SomaliTalk

Eritrea oo ka Digtey Xaaladda Cakiran ee Soomaaliya

Isaias Afewerki | Sawirka: Aljazeera

Jan 19, 2007: Madaxweynaha dalka Eritrea ayaa ka digey isku dayga in ciidamo Afrikaan ah loo diro Soomaaliiya ay noqon karaan kuwo ku dambeeya guul darro.

Waraysi gaar ah oo uu la yeeshay Al Jazeera, waxa uu madaxweyne Isaias Afewerki yiri: weli lama arkin dhammaadkii Maxkamadaha Islaamiga ah.

Afewerki hadalkiisu waxa uu ku soo beegmay xilli sarkaal sare oo ka socda Qaramada Midoobey [Francois Fall] uu Muqdisho maalintii Khamiistii uu wadahadal kula lahaa Madaxweyne Cabdullaahi Yuusuf oo ay kawada hadleen sidii dalka loo geyn lahaa ciidamdo Afrikaan ah.

Waraysiga Al-Jazeera oo telefishanka ka baxay Khamiistii, Madaxweyne Afewerki waxa uu sheegay in Itoobiya ay ka qayb qaadatay dagaal aan meelna u socon ama cakiran. Waxa kale oo uu yiri "Maxkamadaha Islaamiga ah lama jebin, Soomaalida weligeed lama jebin. Dadkii rabey in ay qorshadooda gaarka ah usoo galaan Soomaaliya ayaa naftooda dhex geeyey baylah halis ah." Waxana uu intaas kudaray "Tani waa arrin cakiran oo waqtiga oo sheegi doono cidda laga guulaystey."

Madaxweyne Afewerki waxa uu dhaliilay awooda wax qaban karta ee Midowga Afrika. Waxana uu yiri: "Waxaan marka hore rabna in aan ogaano hawsh aloo xilsaaray ciidanka Afrikaanka", waxana uu Midowga Afrikaanka ku tilmaamay mid gabay qaybo ka mid ah Qaarada Afrika.

Dhanka kale, Mr. Francois Fall oo ah wakiilka QM oo waxa uu DFKMG ugu baaqay in ay ka shaqeeyaan dib u heshiisiinta, waxana uu sheegay ciidamada Afrikaanka ee nabad ilaalintu "in ay yihiin fursadii ugu wanaagsanad ee nabadda Soomaaliya soo marta 16kii sano ee ugu dambeeyey", waana in aan taas la khasaarin ayuu yiri.

Waxa kale oo arrimaha Soomaaliya ka hadlay Dr. Ken Menkhaus oo macallin ka ah jaamacadda North Carolina. Qoraal kusoo baxay jariidada Guardian (16/1/2007) oo uu Soomaaliya kaga hadlay waxa uu Dr. Menkhaus yiri: Marka la eego xaaladaha ka jira Soomaaliya, ma adka in la saadaaliyo arrimuhu sida ay noqon karaan Soomaaliya: Itoobiya qaar ka mid ah ciidankeeda ayey kala bixi doontaa, mana bedeli doonaan ciidaamo tiro ahaan ku filan oo nabad ilaalin ah oo ka socda Midowga Afrika; DFKMG madaxdoodu ma awoodi doonaan in ay xakumaan Muqdisho, waxaa soo wajahi doona koror iska caabin ah, waxayna si degdeg ah ugu laaban doonaan dhanka baadiyaha; waxaana Soomaaliya soo wajahi doona xaalad siyaasadeed oo kala qaybsan.....[eeg www.guardian.co.uk].

November 27, 2001 ayey ahayd markii Ken Menkhaus, oo professor sare ka ah kulliyada Davidson College, kuna takhasusay Soomaaliya oo kahadlaayey in aan arrimaha Soomaaliya laga dhegeysan Itoobiya, waxa uu yiri: "Waa in aynaan kuxiraan in aan akhbaarta keliya ka qaadano Itoobiya kuwaas oo inkasta oo ay saaxiibadeen yihiin haddana waxay wataan qorshe iyaga u gaara oo aan caddayn, waxayna kabadbadiyaan khatarta."

