Faallo:Mr. Donald Payne ma mudan yahay in Muqdisho lagu weeraro?.
Mr.Donald Payne waa mudane ka tirsan xisbiga Dimuquraadiga, isla markaana xubin
ka ah aqalka Congresska dalka Mareykanka, waxaana laga soo doortaa gobalka
dhinaca Bari ku yaal ee New Jersey, sanadka markuu ahaa 1988 ayaa markii ugu
horeysay loogu soo doortey inuu ka mid noqdo Aqalka Congresska, hada shaqadiisa
waxay tahay xubin Guddiga Aqalka Congresska u qaabilsan Arrimaha Dibedda, waana
Guddoomiyaha Guddi-hoosaadka Arrimaha Afrika iyo Caafimaadka Caalamka. .
Hadaba Mr Donald Payne waxa u yimid dalka Soomaaliya maanta si uu ugu kuurgalo
xaalada dalka iyo guud ahaan arimaha ka soo cusboonaaday Badda Soomaaliya,
waxana u la kulmay madaxda Dowlada Midnimo Qaran sida Madaxwaynaha Sheekh
Shariif iyo Raisal Wasaaraha kadib kulankaas waxaa u ka dhoofay garoonka weyn ee
magaalada Muqdisho ku yaal, hasa yeshee waxaa duqayn aanan loo meel dayin lala
beegsaday garoonka iyo xaafada ku dhaw waxaana ku dhawaacmay dad maato ah oo
Soomaaliyeed oo xaafadahooda jooga oo aananba war u haynin safarka masuulkaan
iyo weerarkaba.
Mr Donald Payne waxaa lagu
xasuustaa inuu ahaa shaqsi kaalin weyn ka ciyaaray isla markaana mowqif fiican
ka istaagay halgankii dalka looga saarayay ciidamada Ethopianka ee qabsaday
dalka isla markaana xasuuqa ka waday, waxaana u si toos ah uga hadlay una
muujiyay inay qalad tahay in ciidamada Ethopia galaan dalka Soomaaliya isla
markaana waxa u marar badan hor dhigay dowladiisa mooshin uu ku dalbanaayo
sababta ciidamada Ethopia u galeen Soomaaliya iyo dhibaatada ay ka wado
Soomaaliya iyo weliba dhulka Soomaalidu degto ee Ogaden ama Soomaali Galbeed kaa
doonto.
Waxana uu ka mid ahaa mudanayaashii dalban jirey in Dowlada Ethopia laga joojiyo
miisaaniyada madaama dhibaatooyin xuquuqal insaanka ka soo horjeedo ka gaystey
Soomaaliya iyo Ogaden isla markaana lala xisaabtamo Melas Zenawi, sidaa
daraadeedna ku qasbay in Ethopia xabsiyada ka sii dayso mucaaradkeeda, arimahaas
oo dhana waxa uu u samaynayay waxay ahayd bini aadanimo iyo isagoo si toos ah
shacabka Soomaaliyeed ula qaybsanayay dhibaatada lagu hayay ilaa haatana doonaya
in dhibaatada ka jirta geeska Afrika lagu dhameeyo is afgarad, marka waxaa
sharaf daro ah isla markaana abaal dhac weyn ah ninkii u istaagay inuu qadiyada
Soomaaliyeed ka daafaco Congresska dhaxdiisa iyo Saxaafada xorta ah in maanta
markii dalkii Xabashida laga saaray isla markaana caalamka ay u soo jeesteen in
wax laga qabto arimaha murugsan ee dalkeena in maanta la isku dayo in lagu wax
yeelayo magaalada Muqdisho waxaan u arkaa mid sharaf daro ah isla markaana ceeb
ku ah dhamaan dadka Soomaaliyeed, madaama uusan naga mudnayn in lagu dhibaateeyo
ciida Soomaaliya nin taageeray xiligii ay ugu xumayd taariikhda dalka
Soomaaliya.
Marka waxaan codsanayaa in dadka Soomaaliyeed inay raali galin ka bixiyaan
qaladka ay sameeyeen wax magarato damiir Soomaalinimo iyo mid islaanimo aan
waxbo ka aqoon oo ay madax martey seef la boodnimo been ah oo shaar diimeed oo
shaar Qabiil hoosta ka xiran isla markaana raba inay dadka ku qaldaan, madaama
ay leeyihiin hadafka ka duwan hadafka Islaamka balse isku qarinaayo.
Sidee macquul ku tahay ninkii diiday dagaalkii Soomaaliya ka socday 2006/2009 oo
Ethopia ku qabsatey inuu ahaa dagaal lagu baacsanaayo Argagaxiso isla markaana
si cad oo aan leex leexad lahayn u yiri dagaalka lagu xasuuqa shacabka
Soomaaliya sax ma ahan dowladii hore Bush madaxda ka ahaa way ku qaldantey inay
Ethopia ku fasaxdo Soomaaliya.
Donald Payne waa ninkii booqasho ugu tagay ururkii Isbahaysiga dib u xoreynta
Soomaaliya magaalada Casmara isla markaana wada hadalada kula soo yeeshay
kadibna taageeray iyo isaga xafiiskiisaba shirkii Jabuuti ee Dowlada cusub lagu
soo dhisay, marka waxaa ceeb ah in Carab oo dhan waxay afkooda ka sheegi waayeen
ninkii ka sheegay oo yiri dagaalka Soomaaliya ka socda waa mid ay isaga
difaacayaan Ethopia oo ku soo duushay in maanta halkii Caano iyo Hilib isla
markaana lagu soori lahaa sidii Soomaalida u soori jirtey lana siin lahaa Faras
iyo Qori iyo geel badan in Hoobiyo fulay soo tuurey lagu soo sagootiyo kadib
jaraaidka lagu soo qoro ma ahan mid uu naga filayay anagana aan filanaynay
Soomaaliyeey maanta.
Waxaan rajaynayaa in Soomaalida Mareykanka ku nool inay raali galin ka siin
doonaan qaladka fulayga sameeyay ee ku qaldamay hogaamiye nagu mudan sharaf iyo
qadarin.
W/D: Yusuf Mohamed Abdi Yusuf
mrsomalia@hotmail.com
London
Faafin: SomaliTalk.com | April 13, 2009 |