MAXAA
KU KELIFAY INUU JEN. CADDE DIB U SOO
CELIYO MAAMULKII COL. CABDULAAHI?
Waxaa hubaal ah in dhamaan
muwaadiniinta u dhashay Maamul
Goboleedka Puntland dibad iyo
Guddaba ay sugayeen isbadel wayn oo
uu la yimaado maamulka cusub ee uu
madaxda ka yahay Jen. Cadde Muuse.
Waxaa la filayay isbadel madaxeed,
maamul, maarayn, maaliyadeed,
mushtamac iyo mustaqbal in uu la
yimaado Jananka Cusub ee dhawaan la
doortay.
Waxyaabihii ay mucaaradku ku
haysteen Col. Cabdullahi Yusuf ayaa
waxaa ka mid ahaa inuusan wax
horumarka ka samayn deegaamada
Puntland 7dii sanadood oo uu
hormuudka ka ahaa dhulkaasi.
Shacabku waxay is lahaayeen hadii
Jen. Cadde uu meesha qabsado waxaa
iman doona isbadel kaamil ah, wuxuu
kala-dirri doonaa dhamaan ragii Col.
Cabdulaahi maamulkiisii lagu yiqiin.
Waxaa kaloo la is lahaa wuxuu ku
xulan doonaa raga cusub ee
maamulkiisa halku dhaga ah “maxaa
taqaan ood dadka u qaban kartaa, ee
yaatahay iyo yaataqaan meesha way ka
bixi”.
Waxaa durba markii Jen. Cadde uu
meesha qabsaday soo ifbaxday inay
isku hareereeyeey dad ay isku jifo
hoose yihiin sida Ing. Caydaruus (oo
ah qof aan oran karo wuu u qalmaa
jago kasta oo loo dhiibo), laakiin
nasiib daro dadka indhaha qabiilka
wax ku eega oo indho ku garaad laha
ahi si kale ayay u arkaan, Osman oo
ah nin reer Kanada ah oo isaguna
jifada ka tirsan, Faarax Xaaji Mire,
iwm…..
Intaa markii laga soo gudbo oo la
eego wasiirada uu ku dhawaaqay Jen.
Cadde, waxaad laga dhandhasanayaa in
uu ku saleeyay qaab qabiil oo weliba
uu u sadburiyay qolooyin gaar ah.
Mida intaas isku fuuqsatay oo
Dulucda u ah qormadaydu waa su’aasha
oranaysa :
Maxaa ku kelifay Jen. Cadde in uu
dib u soo celiyo wajiyadii laga
daalay ee maamulkii Col. Cabdulaahi,
maxaa kelifay in uu ragii lagu
eedaynayay dhunsashada Canshuurta
Shacabka inuu soo celiyo? (Faroole,
Gaagaab, Xaabsade, Seefta Banaanka)
iwm….
Xaaji Bakiin iyo Ismaaciil Xaajina
muu ku soo daro dee, ilayn ragu waa
isla ragii ruugcadaaga ahaaye.
Markaan dib ugu noqday khibradayda
aan deegaanada Puntland u leeyahay,
markaan la kaashaday aqoontayda
Shacabka reer Puntland, waxaaba ii
soo baxday in uu Jen. Cadde, ragaas
wax u dhaama waayay, maxaa yeelay
raga meesha jooga waa wada (maxaan
cunaa iyo aan ku cuno), waa dad
bahaloobay oo xaaraantu uga macaan
tahay xalaasha.
Sidoo kale , isbadelka waxa
layiraahdo kuma yimaado habeen qudha,
ee waa wax u baahan dulqaad, iyo
marba talaabo qaad.
Sidaa awgeed anigu oran maayo sida
dadka qaarkii leeyihiin oo ah maxaa
odaygii Col. Yay saynta loo
maroojinayay hadii uu Jen. Cadde
shaxdaan iyo sheekadaan aan
cuntamayn soo bandhigo.????.
Waxaa sidoo kale u baahan in
shacabka reer Puntland la xusuusiyo
in Jen. Cadde uu wadanka ka maqnaa
Muddo aad u dheer oo dhan ilaa 30
sanadood, sidaa awgeed, isaga
laftiisa ayaa u baahan inuu dadka
iyo deegaankaba dib u kala barto,
qofkastaa wuxuu galo iyo wuxuu gudo
ogaado, markaasi ayaa laga yaabaa
inuu ama sidii Cabdirisaaq Xaaji
Xuseen lafihiisa la cararo ama inuu
isbadel keeno ama inuu sidii ragii
asaagiis iyo jaalkiis ahaa ku
dhexmilmo Sidii Jen. Maxamed Abshir
oo kale, oo baalashu kaga rifmaan
meesha, ilayn waa nin waraabayaal
iyo yay la yiri kala hore.
Waxaan Jen. Cadde kula talin lahaa
inuusan marna isku deyin isbadel
degdeg ah oo aan caaqibadiisa laga
fiirsan, sidoo kale inuusan il
keliya wax ku arkin dhag keliyana
wax ka maqlin ee uu ahaado nin
figradaha wax ku oolka ah qaata.
Waa hadii Jen. Cadde uu weli yahay
ninkaan aqaanay oo ah nin war cad,
munaafaqada aan jeclayn, beenta
necel, hadalkana aan qofna kala
cabsan.
Shacabka reer Puntlandna waxaan
leeyahay dulqaad muujiya oo ka
wardhowra odayga, oo haka sugina
dowladaan dhalatay inay orodo oo
isbadel degdeg ah iyo barwaaqo iyo
xabag barsheed farta idiin wada
geliso. Orodka waa marxalad la
gaaro oo dulqaad u baahan, waxaa ka
horeeya xamaarasho, guurguurasho,
kufaa dhac, iyo socod.
Ha
oranina maba aysan dhalane dhowrsan
okaa?!!!!!!!!
Jabarti Osman
Jabarti2020@hotmail.com
Afeef: Aragtida qoraalkan waxaa leh
qoraaga ku saxiisan
Faafin: SomaliTalk.com | Jan 27,
2005
Daabaco
Boggan | Print