Dhanka kale magaalada Rooma ee Dalka Talyaaniga waxay hay'adda Reuters waraysi kula yeelatay Shariif Xasan Sheikh Aadan, oo sheegay in ay Soomaaliy aka muuqato xaalada keli talisnimo, oo ay diyaar yihiin arrimihii kelitaliska. Shariif Xasan waxa uu hore ugu gacan sayray xil ka qaadistii baarlamaanka.. Halkan ka dhegeyso.

Intaas kadib si aan wax uga Ogaado Fekerka ay bulsho weynta soomaaliyeed ,gaar ahaan kuwa reer muqdisho Ugu muuqato Ridista shariif xasan sheikh aadan ayaan waxaan ka waraystay waxgarad waayo soo joogay iyo Qaar ka tirsan Bulsho weynta kala duwan ee ku nool magaalada muqdisho .

Waxaan ugu horaynba Hadalka ii bilaabay xuseen raage oo kamida Duqowda waayo araga ah ee soo joogay dowladihii dalka soo maray iyo waqtigii gumaysigaba waxuuna hadalkiisa ku cabiray sida wadanku maanta yahay iyo sida xaalku noqon karo hadii xilka laga qaaday shariif xasan sheikh aadan.

''Ilaah ayaa Mahad leh ,waxaana anigu la amakaag sanahay oo marnaba iga degi la, horta yaa wadanka iska leh yaase u maqan ? waa su,aasha aan keligay is waydiiyo waayo waxaa haboon in dalka iyo dadku ay had iyo jeer taageeraan ninka dalkiisa iyo dadkiisa wax u qaban kara ,waxna ka dhigi kara ,waxay ila tahay shariif xasan sheikh aadan taariikhda ayaa qori doonta ,anigase waxuu iila muuqday nin diidanaa ciidamada Ethiopia islamarkaana ay taasi keentay maxaad u diiday ,waxaa keliya oo shariifka laga raacay sida muuqata waa intaas ,hadaba miyasan idiin muuqan sida wax u jiraan wadankan soomaaliya marba heer ayuu taagnaa maantana waxaa taariikhda iigu yaabka badan ay tahay Taangiga Ethiopiya oo dhex Gurguuranaya Magaalada muqdisho.

Sidoo kale waxaa isna fekerka ku aadan mawduucan ridista shariif xasan sheikh aadan ka hadlaya sulayman cabdi oo ku magac dheer (Ciiro) oo ah arday wax ka dhigta jaamacada muqdisho ''waxaan isleeyahay waxuu is bedel ku yimid siyaasadiisa islamarkaana waxay xaga fekerka ku kala duwanadeen masuuliyiinta sarsare ee dowlada taasina markii ay xukumada Ethiopia usoo tafa xaydatay inay dalka dhexdiisa keento kumanaan ciidamo ah islamarkaana welibana ay Gobol gobol ula heshiisay qaarna ay ula dagaalantay taas oo ah kala qaybi oo xukun mase noqon karto oo xiligan waxaan ku jirnaa xili dadku wax kala arkaan marka anigu waxaan shariif xasan sheikh aadan oran lahaa lama ridin ee waxaa usoo hoyatay taariikh ah baal dahab ah waayo xiligan lagu jiro oo ah xili siyasiyiintii soomaaliyeed ay u kala baxeen taageere Ethiopia iyo muwaadin soomaaliya hadii uu taageeray dhankii toosnaa waa baal dahab ah ayaa la oran karaa ''.

