SOMALITALK.COM
w w w . S o m a l i T a l k . c o m
SOMALITALK - WARAR
 

Wararkii July 21, 2006

  • Safiyo Xiiray “Waxaan Kanada uga imid sidii aan carruurta soomaliyeed uga faa’iideyn lahaa aqoonteyda”
  • Siminaar ku saabsan Cudurka AIDS-ka oo loo qabtay Suxufiyiin ka kala socotey qaybaha waarbahinta….
  • Sheekh Shariif “C/llaahi muxuu isku wareerinayaa, cid ku heysata madaxweynanimada ma jirto”
  • Yuusuf Indhacadde, “Itoobiya haddii ay soo weerarto Muqdisho anaguna waxaan weerareynaa Adis Ababa”
  • .Ciidamo Itoobiyaan ah oo lagu arkay Magaalada Baydhabo….
  • ."Itoobiya oo isu diyaarisay in ay ku duusho Soomaaliya"
Safiyo Xiiray “Waxaan Kanada uga imid sidii aan carruurta soomaliyeed uga faa’iideyn lahaa aqoonteyda”

Waxaa dhawaan Dugsiga Hoose iyo Dhexe ee premier Education lagu qabtay xaflad ku saabsaneyd gebagabadii sanad dugsiyeedkii 2005 iyo 2006, waxaana xafladdaasi ka qaybgalay mas’uuliyiin ka socotay gobalka Banaadir, Dalladaha waxbarashada, waalidiinta iyo ardayda wax ka barata dugsigaasi, waxaana halkaasi warbixin ka soo jeediyay maamula dugsigaasi Safiyo Xiiray Qaasin oo sheegtay in Dugsiga mudadii yareyd ee uu furnaa maalinba maalinta ka dambeysa ay sii kordhayaan carruuta la keenayo , waxayna sheegtay in mudadaasi ay Ardaydu wax badan ka faa’iideen waxbarashadii, iyagoo qaarkoodba la dhihi karo waxay la heer yihiin ardayda dugsiga sare sida ay sheegtay.

“In Dugsiga heerkaan uu gaaro waxaa gacan nagu siiyay waalidiinta, la’aantoodna wax aan wadi lahayn ma jirto’ ayay tiri Safiyo Xiiray oo intaa raacisay “waxaan uga imid wadanka kanada sidii aan aqoonteyda aan uga faa’iideyn lahaa carruurta Soomaaliyeed oo mudo 16 sano ay ku dhacday waxbarasho la’aan”, Safiyo waxay kaloo sheegtay in dugsiga uu ku shaqeeyo Manhajka wadanka Kanada, iyadoo sheegtay in sababaha ay u doorteen ay tahay sidii ay kor ugu qaadi lahaayeen heerka aqoonta carruuta, sidoo kale waxay sheegtay in carruurta ay baraan Tarbiyada Islaamka.

Xafladdaasi ayaa waxaa kaloo ka hadlay Guddoomiyaha Golaha Deegaanka Gobalka Banaadir Maxamuud Cumar Tuutoow oo u mahadceliyay intii gacanta ka gaysatay furitaanka dugsigaani, waxana uu u rajeeyay maamulka iyo Macallimiintaba in halkaasi ay ka sii wadaan howlahooda.

 
 

Gebagabadii xafladdaasi ayaa Macalliminta wax ka dhigta dugsigaasi iyo ardaydii gashay kaalimaha hore la guddoonsiiyay abaalmarino kala duwan iyo shahaadooyin, waxaana waalidiinta Ardaydu u mahadceliyeen Macallin Safiyo Xiiray, waxay sheegeen in ay wax weyn u qabatay bulshada Soomaaliyeed, maadaama ay ku soo dhiiratay in ay dalkeeda timaado waxna barto Caruurta Soomaaliyeed, waxa uuna dugsigaani dugsiyada kale dheeryahay iyadoo carruuta ay qaataan casharo la xiriira dhinaca Kumbuyuutara, waxaana dugsiga yaala Kumbuyuutaro, waxaadna arkeysdaa cunug yar oo ilaa iyo 7-sano jir ah, oo si wanaagsan u yaqaana ama fahamsan Kumbuyuutarka.

Siminaar ku saabsan Cudurka AIDS-ka oo loo qabtay Suxufiyiin ka kala socotey qaybaha waarbahinta….



Waxaa maalintii shalay ahyad xarunta horumarinta Haweenka ee IIDA lagu soo gebagabeeyay siminaar socday mudo saddex maalmood ah o ay ka qaybgaleen qaybaha warbaahinta ee magaalada Muqdisho, waxaana siminaarkaasi iska kaashaday Hay’adda IIDA iyo Hay’adda CONCERN.

Siminaarkaasi oo lagu baranayay casharo la xiriira qaabka ugu haboon ee looga hartagi karo cudurka Aids-ka oo la sheegay in waqtiyadaan uu ku soo badanayay Dalka Soomaaliya oo laga helay 1%.

Madaxa mashruuca Xaawo Ciise Weheliye oo ka mid ahayd macallimiintii casharada ka jeedineysay siminaarkaasi ayaa waxa ay si aad ah ugu dheeraatay siyaabaha ugu haboon ee looga hortagi cudurkaasi iyo sida loo kala qaado, waxayna sheegtay in bahda Warbaahinta ay yihiin kuwa ugu fudud ee bulshada ka wacgelin kara halista Cudurka Aids-ka.

