cid
kale. Cimilka idin galay kama soo billaabanin Asmara iyo Jabuuti midna, waxaana
mar kasta laydinka fahmayaayay inaad u arkaysaan qof kasta oo aan idinka ahayn
inuu daba joogo dan shakhsi ay ama ku dagaallamaayo “raayo” mugdi ah oo jaahili
ah!! Maxkamadaha (oo idinku aydaan aqoon-sanayn, xitaa shirkii Jabuuti ka hor), waxay
sheegeen inay u dagaallamaayaan inay kelmadda Ilaahay kor noqoto, shareecada
Islaamkana looga dhaqmo dhulka soomaaliya. Sidoo kale Jabhadda Islaamiga anigu
inta aan ka arkay ariinkoodu waa cad yahay oo waa sidaas oo kale. Inta aan ogahay farqiga kaliya ee idiin dhaxeeya waa inaad adinku doonaysaan in
qeyb laga noqdo muslimiinta jihad doonka ah ee caalamka dhulka soomaaliyeedna uu
yahay meel aysan muslimiintu kala xigin. Arrinkaasi miyuusan ahayn mid dadaal
(Ijtihaad) geli kara? Amaba laga yaabo in laydinkaga gar leeyahay? Sida ay ila
tahay Ilaahay waa nugu addonsaday inaan isku xukunno shareecadiisa laakiin
nuguma addonsan inaan raaciye u noqonno Muslimiin kale oo iyaguba duruufahoodu
haystaan.
Waxaad mar kasta u muuqateen inay ”far” idiin laabantahay. Markii Soomaalida in
badan ay farxad la kala bateen berigii maxaakimta, qaar idinka idinka mid lagama
dareemaynin wax farxad ah iyagoo ogaa inaan dagaalkii dhabta ahaa uusan
bilaabanin, cidda runta ah ee ay ishayaan aysan ahayn qab-qblayaashii Muqdisho,
waxaana soo xasuusan jirey marka aan qiimeeyo xaalka qaarkood, tix gabay oo
aanan aqoon cidda marisay: “Waan kula cawaysimahayaa kugu calool maahi
Meeshaan ka ceel-shubahayana waa carro an muuqan!!” Walaalayaal sida aad ogtihiin waxa ka dhacaya meelaha qaarkood ma aha wax habeen
iyo maalin ku dhashey, ee waa wax ka dhashey cuqdado laysu qaaday intii la wada
shqeynaayay, iyo qanaaco ay ku qanceen walaalha qaarkood inaydaan dib dambe u
wada shaqeyn karin sidaas darted waxaan anigu arkayaa inaad wax ku leedihiin
kala tagga iyo kala leexashada. Waxaad mar dhow soo dhigteen website-kiinna Cajalad ku saabsan Saalax Nabhaan
(Abuu Yuusuf), oo ay wax badan reer galbeedku sheegeen inuu ka mid yahay rag
sheegeen inay dartiis u asaaseen Isbahaysigii argaggaxa (Ashahaado la dirirka).
Waxaan hadda ka hor dhigeystay waraysi Abuu Mansuur(Allaha dhowree) uu leeyahay
“maba jiro nin aan naqaano oo magacaas la yiraahdo”. Haddaba Maxaa keenay maanta
inaad qirataan joogitaanka ninkaas idinkoo weligiin beenin jirey?? Abuu mansuur
ma run ayuusan waagaas sheegaynin mase markaas ka dib ayuu bartey? Waxaan xasuustaa inaan adduunka ugu necbaan jirey qofkii aan ka maqlo ninkaas
iyo walaalihiisa kale joogitaankooda, annagoo ku tiring jirney munaafiqiinta,
Haddaba maxaad xujada noogu soo oogteen? Maxaad u qiran weydeenn markii uu socday dagaalkii Ashahaado la dirirka? Oo
Madaxdii maxaakimtu ay beenta u sheegi jireen iyadoo aan laga tala gelin
joogitaanka iyo bixitaanka raggaas? Fadlan caddaaladdii islaamka lugu yaqiinnay
ku jawaaba ee hadii ay caddaato in walaakaas iyo raggisii kale ay marti noo
ahaayeen, reer galbeedku ma nooga gardarnaayeen inay marna mooryaanytii
shayaadiinta ahaa nugu hubeeyaan, marna ay xabashi oo ay godob hore na
dhex-taallo?? Miyaysan ahayn wixii aan ku fali lahayn cidii soo dhaweysa dad col
noo ah? Walaalahaas laftoodu waxay ka yimaadeen waddamo dad muslminiin ah ay joogaan,
maxay tahay duruufta keentay inay Soomaalia magan usoo soo raadsadaan, maxay
soomaalidu ka taag roon yihiin muslimiinta joogta meelaha ay ka yimaadeen? Ma
waxaa tihiin dowlad saanaddeedu u dhamaystirantahay oo laga heybaysto. Haddii
aysan magan ahayn ee rag dagaal u jooga yihiin (sida ay gaaladu sheegaan), maxay
dhimbisha uga soo fogeeyeen daarahooda iyo ehelkooda? Dagaalka klaiya ee aan cadawgeenna la geli kanro waa kudhufo oo ka carar sida
aan haddaba aragno, kaasina waa qaab uu isku difaaco qof cadaw ka xoog weyni ku
soo gar darrooday qaab kale oo uu isku difaacana waayay! Ma aha qaab uu ku
dagaallamo nin dagaal u diyaar garoobay oo shafka u garaacay “qofkii muslim ah
ee baqa aniga ha isoo magansano”! Waa qaab aad ugu qasaara badan shacabka una
qasaara yar dagaal yahannada. Sidee loogu qanci karaa inaad qeyb ka noqotaan
dagaal horey u socday aadna u dhibaato badan? Idinku diyaar garowgiinnu uu kaas
yahay? Sidee baa looga raalli noqon karaa u yeeridda Abuu Yuusuf (Nabhani) uu ugu
yeeraayo muslimiinta Jihaadka doonaysa inay u soo deg-degaann xeryaha tababar ee
ka furan Soomaaliya? Waxa aad u dagaallmeyseen ma waxaa weeyaan in waddankeenna
laga dhigo xeryo lugu tababarto? Dad aan aanigu ka mid ahay waa la khaldanyahay
arrinkaas, maxay tahay xukunka ay shareecadu ka qabto inaan dhahno arrinkaas
tabar uma haynee naga daaya? Waxa aad u leedihiin kooxaha kale ee mujaahidiinta
“raayadoodu” ma cadda ama waa jaahili ma sidaas ayaa loola jeedaa?? Walaalayaal haddii ay jirto qolo fursad u haysata inay midayso kooxaha
mujaahidiinta, waxay ila tahay inay adinka tahay, waxaad u baahan tihiin oo
kaliya arrinka inaad ka daysaan caalaminimada, iyo dadka aan loo jeedin ee aad u
gacan haaadinaysaan, oo aad hadafkiinna ku soo koobtaan in Dalkaas cadawga
haysta laga xoreeyo luguna dhaqo shareecada Islaamka. Inkastoo aan cadawgu taas
lafteeda ku farxi doonin haddana waa meel ay ka wada siman yihiin mujaahidiinta
kale waa hadaf nafta looo huri karo. Adinkana waxay ila tahay inaadan taas
ilaahay ku caasinin haddii aad sidaas yeeshaan. Walaalayaal qolo kasta oo aan
tixgelin duruufta iyo deegaanka ay ku nool yihiin waxaa u dambeeya fashil.
Fadlan ogaada hadii aad inta kale kala dirtaan idinkuga kaligiin meel ma gaari
kartaan ee har eydaan ku sii nagaan doonin haka saarinina walaalihiin.! Walaalayaal Ilaahay wuxuu ballan qaaday kuna qoray kutubtiisa inuu dhulka
dhaxalsiin doono addommadiisa wanaagsan, idinka idinma saarra inay guushu soo
deg-degto, waxaa idin saran inaad u martaan dariiq sharci ah. Waxay ila tahay
inaadan moogayn in qof dhiiggiisu daadanaaya, ama xoolihiisa bixinaaya inuusan
ujeedin xummaan. Fadlan joojiya qoraallada wax dhaawaca iyo go’aamada aad la
kali noqonaysaan. Joojiya riyada ah in dadku ay isku si wax u arkaan wixii aad
farta ku fiiqdaanna horey looga wada qanco. Arrimaha ijtihaadka (dadaalka) keli
kara dadka haku ciriirinnina. Aniga waxay iila muuqataa in wax badan oo
dhaqankiinna ah ay abuureen kala fogaansho iyo kala shaki mustaqbalkana ay noqon
karaan wax aan ciribtooda la mahadin. Arrimaha caddaynaya in loo baahanyahay inaad dib u eegtaan siyaasaddiinna la
dhaqanka dad-ka kale waxaa ka mid ah qoraal ku soo baxay Interenetka kaasoo ka
hadlaayay cidda ay saamaysay xiritaanka garoonka Muqdisho waxaa aan meeshaas ka
akhriyey waxaa ka mid ahaa “Garoonka Xiridiisa sidoo kale waxay saameyn ku
yeelatay Dadka ku qaraabta magaca midowga maxaakiimta oo horay u burburay ayadoo
aan la garan Karin ujeedada dhabta ah ee ay u diidan yihiin go,aanka lagu xiray
Garoonka, waxaana ka hadlay arintaas.Dr.Cumar Iiman, Xaaji Yuusuf indha Cadde,
Sh. C/qaadir Cali Cumar iyo C/raxiin Ciise Caddow (?????)” . Hadalkaasi haddii
uu ka soo baxay cid ay arrintu ka go’do wuxuu daliil cad u yahay inaad shar
maagantihiin, Ilaahey baase arrinta xaqiiqadeeda og. Hadii aad ula jeeddaan ganacsatadu kama hadlin idaacadaha, taas waxaan u
malaynayaa inay kaftan idinka tahay, maxaa yeelay waa tee cidda Alshabaab kala
hadli karta idaacad xamarna sii joogi karta? Hadii aad ujeedaan waxay ku
faraxsan yihiin in garoonka laga xiro, taasi waxay weli muujinaysaa in
wadaaddadu markay rabaan ay been sheegaan!
