Daabaco Boggan | Print

Banaan bax ballaaran oo looga soo horjeedo fara gelinta dowladda Itoobiya oo ka dhacay Garoonka K/cagta Stadium Banadir

Banaan bax ballaaran oo ay ka qeyb galeen masuuliyiinta midowga maxaakiimta iyo kuwa gobolka Banaadir iyo dadweyne aad u fara badan oo looga soo horjeedo fara gelinta dowladda Itoobiya oo ka dhacay Garoonka K/cagta Stadium Banadir..

Bannaan baxan oo ay ka hadleen masuuliyiin fara badan ayaa ka warramay ujeedooyinka loo soo qaban qaabiyay iyo sida loogu baahan yahay in loo taageero guulaha Midowga maxaakiimta ay ku tallaabsadeen iyo in si weyn loogu cambaareeyo faragelinta qaawan oo ay dowladda Itoobiya ku hayso arrimaha gudaha Soomaaliya. 

Sheikh Shariif oo ka hadlaya bannaanbaxa Sawir Qaade: Muuse Maxamuud Jiisow

Guddoomiyaha Midowga maxkamadaha islaamiga Sheekh Shariif Sheekh Axmed oo halkaasi ka hadlay ayaa ku dheeraaday taariikhda soo jireenka ah ee dowladda Itoobiya ay mar walba ku hayn jirtay arrimaha gudaha ee Soomaaliya iyo guulaha maxaakiimta ay ku tallaabsadeen, wuxuuna hadalkiisii ku bilaabay "walaalayaal waxaad la socotiin xaaladda uu maanta dalku marayo iyo caalamka meesha uu maanta taagan yahay, waxaad la socotiin Muslimiinta dhiigooda, maalkooda iyo sharaftooda in la banneystay, arrintaasi waa arrin khatarteeda leh, loona baahan yahay in dadka oo dhan ay fahmaan, waxaad la socotiin waxa ka dhacaya Carriga Falastiin iyo caalamka sida uu dhagaha uga fureystay, waxaad la socotiin sidoo kale Lubnan waxa ka dhacaya, maanta caalamkii ahlu shar ayaa hoggaaminaya, waxayna u jiidayaan dhinaca sharta iyo inay dhibaato geliyaan dadka masaakiinta Muslimiinta ah ee guryahooda ku nool in madaafiic lagu tuuro oo lagu duulo.. maxay halleeyeen Muslimiinta? Waxay yiraahdeen Muslimiin ayaan nahay oo kaliya ayaa lagu dilayaa... haddii aan soo qaato waxyaabaha cadcad ee jira Soomaaliya intii ay dhibaatadu ka jirtay 16-kii sano waxba lagama sheegi jirin, laakiin markii ay shacbiga Soomaaliyeed ay sameeyeen kacdoon oo dadkii magaalada Muqdisho degganaa ay is abaabuleen ay bilaabeen howl gallo ay uga soo horjeedaan jidgooyooyinka, afduubyada iyo dhibaatooyinka kale ee faraha badan ee ka jira, waxaa la bilaabay in la yiraahdo argagaxiso ayaa ka jirta dalka, ujeedaduna waxay tahay in la hagar daameeyo ummaddaas.  Oo ay san horey u dhaqaaqin markii ilaahey uu guuleeeyey umadaan oo ninmankii 16 ka sono hortaagna ilaahey uu ka guuleeyey oo ay magaaladii isu furan tay oo airporkii la furey dekadii la furay waxyaabaha la sameeyey waxaa ka mid ah in la yiraahdo cunaqabateyntii hubka waa la fududeeyey waana la qaaday in eithopiya ay waxaan jirin ku marmarsooto ciidamo farabadane soo geliso waxaad la socotiin maxaakiimta islaamiga si nabada loo dhaliyo in ay wadahadal ugu baaqeen dowlada in suudaan la isgu tegay wejigii horeba si wanaagsan la isugu afgartey markii wejigii labaad la soo gaaray ee balantii la soo gaarey oo la rabey in bantii kharduun  la aado waxaa koogu jawaabey in eithopiyaan ah ay dalka soo galaan arimaahsi wax iska dhacaayo maaha ee waa wax qorsheysan oo ku talagal loo sameeyey oo la rabo in aysan somaliya weligee degin aysana helin kala danbeyn sharci iyo nidaan dowladeed, waxaasoo dhanna waxa loo sameynayo waxa weeye in dalkan inta ka hartay Itoobiya gacanta loo geliyo.

• Daawo Video-ga xorayntaii Soomaali Galbeed & Somali Abow

Calanka Itoobiya oo la gubayoSawir Qaade: Muuse Maxamuud Jiisow

"Ilaahay weyn ee markii Soomaaliya shanta loo qeybinayay joogay hadda markii hoggaamiye kooxeedyada lacagta la soo siinayay ee la soo yiri soo baabi'iya waxa yar oo magaalada Ka jirana guusha naga siiyay waa noo joogaa, Itoobiya dhul nagama qabsoon doonto Insha Allaah Tacaalaa, ku jiridda dalkeena ay ku jirtana way ka shallaayi doontaa. Waxaan idiin sheegayaa walaalayaal, ciidamada maxaakiimta islaamiga inla diyaariyay inay howlahooda si wanaagsan laysu duba rido oo qaab ciidan loo diyaariyay loona qeybiyay ciidamo nabadda suga iyo ciidamo difaaca dalka, iyagoo kaashanaya Alle iyo shacabkooda, waxaana idiin sheegaynaa dhammaan ciidamada qalabka sida inay diyaar garoobeen, labadana ciidanna ay wada shaqeyn doonaan, waxaan idiin sheegayaa in shacbiga Soomaaliyeed ay dhammaantood og yihiin waxa ka socda magaalada Muqdisho, sidoo kale inaan maanta caalamka isku mowqif ka taagneyn waxa ka jira Soomaaliya waad la socotiin, Soomaalidu waxay leeyihiin rag qaddiyadooda aaminsan oo caalamka ka tirsan iyo dad ka soo horjeeda, arrintaas darteed iyada ayaa guul oo in la milicsado ay tahay.. walaalayaa, Soomaalidu meel kasta oo ay joogto waxaa la gudboon inay xaqaa'iqa gartaan, una diyaargaroobaan sidii ay u difaaci lahaayeen diintooda iyo dalkooda, in khilaafkii  yar-yarka ahaa laga gudbo, in maanta dareen Muslinimo iyo dareen Soomaalinimo la muujiyo, qof walbaana gunta uu dhiisha isaga dhigo dal iyo dibad meeshii la joogaba. 

Sawir Qaade: Muuse Maxamuud Jiisow

"Walaalayaal waxaan wada hadalka u fureynay oo nabadda aan u raadinaynay oo dowladda u aqoonsaneynay ujeedadeenu waxay aheyd inaan dalka Soomaaliyeed cadow shisheeye ka faa'ideysan oo aan amxaaro soo gelin oo aan qolo soo gelin oo aan loo baahan cidna oo Soomaali ay wada hadasho, waxna meel wada dhigato, laakiin arrintaasi waxay u muuqataa inaan loo jeedin, si aan marmarsiiyo loo helin weliba waxaan u sheegaynaa dhammaan ummadda Soomaaliyeed meelay joogaan iyo caalamka in maxaakiimta Islaamka ay wadahadal diyaar u aheyn, in qaddiyadda la kala furo oo qaddiyad Soomaali u dhexeysa iyo  mid xabashi  iyo Soomaali u dhexeysa,  arrinta Itoobiya haddii aan si qoto dheer horay u sii galo, waxa idiinla dagaalamaya Itoobiya oo dhan, waxa meesha socdaa waa labo qolo, niman la yiraahdo tikree oo deggan waqooyiga Itoobiya oo ninkii lacagtiina wax ku bartay uu hoggaaminayo Meles Zenawe, abaalkeeda Soomaaliya maanta wuxuu ugu guday inuu intii hartay qabsado, shacabka Itoobiya dhammaan meel ay joogaan waa ay dhibaateysan yihiin, caddaalad darro iyo nidaam xumo ayaa ka jirta, qawmiyaadka deggan dhammaantood Itoobiya waa dulman yihiin, waxa u talinayana waxa sedax Milyan oo Tigree, sidaas darteed shacbiga Itoobiya waxaan u sheegeynaa Meles Zenawe inaan lagu kaalmeynin dulmiga uu ku sameynayo deriskiisa oo Soomaaliya ah, Qowmiyadda Tikreegana waxaan u sheegeynaa inay nabad ku joogaan dalkooda, ciidamadoodana kala baxaan dalka Soomaaliya, qolada labaadna waa qolo la soo kireystay oo been loo sheegay, waxyaabo aan jirinna loo ballan qaaday oo la marin habaabiyay, mana doonayo inaan magacooda sheegno, laakiin xabbadda meeshaad ka rideysiin iyo meeshaad ku rideysiin kala garta, dan idinkuguma jirto idinkoo Itoobiya ama taliskaas Tikree wakiil ka ah inaad Soomaaliya ku dhimataan, Maxaakiimta Islaamiga ah waxay diyaar u yihiin inay la hadlaan cid kasta oo wax ka tabaneysa, wax walba oo khilaaf ahna lagu dhameeyo wada hadal, waxay ka soo horjeedaan in la adeegsado awood, in loo adeegsado ciidamo Shisheeye Soomaaliya meeshey doonaan ha ka yimaadeene, walaalayaal arrintaas waxa loo sameynayana waa in lagu wiiqmo oo nalaga mashquuliyo horumarkii aan sameyn laheyn, waxaad la socotiin in magaalada Muqdisho ay ka bilaabatay howlo nadaafadeed, waxa abaabul loogu jiraa sidii loo sameyn lahaa waxna looga qaban lahaa arrimaha caafimaadka, tacliinta sidii kor lougu qaadi lahaa, amniga sida loo sugi lahaa, sidii ummadda laysugu laab xaari lahaa oo Soomaaliya hal meel uga soo wada jeesan laheyd, si arrimahaas nalooga mashquuliyana waxaa gudaha dalka la soo geliyay ciidamo shisheeye, sidaas darteed waa inay socdaan howlaha oo dhan, Soomaaliyana Ilaahay wuxuu ku maneystay inay leedahay wax howlahaas qabta iyo wax dalka difaaca, haddii dhammaantood u diyaar garowno inaan shaqeeyo Ilaahay (SW) garab ayuu nagu siinayaa. 

