Wararkii July 9, 2006

• Muqdisho: Goobo Muhiim ah oo ay la wareegeen Maxkamadaha

• Xisbiga Ramaas oo Bayaan ka soo saaray Garoowe:::

• Kismaayo: Warbixin waftigii ka socdey beesha caalamka...

• Xubnihii Isbahaysiga oo maanta kulan la yeelan doona...

• Hay’ad camabareysay falal dil ah oo ay gaysteen Maxaakiimta Islaamiga ah.

• Barre Hiiraale iyo Itoobiya oo si aad ah isugu soo dhawaanaya

• Sheekh Xasan Daahir Aweys oo kulan kulan kula yeeshay Dhuusamareeb Safiirka Talyaaniga..

• Warar ku saabsan xaaladda Magaalada Baydhabo..

• ---

Wafdigaani oo ka koobnaa 21 xubnood kana socday beesha caalamka ayaa diyaaradi waday waxay soo cagadhigatay garoonka diyaaradha ee magaalada Kismaayo sideedii subaxnimo ee sabtidii waxayna isla subaxnimadii uga warameen ujeedkooda imaatiga magaalada Kismaayo masuuliyiinta Dooxada Jubba oo kusoo dhoweeyey magaalada Kismaayo xaruntooda baranwaa,

Xubnahaasi ayaa ku sheegay ujeedada imaatingooda magaalada Kismaayo in ay tahay mid qeyb ka ah qiimeyn arimaha nabadgalyada ah iyo u kuurgalida arimaha siyaasada oo ay kawadeen waayadani magaalooyin badan oo dalka soomaaliaya ah, qeybna ay katahay magaalad Kismaayo.

Waxay sheegeen wafuudaani oo uu hogaaminaayey safirka dalka Kenya ee Soomaaliya Ambasador Maxamed Cabdi Afey in ay doonayaan in ay kala kulmaan maamulka Isbahaysiga Dooxada Jubba Arimaha ammaanka Gobolka iyo isbedelka siyaasadeed ee dalka ka dhacay sida ay ula jaan qaadayaan madaxda Jubbyooyinka ee Isbahaysiga .

Masuuliyiintani ayaa dhinaca odayaasha Dhaqanka kahadlay sidii ay udhiiragalin lahaayeen heshiiska dowlda iyo Maxkamadaha ayna usii xoojin lahaayeen nabadgalayada iyadoo waliba la weydiiyey fikrada ay ka qabaan ciidamo shiisheeyo odayaasha, inkastoo ay ku qeybsameen arinkaasi,

Wafuudaani ayaa waxaa ku wehlinaayey socdaalkooda Safiirka Ethoobia ee Soomaaliya Cabdicasiis Sheeq Ahmed waxaana aan weydiiyey wareysi gaar ah oo aan layeeshay sababta kalifay in ay yimaadaan magaalada Kismaayo wafuuda Ethiopia oo ay u tagi waayeen magaalada Muqdisho oo kahor Kismaayo ay booqden Xubno ka mid ah waftiga, haseyeeshee waxaa uu taasi kaga jawaabay in cilad dhinaca farsamada ah oo heshay ay taasi tahay.

Waxay Booqdeen xubnahaasi intii ay joogeen magaalada Kismaayo Dekeda magalaada Kismaayo ,Isbitaalka degmada iyo xarunta maamulka degmada Kismaayo, waxayna dhamaantood lakulmeen masuuliyiintii joogtay oo ay kala hadleen Arimo samafalka iyo sida ay ushaqeeyaan .

Wafudaani ayaa waxaa uu noqonayaa socdaalkii ugu horeyey oo ay kuyimaadaan magaalada Kismaayo iyagoo sheegay in ay usii gudbi doonaan magaalooyin kale oo dalka ah oo ay kamid tahay magaalada Gaalkacyo ee maamul goboleedka Puntland.

cabdi qadar nuur maxamed (filipiin)
kismaayo somaliya
cabdiqadar84@hotmail.com

Sweden: Haweeney lugu sheegay iney Soomaali tahay oo dad qabadsiisay cudurka AIDS-ka

W/D Amiin Yuusuf Khasaaro
E-Mail amiinkhasaaro@hotmail.com

Wararka naga soo gaaraya Magaalada Ceel-Buur ee Gobalka Galguduud waxay sheegayaan in uu xiriir dhex maray Guddoomiyah Golaha shuurada Maxaakiimta islaamiga ah Sheekh Xasan Daahir iyo qaar ka mid ah xubnaha la dagaalanka Argagixisada oo iyagu hore ka baxsaday magaalada Muqdisho haatanna ku sugan Magaalada Ceel-Buur.

Xubnahaasi oo ay ka mid yihiin Max’ed Qanyare Afrax, Cabdi Nuur Siyaad iyo Bootaan Ciise Caalin ayaa la filayaa in kulanka maanta ay isla soo qaadaan sidii loo soo afjari lahaa colaaddii horey u dhex martay kadib markii ay dhamaantood qirteen in Isbahaysigaasi uu burburay.