Macallimiintii kale ee iyana casharada ka bixiyay waxay kala ahaayeen, Xaliimo Sacadiya Sheekh oo iyana si aad ah u faahfaahisay cudurada Bulshada waxayna soo qaadatay Cudurka Waraabowga iyo Jabta oo ay sheegtay inay yihiin kuwo inta badan keena dhalmo la’aanta, isla markaana xiriir la yeelan kara cudurka Aids-ka, waxaa kaloo iyana halkaasi ka hadashay Macalimad Duniyo, waxayna halkaasi ka jeedisay casharo la xiriira sida uu dunida ugu faafayo cudurkaasi, gaar ahaan wadamada Saxaraha ka hooseeya, waxayna sheegtay in Soomaaliya ay deris la yihiin wado uu ku badan yahay cudurkaasi, loona baahan yahay in warbaahintu ay ka bixiyaan baraarujin aad u baahsan si bulshada looga digo cudurkaasi oo aan ilaa iyo haatan loo helin wax daawo ah.


W/D Amiin Yuusuf Khasaaro
E-Mail: amiinkhasaaro@hotmail.com

Sheekh Shariif “C/llaahi muxuu isku wareerinayaa, cid ku heysata madaxweynanimada ma jirto”

Sheekh Shariif Sh. Axmed oo ah guddoomiyaha Golaha Fulinta Maxaakiimta oo shalay la hadlayey 135-askari oo ka soo baxsatay dowladda federaalka ayaa wuxuu halkaasi ka caddeeyey in ciidamo Itoobiyaan ah ay soo galeen gudaha Soomaaliya oo haatanna ay ku sugan yihiin magaalada Baydhabo, “Waan ogeyn in markii hore ay ku sugnaayeen gudaha Soomaaliya, balse haatan waxey caddeysteen iney difaacayaan dowladda federaalka ah” ayuu yiri Sheekh Shariif oo sheegay in ciidamada Itoobiya ay yihiin kuwo u socda sidii ay Soomaaliya u baabi’in lahaayeen, hase ahaatee wuxuu ka digay in wixii cawaaqib xumo ah ee ka yimaada ay iyagu dusha u ridan doonaan.

Wuxuu sidoo kale sheegay iney socdaan hawlo lagu abaabulaayo dagaal, waxaana taasi daliil u ah, “Xuseen Caydiid iyo Cabdi Qeybdiid waxey ku sugan yihiin magaalada Gaalkacyo, waxeyna halkaasi ka wadaan abaabul dagaal iyo in Soomaaliya ay mar kale u horseedaan dhibaato iyo burbur, wuxuuna intaasi sii raaciyey, “Dadweynaha reer Puntland waxaan u soo jeedinayaa iney ka hor tagaan waxa uu C/llaahi Yuusuf wado, oo uu ku doonayo inuu ku soo nooleeyo dagaaladii sokeeye ee dhacay 1990” wuxuu intaasi ku daray, “C/llaahi Yuusuf cid ku haysata madaxtinimada maanta ma jirto, waxaana leeyahay dadkaaga u tur, oo ka shaqeey sidii Soomaali la isugu keeni lahaa, ogowna ineysan ciidamo Itoobiyaan ah ku difaaci Karin”. Wuxuu sheegay in ay weli diyaar u yihiin in la wada hadlo lagana shaqeeyo danta ummadda Soomaaliyeed.

Yuusuf Indhacadde, “Itoobiya haddii ay soo weerarto Muqdisho anaguna waxaan weerareynaa Adis Ababa”

Yuusuf Max’ed Siyaad Indhacadde oo maxaakiimta u qaabilsan dhinaca ammaanka ayaa waxaa uu sheegay in ciidamo Itoobiyaan ah oo aan u fara badan ay soo galeen gudaha waddanka Soomaaliya, kuwaasoo uu sheegay iney doonayaan iney gacan siiyaan C/llaahi Yuusuf iyo kooxaha ku fikirka ah.

Wuxuu sheegay Yuusuf Indhacadde in ciidama Itoobiya deegaanada ay soo galeen ay durbaba ku bilaabeen dil, kufsi iyo dhac, isagoo sheegay in ay shacbiga Soomaaliyeed haatan diyaar u yihiin iney iska difaacaan Itoobiya iyo kooxaha la socda, “Itoobiya haddii ay soo weerarto Muqdisho anagana waxaanu weerareynaa Adis Ababa”.

“Haddii ay soo weerarato Baydhabo, waxaan weerareynaa deegaano ka tirsan Itoobiya, waxaan diyaar ula nahay inaan Itoobiya kula noolaano daris wanaag, haddii ay taas ka madax adeygtana ha ogaato wixii cawaaqib xummi ah oo ka yimaada iney dusha u ridan doonto” ayuu sii raaciyey.

Wuxuu kaloo sheegay Yuusuf Indhacadde in Golaha Maxaakiimtu ay yihiin kuwa iska difaaci kara Itoobiyaanka haddii ay soo galaan gudaha Soomaliya, wuxuuna sheegay in Itoobiya ay ku xad gudubtay, sharciyadii caalamiga ahaa, ee dhinaca cunaqabateynta hubka iyo iney iska soo galeen dal xor ah, “Ha ogaato Itoobiya in iyada uu burburka u dambeyn doono, isla markaana Itoobiya ay u gogo’I doonti gobol gobol, ayna soo mari doonto wixii aan soo marnay 16-kii sano ee la soo dhaafay” ayuu yiri Sh. Yuusuf Indhacadde.

