Dowladda Masar oo taageertay in soomaaaliya la keeno Ciidamo shisheeye..

Wasiirka Arimaha dibadda ee Wadanka Masar Axmed Abuu Kheyb ayaa waxa uu sheegay in Dowladdiisu ay si weyn u soo dhaweyneyso go’aankii ururka Midowga Afrika ee ahaa in Soomaaliya loo diro ciidamo nabad ilaalin ah oo ka socda Midowga Afrika.

Wasiirka Arimaha dibadda waxa uu sheegay in dowladdiisu ay qayb ka qaadaneyso sidii ay Dowladda Federaalka gacan uga siin lahayd taabagelinta ciidamadaasi, si ay uga qayb-qaataan arimaha amniga.

Hadalka ka soo yeeray wasiirka arimaha dibadda waxaan ku raacsaneyn Xoghayaha guud ee Jaamacadda Carabta Caamir Muusaa oo sheegay in ciidamo nabad ilaalin ah oo loo diro soomaaliya ay keeni karto in ay sii murjuso xaaladda Soomaaliya.

Dhinaca kale Qaramad Midoobey ayaa ka soo horjeeda in Soomaaliya laga qaado cunaqabateynta hubka, taasoo ay Q/Midoobey sheegtay in Soomaaliya ay noqon karto goob ay ku qulqulaan hub fara badan oo laga yaabo in ay saameyn ku yeelato wadamada deriska la ah Soomaaliya.

Iska hor imaad ka dhacay deegaanka Dhooblay..

Wararka naga soo gaaray Magaalada Dhooblay ee Gobalka J/hoose waxay sheegayaan in maalintii shalay ahayd uu halkaasi ka dhacay iska hor imaad u dhexeeyay labo kooxood oo maleeshiyo ah oo koox midi galbineysay raashin mucaawino ah, waxaana iska hor imaadkaasi ku dhintay 3 ruux, dhowr kalana way ku dhaawacmeen.

Iska hor imaadyada ka dhasha hogaaminta raashinka Mucaawinada ah galbinteeda ayaa waxay maalmahan ku soo badanayeen dalka, waxaana ugu dambeeyay iska hor-imaad ka dhacay magaalada Baydhabo kadib markii ay koox maleeshiyo ah is hortaatay raashin mucaawino ah oo loo waday dadkii ku waxyeeloobay abaarihii deegaanadaasi ku dhiftay, sidoo kale iska hor imaad ayaa isna ka dhacay Gobalka Gedo markii ay koox maleeshiyo ah ay jidgooyo u dhigteen raashin la galbinayay.

Ibraahim Shookaali “Waxaan aad uga Walwalsanahay Maxkamadaha u gaarka ah.”

“Way fiican tahay in dalka Diinta Islaamka lagu xukumo, waana jidkii loo mari lahaa sugida ammaanka dalka iyo garsoor cadaaladeed, balse waxaan aad uga walaacsan nahay in Maxkamadaha u gaarka ah beelaha hubeysan ay noqdaan aalad loo isticmaalo caburinta iyo jowrfalka xaquuqda cadaaladeed ee beelaha dulman ee Soomaaliyeed iyo wixii ay aaminsan yihiin” sidaa waxaa yiri Guddoomiyaha Isbahaysiga Beelaha Dulman Mudane Ibraahim Geedi Jimcaale Shookaali, waxa uuna intaasi raaciyay “Waxaa nala haboon in marka hore heshiis siyaasadeed laga gaaro qaabka qaybsiga siyaasadeed oo ka madax banaan kala sareynta cunsuriyadeed ee 4.5 iyo natiijo dowladeed iyo mid maamul oo oo la wada leeyay iyo hogaan hayin ah oo ujeedo siyaasadeed leh, oo xiligaan Soomaaliya iyo beesha caalamka nabad ku wada xiriiri karaan.

Ugu dambeyntii Guddoomiyuhu waxa uu sheegay in Soomaaliya aysan ka maarmi karin hub ka dhigis caalami ah iyo dibuheshiisiin Soomaaliya oo hoos laga soo bilaabo lana howlgeliyo ilaha Dhaqaalah ee Dalka.

Wafdigii xaqiiqo raadiska oo kulan la yeeshay Dowlada Faderalka .

Wafdi xaqiiqo raadis ah oo ka socday Beesha Caalamka ayaa maalintii shalay ahayd gaaray Magaalada Baydhabo ee Gobalka Bay, waxaana wafdigasi intii aysan la kulmin mas’uuliyiina Dowladda soo kormeereen qaybo ka tirsan xarumaha Dowladda ee Magaalada Baydhabo, kadibna waxay wafdigaasi la kulmeen mas’uuliyiinta sarsare oo ay isla soo qaadeen arrimaha Soomaaliya.

