::: SomaliTalk.com :::

Madaxweyne C/llaahi oo ka qaybgalay kulankii Madaxda Wadamada IGAD ee shalay ka dhacay Dalka Kenya ayaa si weyn u soo dhaweeyey go’aankii ka soo baxay Madaxda wadamada IGAD ee ahaa in Soomaaliya loo soo diro ciidano nabad ilaalin ah oo gacan siiya Dowladda Federaalka oo la sheegay inay tahay Dowlad Taak daran, waxa uuna sheegay C/llaahi Yuusuf in wadamada IGAD ay ka dhabeeyeen gacan siina Dowladda Federaalka ee dhinaca ammaanka.

C/llaahi Yuusuf waxa uu ka codsaday wadamada IGAD in sida ugu dhaqsiya badan loogu soo diro ciidamadaasi Soomaaliya, waxaa kalloo uu sheegay C/llaahi Yuusuf in wadamada IGAD ay Qaramada Midoobey ka dhaadhiciyaan sidii loo qaadi lahaa cunaqabteynta hubka ee Soomaaliya si ay u fududaato in Soomaaliya soo galaan ciidamo nabad ilaalineed.

Wararka ka imaanaya Magaalada Nayroobi waxay sheegayaan in C/llaahi Yuusuf iyo Melez Zenawi ay wada yeesheen kulan gaar ah oo kaas oo la sheegay in lagu sii xoojinayey xiriirka u dhexeeya Dowladda Federaalka iyo Dowladda Itoobiya, waxaana la filayaa in Madaxweyne C/llaahi Yuusuf uu booqdo wadanka Uganda si uu kulamo ula yeesho Madaxweynaha Wadanka Uganda isagoo kala hadli doona sidii ay Ciidamada Uganda u noqon lahaayeen ciidamada ugu horeeya ee soo gala Soomaaliya, iyadoo saraakiil ka tirsan Uganda ay joogaan Baydhabo, waxayna googol xaar u yihiin ciidamo ka imaanaya Uganda oo Soomaaliya soo galaya.

Madaxweyne C/llaahi Yuusuf Axmed waxaa kalloo uu booqan doonaa wadanka Itoobiya si uu Dowladda Itoobiya ugula soo hadlyo imaanshaha ciidamo Itoobiyaan ah oo yimaada Soomaaliya. Haddii ciidamo ka socda Wadamada IGAD ay soo galaan gudaha dalka Soomaaliya, waxaa burburaya heshiiskii dhex maray Maxaakiimta iyo Dowladda Federaalka, maadaama arrimaha ciidamada ay ahaayeen kuwo dib loogu dhigay ka hadlidooda shirka dambe.

Sheekh Shariif Sheekh Axmed oo ah Guddoomiyaha Golaha fulinta ee Maxaakiimta Islaamiga ah ayaa mar uu ka hadlayey banaanbax aad u balaaran oo ka dhacay fagaaraha Tarabuunka oo ay ka soo qaybgaleen dad aad u fara badan ayaa waxa uu uga digay ciidamada ay IGAD ku soo wado Soomaaliya in aysan soo gelin Soomaaliya.

“Waxaan leeyahay ciidamada Uganda yeysan Maydkooda keenin Soomaaliya, wixii qabsadana mas’uuliyadeeda waxaa iska leh ciddii soo dirtay” ayuu yiri Sheekh Shariif oo intaa raaciyey “marnaba dalkeena u ogolaan meyno Ciidamo Shisheeye noocay doonaan ha ahaadeene”.

Sheekh Shariif waxa uu sheegay in Wadanka Itoobiya uu yahay kan keliya ee doonaya in uu Soomaaliya u soo diro ciidamo, isna waxaan mar kale ugu celinayaa in aysan Soomaaliya u soo dirin wax ciidan, waayo dadka Soomaaliyeed waa og yihiin in Itoobiya iyo Soomaaliya ka dhexeyso Cadaawad soo jireen ah oo jirtay 500 oo sano, Sheekh Shariif waxa uu soo dhaweeyey heshiiska Maxaakiima iyo Dowladda Federaalka dhex maray Magaalada Khartuum ee Dalka Suudaan.