Sikastaba ha ahatee dadka badankiisa ayaa ku tilmaamay ridistii shariif xasan sheikh aadan mid aan xiligan meesha ku jirin islamarkaana aan waafaqsanayn weliba sharciga oo ah xiligan dalka soomaaliya oo ku jira xaalad degdega ah .

yaasiin maxamed cali (faytin)
yaasiin06@hotmail.com

Amar dil ah oo lagu soo rogay ciddii lagu arko iyadoo ku dhex wadata degmada Afgooye

garoonka

Jan 18, 2007: Maamulka Degmada Afgooye oo soo saaray wareegto ayaa sheegay in maanta wixii ka dambeeya ruuxii lagu arko isagoo hub la dhex maraya degmada Afgooye la toogan doono.

Maamulka oo kulan deg-deg ah qaatay kaddib markii kooxo hubeysan ay maanta ishortaageen howlo canshuur ururin ah oo uu ka waday maamulka Degmadaas suuqyada degmada Afgooye ayaa waxaa ka soo baxay wareegtadaan.

Wareegtada ayaa waxaa lagu sheegay in maanta 4:00 galabnimo xilliga Soomaaliya cidii lagu arko inay hub ku dhex wadato gudaha Soomaaliya la dili doono, waxaana lagu muujiyay wareegtada in la dilo doono cid walba oo hub wadata, laguna amray sidaas ciidammada Ammaanka ee degmada Afgooye.

Arrintaan ayaa waxaa si weyn u soo dhaweeyay shacabka Degmada Afgooye oo sheegay inay wanaagsan tahay in cid walba oo hub wadata isla markaana khatar ku ah ammaanka guud ee degmada Afgooye la toogto, waxaana tani ay qayb muhiim ah ka noqonaysaa howlaha ay wadaan maamulka cusub ee dhawaan Dowladda Federaalka Soomaaliya ay u magacowday Degmada Afgooye.

Maanta ayaa dadweynaha degmada Afgooye waxay ku wareejiyeen gaari noociisu yahay Landcruiser-ka ah oo ay ugu deeqeen dadweynaha degmadaas ku nool, waxaana deeqdaan ay noqonaysaa middii ugu horreysay oo ay shacabka degmadaas guddoonsiiyaan maamul ka howlgala degmadaas.

Maxamuud Axmed Xasan ( Xuurshe)
Email: xuurshe114@hotmail.com

Kulan looga hadlayo arrimaha Soomaaliya oo berri ka furmaya Addis Ababa

Jan 18, 2007: Waxaa lagu wadaa in lagu qabto xarunta Midowga Afrika ee Addis Ababa berri kulan looga hadlayo arrimaha Soomaaliya, kulankaasoo ah mid qabanqaabadiisa ay socotay maalmihii ugu dambeeyay.

Kulankaan oo ay ka soo qaybgeli doonaan madax ka socota ururrada dunida qaarkood ayaa waxaa diiradda lagu saari doonaa xaaladda ka jirta Soomaaliya iyo sidii dunida ay ciidammo ku keeni lahaayeen gudaha Soomaaliya, gaar ahaan dalalka Afrikaanka ah.

Wararka ka soo baxaya xarunta Midowga Afrika oo uu kulankaas ka dhacayo berri ayaa waxay sheegayaan in lagu wado in Ergayga gaarka ah ee QM u qaabilsan Arrimaha Soomaaliya Danjire Fall uu hadal dheer oo ku saabsan xaaladda Soomaaliya ka jeediyo halkaas, waxaana sidoo kale hadalkiisa ka mid noqon doona qaabka ay qarammada midoobay u doonayso in lagu geeyo ciidammo nabad ilaalin ah gudaha Soomaaliya.

Kulankaan ayaa noqon doona mid si cad loogu qeexo sida wararka ku dhowdhow ay sheegayaan arrimaha guud ee Soomaaliya iyo sidii dunidu ay gacan ballaaran uga geysan lahayd howlaha ay dowladda federaalka Soomaaliya ka waddo gudaha Soomaaliya oo ah mid lagu doonayo in lagu dardargeliyo nabad ka curata gudaha Soomaaliya 16-sano kaddib.

