Sheekh Shariif oo magacaabay Guddiga Nadaafada Gobolka Banaadir..

Guddoomiyaha Golaha Maxaakiimta Sheekh Shariif Sheekh Axmed ayaa shalay magacaabay guddiga nadaafadda gobalka Banaadir, waxa uuna guddigaasi ka kooban dhowr xubnod waxaana guddoomiye u ah Cumar Af-Tooje, waxaa kaloo xubno ka ah Sheekh Axmed Max’ed Suleymaan.

Guddigaan ayaa Sheekh Shariif sheegay in todobaadyada soo socda howlgali doonaan isla markaana ay wax ka qaban doonaan howlaha Nadaafadda gobalka Banaadir.

Sheekh Shariif ayaa wareysi uu dhawaan bixiyay waxa uu ku sheegay in howsha ugu horeysa oo ay ka qaban doonaan Magaalada Muqdisho ay tahay soo celinta bilicda iyo nadaafadda Magaalada, waxaa kaloo uu sheegay inay howl laga qaban doono goobaha sharci darada ah ee ku yaala wadayooyinka.

Cabdi Qaybdiid oo la sheegay in uu ku sii Jeedo Itoobiya..

Wararka naga soo gaaraya Magaalada Gaalkacyo waxay sheegayaan in Cabdi Xasan Cawaale (Qaybdiid) oo haatan ku sugan magaalada Gaalkacyo lagu wado in uu dhaqaaqo dhinaca dalka Itoobiya.

Inkastoo aan la hayn sababaha uu Cabdi Qaybdiid uu u aadayo dalka Itoobiya, haddana warar ayaa waxay sheegayaan in Cabdi Qaybdiid uu u tago sidii uu taageero Militari uga heli lahaa Dowladda Itoobiya.

Dhanka kale Max’ed Dheere oo lagu wado in uu tago Magaalada Gaalkacyo ayaa waxaa la sheegay in Max’ed Dheere uu si dhaqsi leh ugu yeeray Cabdi Qaybdiid, si ay u wada dejiyaan qorshayaal ku aadan sidii ay uga hortagi lahaayeen Golaha Maxaakiimta oo dhawaan uga adkaaday Magaalada Muqdisho.

Warar ku saabsan Max’ed Qanyare Afrax..

Max’ed Qanyare Afrax oo dhawaan ka dhaqaajiyay halkii uu ku dhashay ee Dirri ee deegaanka Ceel-Buur ayaa wararka halkaasi ka imaanay waxay sheegayaan in Max’ed Qanyare uu diiday in wax waan waan ah uu la galo Golaha Maxaakiimta, taas oo la xiriirta sidii uu u soo wareejin lahaa hubka.

“Anigu waan is difaacayaa waayo, waxaan hubkaan u sidaa in aan cidna ku wax yeeleyn” ayuu yiri Max’ed Qanyare oo la sheegay in uu kulamo haatan la leeyahay Odoyaasha iyo Waxgaradka ku sugan Deegaanka Ceel-Buur, si loo dhameeyo wixii khilaafaaf ah ee jira ee u dhexeeya isaga iyo Golaha Maxaakiimta, waxa uuna meesha ka saaray in uusan aadi doonin Dalka Itoobiya, Iyadoo Cabdi Waal iyo Bootaan Ciise Caalin ay aadeen dalka Itoobiya.

Sanduuqa Gargaarka Afrika oo Siminaar u soo gebagabeeyay..

Maalintii shalay ahayd ayaa Jaamacadda Muqdisho , waxaa lagu soo gebagabeeyay Siminaar socday Mudo toban maalmood ah, waxaana Siminaarkaasi ka qaybgalay 12 Macallin, oo ka kala socotay Dugsiyada Aslaam oo ay maalgeliso Sanduuqa Gargaarka Afrika.

Xubnihii halkaasi ka hadlay ayaa waxaa ka mid ahaa Prof. Cali Xasan oo ah Guddoomiye ku xigeenka Jaamacadda Muqdisho oo sheegay in Siminaarada noocaan oo kale ah ay yihiin kuwo kor u qaadaya Garaadka Macallinka, sidoo kale waxaa ka hadlay Bashiir Max’ed Yuusuf oo ka socday Dalladda FPENS oo sheegay in Macallimiitu yihiin kuwo mar kast au baahan Siminaaro, si ay Macallimiintu u noqdaan kuwo awood u yeesha in ay Ardayda u faa’iideeyaan, sidoo kale waxaa ka hadlay Xuseen Tooxoow oo ka socday Hay’adda UNESCO , waxa uuna u soo jeediyay Macallimiintii ka qaybgashay siminaarkaasi inay uga faa’iideeyaan kuwa kale ee aan fursadda u helin.

Waxaa kaloo Guddoomiyaha Sanduuqa Gargaarka Afrika Axmed Max’ed Beeray oo sheegay in Dugsiyada Aslaam ay tiradoodu gaareyso 37 Dugsi, ayna wax ka dhigtaan 20-Kun oo Caruur ah, waxna ay ka dhigaan 500 oo macallimiin ah, isagoo sheegay in Siminaarada Noocaan oo kale ay ay sii balaarin doonaan.