Bin Laden Oo Guubaabiyay Soomaalida Fariin Uu ku soo gudbiyay dhinaca
Internetka Sidee Maraykanka U Arkaa? Maxaase La Gudboon Reer Muqdisho Oo Dagaalo
Ka Soo Daalay?.
Hogaamiyaha ururka Alqaacidah Osaama Bin Laden ayaa ku booriyay soomaalida
maalinimadii qamiistii inay awooda ka tuuraan madaxweynahooda cusub, isaga oo
soo saaray hadal si cad hoosta uga xariiqayay hamiga alqaacida ee ku aadan
soomaaliya ayadoo xili dheer laga cabsi qabay in uu gabaad u noqdo shabakada
argagixisada.
Bin Laden oo hadalkiisan ku soo gudbiyay cajalad soconaysay 11 daqiiqo iyo bar
ayaa waxaa uu gabi ahaanba diirada ku saaray soomaaliya oo ah dal sabool ah oo
ku yaalla geeska afrika, kaasoo ay hareeyeen qas iyo fowdo muddo ku dhaw
labaatan sano laakiin ay hadda ka hana qaaday dowlad ay ku midaysanyihiin
qabqablayaal iyo hoggaamiyayaal diineed, bishii janaayo ayaa loo doortay sheikh
sheriff sh axmed inuu noqdo madaxweynaha cusub ee soomaaliya waana hogaamiye
qunyar socod ah islamarkaana rajo laga muujiyay in uu mideeyo kooxaha wadanka ka
jira.
‘waxan u malaynayaa dadka ka shakisan in Alqaacida uu hamigeedu yahay soomaaliya
uma baahna inay mar labaad ka fakaraan” Cabdirishiid Cabdi oo ah faalo qore ka
tirsan International Crisis Group ayaa sidaas u sheegay wakaalada wararka ee
Associated Press.
Saraakiisha la dagaaladanka argagixisada ee Maraykanka ayaa ka digay xiriirka
sii xoogaysanaya ee alqaacida iyo kooxda Alshabaab, kuwaasoo si joogta ah
dagaalo ugu qaado ciidamada dowladda iyo maleeshiyaadka xiriirka la leh iyo
weerarada lagu qaado nabad illaaliyayaasha midowga afrika ee ku sugan wadanka
soomaaliya.
Sanadkii hore Waaxda arrimaha dibada maraykanka ayaa kooxda Alshabaab oo macno
ahaan u dhigma (Dhalinyaro) ku daray liiska Ururada argagixisida dibada.
Doorashada Shariff Sheikh Axmed ee loo igmaday in uu madaxweyne ka noqdo
soomaaliya ayaa waxaa soo dhaweeyay Qaramada midoobay iyo dowlada Washington.
Doorashadan ayaa timid kadib Xil-hayihii hore ee uu jagada kala wareegay
Abdullahi Yusuf oo shaqada iskacasilay bishii December kaddib markii uu ku guul
daraystay in uu ka hortago islaamiyiinta mucaaradka ah, waxaana uu u baxay
musaafuris dibada ah.
Fariintan cajaladda ah ayaa waxaa Bin Laden uu u sheegay Mintidiinta Soomaalida
ah “Waxaa tihiin difaaca koowaad ee dunnida qeybta koonfurgalbeed, dulqaadkiina
iyo taageeradiina walaalihiina falastiin, Ciraaq, Afghanistaan, Muslimiinta
Maqrib, Pakistaan iyo dhamaan goobaha kale ee uu ka socdo jihaadka.
Sanado badan, kooxaha hubeysan ee islaamiyiinta ah ayaa waxaa ay dagaal kula
jireen dowlada dhexe ee soomaaliya ee ay UNka taageerto, taasoo maamusho qeybo
yar oo ka tirsan magaalo xeebeedka Muqdisho, dhamaan adeegyadii kaabayaasha
dadweynaha ayaa meesha ka baxay inkastoo ay muqdisho mar ahaan jirtay Magaalo
aad u bilicsan.
