“Xasunal Amru” Mar Haddii Sheekh Xasan Xamar Yimid

C/Waaxid C/hi Khaliif

London, UK

cabdulwaxid@hotmail.com

Ilaah baa mahad leh. Nabadgelyo iyo naxariis nabi Muxamed korkiisa ha ahaato.

GaroonKa diyaaraddu ku soo xiray waxaa la soo xigtay inuu yahay kii Kiilomitir 50 laga xaarxaaray. Xabashi meesha ma joogin iyo Amisom-ta la soo xawilay . Sidoo kale Ashahaado-la-dirir ma soo xaadirin. Muusikaaleey lama soo xulin ee keliya Xisbul Islaam baa sheekh Xasan meesha ku marxabbeeyey. Xabbadkey isa saarayeen iyagoo leh: XAYAAKALLAAH.

Waagii Sheekh Shariif Xamar soo gaaray, howsha soo xerogelintiisa waxaa loo xilsaaray Amisom. Waxaa booliiskii Soomaalida ee wax ka soo dhoweeyey xukumay Cabdi Qeybdiid. Ma hubo in muusika la garaacay laakiin waxaa dhici karta in la qaaday:

• Soomaaliyeey toosoo toosoo iska tiirsada ee
• Hadba kiinna taag daraneey tuuryeeya weligiineey

Ilaahay hortii, labada imaansho ee sheekh Xasan iyo sheekh Shariif kala hagaagsan. Sawirka Ammiin Caamir marka sheekh Shariif gaariga qufulan rabo inuu galo booqashadii Turkiga, dib u fiiri. Waxaan garoonka Aadan-cadde Shariifka looga qaaday baabuur qafilan iyadoo la geeyey Hotel Lafweyn! Gaalaa weerdiyeyneysay! Yaa laga waardiyeynaa? Muqaawamada ama shacabka midkood! Halka sheekh Xasan ay raggiisii ay dagaalka kuwada jiri jireen iyo madaxda Xisbi Islaam soo dhoweeyeen. Gabyaa u shaqeyn jiray wasaaraddii waxbarashada oonan magaciis xasuusan baa lahaa:

• Dal Ilaahay kala qaboow deeqna kala roone

Hor Ilaahay labada nin qaabkey Xamar ku soo galeen kala fiican.

Maalmahan waxaan ka bixi weynay: oday hebel baa saas yiri! C/Raxiim Ciise Caddoow baa yiri: Ash-Shabaab baa dadkii soo halgamay leyneysa. Aadan-madoobaa Ash-Shabaab eedeeyey! Bal ka warran haddii Aadan-madoobe iyo C/Raxiim Caddow ay Shabaab wada eedeynayaan?!

Haaruun Ar-Rashiid oo Makka Xaj u yimid oo dadkii dul dhooban yihiin baa waxa meeshii soo maray Cabdullaahi Binu Mubaarak. Dadkii markay Imaamkaas arkeen ayey kulligood ku yaaceen imaamka iyagoo dabogalay. Haweeney “umu walad” u ahayd Haaruun Ar-Rashiid baa Haaruun ku tiri: kugu aabbahaaye! Wataas madaxnimo! Waa Haaruun Ar-Rashiid oo Amiirul Muuminiin ah! Waa Haaruun oo Haashimi ah! Insha Allaahu waan ka raysaneynaa oday hebel, Aadan-madoobe iyo C/Raxiim Ciise Caddoow. Waxaan filayaa in Muqaawamada, Dumarka iyo carruurtu caleemo qoyan ku soo dhoweyn doonaan isku-soo-baxa berri ah haddii Ilaah idmo. Sheekhu waa halgamaa rug-caddaa ah. Marka yaa Xamar jooga oo isku dheririn kara? Haddii iyagoo Xajka la joogoo Amiirkii Muuminiinta ee Haashimiga ahaa dadkii iskaga yaacay yaa sheekh Xasan arkaya oo ku haraya niman Amisom iyo Ashahaado-la-dirir ehel ka dhigtay?