Ra’isul Wasaaraha Dalka Itoobiya ayaa mar uu saxaafadda kula hadlayey dalka Kenya magaalada Madaxdiisa Nayroobi ayaa waxa uu sheegay in ciidamada Itoobiya ay diyaar u yihiin in ay galaan Gudaha Dalka Soomaaliya, isagoo sheegay in ciidamadaasi ay halkaasi u tagayaan sidii ay gacan u siin lahaayeen Dowladda Federaalka.

Mar wax laga weydiiyey waqtiga ay tagayaan Ciimada Itoobiyaanka dalka Soomaaliya, waxa uu yiri “Cutubka ugu horeeya waxa uu tagayaa bisha Oktoobar ee fooda nagu soo haysa”, waxaa la weydiiyey, in ay jiraan ciidamo Itoobiyaan ah oo haatan ku sugan Dalka Soomaaliya, waxa uuna Zenawi ku jawaabay in aysan jirin wax ciidamo Itoobiyaan ah oo ku jira Gudaha Dalka Soomaaliya, laakiin waxa uu sheegay in Ciidamada Itoobiya ay ka gudbaan xuduudada Soomaaliya, iyagoo baacsanaya waxa uu ugu yeeray kooxo argagixiso ah.

Melez Zenawi waxa uu sheegay in Ciidamada Itoobiyaanka ah ee tagaya Soomaaliya ay yihiin kuwo ilaalinayey xarumaha Dowladda.

Kulan ay isugu yimaadeen Odoyaasha, Dhaqanka, Culuma-udiinka iyo Haweenka Beelaha Reer Goleedka ayaa uga digay Barre Hiraale in uu maamul u sameeyo Gobalada Jubbooyinka.

Waxay u soo jeediyeen Barre Hiiraale in uu ku qanco jagada Siyaasadeed ee uu ka helay Dowladda Federaalka, iyagoo sheegay in Barre uu ku xilkaasi korkoronta wax ay ugu yeereen Dhul uu xoog ku haysto, waxayna u soo jeediyeen Barre Hiiraale in uusan dib u soo kecin nabaradii horey u kala gaaray ummadda Soomaaliyeed xili lagu jiro is cafin guud, in uu dhowr axdiga Dowladda Federaalka, ugu dambeytntii waxa ay u soo jeediyeen Ummadda Soomaali-yeed iyo Adduun weynaha in ay arkaan dhibka lagu wado beelaha ku nool Jubbooyinka, waxaana ku saxiixnaa baaqaan 27-xubnood oo uu ka mid ahaa Ugaas Aweys Sheekh Xuseen (Honeero).

Maxkamadda Degmada Yaaqshiid oo wareejisay guri laga haystay general caan ah muddo 16 sano ah

Guriga janeraal Caare

gudoomiyaha maxkamaday aaqshiid | cabdi nuur oo ah wakiilka Gen. Caare

Gurigan oo ka kooban labo qeybood oo kala ah qeyb ganacsi iyo qeyb deegaan ah, guri dabaqna ah, birimana ka ah waddada 30ka ayaa waxaa dableydii haysatay muddo 16 sano ah lagu guul sarreystay in laga qaado waddo kasta oo loo maray, milkiilahaa iska lahaa gurigaasna si uu gacantiisa ugu soo wareego guriga uu ku bixiyay labo kun oo doollar, balse taas waa lagu guul darreystay, Maxkamadda Islaamiga ah ee degmada Yaaqshiid ayaa ku guuleystay inay si nabad gelyo ah ugu wareejiso milkiilihii guriga oo uu wakiil ka ahaa Ganacsade Cabdi Nuur Sahal Cali oo sheegay inay xitaa wada hadal ka diideen kooxihii horay u haystay guriga.