Maxamuud Axmed Xasan ( Xuurshe)
Email: xuurshe114@hotmail.com

Wararkii: Jan 18, 2007

Ciidamada Xukuumada Ethiopia oo Faaruqiyey Dekeda iyo Airport magaalada Muqdisho
Cali daacuun: Hadii hadhuubku buuxsamo Lagama celin karo inuu daato.
Gudoomiyaha Baarlamaanka DFKMG oo Ku gacan Sayray Xil ka Qaadistii....
Kulan Lagu Aasaayey Guddiga Xidhiidhka Saaxiibtinnimo Ee Suuriya Iyo Soomaaliya Oo Ka Dhacay Magaalada Dimishiq.
[Clan Divisions Threaten Somalia Government] - VOA
ama Dhegeyso [Warbixintii Ryu ee VOA]

Ergeyga QM Ugu Qaybsan Arimaha Somalia Mr. Francois Fall Oo Maanta Soo Gaaray Magaalada Muqdisho Ayaa kulamo Kala Gooni Gooni ah La yeeshay Madaxweyne c/laahi yuusuf iyo Qeybaha kala duwan ee bulshada Rayidka ah.

Jan 18, 2007: Waxaa maanta soo gaaray magaalada muqdisho ee xarunta dalka soomaaliya ergayga qaramada midoobay ugu qaybasan arimaha soomaaliya Francois Fall isagoo kulamo kala gooni gooni ah la yeeshay madaxaweyne c/laahi yuusuf iyo ururada kala duwan ee bulshada rayidka ah .

Mr. Fall ayaa kulan saacado qaatey la yeeshay Madaxweynaha DFKMG Somalia C/laahi Yuusuf Axmed oo ay isla soo qaadeen arimo dhowr ah oo ku aadan sidii nabad loogu soo dabaali lahaa dalka soomaaliya ,islamarkaana dardar galin loo gelinj lahaa nabada iyo xasiloonida dalka soomaaliya iyo keenista ciidamada nabad ilaalineed ee la keenayo Somaliya, sida ay suurta gal u tahay in dowladda Somaliya in xubno muuqda laga siiyo qeybaha kala duwan ee bulshada iyo arimo kale oo ku aadan xilka qaadistii shalay lagu sameeyay Gudoomiyihii Baarlamanka Somaliya Shariif Xasan Sheekh Aadan oo uu ku tilmaamay mid lagu degdegay .

Mr .fall ayaa sidoo kale soo hadal qaaday in ciidamada Ethiopia inaysan suurto gal aheyn in ay sii joogaan gudaha Somaliya balse ay ka baxayaan dalka marka ay yimaadaan ciidamada Afrikaanka ah oo lagau wado inay soo gaaraan dalka .

Mr. Fall ayaa wax laga xumaado ku tilmaamay xariggii dhowaan loo gaystay idaacadaha qaarkood ee magaalada Muqdisho, isagoo sheegay in arinkaasi uu cambaareeynayo, waxa uuna saxaafadda kula dardaarmay in ay ilaaliyaan qawaaniinta shuruucda saxaafadda ayna ka qeyb qaataan dib u dhiska dalka, iyo nabad soo celinta dlka Soomaaliya.

Mar uu ka hadlayay hay'adaha samafalka ee Q.M ayaa waxa uu sheegay in hay'adaha samafalka ee ku sugan magaalada Nairobi ay dhamaan tood u soo guurayaan caasimadda Somaliya sida ugu dhaqsiyaha badan, mana jirto sabab hadda ay ugu sii nagaadaan Nairobi, taasina ay soo dedejin karto imaatinkooda hadii aa nabada xoojisaan .

Mr. Fall ayaa waxa uu sheegay in ciidamo caalami ah oo ka socda Q.M ay imaan doonaan gudaha dalka Somaliya, kuwaasi oo ka qeyb qadanaya xasilinta iyo amaanka ku soo celinta dalka soomaaliya .