Ciidamo Itoobiyaan ah oo lagu arkay Magaalada Baydhabo….

Warar la xaqiijyay ayaa waxay sheegayaan in Ciidamo Itoobiyaan ah oo wata 24 gaari oo Tikniko ah ay saakay (July 20) aroortii soo galeen Magaalada Baydhabo oo xarun u ah Dowladda Federaalka, waxana markiiba ciidamadaasi la dejiyay xero ay horey u degaan jireen ciidankii Xoogga Dalka Soomaaliyeed.

Qaarkood ayaa lagu arkay jidadka magaalada Baydhabo, waxayna xirnaayeen Tuutaha sida aadka ah loogu yaqaano Ciidamada itoobiya, waxaana si aad ah ula yaabanaa dadweynaha Magaalada Baydhabo oo iyagu sheegay inay ka cabsi qabaan in dagaal uu ku dhex maro Magaalada Baydhabo Dowladda Federaalka oo gacan ka heleysa Itoobiya iyo Maxaakiimta Islaamiga.,

Soo Gelitaanka ciidamadaan waxaa oo soo dedejiyay markii maalintii shalay ahayd Magaalada Buurhakaba ay gaareen ciidamo ka socday Golaha Maxaakiimta oo uu hogaaminayay Sheekh Mukhtaar Ruubow (Abuu Mansuur), waxayna halkaasi u tageen sidii ay u soo galbin lahaayeen ciidamo ka soo gadoday Dowladda Federaalka oo taradoodu gaareyso 135 Askari oo wata qoryahooda.

Ciidamada Maxaakiimta ayaa ciidamadaasi u soo galbiyay magaalada Muqdisho, saakay ayaana si weyn loogu soo dhaweeyay Magaalada Muqdisho iyagoo ka mid noqday ciidamada golaha Maxaakiimta Islaamiga.

W/D Amiin Yuusuf Khasaaro
E-Mail: amiinkhasaaro@hotmail.com

"Itoobiya oo isu diyaarisay in ay ku duusho Soomaaliya"

Itoobiya waxa ay isu diyarisay in ay weerarto dalka Soomaaliya si ay u difaacdo Dowladda FKMG, ugana difaacdo weerarka loo malaynayo in ay ku soo qaadayan maxkamadaha Islaamiga, sidaas waxaa Arbacadii July 19, 2006 sheegay afhayeen u hadlayey Itoobiya oo ay soo xigatey hay'adda wararka ee AP.

Waxaa warka hay'daasi intaas ku daray in maleysiyada haysata badanaa koonfurta Soomaaliya ay boqolaal dagaalyahanno ah geeyeen  meel dibada ka ah magaalada ay joogaan dowalda aan awoodda lahayn ayan qorshaynayaan in ay qabsadaan, waa sida warku u dhigay'e.

"Waxa aan mas'uul ka nahay in aan difaacno xadka iyo dowladda Soomaaliya.  Waana burburin doonaa," sidaas waxaa yiri Berhan Hailu oo ah wasiirka warfaafinta Itoobiya oo la hadlayey AP.

Waxa warku intaas raaciyey in qabsashada Baydhabo ay maleysiyada Islaamiga siineyso awood aan lagula tartamayn ee badanaa Soomaaliya.

Hay'adda AP waxa ay tiri: Madaxweynaha dowladda kumeelgaarka ah Cabdullaahi Yuusuf Axmed waxa uu xiriir la leeyahay Itoobiya, waxana uu weydiistey taageero. Itoobiya hadda ka hor waxa ay hab militari kusoo gashay Soomaaliya, waxaana taoddobaadyadii dhowaa xadka labada dal lagu arkayey boqolaal ciidamada Itoobiya ah.

Hay'adda oo warkeedii sii wadata waxa ay tiri: dagaal-yahannada Maxkamada Islaamigu waxa ay xiriir la leeyihiin Muslimiinta raba in ay Itoobiya ka go'aan ee ku sugan gobolka Oromada ee Itoobiya.

Dhanka kale war ay werisey Aljazeera ayaa sheegay in dagaal-yahanadda Midowga Maxkamadaha Islaamiga ah lagu arkay magaalada Buur Hakaba oo 60 km u jirta magaalada Baydhabo ee xarunta u ah dowladda.

Sarkaal ka tirsan maleysiyada Islaamiga ayaa yiri ciidamadiisu waxa ay dhowaan qabsan doonaan xarunta dowalda caalamka laga aqoosan yahay ee kumeelgaarka ah, waa sida warku dhigay'e.

"Wax naga hor istaagi kara ma jiro in aan aadno Baydhabo" ayuu yiri Sheikh Muqtar Robow oo ah kuxigeenka difaaca kooxda maxkamadaha sida sheegtay Aljaziira. Waxana uu Sheikh Muqtar sheegay in 130 ka tirsanaa dagaal yahanada Madaxweyne Cabdullaahi Yuusuf ay usoo galeen Islaamiyiinta, waa sida warku u dhigay'e.

Cali Maxamed Geeddi, Ra'iisul wasaaraha DFKMG waxaa laga soo xigtey in uu yiri: Dhawr dagaalyahanada Islaamiga ah oo wata 30 gawaarida dagaalka ee loo yaqaan teknikada ayaa isku meeleeyey koonfurta magaalada Baydhabo.