Guddoomiyaha maxkamadda Islaamiga Degmada Yaaqshiid Sheekh Ibraahim Max'ed Weydow oo xafiiskiisa shir jaraa'id ku qabtay ayaa sheegay in ay maxkamaddu xoogga saartay sidii guryaha la kala haysto ee la kala qabsaday xilligii fowdada ay ugu wareejin laheyd dadkii iska lahaa, wuxuuna sheegay in maxkamaddu haatan ay gacantii iska laheyd ku wareejisay in ka badan toban guri oo la kala haystay, wuxuuna hoosta ka xarriiqay in iyadoo laga duulayo inaan qofna qofka kale ku xadgudbin ayay waajib tahay in qofkii yimaada maxkamadda ee soo sheegta in hanti uu leeyahay ay waajib tahay in sida ugu dhaqsiyaha badan ay maxkamaddu wax uga qabato.

Wakiilka milkiilaha gurigaas Gen. C/raxmaan Warsame Cilmi (Gen. Caare) oo soo wakiishay isagoo dalka dibadiisa ku sugan ganacsade Cabdi Nuur Sahal Cali oo ka hadlay munaasabadda lagu wareejinayay gurigaas ayaa faah-faahin ka bixiyay qaabkii loogu wareejiyay gurigaas, waxaana muddo 16-sano ah uu gacanta ugu jiray dad wax ma garato ah oo uu ku tilmaamay inaysan aheyn kuwo nadiif ah, balse Ilaahay mahaddiis Maxkamadaha Islaamiga ayaa maanta xaqii dadka ka maqnaa u soo celiyay iyadoo aan wax dhaqaale ah lagu bixnin, wuxuuna ugu baaqay dadka kale ee aan weli u suurto gelin in guryahooda lagu wareejiyo inay si dhaqsi ah ula soo xiriiraan maxkamadaha, wuxuuna si gaar ah uga mahad celiyay maxkamadaha Islaamiga ah ee haatan gacanta ku haya magaalada Muqdisho inay bulshada u kala fududeeyaan waxyaabaha weli ka dhex taagan ee ah hanti isu celinta iyo dhulalka la kala haysto.

Muuse Maxamuud Jiisow
Somali39@hotmail.com
Muqdisho somaliya
002521576666/002521653623

Cape Town: booqasho 2 maalmood ah ayaa uga bilaamatay south africa madaxwaynaha dalka russia madaxwayne putin.

Madaxwayne putin ayaa booqasho 2maalmood ah uga bilaamatay dalka south africa kaasi oo uu wada hadalo la kula leeyahay madaxwaynaha dalkaasi south africa madaxwayne Thabo Mbeki.

Booqashadaan ayaa xooga lagu saarayaa sidii labada dalka ay iskula meel dhigi lahaayeen arimaha dahqaalaha iyo sidii ganacsato ka socota dalka russia ay u maal gashan lahaayeen qaarada africa in katoo uu wasiirka arimaha dibeda ee dalka south afrika shaaca ka qaaday in kulanka lagu so qaadayo xaalada bariga dhexe iyo waliba hubka wax gumaada ee ay ku taamayso in ay mar un samaysato xukuumada Iran.

Labada madaxwayne ee Mbeki iyo Putin ayaa sidoo kale laguw adaa in ay diirada saaraan arimaha caafimaad ka ee dalkaasi south africa la il daran yahay marka laga hadlayo cudurka sida wayn u naafeeyay dalkaasi ee HIV/ AIDS oo ay russia doonayso in ay wax kala qabato inta tabarteeda sidii loola dagaalami lahaa cuduraasi HIV?AIDS ee saameeyaya kumaakun oo reer south afric yaan ah.

Inta uu ku sugan yahay madaxwayne putin dalka south africa ayaa la filayaa in uu dalkaasi la soo yeesho xirii qota dheer oo isugu jira dhinacyada dhaqaalaha, siyaasada, caafimaadka iyo arimo kale.

Booqashada 2 maalmood ahee uu putin ku yimid dalka south africa ayaa timid xili ay si wayn booqasho ay maal mihii iyo bilihii ugu danbaysey ku imaanayeen qaarada africa mada ka tirsan xukuumada chine taasi oo doonaysa in ay maalgalin ku samayso qaarada africa islamarkaana ay ugu yaboohday qaarada africa hanti badan.