Dhanka kale Ergeyga Q.M ugu qeybsan arimaha Somaliya ayaa kulanka Madaxweynaha ka dib waxa uu Hotel Pradise kula kulmay Qeybaha bulshada rayidka oo uu kala hadlay ka qeyb qaadashada geedi socodka nabadda Somaliya isagoo qaybaha kala duwan ee buslhada ku booriyey inay si wadajir u qabtaan soo celintii kala damabayntii iyo nabadii dalka soomaaliya isalamarkaana ay muujiyaan dadaalo dheeri ah oo ay uga qeyb qaadanayaan nabada .

Yaasiin maxamed cali (faytin)
Yaasiin2006@hotmail.com

:: Faallo: Cabdullaahi Yuusuf oo Laga Sugayo 24 saacadood Gudahood in uu ku Jawaabo... Akhri..

Maraykanka oo Cambaareeyey Xil Kaqaadistii Guddoomiyaha Baarlamaanka DFKMG....

Dublomaasi sare oo Maraykan ah ayaa cambaareeyey cod bixintii baarlamanka Kumeelgaarka ah ee Soomaaliya uu xilka uga qaaday guddoomiyaha baarlamaanka Shariif Xasan Sheikh Aaden. Caawiyaha xoghayaha Arrimaha dibada ee Maraykanka u qaabilsan arimaha afrika, Jendayi Frazer, waxay tiri arrintani waxay dhaawac ku tahay isku dayga in si nabad gelyo ah lagu xalliyo kala tafaraaruqa dalka dagaalku halakeeyey. Sidaas waxaa warka ku bilaabay Raadiyaha Maraykanka ee VOA.

Jendayi Frazer

VOA waxa uu intaas ku daray: Baarlamaanka Kumeelgaarka ah ee Soomaaliya oo ku shiray Baydhabo waxa uu si aqlabiyad ah ugu codeeyey in xulka laga qaado Shariif Xasan. Shariif Xasan waxa uu sannadkii hore isku deyey in heshiis nabad gelyo ay wada gaaraan DFKMG iyo Dhaqdhaqaaqa Islaamiga ah ee dalka, oo markaas xukumey casimada Muqdisho.

Ciidamda Itoobiya ayaa bishii hore waxay galeen Soomaaliya iyagoo gacan siinaya DFKMG, kuwaas oo Muqdisho iyo in badan oo dalka ah ka saaray dagaalyahainiintii Islaamiyiinta ahaa, waa sida warka VOA u dhigay'e. Ilaa xilligaas saraakiisha Maraykanku waxay ugu baaqayeen madaxda dawladda Soomaaliya in ay la xiriiraan kooxda Soomaaliya ee la jebiyey si la isugu dayo in la dhamaystiro colaada 16ka sano ah.

Caawiyaha xoghayaha Arrimaha dibada ee Maraykanka u qaabilsan arimaha afrika, Jendayi Frazer, waxay tiri go'aanka xilka looga qaaday afhayeenka barlamaanku waxay dhaawacaysaa isku daygii dib u heshiinta garabyada Soomaaliya.

"Calaamadda ah in madaxweynaha iyo ra'iisul wasaaruhu ay taageereen in meesha laga saaro isaga (shariif Xasan) waa mid ka soo hor jeeda dareenka dib u heshiisiinta," ayey tiri, waxayna intaas ku dartay "Sidaas daraadeed waxaan kula talineynaa dawladda, ka taageerayaal ahaan dawladda, in ay muujiyaan wax taas ka duwan." Waxaana VOA intaas ku daray in taas oo jirta in Maraykanku sii wadayo taageeradiisa DFKMG.

Frazer waxay hadalkaas ka jeedisey gole looga hadlayey arrimaha Soomaaliya oo ah xarunta Istaraatiijyada ito daraasada Caalamiga ah ee Washington.

Dhanka kale VOA waxa uu warbixin dheer ka bixiyey xaaladda guud ee Soomaaliya. Raadiyaha oo arrintaas ka hadlaya waxa uu yiri: Dalka Soomaaliya, dhaqdhaqaaqii dalka mar xoogga weynaa ee Islaamiga ahaa jabkiisii waxa uu culays aad u xoog weyn dusha ka saaray dawlada secular-ka (cilmaaniga) ah ee ay qaramada Midoobey aqoonsan tahay si ay u hesho taageerada shacabka, una dejiso dalka. Dhegeyso [Warbixintii Ryu report ] ama Akhri [Clan Divisions Threaten Somalia Government].

Kufsigii ay Ciidanka Itoobiya u Geysanayeen gabdhaha Soomaaliyeed oo sii socda...

Dhanka kale Hay'adaha reer Galbeedka ee ku sugan Bariga Kenya ayaa waxaa wararku sheegeen in ay soo gaarayaan warar isasoo taraya oo tibaaxaya kufsi ay Ciidamada Xabashida ee soo galay Soomaaliya u geysteen gabdho Soomaaliyeed. Mid ka mid ah warbixinadaasi waxay sheegtay in dad soo gaarey Dhoobley ay sheegeen in Ciidamada Itoobiya ay kufsi u geysteen gabdho Soomaaliyeed. Waxaana warbixintu sheegtay in nacaybka u dhexeeya labada dal ee Soomaaliya iyo Itoobiy auusan ahayn mid qarsoon.

Ilaa hadda wax war ah oo arrintaas ku saabsan lagama maqal DFKMG, in kasta oo Dadka Soomaaliyeed ay rumaysan yihiin in arrintaan adduunka oo dhammi ka hadlayo aysan madaxda DFKMG ahi ka hadli doonin.

Toddobaadkii hore ayey ahayd markii ay soo baxday warbixintii in shan ka tirsan ciidamada Itoobiya ay kufsadeen qof dumar ah oo Soomaaliyeed... EEG WARBIXINTII HORE

Ciidamada Xukuumada Ethiopia oo Faaruqiyey Dekeda iyo Airport magaalada Muqdisho

somali Waxaa maalintii Talaadadii ahayd uu Raysal wasaaraha xukuumada Ethiopiya Melez zanawi uu ku dhawaaqay in ciidamiisu ay kabaxayaan dalka Somaliya oo aysan sii joogayn isagoo sheegay in uu waqtigii loo qabtay ay ku ekayd oo kaliya Maalinta taladadii ah oo ku beegnayd maalintii Jan 16, 2007 isagoo intaa ku daray inay hada udiyaar garoobayaan sidii ay uga bixi lahaayeen guud ahaan dalka soomaaliya .

Raysal wasaaraha Xukuumada Ethiopiya ayaa waxa kale oo ay intaa ku dartay inaysan ciidamo Africanka ah aysan sugi doonin iyadoo loo malaynayo inay ku Hungoobeen oo maalmihii lasoo dhaafay uu culays kaga yimid caalamka islamarkaana xooga lagu saaray in lasoo dedejiyo sidii ay ciidamo African ah loo heli lahaa.

Ciidamada Ethiopiya ayaa habeenimadii Arbacadu soo geleysey faaruqiyey fariisimo dhowr ah oo ay ka deganaayeen magaalada muqdisho islamarkaana ku wareejiyey ciidamo soomaali ah , dekeda iyo airporka magaalada Muqdisho iyagoo isaga baxay saldhigyadaas waxana warar laga helayo isla goobahaasi ay sheegayaan in ciidamada Ethiopiyanka ah ee ka baxay meelahaasi inay tageen daafaha maagalada muqdisho sida siinka dheer ee wadada isku xirta afgooye iyo muqdisho iyo dhinaca xeradii hiilweyne.

ka bixitaanka ciidamada xukuumada Ethiopiya ee Garoonka iyo Dekeda ayaa kusoo beegmaya xili ay maamulka cusub ee gobolka banadiir ku dhawaaqeen in ay ciidamada Ethiopya iskaga baxaan gudaha magaalada muqdisho islamarkaana ay arintan oo aad ay usoo dhoweeyeen wax garadka ,aqoonyahanka ,xeeldheerayaasha siyaasadeed iyo bulshada inteeda kaleba.

yaasiin maxamed cali (faytin)
yaasiin2006@hotmail.com

Cali daacuun: Hadii hadhuubku buuxsamo Lagama celin karo inuu daato.