Sharci la’aanta soo jiitamaysay ayaa qarankan oo ay dadkiisu yihiin 9.5 milyan
qiyaas ahaan waxa ay u ogolaatay in ay burcad badeed ka u gaarsadaan gacanka
cadmeed, oo ah mid kamid ah marinada ugu mashquulka badan dunnida.
Madaxweyne Axmed oo lagu tiriyo in uu yahay hoggaamiye qunyar socod ah, oo ka
yimid kooxda islaamiyiinta mucaaradka ah ayaa ku guulaystay in uu qaabilo
kooxaha kale ee mucaaradka ah.
Cajaladdan hogaamiyaha Alqaacidah ee uu ku soo bandhigay barta Internet-ka ayaa
waxa uu ku weeraray madaxweyne shariif, kaasoo uu ku sheegay in jeeb u yahay
maraykanka, isagoo yiri doorashadiisa waxay ahayd miday soo shukaamiyeen ergayga
maraykanka ee Kneya, taasoo uu kala jeeday safiirka maraykanka u fadhiya
Nairobi.
Afhayeenka safiirka maraykan ee Nairobi ayaa sheegtay in safiir Michael
Ranneberger uusan wax faalo ah waqtigan uusan ka bixin karin cajaladda ka timid
bin laden, taasoo noqonaysa tii saddexaad ee sanadkan guddihiisa uu soo bandhigo
ayadoo cajaladan tii ka horeysay uu soo bandhigay 14 march.
Wasiirka warfaafinta dowladda KMG Ah ee soomaaliya ayaa ku tilmaamay hadal bin
laadin mid aan loo meeldayin, wuxuuna sheegay in soomaalida aanay u meel dayi
doonin hadalada bin laadin.
Cajalada oo ay cinwaan u ahayd “Dagaalama” horyaalka soomaaliyeey waxaa lagu soo
bandhigay bar internetka ah oo ay adeegsadaan Ururka Alqaacida, kaasoo badanaa
lagu soo bandhigo fariimaha Bin Laden iyo hoggaanada sar sare ee Alqaacida.
Madaxweyne Axmed ayaa ka yimid markiisii hore midowgii maxkmadahii islaamiga,
kuwaasoo u keenay astaan nabadeed dadka soomaaliyeed muddo 6 bilood ah sanadii
2006 laakiin 2-dii sano ee la soo dhaafay ayaa dowlada Maraykanka waxa ay la
midoowday ciidamada Itoopiya si ay meesha uga saaraan Midowga maxkamadaha maxaa
yeelay waxay ka cabsi qabeen inay xiriir militari la yeeshaan Alqaacida kaddibna
ay xoojiyaan mucaaradka ka soo horjeeda Itoopiya ayna ridaan dowlada dhexe ee
taagta daran ee ay qaramada Midoobay taageeraan.
Ciidamada Itoopiya waxa ay ka soo baxeen soomaaliya bishii Janaayo, taasoo
qeybka ahayd heshiiskii ay UNka dhexdhexaadinaysay ee ujeedkiisu ahaa in xal
lagu soo dabaalo soomaaliya.
Soomaaliya ayaa ah dal 100% ay dadkiisu yihiin Muslim, laakiin dadka
soomaaliyeed waxaa daashaday dagaalo iyo abaaro baabi’iyay nolosha dadweynaha.
Mid kamid dadka degan magaalada Muqdisho Ismaaciil Cali ayaa yiri mar uu ka
hadlayay hadalka Bin Laden “Bin Laden waa in uu ka laabtaa dalabkiisii ahaa in
dagaalada la sii wado”
“Usama waa in uu nagu wacdiyaa Diinta Islaamka . anagu waxaanu nahay Muslim ,
waxaa sidaasi sheegay Cali oo ah 28 “ anagu dagaalo iyo cadawtinimo waan ka soo
daalnay hadda lama joogo xiligii la afgambin lahaa dowlada”
Maxamed Gaarane Aadan
+2525 (0) 996132
+2521 5598706
+254 (0) 722687097
gaarane68@hotmail.com
Faafin: SomaliTalk.com | March 23, 2009
|