W/D:Mursal
Max'ed Max'uud(Garaad)E-mail
stethy1@yahoo.com
Ma'ahan markii ugu horaysay ee rajo
xumo ka soo ifbaxdo horumaro la'isku dayey in loo qaado dhanka
Dowladnimadda iyo Dib-u-heshiisiinta.Dowladdii dhismaheeda loo
fadhiyey mudada dheer ayaa waxaa muuqata in Raggii ugu sareeyey ay
ku dhaqaajiyeen Wadadii ay ku wiiqmi lahdy rajadii laga qabay in
Dowladdu si buuxda uga howlgasho Dalka soona celiso amnigii iyo kala
danbayntii 15-sano oo fowdo ah ka dib.
Inta badan waxyaabihii fashilka ku
keeni jiray Maamuladdii la'isku dayey in Somalia loo sameeyo waxaa ugu
badnaa "Anaa u Xaq leh iyo anaa ka sii mudan" is qab-qabsigaas oo aan
lahayn tanaasul "compromise" ayaa marka ugu danbeeysa ku soo af-jarma in
lagu kala dareero Xaajana ay ku soo idlaato "Gush iyo Gash maleh" sidoo
kalena waxay keeni jirtay in intii wax gooni iskula doonaysayba ay
gaarkeeda dhinac ugu go'do. Waxaana ka soo bixi jiray Ereyga caan baxay
Mudadii Qarab bur-burka, eed moodaba in loo sameeyey wax duminta kaas
oo ah "Looma dhamma"
Markii ugu horaysay waxaa lagu
guulaystay in meesha laga saaro Ereygii "Looma dhamma" kadib dhismihii
Dowladda Mpagthi oo durbadiiba Dadku ay u bixiyeen Dowladdii Isbaaro
qaadka, waxaana la oran karaa waa Nidaamkii ugu horeyey ee 98% ay u
dhanyihiin Raggii adeegsan jiray "Looma dhamma", Waa Maamulkii ugu
horeeyey ee Ragga hubaysani iska wada dhex arkaan. Dad badan ayaa iyagu
aaminsanaa in dhibkii uu intaa ku hari doono mar hadii intii Xalku u
af-duubnaa ay noqdeen min Madaxweyne, Wasiir. illaa Xildhibaan. Hase
yeeshee weli waxaad moodaa in ay tahay "Faanoole fari kama qodna!!"
Marka loo kuurgalo hab-dhaqanka Hoggaanka Dowladda waxaa soo baxaya in
wixii loo fadhiyey mudada dheer ay kaabiga u saaran yihiin Hal bacaad
lagu lisay in ay la mid noq daan, haddii aan la samayn isbedello
xoog-leh oo lagu saxayo khaladaadka dhacay iyo kuwa imminkaba socda,
waxyaabaha raja beelka ku riday Ummadda ee Qof waliba goonidiisa isku
waydiinayo waxaa ka mid ah:
1. Haddii Madaxdda Dowladdii laga
dhursugayey waqtiga dheer ay beegsadeen Waddo halis gelin karta
jiritaanka Ummadnimo ee Somalia.
2. Haddii ay ku dhaqaajiyeen waddo aan
ka tarjumaynin hanaankii Dib-u-heshiisiineed ee lagu soo dhisay.
3. Haddii rabitaankooda shaqsi
madax-maray hoggaankii Dowladda, oo aanay cid kale tixgelin siinayn.
4. Haddii qaar ka mid ah Raggii uu
xalku u af-duubnaa loogu goodinayo in laga saarayo Dowladda, oo aanay
awood lahayn.
5. Haddii aan weli laga gudbin
isbahaysiyadii lagu kala jiray, kahor intii aan la dhisin Dowladda, sida
S.R.R.C, Samatabixinta I.W.M.
6. Haddii hadalka kasta oo ay
yiraahdaan Madaxdii Dowladdu uu noqday goodis, caga juglayn iyo mid
xaalad-abuur ah.
7. Haddii Madaxddii Sare Gaar ahaan
Madaxweynaha la sheegayo in uu ka iibiyey Deegaanka Xaafuun Hay'ad
ajnabiya oo la yiraahdo Xafza muddo Qarniya.
8. Haddii Deeqihii loogu tala galay
Dadkii dhibaatadu ka soo gaartay Masiibadii Tsunami ay Madaxda sare ee
Dowladdu, u isticmaalayn qaab NGO, iyo safaro tamashlayn
ah.
Waa maxay Sawirka kuu muuqan kara
Mustaqbalka dhow iyo kan fogba, haddiise waxyaabahaas oo dhan ay sax
yihiin mayihiin Madaxdaasi kuwii wax badbaadin lahaa?
Sida Wararka lagu helayo waxaa
dhawaanahanba lagu ururinayey Zoonka 5-aad ee Ethiopia iyo meelo ka
tirsan Maamul Goboleedka Puntland, Meleeshiyaad gaaraya dhowr kun,
Ciidamadaas oo sida qorshuhu yahay ku sii jeeda Mgaalooyinka Baydhabo
iyo Jawhar oo uu Geeddi sheegay in ay Dowladdiisu kala degi doonto,
islamarkaasan aan arintaas looga baahnayn in Barlamaanku ansixiyo, ayaa
dhan ka kale waxaa jiray Ciidamo loo diyaarinayey sidii ay kuwaas uga
hortegi lahaayeen, qaar ka mid ah Hoggaamiyayaasha hubbaysan ee
Dowladdana ku jira ayaa iyaguna ku hanjabay in Madaxweyne C/laahi Yuusuf
aanu mar kale tegi karin Jawhar iyadoon raali looga ahayn, waxaa jira in
wadnaha farta lagu hayo is ku dhac ay suurta gal tahay in uu dhex maro
Ciidamadda Gobolada Waqooyi iyo kuwa Bari ee isku hor fadhiya Deegaanka
Ari-caddeeye.
