"DGPL oo Garan la' Cidda Leh Garoonka Diyaaradaha ee Garoowe...?"

• Faalladii SomaliTalk.com | May 14, 2007

  ---

"Lacagta Garoonka Garoowe haloo Dhiibo Isimada, Laakiin Lacagta Garoonka Boosaaso Dawladdu ha maamusho!!?"

Isniin ah (May 14, 2007)- Qaar kamid ah xubnaha sare ee DGPL ayaa waxay u yeereen Issimada Nugaal, waxayna ku wareejiyeen lacag dhan $140,000 oo doolar, lacagtaas oo lagu sheegay in ay bixisay shirkadda Range Resources, taas oo la sheegay in loogu talo galay in lagu dhiso Garoonka Diyaaradaha ee Caasimadda Dawlad Goboleedka Puntland ee Garoowe.

Puntland iyo Batroolka: Waxqabad Rasmi ah mise Maaweelo... Akhri...

Goobta lacagtaas lagu wareejinayey oo ahayd xarunta madaxtooyada DGPL ee Garoowe waxaa goob joog ka ahaa Madaxweyne ku xigeenka DGPL, Xassan Daahir "Af-qurac" , Wasiirka Maaliyadda, Maxamed Cali Yuusuf "Gaagaab" iyo Wasiirka Warfaafinta, C/raxmaan Maxamed "Bankax".

Wasiirka Maaliyadda DGPL, Gaagaab, oo meesha lacagtaas lagu wareejinayey ka hadlay waxa uu sheegay in lacagta ay bixisay shirkadda Range Resources ay ahayd $150,000, laakiin xawaalado iyo meelo kale oo ay lacagtaasi soo martay darteed ay go’day lacag dhan $10,000.

Waxaa xusid mudan in Shirkadda Range Resources ay hore u sheegtay in ay dhismaha Garoonka Garoowe sannadkii 2006 siisay lacag dhan $313,000, ilaa hadda lacagtaas DGPL ma caddayn meesha ay martay, aan ka ahany $95,000 oo la sheegay in Issimada DGPL lagu wareejiyey mar sii horeysey.

Madaxda sare ee DGPL ma cadayn in lacagta cusub ee ($150-kun) ay qayb ka tahay lacagtii ay Range sheegtay in ay garoonka ugu deeqday sannadkii hore ee 2006 ($313,000), haddiise ay qayb ka tahay lacagtaas hore weli maamulku jawaab kama bixin sababta ay xilligii ku haboonaa ee shirkaddu bixisay loogu hawl gelin waayey dhismaha garoonka. Haddii lacagtani ay tahay mid hor leh oo ay sannadkan 2007 ku deeqday shirkaddu, su'aashu waxay tahay xaggee martay tii hore? ($313,000 - 95,000 = 218,000.) - Jawaabta waxaa suurta gal ah in laga arko xisaab xirka lixda bilood ee shirkaddu marka ay sannadkan bartamihiisa u dirto suuqa ganacsiga.

Oday Soomaaliyeed oo reer Puntland ah oo SomaliTalk.com la soo xiriiray markii uu maqlay in lacagtaas ay DGPL ku wareejisey Issimada ayaa yiri: "Waa aragtaan in shirkaddi Mafiyada ahayd (ama jirrida sida Cadde Muuse hore u sheegay) ee Range in la sheegay in laga qaaday lacag dhan $140-kun oo weliba lagu wareejiyay beel ka mid ah beelaha dega Puntland, iyadoo lagu sheegaayo in lacagtaas Garoon diyaradeed lagu dhisayo, halkii ay Dawladdu ka maarayn lahayd lacagtaas. Haddaba; su'aasha taagani waxay tahay haddiiba la dhiso garoonka ma beel baa leh mase ummadda Soomaaliyeed oo dhan, haddii shacabku leeyahay maxay dawladdu ugu riixeysaa isimada, mase waa raad gadasho siyaasadeed."