A/rizak koronto
Garowe puntland

Barnaamijkii Radio Xoriyo

05 September 2006

Dagaallo ka dhacay meelo kala duwan oo cadowga lagu naafeeyay.
Dad shacab ah ooy ciidammada gumaysigu xidhxidheen iyo kuwo ay boobeen.
Gabdho ay ciidammada gumaysigu kufsadeen.
Bayaan uu Hooggaanka Gaashaandhigga ee JWXO soo saaray.
Ururka Ogaden Students Forun oo kulan isugu yimid London.
Unugta iyo ururka dhalinyarada Ogadenya ee Canada oo shir iyo xaflad ku qabatay Toronto.

======================

Wariyaha RX uga soo warrama dalka Ogaadeenya ayaa noo sheegay dagaallo dhawr ah oo ciidammada xoreynta Ogaadeenya la galeen kuwa saama-la-luudka ah ee gumaysiga Itoobiya, kuwaasoo ka dhacay meelo kala duwan oo Ogaadeenya ka mid ah. Daggaalladaasi waxay u dhaceen sidatan;

31/08/06 weerar mir ah oo ciidammada xoreynta Ogaadeenya ku qaadeen ciidammada gumaysigu ee fadhigoodu yahay magaalada Gabagabo, waxay ugu gayseen khasaare ballaadhan oon faahfaahintiisa la haynin.

30/08/06 ciidammada xoreynta Ogaadeenya ayaa sidoo kale weerar mir ah ku qaaday ciidammada gumaysiga ee fadhiya magaalada Shaygoosh, waxayna u gayasteen khasaare ba’an.

21/08/06 duleedka magaalada Jeexdin wuxuu dagaal u dhex maray ciidammada gumaysiga dhexdooda, waxayna halkaas isakaga dileen inta la ogyahay 8 askari.

01/09/06 waxaa cidammada xoreynta Ogaadeenya isu soo dhiibay askari kale oo ka soo goostay cidammada gumaysiga Itoobiya, kaasoo hadda ku jira gacanta ciidammada xoreynta Ogaadeenya.

30/08/06 ciidamada gumaysiga ee fadhigoodu yaha degmada Fiiq waxaa ka goostay 37 askari oo hubkoodii u dhan yahay, kuwaasoo uu hooggaamnayay nin Kabtan ah.

25/08/06 waxaa sidoo kale ciidammada gumaysiga ee fadhiya magaalada Baabili ka goostay 180 askari oo hubkoodii wata.

Dad shacab ah ooy ciidammada gumaysigu xidhxidheen iyo kuwo ay boobeen.

Ciidammada gumaysiga Itoobiya ayaa meelo kala duwan oo Ogaadeenya ka mid ah ku xidhxidhay dad shacab ah oon waxba galabsanin, waxaana dadkaas ka mid ah;

27/08/06 waxay ciidammada gumaysgu ku xidhxidheen magaalada Dhagaxle dadka kala ah;

1- Sh C/llaahi Axmed Deeq

2- Haaruun Cabdi Xasan

3- Ismaaciil-dheere iyo

4- Xasan-Golay

Qaar dadkan ka mid ah waxaa lagu arkay xerada ciidammada gumaysiga ee Garab Case ee magaalada Jigjiga.

28/08/06 waxay ciidammada gumaysigu magaalada Higlaley ku xidhxidheen dadwayne rayad ah oon waxba galabsanin, waxaana dadkaas ka mid ah;

1- Maxamuud Xuseen (Awr-liqe)

2- Maxamed Mahdi

3- Axmed Naasir

4- Mukhtaar C/llaahi Cabdi iyo

5- Yuusuf Maxamuud Caynaashe

29/08/06 magaalada Qabridaharre waxay ciidammada guaysigu ku boobeen farmashi uu lahaa nin dhakhtar ah oo lagu magacaabo C/naasir Axmed Gamaadiid.

Gabdho ay ciidammada gumaysigu kufsadeen.

Ciidammada gumaysiga Itoobiya ee ka hawlgala dalka Ogaadeenya ayaa kufsiga dumarka iyo ragga u isticmaala qayb ka mid ah cadaadiska iyo ciqaabta ay u gaystaan dadwaynaha rayadka ah ee Ogaadeenya.

