Daabaco Boggan | Print

Cumar Cabdi Bile

Damal: Maansadii 45aad ee Doodwanaag

Maansadan la magac baxday Damal oo ah maansadii 45aad ee Doodwanaag waxaa Curiyay Cumar Cabdi Bile oo deggan magaalada Boosaaso ee waddanka Soomaaliya, waxayna silsiladda ku soo biirtay 15kii Maarso 2006. 

Maansadu waxay si guud u dulmaraysaa oo ay ka walwalsantahay dhibaatada ku habsatay Qaranka Soomaaliyeed dhankastoo laga eegaba, waxayna waano guud faraysaa dhamaan umadda Soomaaliyeed iyadoo ku boorrinaysa inay raacaan dariiqa saxa ah oo ay ku dhegaan, si loo bedbaado aakhiro iyo adduunba.

1. Dibnahayga aan furo
2. Deelayda maansada
3. Da’yar samaha garatiyo
4. Doodwanaag la kaashado.
5.  
6. Aan hoos u daadago
7. Aboor baa ku baxa damal
8. Kumanyaal dugsanayaan
9. Aakhirkiisa doc u rida
10. Innagaa la darajo ah
11. Shalaan duminnay Qarankii
12. Dab ku kicinnay ciiddii
13. Kala didinnay shacabkii
14. Dawgeennu waa maxay?
15. Ma damiirki baa dhumay?
16. Ma dadkaa la iibsaday?
17. Ma dalkaanan loo dhalan ?
18. Ma duunyaan la simannahay ?
19. Inaan  kala danbayniyo  
20. Maxaa diiday Qarannimo ?
21.  
22. Soomaaliyeey daya!!
23. Kharykaa halkuu degay
24. Dowladaha horay u maray
25. Miyaaynaan ku dayaneyn?
26.  
27. Waxa taas ka sii daran
28. Dillaal iyo mallaal iyo
29. Afmiishaar dirkiisiyo
30. Dawlada shisheeyoo
31. Aan diirnaxayn baa
32. La inoogu dawgalay.
33.  
34. Soomaaliyeey diid
35. Toban wada dillaalla ah
36. Doollar loo hawada mara
37. Oo wada danayste ah
38. Sokeeyaha u daranoo
39. Shisheeyaha u diran weli
40. Dabna yaysan kugu shidan.
41.  
42. Soomaaliyeey diid
43. Kuwii shalay denbiga dhigay
44. Soomaali kala dilay
45. Kala soocay diirkii
46. Dadkoodiina gawracay
47. Raggii diiday samihii
48. Xumaatada ka doorbiday
49. Kuwii dumiyay Qarankii
50. Kaa duubay Calankii
51. Kuu kaday dayaca jira.
52.  
53. Waxa taa kasii daran
54. Dulmigiyo dhibaatada
55. Adaa lagugu diimaa
56. Badda dalaggii laga xaaq
57. Jiriif baa u dabar tiray
58. Doqon aan wax garan iyo
59. Dullaallaa ku kala kacay
60. Duurjoogti Cawshiyo
61. Ugaartii la dabargoo
62. Deegaannada shisheeyiyo
63. Dibadaha bar baa tegay
64. Kaymihii dab baa galay
65. Duudihii dednaan jiray
66. Dooggiyo harkii ma leh
67. Dabaylaa kasoo kacay
68. Duunyadii barbaa dugay
69.  
70. Midkaloo ka sii daran
71. Diirka aan ka qaadee
72. Dadkiisiyo dalkiisaba
73. Ninkii diida oo naca
74. Dayac buu ku sugan yahay
75. Dugaaggaa ka hela jeex
76. Taa waxaa daliil u ah
77. Daaha kaaga rogi kara
78. Dadkuna wada ogsoon yahay
79. Kuman doonyo lagu raray
80. Badda lagu kor daadshoo
81. Mawjaduhu darbeeyeen
82. Xayawaanku dalamsaday
83. Kuman doonayaa jira
84. Oo maantadan diyaar u ah.
85.  
86.  
87. Wali miyaad dareenteen
88. Dannigiina galiseen
89. Damiirkiinu uu qiray
90. Dalka aad u socotaane
91. Doonta aad u koraysaan
92. Waa dad adiga kula siman
93. Damiir iyo is maqal loo
94. Dadaal muujay waa hore
95. Dalkoodii hagaagsaday
96. Dadow maad is garataan
97. Dareenkiinna kicisaan
98. Ciiddeennan dahabka ah
99. Daacad ugu shaqaysaan
100. Qumanaha daryeeshaan
101. Qaloocana ka daysaan
102. Qorigana u diidaan
103. Qalinkana u doortaan
104. Ubadkeenan dalan ba’ay
105. Muu damiirku dhiidhiyo
106. Jiirku muu dubaaxiyo
107. Dulmi laguma waaree
108. Nabsi muu dab soo shido
109. Rabbi daacad soo diro
110. Kuwa samaha diidanna
111. Daruuraha hogleeliyo
112. Daadku muu la kala tago
113.  
114. Si aynaan u dabar go’in
115. Naarta daa’im ugu noqon
116. Intaan dunidda joognana
117. Ducufnimo ku noolaan
118. Da’yar iyo cirroolaba
119. Soomaali dunjigeed
120. Waxa aan u dirayaa
121. Degdeg aan u farayaa
122. Dariiqii Rasuulkiyo
123. Inay Diinta raacaan
124. Xumaanta iska daayaan
125. Daacadnimana raadshaan
126. Qarannimana doonaan
127. Darbi dheer u fuulaan
128. Dayac ugu adkaystaan
129. Damiirkooda kiciyaan
130. Aan darajo gaarnoo
131. Khayrkeen ku dayanee.

W.T: Cumar Cabdi Bile
abwaancumar@hotmail.com
Bosaaso, Soomaaliya

Faafin: SomaliTalk.com |  Mar 22, 2006

MAANSADA HORE

MAANSADA XIGTA

Kulaabo bogga  www.SomaliTalk.com