Waxana uu odaygaas Soomaaliyeed intaas raaciyey "Madaxda Puntland marka ay ka hadlaayaan Dhismaha Garoonka Diyaaradaha ee Boosaaso waxay uga hadlaan qaab dawladeed, sida in ay yiraahdaan garoonka oo lagu kharash garaynayo lacag caddaadkaas ah ama in garoonka ay hawshiisu habsami u socoto iwm, laakiin lagama maqlo lacagtaan ayaan ku wareejineynaa Isimada Boosaaso ee haloo yeero saxaafada si ay sawir uga qaadaan lacagta Garoonka Boosaaso oo loo dhiibayo isimada Bari, taasi ma dhicin. Haddaba su'aashaas waxaa ku haboon in la weydiiyo xukuumadda, shacabkuna waa in ay arrintaas ka hadlaan."

"DGPL miyeysan Garoowe u aqoonsanayn caasimada Dawlad Goboleedka Puntland, caasimada oo ah meesha u dhexeysa dhammaan shacabka Puntland iyo shacabka Soomaliyeed ee imanaya Garoowe. Waa loo baahan yahay in la dhiso garoonka Garoowe laakiin haddii ay xukuumadii fara kuhayntiisa iska fogeyneyso sidaas ma ku dhismi doonaa, mase waxay xukuumadu damacsan tahay in ay isimada Nugaal hadhow ku eedayso dhammaad la'aanta dhismaha garoonka Garoowe," Ayuu yiri. Waxan auu hadalkiisa kusoo xiray "Maxaa sabab u ah in la yiraahdo: Lacagta Garoonka Garoowe haloo Dhiibo Isimada, Laakiin Lacagta Garoonka Boosaaso Dawladdu ha maamusho!!. Taas ma la dhehi karaa DGPL waxay Garan la'dahay Cidda Leh Garoonka Diyaaradaha ee Garoowe...?"

Su'aasha kale ee marar badan la isweydiiyo ayaa ah: Warbaahinta ka hawl gasha gudaha Puntland si xor ah ma uga hadli karaan arrimaha dhabta ah ee Puntland, su'aalona ma u weydiin karaan madaxda sare ee DGPL? Jawaabtu waa maya. Caddayn waxaa u ah in warbaahinta laga dhegeysto Puntland, gaar ahaan magaalada ugu dadka badan ee Boosaaso in ay gacanta ku hayaan wasiirro ama wasiir ka tirsan xukuumada oo aan ogolayn in cid kale wax ka qorto ama ka hadasho Puntland. Waxaa taas u dheer in shacabka ku sugan Puntland in ay waadan dambe aad uga cabsadaan koox cusub oo loo bixiyey "Far-Fiiq" sidaas daraadeedna aan qof ku sugan Puntland fikirkiisa si xorta ah u cabiri karin.

Su'aal kale oo la isweydiiyey ayaa ah maxaa hadda uu khilaaf soo kala dhex galay Gaagaab iyo Cadde Muuse kusoo beegay in uu Gaagaab lacagtaan u dhiibo isimada Puntland [Arrintaas ka akhri qormada hoose]

Mase arrintani waxay qayb ka thay maaweelada DGPL ..AKHRI....

###

Dhismaha Garoonka Garowe iyo siyaasada Puntland
May 14, 2007 - Isha: Garoweonline

Waxaa maanta magaalada Garowe ka dhacdey xaflad lagu gudoonsiinayay Issimada gobolka Nugaal lacag la sheegey in shirkada Range Resources ugu talagashey dhismaha Garoonka diyaaradaha Garowe.

Lacagtaan oo cadadeedu aheyd $140,000 ayaa waxa ku wareejiyay Issimada Nugaal iyo guddiga dhismaha Garoonka Garowe wasiirka Maaliyada Maxamed Cali Yusuf (Gaagaab), Madaxweyne ku-xigeenka Puntland Xasan Daahir Afqurac iyo wasiirka warfaafinta Bankax.

Mr.Gagaab oo hadal ka jediyay xafladas ayaa tibaaxey in lacagtan ay bixisey shirkada Range Resources ay aheyd $150,000 balse waxa uu ku sheegey xawilaado iyo meelo kale ay soo martey ay $10,000 dhiman tahay.

Shirkada Range Resources oo heshiis muran dhaliyay horey ula sixixatey M.DGPL Cadde Muse ayaa warbixin ay soo saartay (Jan 31, 2007) waxay shaaca kaga qaaday in ay dhismaha Garoonka Diyaaradaha Garoowe ay sannadkii 2006 siisay lacag dhan $313,000 doolarka Maraykanka (USD), [oo u dhiganta 405,000 Australian Doolar].