Waxaas oo dhan ka horse waxaa
hadaba Xiisad Collaadeed ka qaraxday Magaalada Baydhabo ee Xarunta
Gobolka Bay. Dagaal kan oo salka ku haya khilaafaadka u dhexeeya Xubnaha
Dowladda ee ku saabsan halkii ay Dowladdu degi lahayd. Xubnaha ku jira
Dowladda ee ka soo jeeda Gobolkaas ayaa qoloba cid ay malaha u ciil
qabtay Dusha uga tuurtay Mas'uuliyadda Dagaalkaas, ilaa 15 Mudane oo ka
tirsan Barlamaanka Soomaaliya ayaa war Saxaafadeed ay soo saareen ku
eedeeyey Madaxda sare ee Dawladda in ay qarash ku baxiyeen sidii halkaas
Collaad looga aloosi lahaa, halka illaa 5-Wasiir oo uu ku jiro kii
Dowladda u qaabilsanaa Dib-u-heshiisiinta ay ka soo duulayn Nairobi,
sheegeena in ay ka xoraynayaan Gobolka Bay Cadawga ku soo duulay,
iyadoo Mudane shariif Xasan Sh. Aaden uu dhex-dhexaad ka noqday, kuna
baaqay in Dagaalka la joojiyo isagoon cidna ku eedayn.
Sikastaba ha ahaatee waxaa muuqata
in meelo badan oo Dalkaa ay ka jirto dhiilo Colaadeed oo ay suurtagal
tahay in Gacmaha la'iskula tago. Hadaba Dowladdu ma waxay ahaydbaa
la'iswaydiin karaa mid Dib-u-heshiisiin, oo Nabad dhex-dhigta qaybihii
horay isku dagaashanaa mise mid Colaad abuur oo dib i noogu celisa
horraantii 90'meeyadii?
Waan hubaa in Ciwaanka qormada
aanay igu waafaqsanayn inta badan Shacabka Soomaaliyeed, waayo Dadku way
daalan yihiin mana aqbali karaan Dadaal kasta oo la sameeyo in uu
shaqayn kari waayo, oo ciribtiisuna fashil noqoto.....Hase yeeshee
Akhristoow sideed u maarayn lahayd ood una kala dooran lahayd
Su'aalahan?
A). In Dalku uu sii ahaado sida uu
imminka ku sugan yahay iyo in Xaalku ka sii daro?
B). In dhulka Soomaaliyeed la sii kala
qayb-qaybiyo iyo in sida imminka uu yahay uu ku sii hakado?.
C). In Somalia ay noqoto Zoonka 6-aad
ee Ethiopia & in Dalku sidan sii ahaado.
D). In Dowladdu ay abuurto Dagaal cusub
oo lagu hoobto, dibna inoogu celiso 90'yadii iyo in Xaalka aan looga sii
daran?
Haddii aan Anigu ka jawaabayo
waxaan oran lahaa in Dalku sidaan sii ahaadana Xal ma'ahn, in looga sii
daraana way ka sii khatar badan tahay, howlina sida ay u kala culustahay
ayaa loo kala hormariyaa, sidoo kalena Islaamku wuxuu jideeyey haddii
Qofka Muslimka ah ay noqoto in aanu ka baxsanayn 2ba dhibaato midkood
wuxuu qaadanayaa hadba tii fudud. Sidaas darteed marka hore waa in la
xaqiijiyaa in aanu dhicin dhib ka baaxad wayn kii ay Bulshadu horay ugu
sugnayd. Markaas kadibna loo gudbo sidii loo midayn lahaa afkaarta
qaybaha Dadka si loogu wada jiheeyo dhanka wanaagsan ee wax qabsashada.
Ulajeedadu ma'ahan in wax gaar ah
meel lagu ogyahay, mana ahan wax-xun saadaalin. Hase yeeshee Qoruhu
wuxuu ka faaloodaa wax dhacay, waxii taagan iyo waxa immaan kara
Mustaqbalka, waa Bini'aadam Saadaashuna mararka qaarkood way is dhaln
rogi kartaa, inta badanse waxay ku timaaddaa "Sax" haddii loo kaashado
Waayo aragnimadii la soo maray.
Isku soo duuboo weli Dowladda waxaa
loo hayaa Xushmad aad u balaaran, weli soo dhawayn & wada shaqaynbaa
loola diyaar yahay, weli jaanis ay isku sixi karto, si buuxdan ugu soo
celin karto kalsoonidii Dadka ayaa horyaala. Haddiise ay ka go'antahay
in lagu laabto sidii la'ahaa horraantii 90'yadii iyo si kasii liidata,
waxaa la oran karaa in ay fashisho Xukuumaddu ayaa ka roon. Marka aan
leenahay Xukuumad dabcan Waa Golaha cabinet-ka, Madaxweynaha iyo intii
kale ee la shaqaynaysa. Barlammaankuse waa jaanib kale oo lagu baxsan
karo hadday muujiyaan Mas'uuliyad dheeraad ah, sdii ay sameeyeen 17kii
march oo kale.
W/D:Mursal Max'ed Max'uud(Garaad)E-mail
stethy1@yahoo.com