Maxkamadda Islaamiga ah oo daaha ka rogay arrimo sir ah oo ay ka heleen..

Maxkamadaha Islaamiga ah oo iyagu si aad ah uga soo horjeeda isbahaysiga la dagaalanka "Argagixisada" ku tilmaamay kuwo u taagan baabi’inta diinta iyo dalka, ayaa maalintii shalay ahayd waxay shir jaraa’id ku qabteen magaalada Muqdisho, wuxuuna shirkaan jaraa’id daba joogaa shir jaraa’id oo doraad Deyniile ku qabteen Isbahaysiga la dagaalanka "Argagixisada", waxayna Maxakamadaha Islaamku sheegeen in kooxaha ku shirtay Deyniile ay yihiin kuwo u soo jeestay in ay baabi’iyaan diinta iyo dalka, iyagoo adeegsanaya waxay ugu yeereen shisheeye.

“waad ogeydeen waxay ku hadleen markii hore maanta waxay yiraahdeen waxaan shacabka u dhiseynaa dugsiyo, jidad iyo wixii la mid ah, waxaana halkaasi kaaga soo baxaya in la doonayo in la baabi’iyo waxbarasahada Dugsiyada ay magacyadooda yihiin Mascuud, Bilaal, Abuu Bakar, Shaafici, waxayna doonayaan in ay ku bedelaan magacyo gaalo sida John iyo David iyo kuwo kalaba” ayuu yiri Shiikh Shariif Shiikh Axmed oo intaa ku daray “shacabka ayaa looga baahan yahay sidii ay uga hortagi lahaayeen kooxahaas oo adeegsanaya dowladu shisheeye ah”.

Shiikh Shariif Shiikh Axmed waxa uu sheegay in Midowga Maxkamadaha Islaamiga la socdaan in maanta Magaalada Muqdisho uu imaanayo nin Yahuudi ah oo asal ahaan ka soo jeeda Ruushka marna safiir ka ahaan jiray Dalka Itoobiya, waxayna xubnaha isku magacaabay Isbahaysiga kula kulmi doonaa Hotel Global isagoo marka hore diyaaradda wada ay ka soo degi doonto Garoonka Jowhar kaddibna laga soo dejin doono Garoonka Cisaley sidaasna uu ku imaan doono Hotel Global.

Shiikh Shariif waxa uu sheegay in Isbahaysigaas uu yahay mid ku shaqeeya awaamiirta dowlado shisheeye.

Midowga Maxkamahada Islaamiga ah waxay sheegeen inay wadi doonaan howlaha ay ku sugayaan amniga Magaalada Muqdisho waxayna ugu baaqeen shacabka Soomaaliyeed inay ka digtoonaadaan kooxaha doonaya in ay u adeegaan caddowga Islaamka kuwaas oo uu ku tilmaamay in ay yihiin kuwo aan ka naxeyn Diinta iyo Dalka.

Kulankii Wadamada IGAD oo ay ka soo baxeen qodob ay ka mid ahaayeen in Soomaaliya..

Eeg bidix: C/laahi Yuusuf iyo Mels Zenawi oo isla faqaya

Waxaa maalintii shalay ahayd Magaalada Nairobi lagu soo gebagabeeyay wajigii hore ee Kulan madaxeedka wadamada IGAD oo ay ka qaybgaleen Madaxweynayaasha Wadamada Kenya, Suudaan, Jabuuti, Soomaaliya, Uganda, Itoobiya iyo Wasiirka Beeraha oo matalayay Madaxweynahooda.

Kulankaan oo ayaa looga halday labo arrimood oo aad u muhiim ah oo kala ah arrimaha Soomaaliya iyo arrimaha wadanka Suudaan, iyadoo mar ay ka hadlayeen arrimaha Soomaaliya urur gobaleedku uu sheegay in uu diyaar u yahay in uu Soomaaliya u diro Ciidamo nabad ilaalin ah marka laga qaado cunqabateynta hubka, sidoo kale urur gobaleedku waxa uu sheegay inay ka qayb-qaadan doonaan wax u qabashada dadka ay waxyeeladu ka soo gaartay abaaraha.

Wadamada IGAD waxay soo dhaweeyeen kulankii Baarlamaanka ee lagu qabtay magaalad Baydhabo kaasoo ay sheegeen in uu tilmaamayo in Dowladda Federaalka ay dooneyso in ay soo celiso Dowladnimadii Soomaaliya.

Cali Max’ed Geedi “laga bilaabo Raas Kambooni ilaa Raas Caseyr ma joogaan wax argagixiso la yiraahdo”....

Ra’isul Wasaare Cali Max’ed Geedi oo u waramayay Wakaaladda Wararka ee Reuters ayaa waxa daboolka ka qaaday in Soomaaliya aysan ku sugneyn kooxo argagixiso ah oo dhibaato u keeni kara beesha Caalamka ama wadamada Deriska la ah Soomaaliya.

“laga bilaabo Raas Kambooni ilaa Raas Caseyr kuma sugna wax argagixiso ah” ayuu yiri Cali Max’ed Geedi oo sheegay in Dowladdiisan ay beesha caalamka kala shaqeyn doonto sidii looga hortagi lahaa kooxaha argagixisada ah.

Mar waxa laga weydiiyay sida uu u arko Isbahaysigii la dagaalanka Argagixisada dhawaan looga dhawaaqay Magaalada Muqdisho waxa uu yiri Geedi “Dowladdu ma taageersanaya Isbahaysigaasi, waxayna Dowladdu ka soo horjeedaa in la sameeyo Isbahaysiyo” waxa uuna intaas sii raaciyay “Maxkamadaha Islaamiga ah ee ka jira dalka ma ahan kuwo argagixiso ah, ee Maxkamadu ku yimid rabitaanka Shacabka oo ka shaqeeyay nabadgelyada Gobalka Banaadir”.

Hadalka ka soo yeeray Ra’isul Wasaare Geedi waxa uu ku soo beegmay xili ay maalintii shalay ahayd Deegaanka Deyniile ay shir jaraa’id ku qabteen kooxihii dhawaan sameeyay isbahaysiga la dagaalanka argagixisada kuwasoo sheegay in Soomaaliya ay ku sugan yihiin kooxo argagixiso ah.

Siyaasiiinta Soomaaliyeed ayaa ah kuwo is bedel badan, marka la fiiryo xiligaani, waxayna ereyga argagixisada u adeegsadaan hadba shaqsiga ay siyaasadda isaga soo horjeedaan.

C/llaahi Yuusuf, Shariif Xasan iyo Geedi oo kulan ku yeeshay Magaalada Nairobi ee dalka Kenya ..

Wararka naga soo gaaraya Magaalada Nairobi waxay sheegayaan in kulan ay isugu yimaadeen Madaxweyne c/llaahi Yuusuf Axmed, guddoomiye Shariif Xasan iyo Ra’isul Wasaare Cali Max’ed Geedi, waxaana kulankaasi looga hadlay go’aanadii ka soo baxay urur gobaleedka IGAD oo ay ugu weynaayeen in Soomaaliya loo diro ciidamo nabad ilaalin ah.

Kulankaan ayaa ujeeda loo qabtay ay sidi looga dhaadhicin lahaa Guddoomiyaha baarlamaanka in Soomaaliya ay galaan ciidamo ka socda Beesha Caalamka si ay u soo celiyaan amniga iyo kala dambeynta isla markaana hub ka dhigis ugu sameeyaan kooxaha maleeshiyoo-yinka hase yeeshee Guddoomiyaha Baarlamaanka waa uu soo dhaweeyay arrintaasi balse waxa uu sheegay in ay ku xiran ogolaanshaheeda Golaha Baarlamaanka oo ansixiya.

Golaha Baarlamaanka ayaa haatan ku shirsan Magaalada Baydhabo xubno ka mid ah waxay si aad ah uga soo horjeedaan in Soomaaliya la keeno ciidamo shisheeye waana midda keentay khilaafkii dowladda oo kala dejiyay Magaalooyinka Muqdisho iyo Jowhar.

Siyaasiyiin Digil iyo Mirifle ah oo maanta u ambabaxaya Magaalada Waajid ee Gobalka Bakool ..

Siyaasiyiin ka socota Beelaha Digil iyo Mirifle ayaa la filayaa in ay maanta u ambabaxayaan gobalka Bakool gaar ahaan degmada Waajid oo iyadu la dejiyay ciidamadii laga qaaday xerada Kongo.

Siyaasiyiintaan ayaa dadweynaha kala soo hadli doona sidii loo soo dhaweyn lahaa ciidamadaasi, isla markaana loo ilaali lahaa nabadgelyadooda, sidoo kale waxa ay Siyaasiyiintu la kulmi doonaan saraakiisha Ciidamada ee la socda ciidamada Puntland kuwaasoo doonaya in ay ka dhaadhiciyaan inaysan dhex geli dadweynaha Deegaanka, taas oo ay sheegeen in lagu yareyn karo isku dhacyada dhex mara iyaga iyo dadweynaha.

Inkastoo siyaasiyiinta Beelaha Digil iyo Mirifle isku khilaafeen imaanshaha ciidankaas haddana waxay markii dambe ku heshiiyeen in ciidankaasi la dejiyo deegaanka Waajid.

Ciidamadii laga keenay Xerada Kongo oo lagu xareeyay xero ku taala Waajid ..

Wararka naga soo gaaraya Magaalada Xudur ee Gobalka Bakool waxay sheegayaan in ciidamadii laga keenay halka lagu magacaabo xerada Kongo haatan la dejiyay xero ku dhow deegaanka Waajid.

Ciidankaas oo ka kooban 850 askari ayaa waxay soo mareen safar aad u dheere, iyadoo taasi jirto ayaa haddana imaanshahooda Gobalada Bay iyo Bakool waxa ay muran ka dhex dhalisay Siyaasiyiinta, Odoyaasha iyo Dadweynaha ku nool Gobalada Bay iyo Bakool, qaarkood waxay sheegeen in ciidankaasi aan la keeni karin gobaladaasi, kuwo kale waxay soo jeediyeen in ciidamadaasi la dejiyo gobalka Bakool, kuwo kalena waxay soo jeediyeen meel duleed ka ah Magaalada Baydhabo.

Aaqiritaankii waxaa la isku raacay in Ciidamadaasi la dejiyo xero ay horey u deganaan jireen ciidamadii RRA-da oo ku taala degmada Waajid.

Ciidankaani ayaa waxaa la sheegay in uu shalay is fahamwaa ka abuuray Dadweynaha Deegaanka Waajid kaddib markii lacago sheegay inay faalso tahay ay damceen in ay wax kaga iibasadaan dadweynaha ku nool Magaalada Waajid, hase yeeshee ganacsatadii waa ay diideen lacagtaasi.

Ciidankaasi ayaa wararka qaar waxay sheegayaan in loo rari doono deegaanka Salagle oo ka tirsan Degmada Bu’aale ee Gobalka J/dhexe halkaas oo looga dhigi doono xarun rasmi ah, hase yeeshee warar kale ayaa waxay sheegayaan in ciidamadaas dib loogu celin doono deegamadii ay horey uga yimaadeen ee Puntland.

Madaxweynaha Uganda oo sheegay in dalkiisa uu diyaar u yahay in Soomaaliya uu ....

Madaxweynaha Wadanka Uganda Musafeeni ayaa khudbad uu ka jeediyay kulanka Madaxda Wadamada IGAD ayaa waxa uu sheegay in Dowladdiisa ay diyaar u tahay in Soomaaliya ay u dirto ciidamo kala shaqeeya Dowladda Federaalka arrimaha nabadgelyada iyo dib u soo celintii maamulkii iyo kala dambeyntii.

“Haddii Qaramada Midoobey cunaqabateynta hubka ka qaado Soomaaliya waxaa diyaar u nahay in aan dirno ciidamadaasi” ayuu yiri Madaxweynaha Uganda oo isagu xilka Guddoominimada IGAD ku wareejin doono marka uu dhamaado shirka IGAD oo haatan ka socda wadanka Kenya Madaxweynaha Kenya ee Kipaki, sidoo kale Dowladda Suudaan ayaa la sheegay in ay iyana diyaar u tahay in ay Soomaaliya u dirto ciidamo nabad ilaalin ah haddii ay Qaramada Midoobey Soomaaliya ka qaado cunaqabateynta hubka, waxaana la filayaa in shir madaxeedka IGAD uu ka soo baxo codsi loo jeedinayo Qaramada Midoobey oo ah in Soomaaliya laga qaado cunaqabateynta hubka si ay u fududaato in Soomaaliya ay galaan Ciidamo nabad ilaalin ah

C/llaahi Yuusuf iyo Cadde Muuse oo la filayo in ay ku kulmaan Wadanka Yemen ..

War aanu ka helnay rag ku dhow Madaxweyne Madaxweyne C/llaahi Yuusuf ayaa waxay inoo sheegeen in Madaxweyne C/llaahi Yuusuf uu dhaawaan tagi doono dalka Yemen gaar ahaan marka uu dhameysto kulanka wadamada IGAD.

C/llaahi Yuusuf oo la filayo in uu warbixin siiyo Madxweynaha wadanka Yemen Cali Cabdala Saalax oo la xiriira waxyaabihii ka qabsoomay heshiiskii dhex maray Madaxweyne C/llaahi Yuusuf Axmed iyo Guddoomiyaha Baarlamaanka 4-tii Janaayo ee sanadkaan.

Warar kale ayaa waxay sheegayaan in Madaxweyne C/llaahi Yuusuf uu dalka Yemen kula kulmi doono madaxweynaha Maamulka Gobaleedka Puntland Gen. Caddee Muuse iyagoo dowladda Yemen kala hadli sidii loo joojin lahaa dadka tahriibka ah ee maalin walba ku dhimanaya xeebaha u dhexeeya Soomaaliya iyo Yemen.

W/.D: Amiin Yuusuf Khasaaro
E-Mail: amiinkhasaaro@hotmail.com

Faafin: SomaliTalk.com | Mar 21, 2006

Boqor Maxamuud Boqor Muuse oo ku Geeriyoodey Qardho
»Ugaas Max’ed: Itoobiya waxay la kulmi doontaa cawaaqib
»C/llaahi, Shariif Xasan & Geeddi oo kulan gaar ah yeeshay
»Maxkamadaha Islaamiga ah oo u howlgeli doonaan sidii..
»Wafdi wadamada deeqda bixiya oo kulan yeeshay Baydhabo
»Soomaaliya: Mashruuca Ciribtirka Indho la'aanta
»Shir Jabuuti ku dhexmaray taliska ciidamada Mareykanka iyo
Warar GooGoos ah ka akhri halkan... Guji... Mar 15

Xildhibaanada Baarlamaanka oo mar kale Galaya Fasax ilaa mudo Tobaad ah
»Qaar ka mid ah Xildhibaanada Baarlamaanka oo hanjabay
»Shiikh caan ah oo lagu dilay Magaalada Garoowe..
»Ururka Garyaqaanada Somaaliyeed oo walaac muujiyay
»Maleeshiyada Yuusuf Daba-Geed oo weerar qabsaday
»Qoral ka soo baxay Midowga Jabhadda xoreynta Soomaali
iyo Warar GooGoos ah ka akhri halkan... Guji.. Mar 13

Barre Hiiraale iyo Cabdi Cigaal oo soo afjaray Khilaafkii u dhaxeeyey..
»Heshiis buuxa oo laga gaaray shaqaaqooyinkii Kismaayo
»Geeddi oo markii ugu horeysay shir Gudoomiyey Kulankii..
»Shirka Golaha wasiirada DFK la iskula soo qaaday amaanka
»Ururka Garoobada oo ka cabanaya ganacsato loogu...
»Ciidamada Itoobiya ee soo galay Deegaanka Buulo Xaawo
»C/llaahi Yuusuf oo la filayo in Nairobi kulan kula yeesho..
wararka oo dhan ka akhri halkan... Guji... Mar 12