FOGAANTA MAGAALOOYINKA:::
Muqdisho Afgooye 30 km
Afgooye Buur-Hakaba 164 km
Buur-Hakaba Baydhaba 66 km
Baydhaba Luuq 150 km
Baydhaba Xudur 155 km
Luuq Dooloow 80 km
Luuq Garba Haarey 69 km
Garba Haarey Baardheere 129 km
Baardheere Baydhaba 195 km
www.somalitalk.com/fogaan

Geeddi waxa uu maxkamadaha ugu baaqay in ay ku laabtaan Muqdisho, ayna joojiyaan weerarka qaybaha kale ee Soomaaliya.

Aljazeera waxa ay sheegtay in toddobaadkii hore ay xadka Soomaaliya ka talaabeen 2,000 oo ah ciidamada Itoobiya oo wata dhawr taangi kuwaas oo ku biiray 2,000 oo cidamada Itoobiya oo halkaas hore u joogey.

Labada dhinac (DFKMG iyo Midowga Maxkamada Islaamiga) waxa ay heshiis hordhac ah magaalada Khartuum ee dalka Sudaan ku gaarey June 22, 2006. Waxa la filayey in kulan dambe la isku yimado July 15, 2006, kulankaas oo ay ka baaqatay DFKMG, laakiin dhowaan ayaa madaxweynaha DFKMG oo safar ku tegey Puntland waxa uu sheegay in ay DFKMG ka qayb geli doonto kulan ay la yeelato Maxkamadaha.

Dhanka kale Ra'iisul wasaare Geeddi oo Arbacadii July 19 shir jaraa'id ku qabtay magaalada Baydhabo ayaa sheegay in magalada Buur Hakaba ay qabsadeen Maxkamada Islaamiga, kuwaas oo sida ra'iisul wasaare Geeddi yiri maxkamaduhu waxa ay reer Buur Hakaba u sheegeen in ay halkaas ka hir gelinayaan maxkamad Islaami ah.

Afhayeenka wasaarada Arrimaha Dibadda Maraykanka, Sean McCormack, waxa uu yiri "Maraykanku waxa uu ugu yeerayaa Maxkamadaha Islaamiga ah iyo dhammaan qaybaha Soomaaliya in ay si degdeg ah u joojiyaan colaadda , ayna dib u bilaabaan wadahadal ku salaysan hab nabadeed." sida ay werisey hay'adda Reuters.

Tarjuamdii: SomaliTalk.com | July 20, 2006 | Isha: AP, Aljazeera,Reuters

Eng. Yarisow oo la kulmay aqoonyahanadda Mudulood ee Qaahira.

Guddoomiyaha ururka Somali Concern Group (SCG) Mudane Abdirahman Omar Osman (Eng. Yarisow) oo beryahanba ku sugnaa magaalada Qaahira ee dalka Masar ayaa xalay xaafada Madinatu Nasri ee caasimada Qaahira kula kulmay aqoonyahanadda beesha Mudulood ee ku sugan waddanka Masar.

Kulankan oo ay soo qabanqaabiyeen guddiga aqoonyahanada ee beesha Mudulood ee ku sugan Masar ayaa ku casuumay Mudane Eng. Yarisow si uu warbixin uga siiyo arrimaha Somalia bacdamaa uu dhowaan ka soo laabtay magaalada Muqdishu. Kulankan ayaa waxaa Eng. Yarisow ku wehliyey Eng. Mohamed Nur Cadde oo xubin ka ah ururka SCG iyo Sheekh Cumar oo isna ka yimid waddanka UK.

Mudane Eng. Yarisow ayaa uga mahadceliyey aqoonyahanada ka soo qeyb galkooda iyo abaabulkooda, isla markaana siiyey warbixin guud ee xaaladda uu waddanku ku sugan yahay iyo gaar ahaan kacdoonka Muqdisho oo ay hoggaaminayaan Maxkamadaha Islaamiga ah. Warbixin dheer oo dhinacyo badan taabaneysay ka dib Mudane Eng. Yarisow ayaa ka codsaday aqoonyahanada in taageero buuxda la siiyo kacdoonka Muqdisho, lana fiiriyo danta guud ee waddanka, gaar ahaan caasimadda Muqdisho. Eng. Yarisow oo hadalkiisa sii wata ayaa sheegay in caqabado farabadan ay jiraan, si looga wada gudbana loo baahanyahay isku duubnaan iyo wadajir si xal waara loo gaaro. Eng. Yarisow ayaa sheegay in shaqsi walba uu door ku leeyahay sidii kacdoonka uu u noqon lahaa mid miro dhala.

Sheekh Yusuf iyo Dr Aweys Moallin ayaa ka mid ahaa mas'uuliyiintii goobtaas ka hadashay islamarkaana ugu mahadceliyey mas'uuliyiinta iyo warbixintooda. Waxaa isna goobtaas ka hadlay Eng. Mohamed Nur Cadde oo sheegay in aqoonyahanada looga baahan yahay dadaal dheeraad ah iyo sidii aqoonyahanada dibedda iyo gudaha la isagu xiri lahaa, loona yeelan lahaa xirriir joogta ah.
Laxiriir: somali@somaliconcern.org 
July 20, 2006

Wararkii: July 19, 2006

  • Wadadii isku xireysay Maka Al-Mukarama iyo Ekwatoore oo dib loo furay 16 sano kaddib

  • Shariif Xasan oo soo dhaweeyay hadalkii C/llaahi Yuusuf..

  • Cabdi Qaydiid oo weli ku adkeysanaya in Maxaakiimtu ay yihiin "Argagixiso.."

  • Jaamacadda Carabta oo wada qorshey ay ku dooneyso in ay isugu keento..