Sheekh Xasan Daahir ayaa waxa uu sheegay in raggaasi ay horey u wada xiriireen, haatanna ay diyaar u yihiin in la soo gebagabeeyo wixii horey u dhacay.

Kulankaan oo aan weli la shaaci halka uu ka dhacayo ayaa wararka qaarkood waxay sheegayaan in lagu wado in kulankaasi uu ka dhaco Degmada Ceel-Buur, hase yeeshee ilaa iyo haatan lama oga halka ay ku dambeeyeen Bashiir Raage, Muuse Suudi iyo Max’ed Dheere, waxaase raggaasi ka soo baxaya warar kala duwan qaar waxay sheegayaan in raggaaasi ay ku sugan yihiin Magaalda Boosaaso, warar kale ayaa waxay sheegayaan in xubnahasi qaar ka mid ah iyana ay ku sugan yihiin dalka Itoobiya, isku soo wada duuboo dadku weli ay ku jahwareersan yihiin halkii ay ku dambeeyeen raggaasi oo ahaa raggii ugu firfircoonaa Isbahaysigii la dagaalanka Argagixisada ee burburay, waxaana Magaalada Muqdisho haatan ku sugan Cabdi Xasan Cawaale Qaybdiid iyo Cumar Finish oo ciidamadiisa ku biiriyay Maxaakiimta Islaamiga ah.

Hay’ad camabareysay falal dil ah oo ay gaysteen Maxaakiimta Islaamiga ah.

Xarunta Ismaaciil Jimcaale ee Xaquuqda Aadamiga waxay cambaareyneysaa dilkii loo gaystay 5-tii Julay marxuumiinta kala ah Max’ed Xirsi Dhoore iyo Sahro Axmed Indhaweyne oo koox maleeshiyo ah, waxayna xaruntu sheegtay in labadaasi qofood dilkooda ay ka dambeeyeen maleeshiyo ka tirsan Maxkamadda Islaamiga ah ee Magaalada Dhuusamareeb iyadoo markaa daawanayay cayaar ka tirsan Koobka Adduunka.

Dilka loo gaystay marxuumiintaas ayay Xarunta Ismaaciil Jimcaale ku tilmaantay mid xadgudub ku ah Shareecadda Islaamka, Xeerarka soo jireenka ah ee Dhaqanka Soomaalida iyo Baaqa caalamiga ah ee xaquuqda Aadamiga qodobkiisa 3 –aad oo leh “qof kata waxa uu xaq u leeyahay inuu ku noolaado nabadgelyo iyo xorriyo”.

Ugu dambeyntii waxa ay ka codsaneysaa xaruntu Maamulka Maxkamadda Islaamiga ah, Odoyaasha Dhaqanka, Culuma’udiinka iyo dhamaan qaybaha bulshada in ay gacan ka gaystaan soo qabashada maleeshiyadii gaysatay dilkaas bareerka ah si loo hor keeno sharciga hortiisa loogana jaasiyo xadgudubkii ay gaysteen, waxaana qoraalkaan ku saxiixnaa Maryan Xuseen Awreeye oo ah Guddoomiyaha Xarunta..

Barre Hiiraale iyo Itoobiya oo si aad ah isugu soo dhawaanaya

Waxaa maalintii shalay ahayd Magaalada Kismaayo gaaray wafdigii xaqiiqo raadinta ee maalmahan booqanayay gobolo ka mid ah dalka, iyadoo intii ay ku sugnaayeen Magaalada Kismaayo ay kulamo la yeesheen wasiirka dib u dhiska iyo dib u dejinta Barre Aadan Shire (Barre Hiiraale) oo ay isla soo qaadeen is bedelada cusub ee ku soo kordhay dalka, gaar ahaan Koofurta Soomaaliya. Wafdigaasi waxaa ku jiray Safiirka Itoobiya u fadhiya Soomaaliya, waxaana la sheegay in Barre Hiiraale iyo safiirka Itoobiya ay wada yeesheen kulan gaar ah oo mudo saacado ah wada qaateen, ilaa iyo haatanna lama oga waxyaabihii ay ka wada hadleen, hase ahaatee waxaa maalmahan soo xoogeysanayay isu soo dhawaanshaha Itoobiya iyo Barre Aadan Shire (Hiiraale), iyadoo Barre Aadan Shire uu taageeray in Soomaaliya la keeno ciidamo shisheeye oo aan la kala soocin oo ay ku jirto Dowladda Itoobiya.

