Wararkii July 8, 2006

• Golaha Maxaakiimta Islaamiga ah oo beeniyay in dagaalkii Muqdisho ka qaybqaateen...

• Cadde Muuse “Anagu ma aqoonsanin wax la yiraahdo Maxkamado Islaami ah..”

• Wafdigii xaqiiqo raadinta oo maanta tegaya Kismaayo..

• Mid ka mid ah ilaaladii Wasiirkii ku xigeenkii.Xanaanada Xoolaha oo toogasho.

• ---

Golaha Maxaakiimta Islaamiga ah oo beeniyay in dagaalkii Muqdisho ka qaybqaateen...

Golaha Maxaakiimta Islaamiga ah ayaa si kulul u beeniyay "Cajalad Fiidiyow" ah oo la sheegay inay baahisay wakaaladda wararka AP, cajaladaas ayaa waxa ay ahayd mid ku saabsanayd in dagaaladii dhawaan ka dhacay Magaalada Muqdisho ay ku jireen ama qayb-qaateen rag shisheeye ah oo u badan Carab, waxayna wararkaasi ku tilmaameen Golaha Maxaakiimtu mid aan sal iyo raad toona lahayn oo loogu qiil dayanayo in la sii fogeeyo xal u helida arrimaha Soomaaliya. Golaha Maxaakiimtu waxa ay sheegeen in aysan jirin wax shisheeye ah oo ka qayb-qaatay dagaalkii ka dhacay Magaalada Muqdisho ee looga soo horjeeday Isbahaysigii burburay ee la dagaalanka Argagixisada.

“Dagaalka waxaa ka qayb-qaatay shacabka Soomaaliyeed oo iyagu ka dhiidhiyay dhibaatadii ay ku hayeen mudo 16 sano ah Hogaamiye kooxeedyadii” ayay yiraahdeen Golaha Maxaakiimta oo sheegay in ay diyaar u yihiin in ay cid kasta tusiyaan xaqiiqda dhabta ah ee uu dagaalkaasi ku saabsanaa iyo wixii dhaliyay. Dhowr sawir oo aan ka daawaday Cajaladda, ayaa mar hore cajaladdu waxay tahay mid mugdi ah, waxaana lagu tusinayaa in Caddaan ah oo dul saaran Gaari haystana Qori, sidoo kalana waxaa lagu tusinayaa nin kale oo Caddaan ah oo uu madaxa ugu duuban tahay maro ay ku qoran tahay (Allaahu Akbar), watana funaanad u eg Tuutaha Mareykanka, mana jiraan wax Soomaali ah oo ag taagan raggaasi. Sidoo kale Cajaladdii uu dhawaan soo daayay Usaama Bin Laadin ayaa iyana qaar ka mid ah Bulshada waxa ay sheegeen in cajaladdaasi ay ahayd mid u eg been abuur, waayo weli ma dhicin 24-saac in Usaama Bin Laadin uu soo duubo labo cajal. “Dagaalka lagula jiro Midowga Maxaakiimta ee dhinaca Saxaafadda waa mid isa soo taraya, waxaana loo baahan yahay in ay dulqaad yeeshaan” ayuu yiri mid ka mid ah Xubnaha Shuurada ee Golaha Maxaakiimta oo sheegay in aysan dheg shalaq u siin Maxaakiimtu arrimaha noocaas oo kale ah.

Cadde Muuse “Anagu ma aqoonsanin wax la yiraahdo Maxkamado Islaami ah..”

Gen. Cadde Muuse oo ah Madaxweynaha maamul Gobaleedka Puntland ayaa wax laga weydiiyay sida aragtidiisa ku aadan is bedelka cusub ee ka dhacay magaalada Muqdisho iyo nawaaxigeeda, kadib markii ay Golaha Maxaakiimtu la wareegeen gacan ku hayntii caasimadda iyo Gobalada ku dhow dhow, waxa uuna sheegay Cadde Muuse in maamulkiisu uusan aqoosanayn Maxaakiimta.

“Anagu waxaan leenahay maamul noo gaar ah iyo maxkamado noo gaar ah” ayuu yiri Cadde Muuse oo sheegay in is bedelka ka dhacay Magaalada Muqdisho uu saameyn ku yeeshay qaar ka mid ah Gobalada hoos taga maamul Goibaleedka Puntland, isagoo markaasi ula jeeday dilkii loo gaystay weriye u dhashaday wadanka Sweden oo dhawaan lagu dilay fagaaraha Tarabuunka oo uu banaanbax ka dhacayay.