Maxkamadihii way burbureen!!
Maxay tahay danta aad ku qabtaan inay burburaan maxkamadaha. Waxay ahayd markii
xamar laga Baxay oo hawdka laysugu tegay markii lasoo boodeen maxkamadihii waa
burbureen. Wuxuu ahaa Sh. Muxyadiin Maxamed Cumar (Ilaahay haka qabalee
shahaadadiisa), kii waqti dheer ku bixiyey inuu cadeeyo inay burbureen. Waxay
aheyd su’aashii aad sanka ka gelinayseen Sh. Xasab turki. Maxaa idinka
xumaanaaya hadii aad iska daysaan iyagoo koox kale ah, oo cadawga la dagaalama,
xitaa hadii ay labo nin yihiin??????
Dilalka Qorsheysan!
Walaalayaal arrin kale oo aanan jeclayn inaan hoos ugu daadego laakiin aad
ogtihiin in dad badan ay ka wel-welsan yihiin waa arrinka ku saabsan dilalka
dadka cadawga loo arko ee qorsheysan. Walaalyaal bilihii ugu dambeeyey arrinkaas
wax qariib ah ayaa ku soo kordhay. Waxaa dhici karta in uu khlad soo galay daba
galka iyo hubinta dadka oo laga yaabo in la fududaysto ogaanshaha waxa runta ee
qofka la daba socdu uu yahay. Sida aad ogtihiin qof bani’aadam ah (ma aha muslim
kaliya) ma banana in dhiiggiisa loo daadiyo wax shaki ku siman. Aniga waxaa ii
muuqata in hawlahaasi ay xadkoodii sharciga ahaa ka sii baxaayaan una baahn
yihiin dib u eegis.! Walaalyaal miyaan la gaarin waqtigii lugu waana qaadan lahaa khaladaadka ka
dhaca meelaha kale, weydiiya dadka gobolka Anbaar ee Ciraaq raadka khatarta ah
ee dilalku ay yeesheen hawlihii Jihaadka ee Gobolkaas. Waxay noqotey dalool
khatar ah oo uu cadawgu ka faa’iidyasto. Ogaada qofna ku farxi maayo walaalkii
ama aabbihiis dilkiisa, xitaa haddii uu markaas hore iska aamuso wuxuu suganayaa
fursad uu ku aargoosto, marka waxay ila tahay inaan la dilin qof aan loo arkin
in noloshiisu ay khatar toos ah tahay arrinkisuna uu cadyahay.
Jabhadda Islaamiga
Walaalayaal waxaa idinkugu hambalyeynayaa qeybta aad ku leedihiin xanuunjinta
cadawga iyo u dhimrinta shacabka. Waxaa adinka taas idiin dheer sida afkiinna
looga nabad galo oo aan inta badan la maqal idinka iyo qolo kale oo hawada ka
yoo-yoo-tamaaya. Waxay ila tahay inaad qeyb ka qaadan kartaan midnimada iyo
caddaynta xaqa, inaad ka fogaataan kooxaysiga oo ay muuqato inuu noo jiidaayo
meel khatar ah. Ila akhriya khudbadii Daariq Bin ziyaad u jeediyey mujaahidiinta
markii ay galeen Andalus (Isbayn),
http://www.aleppogate.com, waxaan nahay dad ay
baddiina ka dambayso cadawyo badanna ay hor joogaan, fadlan ku baraaruga
khatarta intaan taladau faraha ka bixin.!