Siyaasiga soomaaliyeed ee cali maxamed axmed (cali daacuun) oo indhowaaleba hadafkiisa siyaasadeed ku cabirayey halista siyaasadeed ee dalka marayo iyo sida talo ahaan ay ula muuqataba iyo ismaandhaafka siyaasadeed ee ku kala dhex jira masuulyiinta ugu sar saraysa dowlada kmg ah ku cabairaya fekerkiisa ayaa ka yiri sidatan ;

''Hadii haruubku buuxsamo lagama celin karo inuu daato ,noolaha waxaa laga rabaa inuu cabiro weelka uu wax ku shubanayo ,si uu badbaado in siyaasadiisu dhulka ku daadato ,tusaale waxaan noqon kara dowladii lagu soo dhisay Jabuuti Gobolka carta waxay ku dheeliday khilaaf soo kala dhex galay madaxdii ugu sar saraysay Taasoo loo arkay wasiirkii koowaad Dr, cali khaliif galaydh hadii uu meesha ka baxo oo lagu guulaysto radistiisa inay dowladu shaqayan doonto lagana heli doono aqoonsi Ethiopia ,nasiib darro radistii cali khaliif waxay keentay in in TNG ay si fiican u burburto dhaxalkeediina in shirkii khartoum ay ka dhalato looma dhamayn shirkii jabuuti ee waa in shir cusub hada la abaabulaa oo laysugu yimaadaa dalka kenya ''.

Waxuu kaloo intaas ku daray ''sida ii hada muuqata hadii la rido gudoomiyaha baarlamaanka ,waxay noqon doontaa hal bacaad lagu lisay waxii lagu soo dhisay dalka kenya ,ma qabo in reer galbeedka iyo jaamacada carabtu inay ku farxi doonaan ridista hada la qabanqaabinayo ee ku salaysan gudoomiyaha baaralamaanka ''.

Cali daacuun ayaa intaas sii raaciyey '' waxaan talo ahaan usoo jeedin lahaa Madaxweynaha dowlada kmg soomaaliyeed inuu ka fiiro u yeesho shaqaaqada ka socota magaalada baydhabo ,wax kasta oo khilaaf soo kala dhex gala TFG da waa in lagu dhamayaa wada hadal ,hadiise ay noqoto awood ,waxii kasoo baxa waxba yaan layga siin''.

yaasiin maxamed cali (faytin)
yaasiin2006@hotmail.com

Gudoomiyaha Baarlamaanka DFKMG oo Ku gacan Sayray Xil ka Qaadistii....

Saacado intii aysan ka soo wareegin markii ay Baarlamaanka DFKMG ee Baydhabo u codeeyeen in xilka laga qaado guddoomiyaha Baarlamaanka Shariif Xasan, ayuu arrintaas ganafka ku dhiftay Shariif Xasan Sh. Aaden oo safar ku maraya dalal ka tirsan Qaarada Yurub.

"Baarlamanka Soomaaliya sida la ogyahay ma ahan xor go'aan gaari kara" ayuu yiri Shariif Xasan oo intaas raaciyey "waa mid lahaysto, baarlamanka ma ahan mid xil dhiibi kara ama qaadi kara".

Warkii xil ka qaadista hoos ka akhri...

Gudoomiyeha Baarlamaanka oo xilkii laga xayuubiyay....

Golaha baarlamaanka federaalka kmg-ka Soomaaliyeed ayaa daqiiqado ka hor xilkiisii ka qaadey gudoomiyihii golaha baarlamaanka federaalka Shariif xasan Sheekh Aaden.
Golaha Baarlamaanka oo kulan yeeshay ayaa cod u qaadey sidii laga yeeli lahaa gudoomiyeha golaha baarlamaanka oo la soo hordhigay baarlamaanka moshin ka dhan ah gudoomiyeha.

