Arday Soomaaliyeed oo Galay kaalinta
koowaad Jaamacadda Islaamiga ah ee Uganda (I.U.I.U)
Maanta waxa ay u ahayd ardayda soomaalida ah oo waxka barta jaamacadda
islaamka eek u taal magaalada Mbale ee dalka Uganda.
Waxaa Sabtidii jaamacaddaas oo lagu
magacaabo Islamic University In Uganda, Oo magaceeda loo soo gaabsho
I.U.I.U kaqalin jabiyay arday soomaaliyeed oo dhan 35 oo iskugugu jira
wiilal iyo gabdho.
Ardayda soomaaliyeed oo awal tiradooda
guud ay ahayd 208 arday ayaa waxa ay markii sadexaad ku guullaysteen in
uu kasoo dhexbaxo qofka koowaad ee jaamacadda ugu horeeya. Labadii sano
ee lasoo dhaafay ayaa numberka koowaad waxaa ku`kala guullaystay C/laahi
Shariif oo asagu iminka isla jaamacaddaas macalin ka ah iyo sanadkii
kale oo uu kaalinta koowaad ku guullaystay, Maxamed cumar.
Sanadkan ayaa waxaa ku guulaystay in uu
noqdo ninka numberka ugu horeeya noqda C/laahi ibraahim. Waa markii
koowaad oo arday soomaaliyeed oo tiro intaas dhan ay ka qalin jabiyaan
jaamacad ku taala Uganda. waxaa maanta laga dareemi karay jaamacadda
dhexdeeda iyo guud ahaanba meellaha ay soomaalidu ka dagan tahay
magaalada Mbale farxad iyo socod dheeri ah.
Ardayda waxka barata jaamacadda I.U.I.U ayaa ayagu waxa ay caawa iskugu
imaanayaan xaflad balaaran oo loosameeyay ardaydii qalin jabisay ayada
oo si gaar ah loogu sharfaayo C/laahi ibraahim oo ah ninka maanta ay
soomaalidu sida aadka ah ugu soo tahniyaddaynayeen ugu hambalyeynayeen..
Waxaa ii suurta gashay in aan waydiiyo
dareenkiisa maanta halka uu marayo waxa uuna iigu jawaabay maanta waa
maalin ka mid ah maalmihii iigu farxadda badnaa. Alle ayaana ku
mahadinayaa, guusha iyo sumcadda aan usoo hoyiyay ardayda soomaaliyeed.
Guud ahaan ardayda soomaaliyeed oo waxka
barta jaamacadda I.U.I.U iyo dadka ku nool magaalada Mbale ayaa waxa ay
ayaguna tahniyad u dirayaan, C/laahi Ibraahim.
Qodobada iyo khudbadaha shirka caawa
dhacayana waan idiin soo tebin doonaa haddee Allah idmo..
Maxamed dhagaafe cilmi Mbale Uganda
m_dhagaafe@hotmail.com
+256782770872
Warar ku saabsan dagaalka ka
socda Magaalada Muqdisho...
Maalintii afraad ayuu
galay dagaalkii u dhexeeyay Abuukar Cumar Caddaani iyo Bashiir Raage oo
taageero ka kala helaya Maxkamadaha Islaamiga ah iyo kooxaha isku
magacaabay la dagaalanka Argagixisada, waxa uuna dagaalkaani xoogiisu ka
dhacay shalay deegaanka Galgalato oo ahayd halkii xudunta u ahayd labada
ganacsato dagaalkooda.
Dagaalkii shalay
(Sabtidii Maarso 25) oo la isku adeegsaday hubka culus iyo midka fuduba
ayaa waxaa shalay ku dhintay dagaalkaasi ilaa iyo 20 qof guud ahaan
marka la isku daro afartii maalmood ee dagaalku socday waxaa ku
geeryooday dad gaaraya 140 qof.
Maxamuud Cumar Caddaani oo ay walaalo
yihiin Abuukar Cumar Caddaani oo shalay shir jaraa’id ku qabtay Hotel
Ramadaan ayaa waxa uu sheegay in ciidamadoodu ay dhamaan gacanta ku
dhigeen dekeddii Ceel-Cadde ee uu shidaalku ka degayay iyo garoonka
Diyaaradaha ee Cisaley, isagoo sheegay in dagaalku uu u soo wareegay
dhinaca Degmada Kaaraan, ahse yeeshee afhayeen u hadlay Isbahaysiga la
dagaalanka "Argagixisada" ayaa waxa uu sheegay in ciidamada Ibahaysigu
ay ku sugan yihiin goobihii ay horey ugu sugnaayeen isagoo beeniyay
warkii ka soo yeeray Maxamuud Cumar Caddaani.
Weriye ka tirsan Wargeyska oo shalay
soo maray deeganaadaasi ayaa waxa uu indhihiisa ku soo arkay in
Ciidamada Abuukar Cumar Caddaani ay ku sugan yihiin deegaanada Galgalato,
Ciil-Cadde, Ceel-Macaan iyo Cisaley, waxaa kalloo uu sheegay in Gawaari
sida shidaal fara badan iyo noocyada raashinka ay shalay ka soo baxayeen
labadaas dekedood kuwaasoo si toos ah u imaanayay Magaalada Muqdisho.
Gelinkii dambe ee shalay ayaa waxaa
si aad ah loo maqlayay rasaas aad u xoogan, waxaana wararku qaar
sheegayaan in isbahaysigu uu soo rogaal celiyay dagaalka, iyadoo la
sheegay in uu gacan ka helayo dad ay isku xulufo yihiin.
Mid ka mid ah ragga
isku haysta xubintii uu ka geeryooday Xildhibaan Max’ed Xaashi Gaani
oo..
Sida uu ku soo waramayo
Weriyaheena Magaalada Baydhabo Waxaa shalay ka dhacay Hoolka Shirarka
Baarlamaanka ee Magaalada Baydhabo arrin naxdin leh kaddib markii uu
buuq halkaasi ka sameeyay Sharmaake Maxamed Xaaji Gaani oo ka mid ah
ragga isku haysta xubintii uu ka geeryooday Gen. Gaani.
Guddoomiyaha Baarla-maanka ayaa
markii uu soo galay hoolalaka Shirka waxa uu amar ku bixiyay in
Sharmaake uusan soo geli karin gudaha hoolka Baarlamaanka uunsanna ahayn
nin ka tirsan Golaha Shacbiga, intaas kaddib ayaa Sharmaake waxa uu isku
dayay in uu soo galo gudaha Baarlamaanka balse waxaa is hor taagay
ciidanka Booliiska ee ilaalinayay fadhiga Baarlamanka.
Sharmaake markii loo diiday in uu
galo gudaha ayuu gacan ka hadal ula tagay ciidankii Nabadgelyada, markii
cabaar buuq dhex maray ayaa nin ka mid ah ciidankii ilaalada halkaas ka
ahaa ayaa waxa uu la soo booday Qori, inta uu ammaanka ka jartay ayuu
damcay in uu xabad ka rido, laakiin nasiib daro xabaddii ayaa kadimta,
mid kale ayuu ku riday iyana way kadimtay, intaas markii ay dhacday ayaa
Sharmaake Max’ed Xaashi Gaani uu arkay in xaalku uusan caadi aheyn ayuu
isaga huuleelay goobtii.
Markii kulanka Baarla-maanka
dhamaaday ayaa waxaa Shir jaraa’id qabtay Xildhibaan Maxamuud Sayid
Aadan, waxa uuna guddoomiyaha Baarla-maanka ku eedeeyay in uu ka
dambeeyay in la xabadeeyo Sharmaake Max’ed Xaaji Gaani, waxa uuna yiri
“Guddoomiyaha Baarlamaanku waa gacan ku dhiigle umana qalmo in uu noqdo
Guddoomiye Baarlamaan”.
C/llaahi Yuusuf oo dagaalka Muqdisho ku
tilmaamay mid Umolo-doox ah...
Madaxweyne C/llaahi Yuusuf oo shalay
u ambabaxay dalka Bilgium kaddib markii uu martiqaad ka helay midowga
Yururb ayaa waxa uu wareysi siiyay saxaafadda, waxa uuna sheegay in
safarkiisu uu la xiriiro sidii ay heshiis Dowladdiisu ula soo saxiixan
lahayd midowga Yurub oo ku saabsan mashaariicda la doonayo in la
hirgeliyo dalka sanooyinka soo socda, waxaana Madaxweynaha sii raacaya
Ra’isul Wasaare Cali Max’d Geedi oo haatan ku sugan Nairobi waxayna si
wadajir ah uga qayb-galayaan shirka Jaamacadda Carabta oo ka dhacaya
Magaalada Khartuum.