Ra’isul Wasaare Geeddi ayaa mar uu la hadlay wafdigaasi waxa uu sheegay in Dowladda Federaalka ay si weyn ugu baahan tahay in dalka la keeno ciidamo shisheeye oo dowladda kala shaqeeya amniga iyo kala dambeynta, sidoo kale waxa uu Ra’isul wasaaruhu u sheegay wafdiga in beesha caalamka ay ka gaabisay wax u qabashada Dowladda lagu soo dhisay dalka Kenya.

Wafdigaan ayaa maanta la filayaa in uu soo gaaro Magaalada Muqdisho oo la filayo inay la kulmaan Midowga Maxaakiimta Islaamiga ah iyo qaybaha kala duwan ee Bulshada, iyadoo golaha Maxaakiimtu ay si weyn uga soo horjeedaan in dalka la keeno ciidamo nabad ilaalin ah, taasoo ay sheegeen in ay keeni karto dhibaato iyo dagaalo sokeeye oo hor leh.

Maleeshiyooyinka Maxaakiimta oo mar walba jabiya amarka shiikh Shariif...

Waxaa habeen hore maleeshiyo ka tirsan Midowga Maxaakiimtu ku dileen labo qofood oo ay midi Dumar ahayd Magaalada Dhuusamareeb ee Gobalka Galguduud, mar ay weerar ku qaadeen goob lagu daawanayay cayaaraha adduunka. Dilkaas oo ay gaysteen maleeshiyada Maxaakiimta ayaa waxaa si weyn uga xumaaday dadweynaha deegaanka oo iyagu codsaday in Maxaakiimtu ay gacanta ku soo dhigaan raggii ka dambeeyay dilkaasi, maadaama ay dil bareer ah galeen.

Maleeshiyooyinka Maxaa-kiimta oo intooda badan aan qabin tababar isla markaana aan lahayn wax dulqaada ayaa waxaad moodaa in ay mar kasta jabiyaan amarkii guddoomiyaha Golaha Maxaakiimta Sheekh Shariif Sheekh Axmed oo sheegay in waqtigaan aysan Midowga Maxaakiimta qorshaha ugu jirin in ay xiraan Shineemoo-yinka iyo goobaha lagu daawado Aflaanta, isagoo sheegay in Midowga Maxaakiimtu ay ku howlan yihiin howlo ka waaweyn arrimahaasi.

Maalintii shalay ahayd ayaa indhaheygu waxay qabteen wiil yaryar oo dhallinyaro ah oo hadba dhinacd ula ordaya Qori, iyagoo raacdeysanaya Gawaari la sheegay in ay kas oo fakadeen busteejadii loogu talagalay, waxayna wiilashaasi mararka qaarkood ay garbaash la dhacayeen rag waaweyn.

“Yaa u baneeyay in ay garbaash la dhacaan dadka, waxay awoodaan in ay si fudud ay ku wadaan qofkii ay dami ku qabtaan” ayuu yiri Nin odey ah oo sheegay in Maleeshiyadaa Maxaakiimta looga baahan yahay in nidaamka noocaan oo kale ah bedelaan.

Xasan Hilowle “waa dhamaatay xiligii. looma dhama.”

Xasan Hilowle Cusmaan (Xasan Kacaan) oo ka mid ah siyaasiyiinta ka soo jeeda gobalka Hiiraan ayaa waxa uu sheegay in inta badan Koofurta Soomaaliya ay gacanta ku hayaan Golaha Maxaakiimta Islaamiga ah, sidaa darteed, waxaa looga baahan yahay in wax walaba iyaga looga dambeeyo.

“Waa dhamaatay xiligii looma dhama, Taasoo burburka Soomaaliya heerkaan soo gaarsiisay, marka qolooyinka oronaya wax walba waa in nalaga qaybgeliyaa sida Bulshada rayidka ah, Ganacsatada iyo kooxaha kalaba waa in ay ogaadaan is bedelka ka dhacay dalka, gaar ahaan koofruta Soomaaliya, isla markaana ay joojiyaan hadalada maalin walba ay ka sii deynayaan warbaahinta”, laakiin Xasan Kacaan waxa uu sheegay meesha ay ka marneyn oo loo baahan yahay wixii talo ah ee lagu biirinayo Maxkamadaha.

W/D Amiin Yuusuf Khasaaro

E-Mail amiinkhasaaro@hotmail.com