Daabaco Boggan | Print

---

Wararka Radio Xoriyo
April 12, 2005

Barnaamijka Radio Xoriyo wuxuu caawa ka kooban yahay qodobadan soo socda:

• Ciidammada Wayaanaha oo boobay suuqa magaalada Jigjiga.
• Qarax ka dhacay Addis Ababa iyo qaar kale oo la baajiyay.
• Midowga Yurub oo baaq nabadeed ka soo saaray arrimaha Soomaaliya.
• Itoobiyaan iyo Eritereyaan isku laayay dalka Boqortooyada Sucuudi Careebiya.
• Iyo barnaamijkii Aragtida Ahlagamaaga.

==============

Ciidammada Wayaanaha oo boobay suuqa magaalada Jigjiga

Wararka ka imanaya magaalada Jigjiga ayaa sheegaya in ciidammada Wayaanuhu ay dhawaan weerar ku soo qaadeen suuqa wayn ee layidhaahdo Taiwan ee magaalada Jigjiga,ciidamadaas boobka gaystay ayaa sheegeen inay ka baadhayeen badeecadaha ay kontarabaanka ugu yeedhaan, waxayna boobeen hantidii taallay 300 oo dukaan oo ku yaallay magaalada Jigjiga, waxayna arrintaasi keentay in hantiilayaashii suuqaas meharadaha ku lahaa ay iyaguna dhinacooda hantidooda difaacaan.

Wariyaha noo jooga magaalada Jigjiga ayaa noo soo sheegay in ciidammada Wayaanuhu ay xabbad isticmaalayeen, dadwaynuhuna ay dhagxaan iwm ku difaacayeen hantidooda. Wiriyuhu wuxuu kaloo intaas ku daray in iska horimaadkaas ay ku dhaawacmeen dhawr qof.

Ciidammada Wayaanaha, oo lagu yaqaano inay hantida dadwaynaha boobaan, ayaa doonayay inay suuqan boobaan iyagoo boobkooda marmarsiinyo uga dhigaya in lagu iibiyo badeecado sharci darro ah. Ma jiraan calaamado lagu kala garan karo badeecadaha sharci darrada ah iyo kuwa kale, sababtoo ah badeecadaha laga ganacsado oo dhan waa kuwa dalka dibaddiisa laga keeno.

Ciidammada Wayaanaha ayaa dad badan oo rayad ah xabsiyada u taxaabay, ka dib markii uu isku dhacani ka dhacay magaalada Jigjiga. Wariyaha Radio Xoriyo ee magaalada Jigjiga ayaa la kulmay nin dhalinyaro ah oo ka mid ahaa dadkii xabsiga loo taxaabay, hase yeeshee muddo ka dib la soo daayay, ka dib markii si wayn loo jidhdilay. Ninkaas dhalinyarada ah oo codsaday in magaciisa la sheegin ayaa sheegay in xabsigii la geeyay ay ku xidhnaayeen dad uu tiradooda ku qiyaasay 789 qof oo rayad ah.

Boobka noocan ah ee ciidammada Wayaanuhu ay ku boobayaan xoolaha dadwaynaha wuxuu sidoo kale ka dhacay magaalada Harar, iyadoo la sheegay in isku dhacyo ciidammada iyo dadwaynaha ka dhex aloosmay ay ku wax-yeelloobeen ugu yaraan 7 qof.

Ma aha markii ugu horraysay ee ciidammada Wayaanuhu ay weeraraan suuqaqa waaweyn ee ku yaalla magaalooyinka waawayn. Daba-yaaqadii kal hore waxay ciidammada Wayaanuhu weerareen oo bililiqaysteen suuqa kale ee Taiwan ee magaalada Diri Dhabo, halkaasoo ay hanti badana ku dheceen, isla markaana ay lix qof ku dileen, inta ay qirteen, ka dib markii ay dadwaynuhu hantidoodii ku dagaallameen.

Ciidammada Wayaanaha ee ku sugan dalka Ogaadeenya uma kala soocna hantida gaarka ah iyo midda caamka ahi, waxayna boobaan hantida dadwaynaha mar kastoo ay u baahdaan.

Toddobaadyadii la soo dhaafay oo dhana waxay ciidammada Wayaanuhu ka ugaadhsanayeen xuduuda u dhaxaysa Ogaadeenya iyo Soomaaliya, iyagoo dhacayay gawaadhida shacabka iyo badeecadaha ay wadaanba. Waxay kaloo toddobaadkii hore dheceen 80 Dibi iyo 200 oo Adhi ah oo ganacsi loo waday.