Maamul Cadde Muuse ayaa dhawaan xirxiray Culuma-u-Diin iyo xubno kale oo iyagu si weyn ugu guuxay is bedelka ka dhacay magaalada Muqdisho, qaarkoodna ay weli haatan ku jiraan xabsiyada maamulkaasi.

Wafdigii xaqiiqo raadinta oo maanta tegaya Kismaayo..

Maanta ayaa la filayaa in wafdigii xaqiiqo raadinta uu gaaro Magaalada Kismaayo ee Gobalka J/hoose, waxaana lagu wadaa in halkaasi ay kula kulmaan mas’uuliyiinta Dooxadda Jubba oo uu ugu horeeyay Wasiirka dib u dhiska iyo dib u dejinta Barre Aadan Shire (Barre Hiiraale) oo isagu dib ugu laabtay Magaalada Kismaayo.

Wafdigaani ayaa waxay horey u soo mareen Magaallooyinka Baydhabo iyo Muqdisho oo ay ku kala sugan yihiin Dowladda Federaalka iyo Golaha Maxaakiimta, iyadoo Golah Maxaakiimta ay wafdigaasi u gudbiyeen qoraal ay ku diidan in dalka la keeno ciidamo Shisheeye, halka Dowladda Federaalka ay iyana wafdigaasi u sheegtay in dalka uu u baahan yahay in la keeno ciidamo shisheeye.

Barre Hiiraale waxa uu ka mid yahay wasiirada sida aadka ah u taageersan in dalka la keeno ciidamo shisheeye, waxaana wafdigasi marka ay u uruuriyaan fikradaha aybaha kala duwan ee bulshada ayay dib ula laaban doonaan ururadii caalamiga ahaa ee ay ka kala socdeen.

Eedeymo loo jeediyay wafdigii xaqiiqo raadiska..

Maalintii Khamiista ayaa waxaa Magaalada Muqdisho soo gaaray wafdi xaqiiqo raadis ah oo ka socday beesha Caalamka, waxayna wafdigaasi ka soo degeen garoona Diyaaraha ee Cisaley, waxayna markiiba kulan kula qaateen Hotel Ramadaan Golaha Maxaakiimta Islaamiga ah, waxaana wafdigaasi loo gudbiyay warqad qoraal ah oo ay ku qornaayeen dhowr qodob, waxaana ku jiray qodob oronaya in Golaha Maxaakiimta ay si aad ah uga soo horjeedaan in dalka la keeno ciidamo Shisheeye noocay doonana ha noqdeen.

Waxay kaloo la kulmeen qaybo kale oo ka tirsan Bulshada oo uu ku jiro Guddoomiyaha Gobalka Banaadir Cadde Gaabow, hase yeeshee wafdigaasi ayaa waxaa eedeeyn u jeediyay qaar ka mid ah bulshada oo ay ugu horeeyaan xubno la magacbaxay Maxaakiimta Ahlu Sunna Waljameeca, waxayna wafdigaasi ku eedeeyeen in ay ku xadgudbeen waxyaabihii ay u yimaadeen Muqdisho kadib markii ay sheegeen in wafdigaasi uu la kulmay hal dhinac, sidoo kale Culuma-u-diin kale ayaa wafdigaasi ku sugayay Hotel Global, hase yeeshee wafdigaasi ayaa halkaasi tagin, waxayna qaar ka mid ah xubnihii halkaasi ku sugnaa ku eedeeyeen wafdigaasi in aysan ahayn wafdi dhex dhexaad ka ah arrimaha Soomaaliya. Xubin ka tirsan Wafdiga Xaqiiqo raadinta ayaa sheegay in Muqdisho iyo qaar ka mid ah gobalada ku dhow dhow ay beesha caalamka u aqoosan tahay in ay ka taliyaan Golaha Maxaakiimta sidaasna ay ku yimaadeen Magaalada Muqdisho.

Mid ka mid ah ilaaladii Wasiirkii ku xigeenkii.Xanaanada Xoolaha oo toogasho.

