HUGUNKA MADAAFIICDA GOOBTA IYO DHAWAAQA RASAASTA OO AY MUQDISHO KU WAABARIISATAY

Max’ed Dheere “C/llaahi waxaa la gudboon in uu si deg deg ah isu casilo..

Max’ed Cumar Xabeeb Max’ed Dheere oo ah Guddoomiyaha Gobalka Sh/dhexe oo shalay shir jaraa’id ku qabtay xaruntii Jowhar ayaa waxa uu si aad ah uga hor yimid go’aankii Wadamada IGAD ee ahaa in Soomaaliya loo soo diro Ciidamo shisheeye.

“Soomaaliya uma baahna ciidamo shisheeye waayo horey ayaan u soo aragnay ciidamadaasi, waxaana u soo jeedinayaa Wadamada IGAD in ay iska ilaaliyaan fikradda uu shaqsigu wato” ayuu yiri Max’ed Dheere oo u soo jeediyay Madaxweyne C/llaahi Yuusuf in uu deg deg isku casilo.

“C/llaahi Yuusuf waa uu ku fashilmay siyaasadda mana ahan madaxweyne ee waa nin qabiili ah” ayuu yiri Max’ed Dheere oo mar kale ku celiyay in uu diyaar u yahay in khilaafka u dhexeeya isaga iyo Madaxweynaha ay soo kala dhex galaan Beesha Caalamka.

Ismaaciil Hurre Buubaa “Ciidamada ka yimdi xerada Kongo waa ciidamo Qaran.

Imaaciil Hurre Buubaa oo ah Ra’isul Wasaare ku xigeenka ahna wasiirka Gobalka Wasiirka Iskaashiga gobalka oo u waramayay weriyaasheena ku sugan Magaalada Baydhabo ayaa waxa uu faahfaahin ka bixiyay arrimo la xiriira ciidamadii laga keenay xerada Kongo iyo waxyaabaha ay qabato wasaaraddiisa, waxa uuna sheegay in wasaaraddiisu ay tahay mid u taagan iskaashiga wadamada deriska la ah Soomaaliya, isagoo sheegay in wasaaraddiisu ay ka shaqeyn doonto xiriirka iyo wax wada qabsiga wadamadaasi. Mar uu ka hadlaayay sababaha ay uga qaybgali wayeen kulanka wadamada IGAD Wasiiradooda arrimaha dibadda oo dhawaan lagu soo gebagabeeyay Magalada Nairobi, waxa uu yiri “inkastoo aan xaq u lahayn in aan ka qaybgalno kulankaas haddana waxaan arrimahaas u dhaafnay wasaaradda Arrimaha dibadda, maadaama uu naga dhexeeyo xiriir”. Mar uu ka hadlayay sida uu arko ciidamada laga keenay xerada Kongo kuna sugan Gobalada Bay iyo Bakool waxa uu yiri Ismaaciil Hurre Buubaa “Anigu ciidamadaas waxaan u arkaa ciidamo Qaran mana ahan ciidamo qabiil”, waxa uuna intaas sii raacaiyay “waxaan rajeynayaa in ciidamadaasi ay gacan ka gaysan doonaan sidii dalka nabad loogu soo celin lahaa”, waxaa kalloo la weydiiyay sababta dib loogu soo nooleyn waayay ciidamadii xoogga dalka Soomaaliyeed si ay u sugaan ammaanka?, waxa uu yiri “Ciidamadii xoogga Dalka Soomaaliyeed markii runta laga hadlo badankood way gaboobeen oo wax howl ah oo ay qaban karaan ma jiraan, marka la reebo in laga faa’iideysto waayo aragnimadooda, waxyana Dowladdu ku tala jirtaa in ay uruuriso kooxaha maleeshiyooyinka isla markaana loo furo tababar si ay uga qayb-qaataan ammaanka dalka”, Ismaaciil waxaa wax laga weydiiyay sida uu arko gooni u goosadka dalka la magacbaxay Somaliland, “anigu waxaan ka mid ahay dadka aaminsan midnimada Soomaaliya, waxaana rajeynayaa in dad fara badan ay nala fahmi doonaan” ayuu yiri Ismaaciil Hurre Buubaa.

Xildhibaan Cismaan libaax “ciidamada laga keeney maaha ciidamo qaran ..

Xildhibaan Cismaan Libaax oo ka mid ah Xildhibaanad ka soo jeeda Gobalada Bay iyo Bakool haatanna ku sugan Magaalada Baydhabo ayaa wax laga weydiiyay sida uu arko ciidamada Puntland ee laga keenay xerada Kongo, waxa uuna yiri “Ciidamadaasi ma ahan ciidamo qaran ee waa ciidamo beeleed mana soo gali karaan gobalada Bay iyo Bakool”, wuxuu intaa raaciyay “waa in la helaa ciidamo isku dhaf ah oo ka shaqeeya dib u soo celinta nabadgelyadii iyo kala dambeyntii”.