• MAGACYADA DADKA RAYIDKA AH EE LA DILAY MUDDADII U DHAXAYSAY 22^KA JULY 2005 – 20^KA JULY 2006

Sawir Qaade: Muuse Maxamuud Jiisow

Gudoomiyaha maxaakiimta islaamka Sheekh Shariif Sheekh Axmed oo qudbaddaasi ku dheeraaday waxa kale oo uu ka hadlay dadaalka maxaakiimtu ay ugu jiraan in maamul loo dhiso Muqdisha, taasoo u baahan dadaal, aqoon dheer, xikmad, karti iyo garasho, aqoonyahano Soomaaliyeed daraasad ay sameeyeen waxay soo saareen fashiladii dhacayay inay salka ku hayeen aqoon darro maamul, marka waxaan ka shaqeyneyno waxa ay yihiin inaysan aqoon darro maamul aysan dhicin, ummaddaas Soomaaliyeed cid danahooda fulin karta oo ay ku kalsoon tahay in loo dhiso inay lagama maarmaan tahay maxkamaduhu aad u  dareensan tahay, waana la soo gabagabeyn doonaa insha Allaah sida ugu dhaqsiyaha badan, sidaas darteed waxaa loo baahan yahay in qabyaalad iyo nin jecleysi meel layska dhigo, maslaxadda ummaddana aan horay soo marino, dadkii aan howl u dhiibanana dhammaanteen in uu na matalo,  waajibna ayayna ku tahay inuu ka shaqeeyo maslaxadda, dalkeena waxa uu u bur-burayna waa caddaalad darro iyo dhibaato ka jirta, waxa aan ku badbaadin karnana waa caddaalad, haddaan caalad la helinna sidii ayay u jireysaa dhibaatada, deg-degna looma baahna, howlaha socdana waa kuwo culus, waxaana loo baahan yahay degganaan, tallaabta ugu horreysa ee aan ku dhaqaaqeynana waa in guryaha dadka ee lagu jiro waa in laga baxaa, beeraha dadka laga  haysto waa in looga baxaa, dulmi nin kastoo sameeyow Ilaahay uga laabo, howlahaasna waa howlaha ugu horreeya ee maxkamadaha Islaamiga mudnaanta koowaad siinayaan, waxaana jirta in Soomaali oo dhan ay xaggiina soo fiirineyso maadaama magaalo madaxdii dalka ee Muqdisho aanu joogno, waxaana loo baahan yahay arrimahaas oo dhan in sida ugu dhaqsiyaha badan loo fuliyo, waxaana isu dar-daarmaynaa inaan is cafino, midnimada iyo jiritaanka Soomaaliyeedna aan ilaalino" ayuu hadalkiisa ku soo gabagabeeyay.  