Ugaas Max’ed Wali Ugaas Axmed Nuur oo ah Ugaaska Beesha Sade ayaa waxa uu Barre Hiiraale ku tilmaamay in uu fulinayo arimo gaar ah oo uu u soo dhiibay C/llaahi Yuusuf Axmed, isago kula taliyay in Barre uusan ku abaal dhicin dadkii horey gacanta ku siiyay, isla markaana uu ka digtoonaado qorshaha qarsoon oo ay wataan Itoobiya iyo C/llaahi Yuusuf Axmed. Barre dhawaan ayuu ka soo laabtay Magaalada Baydhabo, waxa uuna kulan gaar ah la yeeshay Madaxweyne C/llaahi Yuusuf Axmed oo ay isla soo qaadeen arimo fara badan oo la sheegay in ay u badnaayeen is bedelka weyn ee ka dhacay Magaalada Muqdisho, hase yeeshee Barre waxa uu horey u soo dhaweeyay is bedelka ka dhacay Magaalada Muqdisho oo looga adkaaday qabqablayaashii dagaalka ee madada 16-ka sano ahayd dhibaatada ku hayay shacabka Soomaaliyeed gaar ahaan kuwa ku nool Gobalka Banaadir iyo hareerihiisa.

Sheekh Xasan Daahir Aweys oo kulan kulan kula yeeshay Dhuusamareeb Safiirka Talyaaniga..

Wararka naga soo gaaraya Magaalada Dhuusamareeb oo xarun u ah Gobala Galguduud ayaa waxay sheegayaan in maalintii shalay ahayd Magaaladaasi ay kulan ku wada yeesheen Safiirka Talyaaniga u fadhiya Soomaaliya Mario Revelli, waxaana kulankaasi la iskula soo qaaday arrimo fara badan gaar ahaan is bedelka ka dhacay dalka, kadib markii inta badan Maxaakiimtu la wareegeen goobihii ay horey uga talin jireen qabqablayaasha dagaalka.

“Safiirku ma af xumeyn wax wanaagsan ayuu ku hadlay si wanaagsanna waxaan isku dhaafsanay fikrado badan” ayuu yiri Sheekh Xasan Daahir Aweys oo Guddoomiyaha Shuurada ee Golaha Maxaakiimta.

Mar wax laga weydiiyay in ay isla soo qaadeen qorshe uu Talyaanigu wato oo ah in qaar ka mid ah mas’uuliyiinta Maxaakiimta lagu biiro Dowladda Federaalka ayaa waxa uu ku jawaabay Sheekh Xasan Daahir “Haa arrimahasi waan isla soo qaadnay balse marka hore waxaa ka horeeya in la wada hadlo oo la is afgarto”.

Safarka uu Wasiirku ku tegay Dhuusamareeb ma ahayn mid horey loo ogaa, hase yeeshee Sheekh Xasan Daahir waxa uu sheegay in horey loogu soo wargeliyay.

Warar ku saabsan xaaladda Magaalada Baydhabo..

Iyadoo dhowr jeer magaaladaasi dil loogu gaystay dad rayid ah, ayaa haddana oo waan waxba galabsan, iyadoo ay Magaalada ku sugan yihiin ciidamo fara badan oo booliis ah.

Maalintii shalay ahayd ayaa waxa uu Madaxweyne C/llaahi Yuusuf magacaabay Guddoomiyaha Maxkamadda Sare, waxaana loo magacaabay Yuusuf Cali Haaruun sidoo kale waxaa la magacaabay garyaanka guud ee Dowladda iyo ku xigeenada Guddoomiyaha Maxkamadda Sare.

Sidoo kale waxaa Magaalada Baydhabo shalay soo gaaray qaar ka mid ah wafdigii xaqiiqo raadiska oo iyagu ka soo kicitimay Magaalada Kismaayo, waxayna xalay kulan la yeesheen madax ka tirsan Dowlada Federaalka, maanta ayaa la filayaa in ay u dhaqaaqaan Magaalada Gaalkacyo ee Gobalka Mudug.

Wararka kale ee ka imaanaya Magaalada Baydhabo, waxaa ka mid ah in maalintii shalaya ahayd Magaaladaasi ay dib ugu so laabteen ciidamo booliis ah oo ay tiradoodu gaareyso 96 –askari, kuwaas oo lagu soo tababaray Magaalad Mombassa ee dalka Kenya, kadibna waxaa la sheegay in ciidankasi ay ilaalo u noqon doonaan saddexda mas’uul ee ugu sareysa Dowladda.

W/D Amiin Yuusuf Khasaaro
E-Mail amiinkhasaaro@hotmail.com

Faafin: July 9, 2006

Dood-Cilmiyeed: Isbedelka Cusub ee Soomaaliya
Aqoonyahanno ku sugan dalka Canada ayaa ka hadlay kacdoonka Soomaaliya iyo raadka uu... Dhegeysi...

Wafdigii ka socday ururka Midowga Afrika, jaamacadda Carabta, urur goboleedka IGAD
iyo Midowga Yurub oo Muqdisho si weyn loogu soo dhoweeyay... Warbixin....