SOMALITALK.COM dahabshiil
w w w . S o m a l i T a l k . c o m
SOMALITALK - MAQAAL

Waxqabadkii Midowgii Maxaakiimta & Mustaqbalka Dowladda Cusub.

Siyaasadda Dalka Soomaaliya ayaa waxay soo martay marxalado kala gedisan oo aad u adag waxaase xusid mudan kacdoonkii Shacabka Soomaaliyeed ee ay abuureen Midowgii Maxaakiimta Islaamka ee Soomaaliya, waxaa ka dhashay nabad laga dareemay dhammaan Dalka Soomaaliya xitaa goboladii kale ee Dalka ayaa soo Dhoweeyey una riyaaqay guusha ay soo hooyeen Shacabka reer Muqdisho, kaddib markii laga xoog roonaaday Qabqablayaashii Dagaalka ee Shacabka Cadaadiska ku hayey mudadadii dheerayd ee ay Dagaaladu ka socdeen guud ahaan Dalka oo dhan gaar ahaan Magaalo madaxda Dalka Soomaaliya ee Muqdisho oo ay ka barakiciyeen Dad fara badan oo maati ah kana xanibeen adeegyadii Shacabka oo dhan.

Haddaba guulihii iyo waxqabadkii Midowgii Maxaakiimta Islaamka ee Soomaaliya qoraal laguma soo koobi karo waxaase shacabka soomaaliyeed ay ku noqotay wax aysan weligood illoobin Nabaddii ka dhacday intii ay Xukunka hayeen oo ahayd lix bilood oo qaarkood ay ku tilmaameen 60 Sano oo Nabad ah inay la mid ahayd .sida ay Shacabku u soo dhoweeyeen darteed ayna u soo celiyeen adeegyadii ay bulshadu u baahnayd iyagoon wax shuruud ahi aysan ku xirin kana qaadeen Isbaarooyinkii u yiilay Qabqablayaasha meelihii ay Bulshadu u baahnayd sida Waddooyinka ,Garoonkii Diyaaradaha , iyo Dekadii Weynayd ee Muqdisho.

Midowgii Maxaakiimta Islaamku waxay kaloo Dib u Xoreeyeen Dalka Soomaaliya iyagoo u adeegsaday Qori, Siyaasad, iyo Sharci Caalami ah Ciidamadii Maxaysatada Itoobiya ee Dalkeenna sida Sharci darrada ahi ugu soo duulay kuna kallifay inay si deg-deg ahi uga baxaan iyagoon wax shuruud ahi ku xirin kaddib markii ay ku guul darraysteen Siyaasadoodii ahayd Qaybi oo Xukun ,isla markaana ay fashilantay inay ahaayeen kuwa ay ujeedadoodu tahay inay Soomaaliya Gumeystaan Dunida Caalamkuna ay u arkayeen inay yihiin kuwa u yimi Soomaaliya inay Caawiyaan kaddibna la ogaaday Khiyaamaada ka dambaysay Xasuuqii ay geysteen iyo Barakacii ay wuxuu noqday mid Dunida ku abuura walwal iyo walaac kaddibna Sharci lagu soo robay.

Madaxdii Sare ee Maxaakiimtii Islaamka waxaa ka dhex muuqday Mudane Madaxweyne Sheekh Shariif Sheekh Axmed oo ahaa Halyeygii Horseedka u ahaa Aasaaskii Isbahaysigii Dib u Xoraynta Dalka Soomaaliya oo aannu wada garanayno mirihii uu dhalay oo ah Dib u heshiisiintii Jabuuti oo iyaduna noqotay Natiijo ay Shacabka Soomaaliyeed ee Nabadda jecel ay ku farxaan kana soo baxday Himilooyinkii laga filayey oo ah in lagu doortay Dowlad Xaq ah oo Dalka ku Maamulaysa Shareecadda Diinta Islaamka ee ay Shacabkeenu ay
rumaysan yihiin 100% taasina laga sugayo in ay Shacabku Taageeraan Dowladan Xaqa ah ee la doortay.