  • Itoobiya oo ka dhaadhici-neysa Isbahaysiga Sanca In soomaaliya loo diro..

  • Beesha Sade ee Gobalka Banaadir oo soo dhoweyey isbdelka Cusub ee ka dhacay Muqdisho

  • Hal sano oo ka soo wareegtey dilkii marxuum C/qaadir Yaxye..

  • BEESHA SHEEKHAAL OO  MUQDISHO KAGA DHAWAAQDAY MAXKAMAD LAGU MAGACAABO MAXKAMADDA HIRGELINTA SHAREECADA ISLAAMKA EE AL-HUDAA

Wadadii isku xireysay Maka Al-Mukarama iyo Ekwatoore oo dib loo furay 16 sano kaddib

Maalintii shalay ahayd ayaa Maxkamaddii Islaamiga ahayd ee Maka Al-Mukarama ee aan ka mid ahayn Maxaakiimta Islaamiga ah ee ka jira dalka, ayaa shalay waxay ku wareejisay Golaha Maxaakiimta 43 Maleeshiyo ah iyo hubkoodii. Guddoomiyaha Maxkamadaasi Sheekh Maxamuud Jimcaale ayaa waxa uu sheegay in Maxkamaddaasi intii ay dhisneyd ay qabatay howlo muhiim ah, waxay kaloo sheegeen in wixii haatan ka dambeeya ay ka mid yihiin Golaha Maxaakiimta Islaamiga ah.

Maxkamaddaan oo horey u dhaliishay howlgalkii ay wadeen Golaha Maxaakiimta ayaa haatan Mas’uuliyiintoodu waxa ay sheegeen inay gacan siin doonaan Golaha Maxaakiimta oo ay sheegeen in ay ka shaqeeyeen Nabadda gelyada Magaalada Muqdisho.

Abuu Mansuur iyo Abuu Cuteyba oo ka mid ah Mas’uuliyiinta Golaha Maxaakiimta ayaa waxay halkaasi ka caddeeyeen in wixii haatan ka dambeeya ay furan tahay wadadii isku xiri jirtay Ikwatoore iyo Shabeele oo ah wadada Maka Al-Mukarama, waxaana arrintaasi si weyn u soo dhaweeyay dadweynaha ku nool deegaankaasi, oo sheegay in mar dhow dib loo soo celin doono bilicdii bartamaha Magaalada Muqdisho oo ku burburtay dagaaladii sokeeye.

Shariif Xasan oo soo dhaweeyay hadalkii C/llaahi Yuusuf..

Iyadoo Muran xoog leh u dhexeeyay Madaxweyne C/llaahi Yuusuf Axmed iyo Guddoomiyaha Baarlamaanka Shariif Xasan, kaasoo ka dhashay markii C/llaahi Yuusuf uu diiday in laga qaybgalo shirka Khartuum, Isla markaana la hor fariisto Golaha Maxaakiimta Islaamiga ah ayaa haatan waxaa muuqata in uu soo gebagaboobay khilaafkaasi, waxaa lagu wadaa in Dowladda Federaalka ay wafdi deg deg ah u dirto Magaalada Khartuum ee Dalka Suudaan oo haatan weli ay ku sugan yihiin xubnoa ka tirsan Golaha Maxaakiimta.

C/llaahi Yuusuf Axmed ka qaybgalka kulanka Khartuum waxa uu ogolaaday markii uu tagay maamul Gobaleedka Puntland, warar ayaa waxay sheegayaan in C/llaahi Yuusuf uu cadaadis kaga yimid Jaamacadda Carabta iyo waxgarad ka tirsan Maamul Gobaleedka Puntland oo sheegay in Dowladda Federaalka ay ku shaqeyn karto ama ay ku dhaqaaqi karto haddii ay is fahmaan labada dhinac.

Guddoomiyaha Baarlamaanka Shariif Sheekh Aadan ayaa waxa uu horey u sheegay in Dowladda Federaalka ay tahay Dowlad dib u heshiisiineed ayna la fariisanayaan cid kasta oo wada maslaxadda Ummadda Soomaaliyeed. Haddii C/llaahi Yuusuf uu ku adkeysan lahaa in ayan ka qaygalin kulanka Khartuum, waxaana imaan lahaa in Dowladdu u kala jabto labo garab, sidii horey ugu dhacday markii ay kas oo guurayeen Magaalada Nayroobi ee Dalka Kenya, waxayna Dowladdu kala degtay Magaalooyinka Muqdisho iyo Jowhar. Kulanka Khartuum ayaa la filayaa in ay ka soo baxaan Go’aamo wax ku ool ah oo ku aadan sidii Dowladda Soomaaliyeed iyo Golaha Maxaakiimtu u wada shaqeyn lahaayeen, isla markaan ay si wadajir ah uga qayb-qaadan lahaayeen nabadeynta Ummadda Soomaaliyeed.

Cabdi Qaydiid oo weli ku adkeysanaya in Maxaakiimtu ay yihiin "Argagixiso.."

Cabdi Xasan Cawaale Qaybdiid oo ah hogaamiye kooxeedkii ugu dambeeyay ee ka tirsnaa Isbahaysigii burburay ee "la dagaalanka Argagixisada" oo looga adkaaday Magaalada Muqdisho ayaa waxa uu Magaalada Gaalkacyo ka wadaan kulamo uu laleeyahay beeshiisa.