Abu mansuur ooka hadlaya bannaanbaxa Sawir Qaade: Muuse Maxamuud Jiisow

Waxaa kaloo isna bannaan baxaa ka hadlay Sheekh Mukhtaar Roobow (Abu mansuur) oo ah guddoomiye ku xigeenka Guddiga Fulinta ee midowga maxaakiimta islaamka, wuxuuna yiri " Ethiopia  waa cadow soo jireen ah oo waligeena nala dagaalami jirey waxaana ogsonahay in aan ka adkaan jirney  hada ka hor iyaga iyo shacabkeena ayaa dagaalamay dhulkaan hada  dhulkaaan oo dhan ethiopia  ayaa laga qabsaday oo laga saaray, mujaahidiinta Soomaalidu waxay gaareen Gobolka Kansala hadda dhahee Suudaan ka tirsan, haddii daandaansiga iyo edeb darrida ah aysan joojin, dadkii sidaas wax yeelay awoowayaasheen bay ahaayeen, caruurtoodii baa joogta, wixii baa qoran oo taariikh ahaan baa loo hayaa, meesha ay shalay gaareen bay insha Alaahu gaari doonaan, Wa maa daalika Calalaalhi Bicasiis, cadowga Itoobiya waxaan leenahay dalkayaga ka baxa idinma rabnee, haddii kale shacabka Soomaaliyeed dhamaantood waa mutadawiciin u diyaar ah inay diintooda iyo dalkooda inay difaacaan, waxaana leenahay waxa meeshan jooga dad mutadawiciin ah oo jecel inay dhintaan, diintooda iyo dalkooda ay u dhintaan, sidaas idinku u jeceshihiin nolosha kuwa geerida u jecel ayaa jooga oo diyaar ah inay dalka idiinka saaraan, waxaa diyaar noo ah kuwa jannada u deg-degaya sida aad naarta ugu deg-degeysaan, waxaa diyaar noo ah kuwa  inay diinta ku shahiidaan diyaar u ah, oo markay shahiidaan soo carfaya sidaad u soo ureysaan markaad bakhtisaan, waxaa naga go'an naf iyo maalba inaan gelino sidii aad uga bixin laheyd dalkeena, jus ka mid ah oo weyn baad haysateen, oo aan idiin ku haysanaa ma aqbalayno inaad intii hartay ku darsataan, haddaad rabtaan Bay & Bakool iyo Gedo inaad ka dhigataan killin 6aad, 7aad iyo 8aad waan diidnay, mana aqbalayno insha Alaahu idinkoo dulleysan ayaad baxaysaan, haddaad iska qarineysaan saxaafadda caalamka oo aad leedihiin dalkaas ciidamadeena ma joogaan maxaabiistiina la soo qabtay ayaan saxaafadda soo horjoojineynaa, maalintaas ayaad ceeboobeysaan, Yowma'idin yafraxuunal Mu'minuun binasrilaah yansuru man yashaa, annaga waxaan hubnaa Ilaahay wuxuu noo ballan qaaday inay imaan doonaan, Ilaah baa na amray inaan idiinla dagaalano, allaa na yiri: Qaatilluuhum yucadibhumulaah bi'aydiikum wa yukhzihum wa yunsurkum caleyhim, aayadaas seddax arrimood buu Ilaahay noogu ballan qaaday, Alla gacmihiina ku cadaabaya, waan aaminsanahay ilaa baa gacmaheena idinku cadaabi doona, Ilaahay wuxuu: Allaa hoojinaya oo dulleynaya, waan aaminsanahay in Sida uu Rabigeen ballan qaaday inaad dulloobeysaan, wuxuu yiri ilaah: waan idiin hiilinayaa, waana aaminsanahay in Rabbigeen noo hiilinayo, intuu na amray baan sameyneynaa intuu noo ballan qaadayna isaga ayaan ka sugeynaa.. allaahu Akbar.. wal cizatu Lillaah.

Sawir Qaade: Muuse Maxamuud Jiisow

Sidoo kale waxaa dadkii halkaasi ka hadlay ka mid ahaa Guddoomiye ku xigeenka Golaha Kacdoonka bulshada Sheekh Saciid Geelle, Guddoomiyaha Golaha Baraarujinta Yaxye sheekh Ismaaciil,Guddoomiyaha Maxkadda Al-Irshaad Sheekh Faarax Cali Xuseen iyo   abwaanada kala  Abshir Nuur Bacadle , Cismaan Guure iyo Taakoow Macalin Ciise . waxaana ugu danbayntii isku soo baxaan lagu gubay calanka Dowladda Itoobiya iyadoo midka Mareykankana Lugta lagu xirtay.

Banaanbaxaan oo ay soo qaban qaabiyeen Golaha kacdoonka difaaca diinta iyo dalka iyo Maxkamadda Al-Irshaad ayaa wuxuu ku soo idlaatay  sidii loogu talagalay waxaana  xagga amaanka  goobta uu ka dhacay banaanbaxa sugaayay  maleeshiyooyinka Maxaakiimta Islaamiga ee Muqdisho .Banaanbaxaan ayaa ku soo beegmay xilli magaalada Muqdisho iyo goboloda u dhow dhow ay gacanta ku hayaan  Golaha Maxaakiimta Islaamiga. 

Gabagabadii banaan baxaasi waxaa lagu gubay barxadda weyn ee Stadium Konis calanka Itoobiya iyo kan Mareykanka oo dab la qabadsiiyay, mana ahan markii ugu horreysay ee sidaas oo kale loo gubo calanka Itoobiya, waxaan horay loogu gubay calamo Tarabuunka, halkaas oo ah meeshii lagu dilay sawir qaadihii shisheeye ee lagu magacaabi jiray Martin Edlar.

Muuse Maxamuud Jiisow

Somali39@hotmail.com

Muqdisho Somalia

002521576666

Faafin: SomaliTalk.com | July 24, 2006