Mar uu ka hadlayay waxa uu hor taagan in maamul loo sameeyo Magaalada Baydhabo, waxa uu Cismaan Libaax yiri “waa runtaa Magaalada Baydhabo ma lahan maamul, balse haatan waxaa lagu howlan yahay sidii maamul loogu sameyn lahaa magaalada Baydhabo taasoo wax ka tareysa dhinaca ammaanka iyo adeegyada bulshada”

Ugu dambeyntii waxa uu u soo jeediyay dadweynaha Gobalada Bay iyo Bakool in ay ka shaqeeyaan sidii deeganadooda nabad ugu soo dabaali lahaayeen dowladdu u hesho goob ammaan ah.

C/llaahi Yuusuf oo shalay dib ugu soo laabtay Baydhabo..

Madaxweyne C/llaahi Yuusuf Axmed oo ka qaybgalay shirkii Madaxda Wadamada IGAD ee lagu soo gebagabeeyay Magaalada Nairobi ee dalka Kenya ayaa shalay dib ugu soo laabtay Magaalada Baydhabo, waxaana garoonka Diyaaradaha si wey ugu soo dhaweeyay xubnaha labada Gole ee Dowladda ee ku sugan Magaaladaasi.

C/llaahi Yuusuf oo khudbad ka jeediyay kulankii Wadamada IGAD ayaa waxa uu u soo jeediyay wadamadaasi inay gacan ka gaystaan in Soomaaliya laga qaado Cuqabateynta hubka taasoo ay si weyn u soo dhaweeyeen wadamadaasi iyagoo sheegay in ay u howlgali doonaan sidii Qaramada Midoobey uga dhaadhicin lahaayeen in Soomaaliya laga qaado cuqabateynta hubka si ay u fududaato in Soomaaliya ay soo galaan ciidamo shisheeye.

Hay’adda gargaarka iyo horumarinta Bulshada ee 31 –ka March oo u mahacelisey..

Hay’ada Gargaarka Iyo Horumarinta Bulshada ee 31^st March Waxay u mahad celineeysaa dhamaan ummada Soomaaliyeed ee gurmadka u soo fidiyay walaalahooda Soomaliyeed ee ku dhibaateeysan Gobalada kala duwan ee dalka sidoo kale waay u mahad celineysaa dhamaan inta gacanta ka geeysatay gurmadka gaar ahaan idaacadaha gudaha ah iyo kuwa caalamiga sida barnaamijkii ka baxay Taleefishinka Al-Jaziira ee afka carabiga ku hadasha kaas oo looga hadlay baahida dhamaan ka jirta geeska Afrika gaar ahaan Soomaaliya iyo sidii gurmad loo gaarsiin lahaa kaasoo uu fadhiyay sheekh caanka ah ee Dr Yuusuf Al-Khardaawi wuxuuna Shiikhu codsaday in ummadda geeska Afrika gaar ahaan ummadda soomaaliyeed gurmad la gaarsiiyo

hay’adda Gargaarka Iyo Horumarinta Bulshada Ee 31^st March oo deeq raashin iyo biyo isugu jira gaarsiisay Gobalada abaaruha ka jiraan qaar ka mid ah ayaa codsaneysa in dadkaas caawinaad lala soo gaaro waxaa qoraalkan na soo gaarsiiyey C/xakiin Macalin Axmed oo ah Guddoomiye kuxigeenka Hay’adda Gargaarka Iyo Horumarinta Bulshada Ee 31^st March.

Midowga Maxkamadaha Islaamiga ah oo shalay Gargaar gaarsiiyey Dad soo barakacay..

Maalintii shalay ahayd ayaa Midowga Maxaakiimta Islaamiga ah waxa ay gargaar gaarsiiyeen xero ay ku jiraan dadka soo barakacay oo ku taala Warshaddii hore ee Kabka.

Deeqdaas oo ka koobneyd Bariis, Bur iyo Dhar ayaa waxaa loo qaybiyay 180 qoys oo ku jira xeradaasi, iyadoo dadkaasi ay ahaayeen kuwo dhibaato ay ka soo gaartay dagaaladii dhawaan ka dhacay Magaalada Muqdisho.

Gargaarkaan ma ahan midkii ugu horeeyay ee Maxkamadaha Islaamiga ah bixiyaan dhawaan ayay ahayd markii dad qaxooti ah oo ku jira Xerada Damaayo ay gaarsiiyeen taasoo ay si aad ah ugu farxeen dadkaasi.

Gargaarkaan shalay la siiyay dadka ku jiray Xerada Warshadda Kabka ayaa waxaa halkaasi ka hadlay Macallim Max’ed oo ahaa Macallin Dugsi Qur’aan ku hayay xeradaasi oo u mahadceliyay Maxaakiimta Islaaiga ah.