Markii ay taariikhdu ahayd 01/09/06 waxay ciidammada gumaysigu magaalada Garigo’an ku kufsadeen gabadh yar oo lagu magacaabo Farad Cabdi Cismaan, taasoo ay hadda xaaladdeeda caafimaad aad u liidato.

Markii ay ciidammada gumaysigu kufsadeen gabadhan yar waxaa kacdoon sameeyay dadwaynaha ku dhaqan magaalada Garigo’an, kuwaasoo taliska ciidammada gumaysiga ka dalbay in hortooda lagu toogto raggii ka denbeeyay kufsiga gabadha yar loo gaystay, hase yeeshee waxba lagama garawsanin.

30/08/06 waxay sidoo kale ciidammada gumaysigu gabadh ku kufsadeen Ceelka Bullaale, hase yeeshee nin ay gabadhaas walaalo yihiin ayaa Toorri ku dilay mid ka mid raggii gabadha kufsaday ee ciidammada gumaysiga ka tirsanaa.

Bayaan uu Hooggaanka Gaashaandhigga ee JWXO soo saaray.

Hooggaanka Gaashaandhigga ee Jabhadda Waddaniga Xoreynta Ogaadeenya JWXO ayaa isniintii soo saaray bayaan uu ugu digayo dadka cadowga la shaqeeya ee dhibaatooyinka kala duwan soo gaadhsiiya qadiyada iyo dadwaynaha Ogaadeenya. Bayaankaasi wuxuu sidatan;

Ka dib markii la ogaaday in Dabaqoodhiga, maamul ku-sheegga, iyo Boolisku inay si toos ah iyo si dedbanba uga qayb qaataan dhibaatooyinka shacabka loo gaysto, sida dilka, xidhayga, kufsiga, dhaca iyo jidhdilkaba;

Ka dib markii la ogaaday dhibaatada ay halganka ku hayaan, waxaa digniin lagu siinayaa in ciddii dadkaas kor ku magacaaban ah ee seddex bilood gudohood isugu soo dhiibi wayda ciidammada xreynta Ogaadeenya inay la kulmi doonto ciqaab adag.

Dhinaca kale waxaa dadwaynaha Ogaadeenya laga codsanayaa inay soo sheegaan gacan ku-dhiglayaashaas oo ayna marna qarinin, iyadoo shacabku ogyahay naxariis la’aantooda iyo gacmaha dhiiga leh ee ay shacabka kula dhex jiraan.

Midda kale waxaa ciidammada gumaysiga ee Ogaadeenya ku sugan la ogaysiinayaa inay fursad u haystaan inay isu soo dhiibaan ciidammada xoreynta Ogaadeenya, oo u ballanqaadaya inay nabadgelinayaan, isla markaana u gudbinayaan meelaha ay codsadaan.

Shirkii Khartuum oo is-fahan ku dhammaaday

Shir muddo seddex malmood ah uga socday magaalada Khartuum ee dalka Suudaan dawlada ku meelgaadhka ah ee Soomaaliya iyo maxkamadaha islaamiga ayaa isniintii ku soo dhammaaday is-fahan laga muujiyay qodobo dhawr ah oo markii hore lagu kala tagsanaa.

Labada dhinac waxay isla gaadheen qodobo dhawr ah oon wax badan ka duwanayn kuwii ay markii hore ku heshiiyeen, waxaana qodobadaas ka mid ah;

In la tixgaliyo rabitaanka shacabka, in la dhowro midnimada ummadda soomaaliyeed, in sidooda loo tixgeaiyo heshiiskii ay labada dhinac isla gaadheen bishii Juun 22keedii 2006, inaan taageero loo fidinin hooggaamiye kooxeedyadii Muqdisho lagaga adkaday iyo in dalalka Soomaaliya la dariska ahi ayna xuduudeda ku soo xadgudbin.