C/llaahi Yuusuf mar waxa laga
weydiiyay dagaalka ka socda Magaalada Muqdisho ayaa waxa uu ku timaamay
mid Umo-doox ah, isagoo sheegay in Dowladiisu ay aad uga xun tahay in
dagaalkaasi ay ku lug yeeshaan Wasiiro ka tirsan Dowlada.
“Dagaal noocaas ah markii ay gelayaan
waxay ahayd in ay iska siibaan shaarka Wasiirnimo oo ay is casilaan”
ayuu yiri C/llaahi Yuusuf oo intaa raaciyay “waxaan aaminsanahay in
dalka ay ku sugan tahay argagixio, shaqsiyaad ayaana ah argagixiso ee ma
ahan shacabka, waxayna ahayd in ay si toos ah u abaaraan kuwaas”,
Wuxuuna sheegay C/llaahi in uu aad uga xun yahay in lagu kar dagaalamo
shacabka masaakiinta ah, haddiise ay dagaal hureyn waa in laga dhex
baxaa shacabka.
Hay’adihii Samafalka oo gebi ahaan isaga baxay
Magaalada Jowhar ...
Wararka naga soo gaaraya Magaalada
Jowhar waxay sheegayaan in Hay’adihii Samafalka ee ka howlgalayay
Magaalada Jowhar ay shalay isaga baxeen halkaasi.
Bixitaanka Hay’adahan ayaa waxaa la
sheegay in ay la xiriirto iyadoo laga cabsi qabo in dagaalku uu ku faafo
Magaalada Jowhar ee Gobalka Sh/dhexe kaddib markii Max’ed Dheere uu ku
lug yeeshay dagaalka ka socda Magaalada Muqdiso isla markaana uu xubin
ka yahay waxa loogu yeeray isbahaysiga la dagaalanka argagixisada.
Dhowr diyaaradood ayaa ka
daadgureysay Hay’adahaasi Magaalada Jowhar, waxaana si ku meel gaar ah
loo geeyay Magaalada Nairobi illaa ay iska bedeleyso arrintu.
Mid ka mid ah shaqaalaha Hay’adaha
samafalka oo u waramayay saxaafadda ayaa waxa uu sheegay in ay amar ka
heleen Madaxda Hay’adahooda saasna ay uga baxeen Magaalada Jowhar.
Hay’ado ka tirsan kuwa xaquuqda Adaanaha oo
walaac ka muujiyay dagaalka Muqdisho...
Hay’adaha kala ah Hay’adda nabadda io
xaquuqda Aadanaha ee Elman, hay’adda Sed-Huro HR Kismaanyo, Hay’adda
Hilaal HR-Baladweyne, East African Media Institude-Mogadishu iyo dhamaan
bahda difaacayaasha xaquuqda aadanaha waxay wadajir u cambaareynayaan
dagaalka beryahaan ka socday Muqdisho kaasoo sababay qasaare lixaad leh
oo isugu jira dhimasho, dhaawac, burbur dhaqaale, barakac iyo argagax.
Hay’adahani waxay Welwel iyo walaac
ka qabaan xaaladda nabadgelyo iyo mida nololeed ee dadkii ku barakacay
dagaalkaan oo u badan dad masaakiin ah oo aan waxba galabsan, hay’addu
waxay ugu baaqayaan kooxaha dagaalamaya in ay si shuruud la’aan ku
joojiyaan dagaalka, waxayna ku tilmaameen mid xadgudub ku ah Diinta
Islaamka, Xaquuqda Aadanaha, Dhaqanka Soomaaliyeed iyo baaqa caalamiga
ah ee xaquuqda aadanaha kaasoo sheegaya in qof walba uu xaq u leeyahay
in uu ku noolaado nabad, waxaana War-Saxaafeedkaan loo wakiishay Eng.
Suudaan Cali Axmed.