Warbixintan oo loo gudbiyay suqa lacagaha Australia ayaa ka dhigeysa sharciyan in Cadde Muse iyo wasiirkiisa Maaliyada ay lacagtaan jeebkooda gashey taariikhda kor ku xusan.

Dhismaha Garoonka Garowe iyo siyaasada PL

Waxaa shaki weyn abuurtey sababta wasiirka Maaliyada DGPL uu maanta Issimada gobolka Nugal ugu warejiyay lacagta shirkadda Renge Resources ku bixisey dhismaha garoonka Garowe xilli xukuumada Puntland loo soo jeedinayo dhaliilo badan oo la xiriira maamul xumo iyo isdaba marin, isla markaana uu jiro khilaaf soo shacbaxey oo u dhexeeya Madaxweyne Cadde Muse iyo Mr.Gagaab.

Dadka siyaasada Puntland indha-indheeya ayaa ku tilmaamey sababta xilligaan loo baxshey lacagta dhismaha Garoonka Garowe dhowr arrimood oo kala ah; In wasiirka Maaliyada PL ugu gogol xaarayo imaanshaha Cadde Muse ee Garowe oo malmahaan ay ka soo yeeraysay qeylo dhaan ah in laga guurey caasimada; In wasiirka Maaliyada iyo saxiibadiis bixinta lagacantaan ay siyaasad ahaan isaga horkeenyaan Madaxweyne Cadde Muse iyo reer Nugaled oo xiriirkoodu horey u xumaa; In Gagaab ku raadinayo taageero siyaasdeed xilli uu jiro khilaaf isaga iyo Cadde Muse ah.

Hadaba in lacagta loogu talagaley dhismaha garoonka Garowe la baxsho ayaa ah talaabo horumar ah oo la qaadey balse waxaa su'aali ka taagan tahay waqtiga iyo ujeedada Gaagaab lacagtaan u baxshey xilli Madaxweyne Cadde Muse ku sugan yahay Bosaso.

Su'aashaan jawaabteeda ayaan waxa u dhaafeynaa waqtiga iyo akhristaaysha bogga Garowe Online.

Garowe Online,Garowe

SHIRKADDA RANGE RESOURCES OO LACAG UGU DEEQDAY GAROONKA GAROOWE.

Waxaa maanta May 14, 2007 ka dhacay xarunta madaxtooyada ee Garoowe, munaasubad ay M.Ku-Xigeenka DGPL, Xasan Daahir Maxamuud iyo Wasiirka Maaliyada DGPL. DR. Maxamed Cali Yusuf(Gaagaab) ku wareejinayeen lacag ay ugu deeqday shirkada Range Resources Garoonka loo dhisayo magaalada Garoowe. Xafladaan oo ay goob joog ka ahaayeen Isimada Gobolka Nugaal, ayaa waxaa lacagtaas lagu wareejiyey Islaan Ciise Islaan Maxamed uu uga mahad celiyey dhamaan maamulka iyo shirkada Range.

Lacagtaan oo dhamayd $140,000 (Boqol iyo Afartan kun oo Doolar) ayaa waxaa lagu kabayaa dhismaha garoon caalamiga ah ee loo dhisayo magaalada Garoowe. iyadoo lacagtaas uu Islaanku ku sii wareejin doono Guddiga Dhismaha garoonka Garoowe.

Shirkada Range ayaa horey ugu deeqday lacag dhan $95,000 Garoonka Garoowe.

Lacagta ay u balan qaaday Range garoonka Garoowe waxay dhan tahay $250,000, iyadoo ay shirkadu bixin doonto lacagta inteeda kale Phase ka 2-aad.

Garoonka Garoowe ayaa hada waxaa dhisme ku socdaa Run-weyga Wejiga-ka kowaad, iyadoo loo gudbi doono Terminal ka Wejiga 2-aad.

Dhanka kale waxaa isla xafladaas lagu wareejiyey Islaan Ciise Islaan Maxamed lacag dhan $40,000 oo loogu tala galay Shirkii Cagaare.

Maxamuud Cumar Bille | Garoowe | Email: mcbille@gmail.com

• Puntland iyo Batroolka: Waxqabad Rasmi ah mise Maaweelo... Akhri...