Mustaqbalka Dowladan cusub ayaa saadaasheedu wuxuu yahay inay noqon doonto mid u adeegta Shacabka Soomaaliyeed kana shaqaysa Dib u heshiisiinta iyo Nabadaynta dhammaan Beelaha Soomaaliyeed ee ku kala tegay Dagaaladii Sokeeye iyo abuurid Bulsho Walaala ah oo is jecel oo leh Midnimo Qaran hal meelna uga soo Wada jeeda Gumeystaha iyo kuwa uu ku adeegto , Dowladani oo ay Hoggaaminayaan Madaxdii Sare ee Midowgii Maxaakiimta Islaamka ayaa waxay u muuqataa inay Nabadda ay u sahlan tahay inay abuuraan maadaama ay hore u haystaan khibrad ku filan sida ay Shacabka uga kasban lahaayeen Nabadda horseedna ay uga noqon lahaayeen geedi socodka Nabadda oo ah hal ku dhigga Dowladdani lagu Aasaasay .

Waxaa is weydiin mudan maxaa keenay inay weli Dagaalladu ka socdaan Gobolo ka mid ah Dalka ?waa jahli iyo aqoon darro baahday oo aan xad lahayn , haddii Gumeysigii lala Dagaalamayey Dalka laga saaray maxaad Walaalkaa oo Soomaali ah aad u Dilaysaa? waa kula Diin ,waa kula Af ,waa kula Dhaqan Midnimadeenu waa Guul ,Soomaaliyeey Qoryaha dhigga oo Qallinka qaata, Qabiilka Aasa, oo Khayrka iyo Xalaasha Khuuta
Dagaalladani Diimeed waxay kaloo keeni karaan in Cadaab Alle uu inagu habsado ka jooga oo Alle u noqda.

Waxqabadkii Midowgii Maxaakiimta Islaamka ee Soomaaliya ee Sanadkii 2006- ilaa iyo 2009:-

1. Midowga Maxaakiimta Islaamku waxay abuureen Kacdoon ka guulaystay Dhammaan Qabqablayaashii
2. Waxay ku guulaysteen inay Shacabka reer Koonfur gaarsiiyaan Nabad iyo Horumar Wanaagsan
3. Waxay Dib u fureen Dekadii Muqdisho iyo Garoonkii Diyaaradaha oo 19-Sano Xirnaa
4. Waxay soo Celiyeen Nabaddii iyo kala dambayntii uu Dalku hore u lahaa
5. Waxay Difaaceen Sharafta iyo Qaranimada Ummadda Soomaaliyeed wayna u Dhinteen
6. Waxay ka qayb qaateen Dib u Heshiisiintii Dalka guulo wax ku ool ahina way ka soo hooyeen
7. Siyaasadda Caalamka iyo tan Soomaliduna kalsooni ayay ka kasbadeen
8.Waxay Dib u Xoreeyeen Dalka kaddib markii Itoobiya ay sharci darro ku qabsatay
9. Waxay Xiriir la Sameeyeen DFKMG ah si ay u Badbaadiyaan Shacabka Soomaaliyeed
10. Waxay ka qayb qaateen tartankii Doorashada Madaxweynaha wayna ku guulayteen

Gabagabadii iyo Qoraalkani waxqabadkii Midowgii Maxaakiimta Islaamka ee Soomaaliya iyo Mutsaqbalka Dowladda cusubi waxaannu ku tilmaami karnaa mid rajo wanaagsan oo laga sugayo guulo iyo yididiilo farxad leh oo Dalka ku soo dabaali doonta Horumar iyo Barwaaqo waarta iyo Dib u Heshiisiin dhexmarta Shacabka Soomaaliyeed ee Walaalaha ee Gumeystayaashu isku Gubayaan ,Dowladda cusubi waxay guul u tahay waa Ummadda Soomaaliyeed meel waliba oo ay Dunida ka joogaan Dalka Gudihiisa ama Dalka Dibadiisaba.

Eng. Cabdulqaadir Cumar Yuusuf(Daadurey)
Somalihungerhivprojectus2004@yahoo.com

Faafin: SomaliTalk.com | Feb 4, 2009

Kulaabo bogga www.SomaliTalk.com © www.SomaliTalk.com

La soo xiriir: