Odayaasha iyo Culimada G/Bari oo Shan Nin oo Soomaali ah ka Badbaadiyey in
ay gacanta u Galaan Itoobiya....
- 5 Soomaali ah oo Loo Dhiibi Lahaa Itoobiya oo Laga Celiyey Qardho
Habeenimadii Arbacadu soo geleysey (May 14, 2008) ayaa magaalada Qardho
waxaa dib looga celiyey shan nin oo loo wadey magaalada Garoowe oo ciidankii
wadey ay doonayeen inay ku wareejiyaan Itoobiyaanka. Waxaana lagu celiyey
Boosaaso. Qaabka raggaas Qardho looga soo celiyey ayaa waxaa ka soo baxaya
warar kala duwan. Wararka ugu horreya ayaa sheegaya in 5-ta nin ay yihiin
rag Soomaali ah oo ka soo jeeda Gobolada Soomaalida ee Itoobiya Gumeysato.
Waxaana la qabtay galabnimadii Talaadadii (May 13, 2008) iyaga oo ka
soo degay Garoonka Diyaaradaha ee Magaalada Boosaaso, lana socdey diyaarad
ka timid Jabuuti. Markaas ayaa Ciidanka Sirdoonka Puntland ee loo yaqaan PIS
ay durbadiiba ula dhaqaaqeen Garoowe oo ay xafiis ku leeyihiin Itoobiyaanku
oo ah magaalada rag hore oo Soomaaliyeed loogu gacan geliyey Itoobiya.
Magaalada Qardho markii ay soo gaareen ayaa dib loogu celiyey magaalada
Boosaaso, waxaana la geeyey xabsi ku yaal dekedda magaalada Boosaaso.
Arrintaas ayaa timi markii ay Culimada, Odayaasha iyo Waxgaradka G/Bari ay
ka war heleen in raggaas loo wadey in loo gacan geliyo Itoobiya oo ay si
xoog leh uga dhiidhiyeen. Warar ay faafiyeen qaar kamid ah warbaahinta
Puntland ayaa sheegay in "amarka 5-ta nin lagu qabtay, isla markaasna lagu
xiray, uu bixiyey Madaxweyne ku xigeenka DGPL, ahna kusimaha Madaxweynaha,
Xasan Daahir Afqurac."
Waxaa wararku intaas ku dareen in markii madaxweyne ku xigeenka ay la
xiriireen qaar kamid ah Odayaasha G/Bari oo ay weydiisteen in aan raggaas
loo gacan gelin Itoobiya uu ku jawaabey in uusan hadalka odayaasha aqbalayn
isagoo marmarsiinyo ka dhigtay in "arrinku gacan ka awood saraysa ku lug
leeyahay". Wararku waxay intaas ku dareen in markaas arrintu cirka isku
shareertay oo gaartey Madaxweynaha DGPL oo ku sugan Addis Ababa oo uu ku
maqan yahay laga soo bilaabo
Maarso 30, 2008.
Markaas ayaa Wasiirka Amniga Puntland C/laahi Siciid Samatar iyo
Madaxweynaha DGPL Gen. Cadde Muuse ay si degdeg ah oo toos ah ula
xiriireen Guddoomiyaha Gobolka Karkaar, Yaasiin Siciid Xuseen
(Calaacala-weyne), iyaga oo weydiistey in raggaas oo ku soo aadanaa
Qardho ay dib ugu celiyaan Boosaaso, isla markaana uu Guddoomiyuhu xaqiijiyo
in raggaas aysan gelin gacanta Itoobiya. Guddoomiyaha Gobolka Karkaar oo
la hadlay saxaafadda ayaa xaqiijiyey in ay la soo xiriireen Madaxweynaha iyo
Wasiirka Amniga DGPL, kana dalbadeen in shanta nin laga celiyey magaalada
Qardho oo dib loogu celiyo Boosaaso. Yaasiin Siciid Xuseen isagoo u
waramayey idaacada Codka Maraykanka waxa uu yiri: "Xalay (oo Arbaca soo
geleysey May 14, 2008) xilli ay ahayd 8:30 fiidnimo waxaa na soo
wargeliyey wasiirka Amniga oo ii sheegay nimankaas maxaabiista ah oo ku soo
aaddan Qardho abaare 9-ka fiidnimo in dib loo soo celiyo. Annaga oo
fulineyna amarkaas Wasiirka iyo Madaxweynaha ayaan arrinkaas u hawl gallay,
waana ku guulaysaney in aan dib ugu celino meeshii laga soo xiray oo ay xaq
u lahaayeen in lagu baaro."
Guddomiyaha Gobolka Karkaar waxa uu sheegay in ragga dib loo celiyey
ay ahayeen "5 qof oo saarna gaari ah nooca loo yaqaan MARK iyo hal gaari
oo ah Tekniko oo ay wateen ilaaladii waardiyeyneysey." Waxana uu intaas
ku daray in markii raggaas dib looga celiyey Qardho in lagu sii daray
"Taliyaha Saldhiga Qardho si uu noogu xaqiijiyo in bartii loogu talo
galay la geeyo, waxaana saaka (May 14, 2008) subaxnimadii 8:20 lagu
celiyey dekeda Boosaaso, waxaana lagu raja weyn yahay in sida ugu qurux
badan oo raggaasi ay xaq u leeyihiin loola dhaqmo, qofkii dembiile ahna
in sida sharciga waafaqsan loola dhaqmo." Guddoomiyaha G/Karkaar waxa
uu caddeeyey in uu tegey Kantaroolka Qardho isaga iyo Taliyaha Ciidanka
Qardho si raggaas loo celiyo. Sidaas waxa uu u sheegay Idaacada Radio
Garoowe. Guddoomiyuhu waxa uu sheegay in ay khalad tahay in la qabqabto
dad ka soo jeeda kililka shanaad oo Soomaali ah.
Hadalka Gudoomiyaha waxaa ka cad in Sirdoonka PIS aan lagu
hallayn 5-tii nin oo ay waten, balse lagu daray Taliyaha Ciidanka
Qardho si loo xaqiiqsado in raggaas lagu celiyo Boosaaso iyo in
aysan dhexda ka bixin oo gelin gacanta Gumeysiga Itoobiya. Waxaa
jira warar kale oo tibaaxaya in shacabka magaalada Qardho ay is hortaageen in
raggaas la dhaafsiiyo magaalada Qardho bar kantarool oo ku yaal, kaddibna muddo
markii wadahadal socdey sidaas dib loogu celiyey Boosaaso. Balse waxaa laga
xcabsi qabaa in raggaas Boosaaso diyaarad laga saaro, ayey tibaaxeen wararku.
Shanta nin waxay la socdeen diyaarad ay leedahay Shirkadda Daalo, iyagoo
ka yimid dalka Jabuuti, soona maray magaalada Hargeysa, sidaas waxaa sheegay
idaacada dalka Ingriiska warark au faafisa ee British Broadcasting
Corporation. Idaacaddaas oo intaas ku dartay in kulan ballaaran oo ka dhacay
Boosaaso ay odayaashu maamulka DGPL ka dalbadeen in aan Puntland noqon meel
laga ugaarsado dadka Soomaalida.
Shacabka Gobolka Bari ayaa aad uga caraysan ficillida ay Ciidanka
Sirdoonka PIS ay Garoonka Boosaaso ka ugaarsadaan dadka Soomaaliyeed
ee ka soo degaya ama ka dhoofaya. Dhacdadan ugu dambeysey ee 5-ta
nin looga qabtay Boosaaso [May 13, 2008] ayaa la sheegay in Ciidmada
Sirdoonka Puntland ay ku eedeeyey in raggaasi ka tirsan yihiin
Jabhadda JWXO, sidaas darteedna ay ku doonayeen in ay durbadiiba ugu
gacan geliyaan Itoobiyaanka xafiiskooda Garoowe. Balse Odayaasha,
culimada iyo waxgaradka G/Bari oo ka dhiidhiyey awgeed ay khasab ku
noqotay madaxda sare ee Puntland in ay arrinta soo dhex galaan oo
raggaas lagu celiyey Boosaaso. Lama oga in la siideyn doono iyo in
kale. Dhacdada taas ka horeysey ayaa ahayd in Ciidanka PIS ay
garoonka Boosaaso ka xireen Dhakhtar Soomaali-Kenyan ah, Dr.
Ibraahim G. Cali, oo muddo ka shaqaynayey dhakhtar ku yaal
Boosaaso oo markii uu Garoonka Boosaaso ka dhoofayey [May 2, 2008]
xabsiga loo taxaabay isaga oo lagu eedeeyey in uu watey Baasaboor
Soomaali ah. Dhakhtarku waxa uu fasax bil ah u qaatay Kenya si xagaaga
uu ugu maqnaado. Weli dhakhtarkaasi waxa uu ku xiran yahay Boosaaso. Faafin: SomaliTalk.com | May
15, 2008
 Shir
Nairobi ay ku qabteen Jaaliyada Puntland
oo lagu Canbaareeyay DG Puntland
falkii ay Itoobiya ugu gacan galisay Raggii Soomaaliyeed.
Bayaan/Akhris/sawiro
May 12
:::Beesha Warsangeli ee
ku dhaqan wadamada Austalia iyo New Zealand oo cambaarayn xoogan u diray
Mamul Gobeleedka Puntland | 
Daabaco
Boggan | Print