Cabdi Qaydiid oo labo jeer dagaal aan faa’iido lahayn geliyay beeshiisa, midkii koowaad oo ahaa midkii uu kaga hor yimid Gen. Max’ed Faarax Caydiid, iyo midkii kale ee uu la galay golaha Maxaakiimta, ayaa qaar ka mid ah Waxgaradkii uu la kulmay, waxay Cabdi qaybdiid u sheegeen in dagaaladii hore ee uu galay uusan wax faa’iido ah ka keenin, isla markaana ay beeshiisu wax badan ku weyday.

Cabdi Qaybdiid mar wax laga weydiiyay sida uu arko Golaha Maxaakiimta ayaa waxa uu yiri “Waa dad doonaya in ay dadka dhibaateeyaan, dilaan, bililiqeystaan, isla markaana waa dad ka mid ah argagixisada caalamiga ah”.

Cabdi Qaybdiid waxa uu sheegay in Muqdisho uu ugu laaban karo labo midood dagaal ama nabad, waxaana la sheegay in Cabdi Qaybdiid uu maalmaha soo socda booqan doono deegaano ka tirsan Gobalka oo ay degto Beeshiisa.

Jaamacadda Carabta oo wada qorshey ay ku dooneyso in ay isugu keento..

Warar aanu helnay ayaa waxay sheegayaan in Jaamacadda Carabtu ay wado in ay meel isugu keento Madaxweyne C/laahi Yuusuf Axmed iyo Guddoomiyaha Golaha Maxaakiimta Islaamiga Sheekh Shariif Sheekh Axmed, kulankaan ayaa la sheegay in ay lagu balaarin doono midka furmaya Dalka Suudaan.

Sheekh Shariif oo aan weli wax safar ah ugu ambabaxin dalka dibaddiisa ayaa waxaa la sheegay in wadamada carbeed uu ka haysto taageero aad u xoogan, iyadoo marka laga arko shaashadaha Sheekh Shariif ay wadamada Carabtu aad ugu farxaan, maadaama uu ahaa ninkii ka saaray Muqdisho qabqablayaashii dagaalka oo mudo 16 sano ah dhibaato ku hayay shacabka Soomaaliyeed.

Ilaa iyo haatan labada mas’uul wax war ah kama soo saarin qorshaha ay wado Jaamacadda Carabtu, hase yeeshee warar ayaa waxay sheegayaan in labada dhinac ay aqbaleen qorshaha ay wado jaamacadda Carabtu si loo soo afjaro khilaafka jira.

Itoobiya oo ka dhaadhici-neysa Isbahaysiga Sanca In soomaaliya loo diro..

Magaalada Adis-Ababa oo haatan ka socdo kulanka Wasiirad Arrimaha Dibadda ee Wadamada Isbahaysiga Sanca ayaa waxaa Soomaaliya uga qaybgalaya wasiirka arrimaha dibadda C/llaahi Sheekh Ismaaciil.

Khudbad uu ka jeediyay Wasiirka Arrimaha dibadda ee Itoobiya ayaa waxa uu ka codsaday wadamada Isbahaysiga Sanca in Soomaaliya loo diro ciidamo nabad ilaalin ah oo gacan siiya Dowladda Federaalka, maadaama Dowladda ay ku soo wajahan yihin waxa uu ugu yeeray kooxo argagixiso ah.

Qoraalkaasi ayaa waxaan u riyaaqin qaar ka mid ah wadamada Isbahaysiga ku jira oo ay ugu horeyso Dowladda Suudaan oo iyadu qabanqaabi-neysaa kulan ay ku dooneyso in lagu soo gebagabeeyo khilaafka u dhexeeya Dowladda iyo Maxaakiimta.

Wasiirka arrimaha ee wadanka Suudaan ayaa waxa uu isna sheegay in xaaladda Soomaaliya haatan ay mareyso meel aad u wanaagsan, waqtigaan xaadirka ahna Soomaaliya uma baahna ciidamo shisheeye.

W/D Amiin Yuusuf Khasaaro
E-Mail: amiinkhasaaro@hotmail.com

Beesha Sade ee Gobalka Banaadir oo soo dhoweyey isbdelka Cusub ee ka dhacay Muqdisho

Shir ay isugu yimadeen gudiga hogaanka beesha Sade ee Gobalka Banaadir ee uu shir gudoominayey Ugaaska beesha Sade Ugaas Max’ed Wali Sheekh Axmed Nuur ayaa looga dooday marxalada uu dalka marayo waxaa gabagabadiisi ka soo baxay qodabada soo socdo.  

1.    Beesha in ay taageersan tahay is badalka la taaban karo ee ka dhacay magaalada muqdisho iyo la wareegida golaha maxaakiimta somaliyeed ee magalada muqdisho iyo  waaxigeeda waxaan u rajeyneenaa hormar iyo waxqabad dhab ah iyo hirgilinta shareecada islaamka.

 2.    Waxaan soo jeedineynaa ka qeybgalka shirka Qartuum golaha Maxaakiimta Somaliyeed iyo Dowlada KML federaalka Somaliyeed lana tixgaliyo rabitaanka shacabka somaliyeed lagana miro dhaliyo shirka isaga ah maadaama umada somaliyeed si aad ah ugu dhursugeeso wixii  ka soo baxo.

Beesha Sade waxay ka digeesaa dagaal mar kale ka qarxa gudaha somaliya.

Waxay beesha Sade cambareyneysaa fargalinta dowlada Itoobiya ee gudaha Somaliya.