Ma filayo iney jirto maalin looga baahi badan yahay maanta sheekha. Waa maalin ay gaalo iyo gaalo-raacyo damceen in shacabka la isku diro. Waa maalin qabiilooyinka iyo shacabka Xamar muujiyeen samir iyo dulqaad si aan loogu jilin filimaan Maraykanku ka soo dhigay Ciraaq iyo Afganistaan – Mujaahidiintii iyo shacabkii oo la isku diray.

Waxaa jira Xaddiis uu Bukhaari callaqay oo dhahaya: Arwaaxdu waa ciidamo duman oo kale. Wixii ay isla gartaan waa iskaga dunmaan; wixii ay iska inkiraanna wey isku khilaafaan. Yaa kheyr isku khilaafi kara? Shaki ma leh in Muqaawamadii la isku diray oo qaar la hoos geeyey gaalo iyo gaalo-raacyo. Waxaan filayaa in wixii Maxkamadaha ahaa ee kheyr ku haray soo haleeli doonaan sheekh Xasan. Waa sidii magnad iyo bir oo kale oo isa soo jiidanaya. Marka mu’aamaradii ahayd in sheekhba maalin la dilo si la iskugu diro Muqaawamadu meeshay ka baxaysaa Insha Allaah. Marka wiilasha kheyrku ku haray ee Shabeellaha Dhexe iyo Hiiraan jooga waa la maqli doonnaa iyagoo soo dhoweynaya libaaxoodii halganka.

Waxaa sheekh Xasan Xamar yimid maalin ay caddaatay jeesjeeskii Shareecada Islaamka. Cumar C/Rashiid kaddib waxaa markhaati shacabku ka yahay in weli Aadan-madoobe sheeganayo inuu “ilaah” yahay! Soow baarlamaanku maanta oo bisha miilaaddigu tahay 23/04/09 kama hadlayaan miisaaniyadda dowladda? Haddii Shareeco Islaam la isku xukumayo yaa jaahil Aadan-madoobe oo kale siiyey xeer uu noogu qoondeeyo dhaqaalaheenna? Soow jiliddii iyo heestii Janaqoow been ma noqon? Teeda kale, Musaalixadii qaarkeed soo dhoweynayey jeesjeeskaas miyeyna iyagu wax ku lahayn miisaaniyad-dejin? Mise Shareecadaa qabta in kuweenna noogu jaahilsan ay miisaanka noo qabtaan?

Sheekh Xasan sidii nimanka qaarkood ma soo cararin. Sheekh Xasan wuxuu Soomaaliya ka tagay markii gaaladii waxay dili kareen dileen. Dagaalladii Koonfureed marka Muqdisho laga reebo wuu joogay. Markuu waddanka ka soo tagayey Muqaawamadu waxay yimaadeen Kismaayo agteeda, qaarna Xamar beyba soo galeen. Marka shirkii Asmara dartiis buu waddanka uga tagay. Sheekh Xasan-Turki iyo isagu waxay isla joogeen Kismaayo agteeda

Marka Ilaah idankii amarku waa wanaagsanaaday. Yaa isa siisan kara “Xasaneyn” waa sheekh Xasan Daahir iyo sheekh Xasan-Turki iyo “Shariifeyn” waa sheekh Shariif iyo Shariif Xasan? Mid macangag ah mooyee, Muqaawamada oo dhami waa isu imaan. Waxaa xididdada loo siibayaa dhagarta gaalada ee ah in Muqaawamada la isku diro. Gaala-raac badan baa sidii milix lagu dhex riday biyo dhalaalaya markay sheekh Xasan maqlaan ama arkaan. Qabiil baa korneyl C/hi raacay oo qaakrood maanta Xamar looga cararay. Qaar baa sheekh Shariif oo gaalo wadato iska dabo-ordaya. Marka waa nasiibdarro qolo sheekh Xasan oo kale heysata oo cid kale uga ordeysa. Marka Muqaawamada, carruurta, cirroolaha iyo dumarkuba waxay sheekha leeyihiin: muusiko kuu tumi meynno, Amisomna kuguma aamineyno ee waxaan ku leennahay: MARXABAN BIKA YAA ABAL MUJAAHIDDIIN.