Wararka ka imaanaya Baydhabo, waxay sheegayaan in maalintii shalay ahayd la dilay mid ka mid ah ilaaladii wasiir ku xigeenka Xanaanada Xoolaha Cabdi Max’ed Dhuxulow.

Dilakaas ayaa waxaa gaystay kooxo hubeysan oo ka tirsan deegaanka, ilaa iyo haatanna lama garanayo sababihii loo weeraray ninkaasi, warar ayaa waxay sheegayaan in la doonayay in laga disho qoriya, hase yeeshee warar kale ayaa waxay tibaaxayaan in inta aan la dilin uu muran dhex maray mid ka mid ah maleeshiayda deegaanka kadibna rasaas lagu furay oo uu goobtii ku dhintay.

Ma ahan markii ugu horeysay oo dil noocaan oo kale ah uu ka dhaco Magaalada Baydhabo oo xarun u ah Dowladda Federaalka, iyadoo dhawaan maleeshiayda daacadda u ah Madaxweyne C/llaahi Yuusuf ay bartamaha Magaalada ku dileen nin la oran jiray Bashiir Boonow.

Sidoo kale weerar ayaa lagu ekeeyay xarun u booliis oo ku tiilay bartamaha magaalada Baydhabo, waxaana halkaasi ku dhintay mid ka mid ah ciidamadii booliiska ee halkaasi ku sugnaa.

Xaflad loo sameeyay furitaankii Radio Simba...

Xaflad si heer sare ah loo soo agaasimay ayaa lagu qabtay Hotel Peace, waxayna xafladdaasi ku saabsaneyd furitaanka Idaacad Cusub oo noqoneysa Idaacaddii ama Raadiyihii 12-aad ee ka furan Magaalada Muqdisho.

Raadiyaahan oo loogu magac-daray Radiyo Simba ayaa furitaankiisii waxaa ka qaybgalay qaybaha kala duwan ee Bulshada, waxaana ugu horeyntii halkaasi warbixin ka soo jeediyay agaasimaha Idaacadda Max’ed Xasan Feynuus oo sheegay in ujeedooyinka loo furay idaacaddaani ay tahay sidii ay Bulshada uga haqabtiri lahayd war hufan oo ku saleysan xaqiiqda dhabta ah.

Sidoo kale waxaa halkasi ka hadlay madaxa Maaliyadda iyo horumarinta ee Idaacaddaasi Daahir Cabdulle Calasow (Daahir yare) oo isna sheegay in Idaacaddu ay diyaar u tahay in ay qayb ka qaadato sare ku qaadida ganacsiga Soomaaliyeed, isagoo sheegay in ay Idaacaddu ku shaqeyn doonto dhex dhexaadnimo si ay bulshadu u helaan warar ay ku kalsoonaan karaan.

Intii ay Xafladdu socotay ayaa waxaa halkaasi lagu soo bandhigay Ruwaad ka hadleysay Idaacadaha, waxaana ugu yaab badnaa markii Make Xaaji Banaadir uu Bac ka soo buuxsaday ilaa iyo 12 Raadiye markii la weydiiyayna waxa uu yiri “Ma doonayo in uu hal war I dhaafo” taasoo ay si aad ah ula yaabeen dadkii Xafladdaa joogay, waxaa kaloo ka hadlay Tifaftiraha Idaacadda C/naasir Zero oo sheegay in Idaacaddu ay Tifaftiri doono war kasta oo idaacadda ka baxay, sidoo kale waxaa ka hadlay Siciid Siyaad Shirwac oo ku hadlayay Magaca Aqoonyahanada Soomaaliyeed, waxa uuna u mahadceliyay intii ka soo shaqeysay furitaanka Idaacaddaasi, isagoo u soo jeediyay in ay bulshada u soo gudbiyaan warar tayo leh.

W/D Amiin Yuusuf Khasaaro

E-Mail amiinkhasaaro@hotmail.com

Faafin: July 8, 2006

Dood-Cilmiyeed: Isbedelka Cusub ee Soomaaliya
Aqoonyahanno ku sugan dalka Canada ayaa ka hadlay kacdoonka Soomaaliya iyo raadka uu... Dhegeysi...

Wafdigii ka socday ururka Midowga Afrika, jaamacadda Carabta, urur goboleedka IGAD
iyo Midowga Yurub oo Muqdisho si weyn loogu soo dhoweeyay... Warbixin....