W/.D: Amiin Yuusuf Khasaaro
E-Mail:
amiinkhasaaro@hotmail.com
Baaq Uu Wasiirka Dib U Dhiska Xildhibaan Barre Hiiraale U Jeediyay
Dhinacyada Ku Dagaallamaya Muqdisho
cabdi
khadar Nuur |
cabdiqadar84@hotmail.com
Wasiirka wasaaradda dib u dhiska iyo dib u dejinta dowladda federaalka
ku meel gaarka ah, ahna guddoomiyaha isbahaysiga dooxada Jubba Barre
Aadan Shire ayaa waxa uu markii ugu horreysay Sabtidii ka hadlay
dagaallada u dhexeeya labada garab ee kala taageersan Bashiir Raage
Shiiraar iyo Abuukar Cumar Caddaan ee ka socda magaalada Muqdisho.
Wasiirku waxa uu sheegay in dagaalladaas Muqdisha ka socda maalinkii
4aad ay yihiin dagaallo nasiib darro ah, waxase ka sii daran inay sii
socdaan ayuu raaciyay, waxana uu intaas ku daray in dagaalladaas oo ay
dad badan oo rayid ahi ku dhinteen oo ay ka mid tahay Aamina Sahra
Macallin C/qaadir oo 3 bilood jirta 3 xabbadoodna ay ku dhaceen oo
iminka taalla isbitaalka Madiina ee magaalada Muqdisha in loo baahan
yahay in dadka rayidka ah loo naxo oo la badbaadiyo.
Mar uu ka hadlayay khasaaraha dagaalkaas ayaa waxa uu Barre Hiiraale
sheegay in ay hanti badan ku baaba'day oo weliba ay dad rayid ah
leeyihiin, waxana ku dhintay dad ku dhow boqol qof tiro kalena waa ay ku
dhaawacmeen.
Wasiirka waxa uu baaq u jeediyay dhinacyada is haya ee ku hardamaya
magaalada Muqdisho dhinaceeda bari ee dagaalkoodu uu 4 maalin jirsaday,
waxa uu ugu baaqay dhinacyada is hayaa inay si shuruud la'aan ah
dagaalka u joojiyaan, isla markaasna khilaafkooda ka wada hadlaan, kuna
dhameeyaay jawi xasilloon.
Mar aannu wax ka weydiinnay wasiirka in Isbahaysiga dooxada Jubba uu ka
qayb galay dagaalka ka socda magaalada Muqdisho waxa uu sheegay in aanay
arrintaasi jirin isla markaasna taliyaha ciidammada isbahaysiga dooxada
Jubba Maxamed Rooble Jimcaale (Goobaale) uu iminka ku sugan yahay
degaanka Ceeljaalle ee gobolka Shabeellada Hoose isla markaasna uu fasax
kaga maqan yahay isbahaysiga dooxada Jubba isla markaasna uu reerkiisa
halkaas u deggan yahay.
Ma ahan oo keliya wasiirka cidda baaqa u direysa garabyada ku
dagaallamaya magaalada Muqdisho, waxaana sidoo kale baaq kaas la mid ah
u diraya dhinacyada isku haya Muqdisho ururrada bulshada rayidka ah ee
magaalada Kismaayo iyo aqoonyahanno ku sugan Kismaayo.
Baaqyadanna waxa ay ku soo beegmayaan xilli dagaalkii Muqdisho uu sii
xoogeysanayo oo uu galabta oo Sabti ahna mar kale dib uga billowday
degaanka Galgalato.
cabdi khadar Nuur |
cabdiqadar84@hotmail.com
Faafin: SomaliTalk.com | Mar 26, 2006
WARARKII KHAMIISTII
& JIMCADII
Warbixin ku saabsan dagaalkii ka socday Magaalada Muqdisho...
Dagaalkaan waxaa ku dhintay saddexdii maalmood ee uu socday dad gaaraya
120 qof...
Maalinii saddexaad ayuu
galay dagaalkii u dhexeeyay isbahaysiga la magacabacay la dagaalanka
Argagixisada iyo Maxkamadaha Islaamiga ah, waxaana dagaalkaan lagu
waramay in uu yahay kii ugu xoogga badnaa ee ka dhaca Muqdisho waaydaaan
iyadoo la isku adeegsanayo hubka noocyadiisa kala duwan.