Beesha waxay ugu baaqeysaa dowlada somaliyeed in ee si weyn u aqoonsato isbadalka weyn ee magalada muqdisho si dowlada ugu shaqeyso caasimada somaliya ee muqdisho.

 3.    Ugu dambeyn waxaan ugu baaqeynaa umada somaliyeed ku dhaqanka shareecada Islaamka iyo isbadalka cusub ee magalada muqdisho ka dhacay.


muuse maxamuud jiisow
somali39@hotmail.com
mugdisho bakaaro somali
Hal sano oo ka soo wareegtey dilkii marxuum C/qaadir Yaxye..


Waxaa maalintii July 16,2006 ahayd Hotel Naasa- Hablood lagu qabtay xus loo samaynayey Halyey C/qaadir Yexye Sheekh Cali oo sanadkii hore lagu dilay Magaalada Muqdisho wuxuuna ka mid ahaa masuuliyiintii wax ka aas-aastay Hay’adda CRD waxaana xilligii la daliyey loogu soo galay Gurigiisa oo ku yaalay Xaafada Buulo Xuubay,

Sanad guuradii 1-aad ee ka soo wareegtay xuska C/qaadir Yexye waxaa ka qaybgalay qaybaha kala duwan ee Warbaahinta iyo Mas’uuliyiin ka socotay Hay’adda CRD, waxaa ugu horeyntii war bixin ka soo jeediyey halkaas Xasan Sheekh oo ka mid ah Mas’uuliyiinta Hay’adda CRD wuxuuna si aad ah ugu dheeraaday Taariikhdii iyo wax-qabadkii C/qaadir Yexye isagoo sheegay in uu ahaa nin u ololeyn jiray nabad iyo dibuheshiinsiinta, wuxuu kaloo sheegay in wax qabadkii uu ka tagay C/qaadirYaxye ee wali ka muuqdaan dalka.

Xubnihii kale ee halkaas ka hadlay waxaa ka mid ahaa Duqa Magaalada Muqdiho Maxmuud Xasan Cali (Cadde Gaabow) wuxuuna isna sheegay in C/qaadir Yaxye uu ahaa nin aysan hilmaami doonin Ummadda Soomaaliyeed isala markaana uu ahaa nin wax weyn u qabtay ummadda Soomaaliyeed gaar ahaan dhinaca nabadda iyo isku soo dhawaanshaha bulshada.

 
 
 

Waxaa kaloo iyana ka hadashay Shamso Cabdulle Butugey oo ku hadleysay magaca Haweenka Soomaaliyeed waxayna sheegtay in C/qaadirYaxye uu ahaa nin gacan siin jiray Haweenka Soomaaliyeed qaarkood waxayna sheegtay in uu u abuuray shaqooyin.

C/qaadir Ibraahim Gacal Abkow oo isna si weyn ugu dheeraaday taariikhdii C/qaadir Yaxye wuxuuna sheegay in ay dileen kooxo aan doonayn in ay Soomaaliya nabad hesho wuxuuna Tilmaamay in wixii uu ka tagay ay wali ka muuqdaan umadda Soomaaliyeeda.

Faarax C/qaadir oo ah maamulaha Hay’adda Muslim Ifriiqiya waxa uu sheegay in C/qaadir Yaxye ay ka go’neyd sidii Soomaaliya dhibaatada uga bixi lahayd una heli lahayd dibuheshiisiin dhab ah.

C/llaahi Max’ed Shirwac oo Isna ka mid ah mas’uuliyiinta CRD waxa uu sheegay in C/qaadir Yaxye uu ahaa nin naxariis badan oo ka damqan jiray dadka dhibaateysan waxa uuna ka codsaday in halkaas ay ka sii wadaan howlihii fiicnaa ee uu waday.

Waxaa isna halkaas ka hadlay C/qaadir Aabihii, Yaxye Sheekh Cali Cibaar oo isna si weyn uga hadlay heerarkii uu soo maray waxa uuna ku tilmaamay nin wadani ah isla markaana aad ugu fiicnaa dhinaca wax-barashada waxa uuna u mahadceliyey intii la shaqeyn jirtay isagoo si gaar ah ugu mahadceliyey Hay’adda CRD oo uu sheegay in Bulshada wax weyn u qabatay waxa uuna Ilaah uga baryey in uu Jannadii Firdowsa ku abaal mariyo.

Intii Xafladda Xuska ay socotay ayaa waxa Xubnihii ka qabgalay ay halkaas ku daawadeen Filim ka hadlayey wax qabadkii C/qaadir Yaxye iyo hal-ku-dhigyadiisii.

W/D Amiin Yuusuf Khasaaro
E-Mail amiinkhasaaro@hotmail.com

BEESHA SHEEKHAAL OO  MUQDISHO KAGA DHAWAAQDAY MAXKAMAD LAGU MAGACAABO MAXKAMADDA HIRGELINTA SHAREECADA ISLAAMKA EE AL-HUDAA

July 17, 2006: Beesha Sheekhaal oo ka mid ah beelaha Soomaaliyeed ee ku dhaqan magaalada Magaalada Muqdisho iyo qaar ka mid ah gobollada iyo degmooyinka dalka ayaa maanta magaalada Muqdisho kaga dhawaaqday maxkamad, taasoo lagu magacaabo Maxkamadda Hirgelinta Shareecada Islaamka ee Al-hudaa  isla markaana ku biirtey midowga maxkamadaha. 