Qarax ka dhacay Addis Ababa iyo qaar kale oo la baajiyay

Bambo aan la garanayn ciddii dhigtay ayaa ku qaraxday dukaan ku yaalla xaafadda Bole ee magaalada Addis Ababa, hase yeeshee cidina maxba kuma noqonin, waxayna burbrisay oo kaliya derbigii dukaanka.

Dhinaca kale ciidammada ammaanka ee gumaysiga Itoobiya ayaa sheegay Sabtidii inay baajiyeen laba qarax oo ka dhici lahaa bas ka dhex shaqeeya magaalada Addisa Ababa,. Maalintii jimcaha ahayd ayaa laba bambo midna lagu tallaalay mid ka mid ah kuraasta baska hoostiisa, midda kalana la dhinac dhigay kursiga bas u kala shaqeeya xaafadaha Kazzanchis iyo Merkato, hase yeeshee ciidammada ammaanka ayaa bambooyinkaas furfuray intii ayna qarxin, ka dib markii loo soo sheegay.

Booliska taliska Addis Ababa ayaa sheegay inuu billaabay dadaal uu ku baadi-goobayo dadkii ka denbeeyay bambooyinkaas. Ammaanka magaalada Addis Ababa ayaa maalinba maalinta ka denbaysa sii xumaanaya, iyadoo hadda si wayn loo adkeeyay xarumaha dawlada oo dhan, isla markaana magaalada lagu faafiyay boqollaal ka mid ah ciidammada dhar-cadka ee taliska Addis Ababa.

Ismaaciil Cumar Geelle oo madaxtinimada Jabuuti ku guulaystay

Madaxwaynaha dalka Jabuuti Ismaaciil Cumar Geelle ayaa madaxtinimada dalka Jabuuti mar kale ku guulaystay, ka dib markii jimcihii la qabtay doorashada madaxtinimada ee Jabuuti. Wasiirka arrimaha gudaha ee Jabuuti C/qaadir Ducaale Wacays ayaa daboolka ka qaaday in 78,9% ay dadka ree Jabuuti ka qayb qaateen doorashada.

Wacays wuxuu kaloo intaas ku daray in tirada ka qayb galka ee aadka u sarraysa ay sabab u tahay iyadoo dawladu ay soo bandhigtay barnaamij siyaasadeed oo muhiim ah iyo iyadoo ololaha doorashadu uu ahaa mid aad u firinfircoon.

Natiijadii kama dembaysta ahayd ee doorashada ee ka soo baxday wasaarada arrimaha gudaha ee Jabuuti ayaa tilmaantay in madaxwayne Ismaaciil Cumar Geelle uu helay 100% codkii dadwaynaha. Qiyaastii 197,000 oo ka mid ah dawaynaha Jabuuti oo dhan 700,000 oo qof ayaa loo diiwaan geliyay inay cod-bixinta ka qayb galaan.

Midowga Yurub oo baaq nabadeed ka soo saaray arrimaha Soomaaliya

Ururka midowga Yurub ayaa baaq nabadeed ka soo saaray arrimaha Soomaaliya, wuxuuna dhamaan kooxaha ku jira dowlada ku meelgaadha ah ee Soomaaliya iyo kuwa bannaanka ka joogaba ugu baaqay inay ka fogaadaan colaada iyo iska horimaadyada hubaysan.

Midowga Yurub wuxuu sidoo kale ku taliyay in dhamaan kooxaha dagaallamaya ay ku laabtaan miiska wada xaajoodka, kaasoo ah midka kaliya ee la isku afgaran karo.

Ururka midowga Yurub wuxuu hoosta ka xarriiqay in qorshaha dib u-heshiisiintu uu ka mid yahay tiirarka nabadda, loona baahan yahay in la soo celiyo, taasoo udub-dhexaad u noqon kara ayuu yidhi ururku isku soo dhawaynta labada gole ee dawlada ku meelgaadhka ah ee Soomaaliya oo sii kala fogaanaya.

Midowga Yurub wuxuu sheegay in haddii la waayo nabadgelyo oo dawlada ku meelgaadhka ahi ku laaban waydo dalka Soomaaliya, inay taasi keenayso kala qaybsanaan iyo in hal bacaad lagu lisay noqoto rajadii laga qabay shirkii dib u-heshiisiinta ee muddada dheer loo fadhiyay dalka Kenya.