Waxaa kaloo intaas dheer qodobo ay labada dhinac dib ugula noqden masuuliyiintooda sarsare, waxaana la sheegayaa in waftiga maxkamaduhu uu madaxdiisii dib ugula laabtay arrimo ay ka mid yihiin wax ka beddalka dastuurka iyo awood qeybsiga, halka waftiga dawladuna uu la noqday qodobada kala ah ka laabashada go'aankii Baarlamaanka ee ahaa in dalka la keeno ciidammo shisheeye ah iyo in dalka laga saaro ciidammada shisheeye ee hadda jooga.

Labada dhinac waxay sidoo kale ku heshiiyeen in la isugu yimaado shir kale oo lagu sii lafaguro heshiiska qabyada ah ee labada dhinac u dhexeeya. Ø

Unugta iyo ururka dhalinyarada Ogadenya ee Canada oo shir iyo xaflad ku qabatay Toronto.

Maalintii Sabtida ee ay taarikhdu ahayd Sept. 02. 2006 waxaa magaalada Toronto ee Canada ka dhacay sanadguuradii 22aad ee Jabhada Wadaniga Xoraynta Ogaadeenya lagu xusayay. Shirkan oo ay si wada jir ah u soo qabanqaabiyeen Unuga JWXO ee Canada iyo ururka dhalinyarada Ogaadeenya ee marka magaciisa la soo gabiyo loo yaqaano OYA ayaa waxaa ka soo qaybgalay dhamaan qaybaha ay dadwaynhuhu ka koobanyihiin.Shirka waxaa goobjoog ka ahaa Mudane Abdiraxman Yusuf (Abdirahman Dheere) oo ka soo labatay shirwaynihii Jaaliyaadka Ogaadeenya ee ka dhacay Denmark.

Waxaa sidoo kale goobjoog ka ahaa ku xigeenka hogaanka arrimaha dibada iyo jaaliyadaha Mudane Maxamed Macalin oo isna ka soo laabtay wadankii laba maalimood uun ka hor shirka, iyo Gudoomyaha unuga JWXO Maxamed Qamaan Tube iyo waliba iskuduwaha guud ee ururka dhalinyarada Ogaadeenya Maxamed Cali (Ordaaye). Dadwaynihii isugu yimid Hallka u shirku ka dhacay ayay ka muuqatay wajiyadoodu farxad kadib markay dhagaysteen warbxin ay aad u sugayayn oo ah xalada uu dalka Ogaadeenya ku suganyahay iyo dar darta cusub ee uu halganka Ogaadeenya galay.

Gabagabadiina waxaa shahadooyin sharaf la gudoonsiiyay dadka kaalinta 1kobaad iska soo tagay tagerida xalganka Ogaadeeny ee ku nool Canada kadibna waxaa su'aalo loo furay dadwaynhii oo mid-mid loogu jawaabay wixii su'aalo ah ee ay hayeen. isku soo wada duduboo shirku wuxuu ku dhamaaday guul, farxad iyo duco alle looga baryayay in guumasiga kaga qaado ummada Ogaadeenya.

05 September 2006.

Axmed Gaal-Eri

Info@radioxoriyo.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 25 MB ee dhererkeedu yahay 11865 KHZ,iyo internetka Radioxoriyo.com,Ogaden.com Maalmaha Talaadada iyo Jimcaha 7: 30PM waqtiga Afrikada Bari

Qodobadii ka soo Baxay Shirkii Khartuum..
»Markab u raran WFP oo 11-sano kaddib ku soo xirtay…
»Madaxweynahe Cabdulaahi Yuusuf oo gaaray Nayroobi
»Warbixin dheeraad ah oo ku saabsan dagaalkii ka dhacay..
»Bannaanbaxyo maanta ka kala dhacaya Muqdisho..
»Sheekh Shariif oo dib u soo laabtay isagoo ka hor yimid in..
»Xarunta Ismaaciil Jicmaale oo welwel ka..
»Xulka Qaranka Soomaaliya oo shalay u Ambabaxay ..
»Hay’adda SCAC, Siminaar ku saabsan Aidska u soo..
»Guddoomiye Xigeenkii 1aad Hantidhawrka PL oo Geeriyoodey
Wararka oo dhan ka akhri halkan... Sept 5