Maanta waxaa soo xaadiray kulanka baarlamaanka 192 xildhibaan oo 183 in kalsoonida kala laabteen gudoomiyaha baarlamaanka, halka 9-diideen, iyadoo Boqore uu sheegayin aysan jirin cid ka aamustay. AKHRI WARKA OO DHAN...

Kulan Lagu Aasaayey Guddiga Xidhiidhka Saaxiibtinnimo Ee Suuriya Iyo Soomaaliya Oo Ka Dhacay Magaalada Dimishiq.

Waxaa lagu qabtay magaalada Dimishiq kulan lagu aasaasayey guddi loogu magacdaray , gudiga xidhiidhka saaxiibtinnimada Suuriya iyo Soomaaliya, kulankan oo uu soo qabanqaabiyey safiirka Soomaaliya Mudane Maxmuud Muuse Tarey ayaa waxa loogu talo galay sidii loogu xoojin lahaa xidhiidhka labada dal ee Suuriya iyo Soomaaliya.

Waxaana ka soo qayb galay kulanka xubno hore uga ahaan jiraya safiiro Soomaaliya oo uu ka mid yahay safiirkii hore ee Suuriya u Fadhiyey Muqdisho, mudane Naciim Qaddaax , mudanayaal ka tirsan golaha shuurada ee dalka suuriya oo ay ka mid yihiin Cadnaan Dakhaakhina, Dr. Maxmed Al-Xabash, iyo Bahaa�addiin, iyo Xoghayaha Safaaradda Soomaaliya ee dalka Suuriya Mudane C/raxmaan C/qaadir Shiikh Maxmuud.

Sida la sheegay gudigani waxa ay ka shaqayn doontaa sidii kor loogu qaadi lahaa xidhiidhka ka dhexeeya labada dal,iyo sidii dhinaca ganacsiga, waxbaradhada iyo iskaashiga siyaasadeed loo xoojin lahaa.

Waxaa iyana laysla soo qaaday sidii looga wada shaqayn lahaa ilaalinta qarannimada ummadda carbeed iyada oo laga shiidaal qaadanayo heshiisyadii hore ay wadamada carbeed u gaadheen.

Waxayna sheegeen labada dhinac in arrimahan lagu fulinayo iyada oo loo marayo in la qabto wacyi galin loo qabanyo shacabka laba wadan.

Safiirka Soomaaliya u fadhiya dalka Suuriya Maxmuud Muuse Taray ayaa isaga oo saxaafadda u warama sheegay in ay tahay gudigani tii ugu horaysay ee laba wadan oo carbeed dalka Suuriya iskula afgartaan in ay talaabadan wada qaataan.

Asad Caddaani Ibraahim
Dimishiq Suuriya.
asadlaska@hotmail.com

Faafin: Jan 18, 2007

Gudoomiyeha Baarlamaanka oo xilkii laga xayuubiyay...
Golaha baarlamaanka federaalka kmg-ka Soomaaliyeed ayaa maanta xilkiisii ka qaadey gudoomiyihii golaha baarlamaanka Shariif xasan Sheekh Aaden, waxaana magaalada Baydhabo ee cod ku... Akhri.... 17/1

WAR MURTIYEED: Jaaliyadda Reer Xaaji Suleymaan ee Yurub & Waqooyiga Ameerika waxay soo saareen Akhri... 17/1

SomaliGalbeed: Dagaallo ciidammada gumaysiga lagu naafeeyay.
iyo Dadwayne uu cadowgu ku xidhxidhay meelo kala duwan.... Xorriyo 16/1

Shariif Xasan Sheekh Aadan "Maanta maalin ka xun ma soo marin Soomaaliya"
Guddoomiyaha Baarlamaanka DFKMG iyo wafdi uu hoggaaminayo booqday Belgium ayaa Akhri.. 16/1