Midowga Maxkamadaha Islaamiga ah waxa ay sheegeen in gargaarka noocaan oo kale ah ay siin doonaan dadka ku jira xeryaha dadka soo barakacay.

Hay’adda CDHR oo qabtay wejigii saddexad ee siminaar ku saabsan Dimoqraaduyadda..

Hay’adda Center For Democracy Human Rights (CDHR) aya shalay xarunteeda Magaalada Muqdisho waxay ku qabatay wajigii saddexaad siminaarkii ku saabsanaa Demuquraadiyadda, waxaana iska kaashaday Hay’adda CDHR iyo Hay’adda NED waxaana ka qaybgalayay ilaa iyo 30 xubnood oo ka socday qaybaha kala duwan ee bulshada.

Siminaarkaan oo socon doona mudo saddex maalmood ah ayaa waxaa furitaankiisii waxaa ka hadlay wakiilka difaacayaasha Xaquuqda Aadanaha Bariga iyo Bartaha Afrika Axmed Max’ed Kiimiko, waxa uuna sheegay in siminaarkaani uu yahay mid daba socday siminaaro horey u baxay oo la xiriiray dhinaca dimuquraadiyadda.

Siminaarkaan oo lagu baranayo qaabka awood qaybsiga, sidii loo heli ahaa Dowlad dastuuri ah, iyo waxa ay tahay dimuquraadiyaddu iyo heerarka ay soo martay ayaa waxaa casharo ka bixinayay AVV. Sakeriyeoo isagu shalay si aad ah faahfaahin uga bixiyay qodobaadaasi.

Qaar ka mid ah ka qaybgalayaasha oo iyana ka hadlay siminaarkaasi ayaa waxay sheegeen in casharada ay ka bartaan siminaarkaan ay u gudbin doonaan walaalahooda kale ee aan fursadda u helin siminaarkaani.

Shariif Xasan Shiikh Aadan oo maanta la filayo in uu khudbad ka jeediyo..

Guddoomiyaha Baarla-maanaka oo maalintii shalay ahayd kulan kula yeeshay Magaalada Nairobi mas’uuliyiin ka socotay Wadamada IGAD ayaa waxaa kulankaas la iskula soo qaaday sidii Dowladda Federaalka u ogolaan lahayd in Soomaaliya loo soo diro ciidamo nabad ilaalin ah oo Dowladda kala shaqeeya dhinaca amniga.

Shariif Xasan ayaa waxa uu mas’uuliyiintaas u sheegay in ogolaanshaha Ciidamo nabad ilaalineed oo Soomaaliya la keeno ay ku xiran Baarlamaanka Soomaaliyeed, isagoo sheegay in sida ugu dhaqsiyaha badan uu arrintaani u hor dhigi doono Baarlamaanka.

Maanta ayaa la filayaa in Guddoomiyaha Baarlamaanka uu khudbad ka jeediyo Golaha Baarlamaanka ee dalka Kenya taasoo uu uga warami doono wixii u qabsoomay Baarla-maanka mudadii sanadka ahayd, waxaana lagu wadaa in Guddoomiyaha Baarlamaanka la gudoonsiiyo qoraaloo la xiriira qaabka u shaqeeyo Baarla-maanka wadanka Kenya.

Guddoomiyaha Baarla-maanka oo si dhaqsi ah looga rabo Magaalada Baydhabo kaddib markii qaar ka mid ah Xildhibaanada Baarlamaanka ku heshiin waayeen qaabka qaybsiga guddiyada Baarla-maanka, iyadoo qaar ka mid ah xildhibaanada ay sheegeen in ay san ku qanacsaneyn qaabka qaybsiga guddiyadaasi oo ay sheegeen in beelaha qaar ku badan yihiin.

Bandow xalay lagu soo rogey magaalada Baydhabo

Wararka naga soo gaaraya Magaaladabaydhabo waxay sheegayaan in habeenkii xalay ahaa Magaaladaasi lagu soo rogay bandow soconaya afarta habeenimo ilaa waabirigii kaddib markii maalmahan Magaalada ay ku soo kordheen falal amaan daro ah.

Bandowgaan waxaa Magaalada KU soo rogay guddiga nabadgelyada ee Magaalada, iyagoo sheegay in ciddii lagu arko iyadoo socoto waqtiga kor ku xusan in lala tiigsan doono Shariciga isla markaana ganaax la saari doono.

Dadweynaha Magaalada Baydhabo ayaa si weyn u soo dhaweeyay bandowgaan lagu soo rogay Magaalada Baydhabo iyaagoo sheegay in uu wax ka tarayo ammaanka Magaalada Baydhabo.

Dhawaan ayaa Xildhibaano ka tirsan Baarlamaanka waxaa loo dhigtay isbaaro, waxaana laga qaatay Moobeeladii waxaana loo gaystay jirdilyo.

W/.D: Amiin Yuusuf Khasaaro
E-Mail: amiinkhasaaro@hotmail.com