Kulan ka dhacay xaafadda Xamarjadiid ee degmada Wardhiigley ee magaalada Muqdisho ayna ka qeyb galeen masuuliyiin ka socotay Midowga maxaakiimta islaamiga, culimaa'udiin, waxgarad iyo marti sharaf lagu casuumay ayaa qoraal loo qaybiyay saxaafadda waxaa lagu sheegay in kaddib markii beeshu ogaatay baahida ay u qabto maxkamad islaami ah ayey beeshu isu taagtay inay ku dhaqaaqo howshan qeybaheedakala duwan oo ay ka kooban tahay sida: culimaa'udiinka, Ganacsatada, aqoonyahanka, odayaasha dhaqanka, dhallinyarada iyo haweenka beesha Sheekhaal ayaa waxay go'aansadeen inay ku dhawaaqaan maxkamad islaami ah, waxayna beeshu soo saartay qodobbo ka kooban 7 oo kala ah:

  1. In Hirgelinta ku dhaqanka shareecada Islaamka ay waajib  tahay.
  2. Inay xalliso wixii khilaafaad ah ee beesha dhexdeeda ah.
  3. Maxkamaddu waxay si toos ah ula howl geli doontaa midowga maxkamadaha islaamiga, waxayna ka qeyb qaadan doontaa difaaca diinta iyo dalka.
  4. Maxkamaddu waxay wax ka qaban doontaa ammaan darrida deegaannada beeshu ay degto.
  5. Maxkamadda Al-huda waxay ka mi tahay Midowga maxaakiimta islaamiga, waxayna ballan qaadaysaa inay dhaqan celiso maleeshiyooyinka una furto tacliin.
  6. ugu dambeyn waxay maxkamaddu xil gaar ah iska saareysaa ammaanka deegaannada u dhexeeya Jilib ilaa Xaramka oo ah deegaannada sida gaarka ah beesha Sheekhaal ay u degto. 

Furitaanka maxkamaddaas waxaa ka hadlay guddoomiyaha golaha Difaaca iyo midnimada Qaranka Soomaaliyeed Sheekh Xasan Max'ed Axmed, wakiilna ka ahaa guddoomiyaha golaha maxaakiimta Islaamiga sheekh Shariif Sheekh Axmed, wuxuuna sheegay in beesha Sheekhaal looga baahan yahay inay horseed ka noqoto howlaha ka socda dalka ee ku dhaqanka shareecada Islaamka iyo is beddelka siyaasadeed ee ku soo kordhay qaranka Soomaaliyeed, wuxuuna ka digay inaan qabiilna la siyaasadeyn, siyaasadna aan la qabiileyn ee layska ilaaliyo, wuxuuna kula dar-daarmay in culimaa'udiinka beesha iyo ganacsataduba ay hormuud ka noqdaan howlaha haatan socda.  


Munaasabadda ku dhawaaqista waxaa kaloo ka hadlay Khaliif Xuseen C/laahi oo ku hadlayay magaca guddiga dhaqanka ee beesha Sheekhaal iyo guddoomiyaha maxkamadda hirgelinta shareecada Islaamka ee Al-hudaa Sheekh Xasan Axmed Max'ed, kuwaasoo sheegay inay la jaan qaadaan howlaha xasaasiga ah ee dalka ka socda beeshuna ay tahay beel lagu yiqiin mar walba inay horseed u noqoto fidinta diinta islaamka iyo ku dhaqanka shareecada Islaamka, waxayna ballan qaadeen inay shacbiga ugu shaqeyn doonaan si daacad ah.  

Waxaa sidoo kale munaasabaddaas ka hadlay oo ku hadlayay magaca ganacsatada Xuseen Sheekh Nuur oo ballan qaaday in hiil iyo hooba ay la garab istaagi doonaan ganacsatada beesha hirgelinta maxkamadda.  

Maalmahaan danbe ayaa waxaa magaalada mugdisho ku soo badanayaa furintaanka maxakadaha islaamiga ah tani iyo intii ay magaalada mugdisho gacanta ku dhigeey midoowga maxadaha oo ay ka awood roonaadeeyn isbaheeysiga la dagalaan argigixisada oo noqday hal haaday iyo hal la heebshay ka dib markii la tusay dagaal aan hore aan loo arag , oo ka duwan kii ay lix iyo tobonka sano ay isku hayeen ayaga  bulshada ku hayeen. 

Muuse Maxamuud Jiisow
Somali39@hotmail.com
Muqdisho somaliya

Faafin: SomaliTalk.com | July 19, 2006

Dood-Cilmiyeed: Isbedelka Cusub ee Soomaaliya
Aqoonyahanno ku sugan dalka Canada ayaa ka hadlay kacdoonka Soomaaliya iyo raadka uu... Dhegeysi...

 

Fuustooyinka Sunta ee ku Duugan Jidka Garoowe-Bosaso
TV-ga Rai ee Talyaaniga ayaa soo bandhigay baaritan cusub oo cadayn u ah sunta halista ah ee ku duugan Soomaaliya, baaritaankaas oo afar qaybood ah oo af Talyaani ah ka daawo halkan: Qaybta 1 | Qaybta 2 | Qaybta 3 | Qaybta 4
Video-ga si aad u daawatid soo rogo barnaamijka windows media player
Akhri: Cilmi Baaristii Sunta ku Duugan Soomaaliya | 2000 | Dr. Bashir

MINNEAPOLIS::: ARDAY QALIN JEBISEY:::::::: GUJI [WARAR HORE]

Kulaabo bogga  www.SomaliTalk.com 
© www.SomaliTalk.com



HTML CD