Haddii aan warbixin
kooban idinka siino kii dhacay Maalintii Khamiista ahayd waxa uu
xooggiisu ka dhacay Waxara-Cadde, Cali Tucaaye, Geed Timir iyo Baqalo
waxaana dagaalkaas isna uu ahaa mid aad u xooganaa waxaana Maxkamadaha
Islaamiga ah u suuragashay in ay gacanta ku dhigaan bar koontarool oo ku
taalay halkaasi oo tagta Dekedda Ceel Macaan.
Dagaalkaas ayaa waxaa
soo galay dhowr Tikniko ah oo uu leeyahay Max’ed Dheere waxayna la
sheegay in gacanta looga dhigay labo Gaari oo Tikniko ah, iyadoo
Maleeshiyooyinkii kaga dhaawacmay dagaalkaasi loo qaaday Magaalada
Jowhar, dagaalkaan waxaa kalloo ku lug lahaa wasiirka hub ka dhigista
Bootaan Ciise Caalin, oo isagu xubin ka ah Isbahaysiga la dagalanka
Argagixisada, waxaana la sheegay in hal gaari oo Tikniko ah looga
qabsaday dagaalkaasi, balse waxay gubeen gaari ay lahaayeen Maxkamadaha
Islaamiga ah.
Odoyaal ka tirsan beesha
uu ka soo jeedo Wasiirka hub ka dhigista Bootaan Ciise ayaa iyagu
heshiis xabad joojin ah la galay dhinaca Maxkamadda, taasin waxay
suuragelisay in dagaalku ka is taago dhinaca Waxara-Cadde.
Dagalkaan shalay
(Jimacdii) oo xoogiisu ka dhacay Deegaanka Galgalato, Kaawooyinka iyo
Mowlacaha Shiikh Cali Cabdule ayaa waxaa la isku adeegsaday hub culculus
waxaana si aad ah looga maqlayay hubkaasi Magaaalada Muqdisho oo dhan
waxaana la sheegay in Maxkamadaha Islaamiga ah oo gacan siinaya
Ganacsade Abuukar Cumar Caddaani ay u suuragashay in ay la wareegaan
deegaanadii saddex bilood ka hor dagaalku ka dhacay. Dagaalkaan ayaa
waxaa ku dhintay saddexdii maalmood ee uu socday dad gaaraya 120 qof,
wadaana ku dhaawacmay tiro intaa ka badan, iyadoo Isbitaalada Magaalada
Muqdisho ay buux dhaafiyeen dad dhaawac oo laga keenay goobihii uu
dagaalku ka dhacay.
Dagaalkaan ayaa waxaa ku
dhaawacmay saraakiil ka tirsan Isbahaysiga la dagaalanka argagixisada
waxaana ka mid ah nin ay walaalo yihiin Bashiir Raage oo lagu magacaabo
Cabdi Raage, waxaa kalloo ku dhaawacmay Ibraahim Jeebe, sidoo kale waxaa
ku dhaawacmay C/qaadir Beebe.
VOA oo ka warbixinaysa Dagaalka Soomaaliya: Dhegeyso...
W/.D: Amiin Yuusuf Khasaaro
E-Mail:
amiinkhasaaro@hotmail.com
Warbixin ku Saabsan Dagaalka Muqdisho...
»120
Qof oo ku dhintay dagaalkii saddexda maalmood
»Saraakiil
sare oo ka tirsan Isbahaysiga la dhaawacmay..
»Baaqyo
soo gaaraya kooxaha ku dagaalamaya Muqdisho..
»Xus
loo sameeyay C/llaahi Ciise Maxamuud..
»C/llaahi
Yuusuf oo shalay gaaray Degmada Waajid…
»Caasha
Axmed: labo arrimood waa in ay isku casishaa..
»Maalinta
Qaaxada Adduunka oo laga xusay dalka..
»Ururada
bulshada rayidka ee W.Bari kenya oo Cambaareeyay
»Britain
oo sheegtyay in Argagixiso ay joogto Muqdisho...
Wararka oo dhan ka akhri halkan... Guji... Mar 25
Daabaco
Boggan | Print