Ururka midowga Yurub wuxuu walaac xoog leh ka muujiyay khilaafka u dhexeeya labada gole ee dawlada ku meelgaadhka ah ee Soomaaliya.

Midowga Yurub wuxuu sheegay in marxaladda dib u-heshiisiinta ugu horraysa ay muhiim tahay in aqbalaad laga helo dhamaan kooxaha ka tirsan dawlada ku meelgaadhka ah ee Soomaaliya, isla markaana laga shaqeeyo sidii loo sugi lahaa ammaanka dalka.

Dhinaca kale madaxwayne C/llaahi Yuusuf Axmed ayaa booqasho ku tegay magaalada Addis Ababa, si uu uga qayb galo shir Midowga Afrika kaga arrinsanayo sidii loo samayn lahaa ciidamo nabad ilaalin ah oo si degdeg ah u hawlgeli kara mar kastoo loo baahdo

Ciidamadan oo la sheegay in Maraykanku maalgelin doono, waxaa si dhakhsa ah loo gayn karaa meel kasta oo Qaaradda Afrika ka mid ah oo qulqulado ka dhacaan, waxaana la filayaa in magaalada Addis Ababa ay xarun u noqoto.

Itoobiyaan iyo Eritereyaan isku laayay dalka Boqoqtooyada Sucuudi Careebiya

Labo qof ayaa dhimatay, toddoba kalana waa la dhaawacay, ka dib markii uu dagaal hubaysani dhex maray labo kooxood oo u kala dhashay Itoobiya iyo Eritereya, kuwaasoo ku dagaalamay tuulada Al-Shaykha ee gobolka Abha ee Boqortooyada Scuuudi Careebiya. Dadkii dhaawaca ahaa ayaa loo qaaday isbitaal yar oo ku dhaw meesha uu dagaalku ka dhacay. Maydka labadii qof ee halkaas lagu dilay ayaa sidoo kale la geeyay Isbitaalka Guud ee Casiir.

Ciidamada ammaanka ee Sucuudi Careebiya ayaa weerar ku qaaday goobtii uu dagaalku ka dhacay, waxayna xabsiga u taxaabeen shan iyo toban qof. Ciidamo aad u tira badan ayaa isku hareereeyay nawaaxigii uu dagaalku ka dhacay, kuwaasoo ugaadhsanayay dad badan oo ka baxsaday deegaannadii ay ku noolaayeen, ka dib markii uu dagaalku dhacay.

Ciidamada booliska ee Sucuudi Careebiya ayaa sheegay inay shan iyo tobankan qof ka soo qaqabteen meelo ka baxsan deegaannadii ay markii hore ku noolaayeen. Sababta uu dagaalkani ka billowday ma ayna sheegin masuuliyiinta Sucuudigu, hase yeeshee dagaalkii dhawr sano ka hor dhex maray labada dal ee Itoobiya iyo Eritereya ayaa keenay in colaad qallafsan ay ka dhex abuuranto labada shacab, iyadoo gaar ahaa dadwaynaha Eritereya ay diiddan yihiin damaaciga foosha xun ee taliska Addis Ababa ku doonayo inuu dalkooda mar kale ku qabsado.


Radio Xoriyo

12 Apr. 2005

C/nuur Sh. Mohamed
radioxoriyo@ogaden.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari

 Faafin: SomaliTalk.com |  April 12, 2005

Xisbiga Kulmiye oo Kubaaqay in Xilka Laga Qaado Madaxweyne Riyaale
Shir jaraa'id oo uu xafiiskiisa kuqabtay afhayeenka xisbiga kulmiye maxamed kaahin axmed ayuu... Guji... Apr 7

Soomaaliya & Liibiya oo Isku Afgartay in Dib Loo Soo Celiyo Mashruucii LIBSOMA 
»W/Maaliyada DFKMG oo la kulmay W/Maalgalinta Liibiya
»DFKMG oo ka Qayb Qaadanaysa Aaska Pope-ka Kaatoliga 
»Yuusuf Indhacadde oo soo Dhoweeyay Xildhinaano
»Qaar ka mida xildhibaanadii la filayay oo soo gaaray Xamar
»Muqdisho: Shir Jaraa`id oo ku saabsan cudurka Kaduudiyaha
Warka oo dhan ka akhri halkan... Guji... Apr 6

Kulaabo bogga  www.SomaliTalk.com 

SEARCH