Dhamaantood
Walaalayaal waxaan idiin sheegayaa in cadawgu uu fashilmay waxa kaliya ee uu ku
sii waari karana ay yihiin khaladaadkiinna. Hadii ay dhab idinka tahay in aad
cadaw la dagaashaan ku dadaala inay yaraadaan khaladaadkiinna hadii ay idinka
dhacaanna haku madax tiirinnina ee noqdo kuwa khaldama kuwa ugu qeyrka badan oo
qirta kana cudurdaarta wixii walaalihiinna kale ay idinku dhibsadaan. Waxaa
haboon in qola walba ay dib u dhigato waxa iyada u gaarka ah ee laysugu yimaado
kan asaasiga ah ee dhammaan laysku raacsanyahay, lagana fogaado wax kasta oo
keeni kara mad-madow.
Hadii ay Xabashidu Baxdo
Dad badan waxay aaminsan yihiin in hadii ay baxaan itoobiyanka oo ay waddanka
dib u qabsadaan Islaamiyiinta in loo bixi doono nasasho, iyagoo maanka ku haaya
wixii dhacay kal hore, laakiin xaqiiqdu waxay tahay inaysan meesha joogin dadkii
kala dambaynta iyo is-ixtiraamka badanaa ee markii loo jeedo qalbiga barafku
mari jirey, balse la soo rogi doono bog cusub oo uu ku xardhan yahay
dhiig-sokeeye, iyo muuqaal u eg kii Kaabuul markii ay mujaahidiintu ka adkaadeen
ciidamadii Ruushaka. Waxaa laga soo weriyey mid ka mid ah hoggaankii maxkamadaha
”ilaahay waa noo ballan qaaday guul, laakiin nooma ballan qaadin inaanan is
dilayn!!!!”, oo hadii lays dilo maxay tahay guushu?? Ma ogtihiin waxa ka dhacay Afgaanistaan iyo ugu dambayntiina ciraaq? Maxaad ka
ogtihiin in Axmed Shaah Mascuud beryihii hore loogu yeeri Jirey ’Libaaxii
Baansheer”, qeyb weynna ka soo qaatey Jihaadkii, in markii dambe ay isaga iyo
kooxihii kale ee dagaallamayay ay iksu khilaafeen sida wax loo maareynaayo,
markiisii dambana laysku qarxiyey maantana ay dadka qaarkiis ay ugu yeeraan
”Murtad-kii bakhtiyey!”. Ma laydiin warramay, waxa jira arlada, in dalka Ciraaq
Mujaahidiinta dowladda Islaamiga ah ee Ciraaq iyo Jeeshka Islaamiga ee Ciraaq oo
ahaa laba kooxood oo aad u awood badan in markii dambe ay gacanta isula tageen
oo dhiiggoodu isku daatay, haddana qolaba qolada kale ay leedadahay waa
munaafiqiin ushaqeeya qola heblaayo?? Marka la fiiriyo annaga sida ay wax u
socdaan inteen u jirnaa arrinkaas isaga ah?? Somaaliyeeyey hankiinna iyo filashadiinna hoos u dhiga, haddii aad sugeysiin in
hasha caano dhaay ah laga maalo, ogaada inay suurta gal tahay inay dhiiqi weydo
ama dhiig xinjiro ah iyo waxaan la filayn laga maalo hadii aan Ilaahay Madi loo
dhalin ama duul kheyr leh noo bixin! Ma filaayo in walaalaha qaarkood ay diyaar u yihiin inay ka faaiidaystaan
khaladdaka dadka kale, wxaan hubaa inay doonayaan inay iyaga laftoodu
dhadhamiyaan dacartii ay dhadhamiyeen kuwii iyaga ka horreyey balse waa loo
joogaa haddii sibirkii (dacarkii) shalay uu maanta sokor isu beddelaayo!
Berritona nin gaaraaba meel ma jirto!
Wixii aan saxo waxaa i waafajiyey Allaah, wixi aan khaldana waa nafteyda
daciifka ah iyo sheydaan. Mohamed Ahmed Wallays
inawallays@yahoo.com
4 Shawaal 1429 / 04/10/2008
Akhri: Maqaalladii Hore ee Maxamed Wallays
Faafin: SomaliTalk.com | Oct 5, 2008
|