SOMALITALK.COM dahabshiil
w w w . S o m a l i T a l k . c o m
SOMALITALK - Maqaal

Goormaynu  Khaldanay ?

 Qaybtii 1aad                              

(Goormaynu khaldanay waa suaal aan jawaabteeda mudo dheer raadinayey welina aanan gunteedii gaadhin balse aan malayn karo ,marna waa dood u furan cid kasta oo jawaab sax u haysa suaasha ah Goomaynu khaldanay ?) 

Marar badan waxaan isweydiiyey khaladaadka Siyaasadeed-dhaqaale iyo dhaqan ee ka jira Somaliland sida ay ku yimaadeen iyo sida loo xalin karo , marar badan ayaan  isweydiiyey waxa inaga khaldan shicib Siyaasi iyo aqoon yahanba.Waxaan wax badan la sheekaystay noocyada bulshada qaar ahaan  Siyaasiyiinta-aqoon yahan-bulshada rayidka ah iyo qurba joogaba,ilaa haddana waxaad moodaa in lagu kala qaybsan yahay jawaabta  sax ah ee  suaasha Goormaynu Khaldanay? 

Mudadaa dheer ee aan raadinayey  jawaabta ,suaasha ah goormaynu khaldanay,ayaa waxaan helayey jawaabo kala duwan ,kuwaas oo aan filayo in ay qayb ka noqon karaan jawaabaha ku haboon suaashaas,waana laga yaabaa in ay jiraan jawaabo kale oo  kaga haboon ,balse waxaad mar kasta ogaataa in dadka badankiisu jawaabaha ay bixinayaan ay yihiin sida ay iyaga la tahay.Waase dood idiin furan.!!. 

Jawaabta ay  bixiyeen Siyaasiyiin badan oo reer Somaliland ay,ayaa waxay ahayd sidan:-

waxaynu khaldanay 1960 bishii  June 26dii  markii dhulkii Somaliland ee ingriisku Gumaysan jiray ay xoriyadoodii ka qaateen  Gumaysigii  Ingiriiska, ee ay si shuruud la,aana ula midoobeen  bishii July 1dii  1960 walaalihii  Soomaaliya ee iyana ka xoroobay Gumaysigii  Talyaaniga.

Ma jirin wax shuruudo ah oo Somaliland ku xidhay midowgii ay la midowday walaalaha Soomaliya ,marka laga reebo in la wada raadiyo shanta(5) Soomaaliyeed amase Soomali weyn.

Dhinaca kale Soomaliya waxaa u diyaarsanaa shuruudo fara badan oo runtii  la odhan karo waxay ahaayeen shuruudo aad iyo aad u adag,kana fogaa wixii ay shacabka iyo Siyaasiyiinta reer Somaliland ka fekerayeen amase aan odhan xataa waxay ka fogayd wixii maskaxdooda ku jiray.

Hadaba haddii khalad jiray  26 Juun 1960,khaladkaa ma waxaa lahaa shacabka mise Siyaasiyiintii xilligaa jiray ?mise waxaa khaladka lahaa wadaniyadii waalida ahayd ee ku beerneyd wadnaha shacabka reer Somaliland? Waa suaalo iyana u baahan in loo helo jawaabo sax ah si aan mar kale loo gelin khaladaadkii hore. 
 
Haddii ay sax tahay jawaabta ay Bixiyeen qaar ka mid ah Siyaasiyiinta reer Somaliland,oo weliba ay ka mid yihiin ragg caan ku ahaa Siyaasada guud ahaan soomaaliya,bal aynu eegno  qayb ka mid ah, Gabaygan uu tiriyey Awaankii caanka ahaa Ibrahim Gadhle-ILLAAHAY NAXARIISTII JANO HA SIIYEE.

"Taariikh da' weynoo, 
Degmadeenu leedahay, 
Aan idiin dul-xaadshee, 
Lixdankii dadkaygoow, 
Markaad Dawladnimadii, 
Diiqada u bixiseen, 
Degdegsiinyo mooyee, 
Doqonniimo ma ahayn, 
Manaydaan denbaabine, 
Shanta kala dab-raacdaa, 
Dermo qudha ah u gogosheen, 
Isku-duubnideenniyo, 
Daacad baw horseeddeen,  
Geeluba hadduu dido, 
Duq baa loo hoggaanshaa, 
Sida loogu deyduu, 
Geesina u diriraa, 
Anna laba-daryaalii, 
Waxaan Daacad uga baxay, 
Dhulku yaanu Daaliyo, 
Dooloow u kala go'in,  
Siday labada daamood, 
Dab u wada kulaalaan, 
Dibi keliday lay qalay, 
Qoys qudh ah dibbiradii, 
Waxa aan ka door-biday, 
Duubiga shan lagu cuno.

Waxaa tiriyey Ibraahin-gadhle, Jabuuti, 30/3/1980kii, 
Qalinka: Boobe Yuusuf Ducaalle. 

Hadal iyo dhamaan abwaanku wuxuu gabaygiisa ku cadeeyey in uu jiray deg deg  ay sabab u ahayd wadaniyadii Soomaliweyn oo shacabka reer Somalilan dhiiga iyo lafaha ka gashay  balse aanay Soomalida kale la qabin xilligaa.
 

----la soco qaybta 2aad---

Qalinkii Abdi M.Saleiman(Mingiste)

   abdi_saleiman@hotmail.com

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | May 28, 2009

Kulaabo bogga www.SomaliTalk.com © www.SomaliTalk.com

La soo xiriir: