Maxay tahay sababta Itoobiya Goloyaasha Dowladda ugu rareyso Nairobi

W/D: Amiin Yuusuf Khasaaro

Muqdisho, Soomaaliya

Markii ay sii cakirnaatay xaaladda Soomaaliya, Isla markaana dagaaladu ay noqdeen kuwo joogto ah ayaa Dowladda Itoobiya waxay Magaalada New York kulan ugu qabatay qaar ka mid ah wadamada IGAD wuxuuna kulankaas uu ka dhacay Qunsuliyada Itoobiya New-York, waxaana kulankaasi ka qaybgalay Dowladda Uganda oo ciidamo ka joogaan Soomaaliya iyo dowladda Kenya oo ah dowladdii martigelisay shirkii lagu soo yagleelay Dowladda Federaalka, waxaana shirkaasi ka maqnaa wadamada Jabuuti, Ereteriya iyo Suudaan.

Inkastoo aan si rasmi ah loo caddeyn waxyaabihii shirkii ka soo baxay haddana waxaa la isku raacay in goloyaasha dowladda la isugu geeyo Magaalada Nairobi ee dalka Kenya, waxaana la sheegay in qorshahan ay waddo dowladda Itoobiya.

Mas’uuliyiinta Dowladda Federaalka, inkastoo aysan wax faahfaahin ah ka bixin kulankaasi ayaa haddana afhayeenka Baarlamaanka Sheekh Aadan Madoobe waxa uu sheegay in aysan suuragal aheyn in dhamaan Dowladda loo raro Magaalada Nairobi, hase yeeshee warar kala duwan oo aanu ka helnay rag ku dhow dhow dowladda ayaa waxay noo sheegeen in jiraan sababo Dowladda loogu rari karo Magaalada Nairobi, waxayna ku tilmaameen sababahaasi, kadib markii ciidamada Itoobiya ee gacanta siinayey Dowladda Federaalka ay ku soo uruureen labo magaalo oo ah Baydhabo iyo Muqdisho, markii kooxaha ka soo horjeeda ay gacanta ku dhigeen Magaalada Kismaayo oo ah goob muhiim ah, markii Magaalada Baydhabo ay ka dhaceen dagaalo isla markaana lagu dilay qaar ka mid ah xildhibaanada Baarlamaanka, markii uu khilaaf soo kala dhex galay xubnaha Dowladda ugu sareeya, inkastoo khilaafkaasi la dhameeyey haddana waxaa weli muuqda raadkiisii, waayo waxaan weli la fulin qaar ka mid ah qodobaddii lagu heshiiyey oo ay ugu horeyso in maamul loo sameeyo Gobolka Banaadir mudo 15 maalmood ah.

Qodobada kale waxaa ka mid ah markii ciidamadii loo soo tababaray dowladda iyana ay bilaabeen in ay dhac iyo dil ka gaystaan qaybo ka mid ah Magaalada Muqdisho, markii kooxaha Muqaawamada ay bilaabeen in ay xiraan Garoonka Diyaaradaha ee Magaalada Muqdisho, iyo weerarada lagu hayo ciidamada AMISOM, dowladda Itoobiya waxay kaloo ka fekereysaa sidii ay faraha ugala bixi lahayd guud ahaan dalka Soomaaliya, sidoo kale markay aragtay in ay xirantay wadada isku xirta Muqdisho iyo Baydhabo, markii kooxaha Burcad-Badeedka ay gacanta ku dhigeen markab sida hub kala duwan oo ay Taangiyo ku jiraan oo ay Itoobiya ka cabsatay in ay gacanta ku dhigaan kooxaha ka soo horjeeda, markii Golaha Baarlamaanka uu dib Madaxweynuha ugu celiyay go’aankiisii ahaa in ay sii shaqeeyaan 13 wasiir ayaa waxaa halkaasi ka dhashay in uu khilaaf soo kala dhex galao Madaxweynaha iyo Guddoomiyaha Baarlamaanka, Ra’isul Wasaare Nuur Cadde oo ilaa iyo hadda aan magacaabin 13-kii wasiir, markii ciidamada Itoobiya ay joojiyeen hawlgaladii ay ka wadeen Magaalada Muqdisho ayna ku ekaadeen xeryahooda oo ah kadib markii ay ka daashay dagaalo joogto ah oo lagu hayey, markii Dowladda Federaalka laga jaray dhamaan dhaqaalihii ka soo gali jiray dalka Dibaddiisa, markii uu burbur ku yimid heshiiskii Jabuuti ee ay wada gaari lahaayeen Dowladda Federaalka iyo qaar ka mid ah kooxaha Muqaawamada, markii ciidamo ka tirsan Dowladda iyana u baxsadeen dhinaca kooxaha Dowladda iyo joogista ciidamada shisheeye ka soo hotjeeda, markii hubkii ay dowladda Itoobiya bixisay siisayna ciidamada Dowladda ay dib u gateen kooxaha ka soo horjeeda ciidamada Itoobiya intaas oo dhan ayaa lagu sababayn karaa in dowladda haatan looga waco Magaalada Nairobi oo ay u guurto,

hase yeeshee xildhibaana diiday magaciisa ayaa sheegay in dowladda Itoobiya ay dooneyso in shirka ka dhacaya Nairobi ee ay isugu tagayaan golayaasha dowladda in mudo 3-sano kale ah xilka loogu daro C/llalahi Yuusuf Axmed oo isagu ku doodaya in mudo 4 sano ah aysan waxba qaban dowladiisa oo ay ku jirtay dagaalo aan dhamaad laheyn, waxaa kale oo oo ay dowladda Itoobiya damacsan tahay in marka la isugu keeno Nairobi dhamaan xubnaha dowladda oo ay dowladda ka dhigto dibad joog si oo ay caalamka u tusto in Dowladda aysan ku laaban Karin Magaalada Muqdisho ilaa la helo ciidamo ka socda Qaramada Midoobey sidaana ay uga baxaan ciidamada itoobiya soomaaliya waxay kaloo uga danleedahay in dowladda Itoobiya ay caalamka ku cadaadiso in la helo dhaqaale fara badan si loola dagaalamo waxa ay ugu yeerto kooxaha Argaixisada ah.

warar kale ayaa sheegaya in shirkaas looga gol leeyahay sidii loo qaybsan lahaa awooda dowlada gaar ahaan mucaaradka ku sugan jabuuti isku soo wada duuboo ilaa iyo hadda ma cadda wax ka soo bixi doona shirkaasi.

Faafin: SomaliTalk.com | Oct 6, 2008

BAARID | SEARCH

"Markabka sida Taangiyada iyo hubka waxaan ka rabnaa Madax-furasho gaareysa $35 Milyan oo Doolar"
sidaas waxaa yiri nin u hadlay burcadda.. iyo Markab laga leeyahay Japan oo laga qaatay $2 million Akhri... Sept 28

Puntland oo Ganafka ku Dhufatay Heshiiska DFKMG La Gashay Shirkadaha Batroolka Wasiirka Tamarta DGPL ayaa waxba kama jiraan ka dhigay heshiiskii Eng. Kaanje la soo galay shirkadaha KEC iyo Medco Akhri Aug 22