-
13/01/05 Garaac meesha la yidhaahdo
oo ka tirsan Gobolka Qorraxay dagaal
ka dhacay waxaa cadowga lagaga dilay
5 askari, waxaana lagaga dhaawacay
4.
-
31/01/05 Lebiga oo ka tirsan Degmada
Dhagaxbuur ee Gobolka Jarareed
kolonyo ciidanka cadowga oo marayey
ayuu CWXO u dhaba galay. Waxay
halkaas lagaga baabuurkii ugu
horreeyey, waxaana ku dhimatay 35
askari. Waxaa kaloo rasaas lala
beegsaday baabuurkii labaad oo
khaasaare lixaad leh la gaadhsiiyay.
Dhinaca kela taliska Ciidanka
gumaysiga Itoobiya ee fadhigiisu
yahay magaalada Qabridaharre ayaa
isugu yeedhay ciidamada calooshooda
u shaqaystayaasha ah ee gobollada
Nogob, Jarar, Doollo, Qorraxay iyo
Shabeelle, waxaana maalintii shalay
ahayd ee taarikhdu ku aaddanayd
7/02/05 uga furmay magaalada
Qabridaharre shir lagu qiimaynayo
hawlgalladii loo diray ee ka dhanka
ahaa halganka shacabka Ogadenya ugu
jiro xuquuqdiisa.
Waxaa kaloo shirkaas loogu talagalay
in ciidamada calooshood u-shaqaystayaasha
ah loogu sheego waajibaadyo cusub oo
la rabo inay fuliyaan.
Maalintii axadda ahayd ee bisha
Febrawari 6-da ahayd waxay CWXO
jidka ku heleen maleeshiyadii Fiiq
iyo Sagag ee shirka u soo socotay,
kuwaasoo markii la helay marayay
meel lagu magacaabo Qayd oo u
dhexaysa Fiiq iyo Garbo. Waxaa
halkaas lagaga dilay taliyihii
Maleeshiyada Sagag oo ahaa nin muddo
dheer cadowga u shaqaynayay.
Shir lagaga hadlayay arrimaha
Ogadenya oo ka dhacay magaalada
London
Maalintii sabtida ahayd ee
taariikhdu ahayd 5/02/05 waxaa
magaalada London ee carriga
Ingiriiska lagu qabtay shir wayn oo
lagaga hadlayay arrimaha Ogadenya.
Shirkan waxaa lagu rogrogay arrimo
badan oo ku saabsan siyaasada
Ogadenya, waxaana lagaga dooday
xaaladda dalka Ogadenya. Waxaa
dhambaalkan magaalada London looga
soo diray Samatar Guuleed oo shirka
goobjoog ka ahaa.
Gumaysiga Itoobiya oo xayiray
dhaqdhaqaaqii gaadiidka ee Ogadenya
Xukuumadda gumaysiga Itoobiya ayaa
xayiraad ku soo rogtay dhaqdhaqaaqii
gaadiidka ka dhex shaqeeya dalka
Ogadenya iyo gaadiidka ka dhex
shaqeeya Ogadenya iyo Itoobiya.
Wararka naga soo gaadhaya magaalada
Jigjiga ayaa sheegaya in baabuur
badan oo dalka Ogadeyna laga
leeyahay ay hadda hoganayaan
magaalada Jigjiga, iyadoo loo diiday
inay u baxaan gobollada kale ee
Ogadenya.
Gaadiid badan oo rar u waday gobollo
kala duwan oo Ogadenya ka mid ah
ayaa iyagana lagu hakiyay
magaalooyinka Qabri-bayax iyo
Awaare, iyadoo loo diiday inay
dhinacna u dhaqaaqaan, isla markaana
ilaa iyo hadda meelahaas ku xayiran.
Wararku waxay intaas ku darayaan in
gumaysiga Itoobiya uu gaadiidlayda u
sheegay in xaaladda nabadgelyada oon
fiicnayn awgeed aan la oggolayn in
gaadiidku isaga socdo gobollada
Ogadenya. Arrintani waxay dhibaato
wayn soo gaadhsiisay dadwaynaha
rayadka ah ee Ogadenya oo markii
horaba ay dhibaato ka haysatay
dhinaca gaadiid xumada, haddana
looga sii daray.
Dhawrkii toddobaad ee ugu denbeeyay
waxaa meelo kala duwan oo Ogadenya
ka mid ah lagu gubay baabuur ay
wateen ciidamada gumaysiga Itoobiya,
iyadoo khasaare lixaad leh loo
gaystay ciidamada gumaysiga, taasina
waxay keentay in ciidamada gumaysigu
ay xayiraada ku soo rogaan gaadiidka
oo dhan, si ay wadar-ahaan ugu
ciqaabaan dadwaynaha Ogadenya oo
dhan.
Eritereya oo Itoobiya canbaaraysay
Guddiga dawlada Eritereya u qaabisla
xidhiidhka ergada nabad ilaalinta
Qaramada Midoobey ee kala dhex
fadhida Eritereya iyo Itoobiya, ayaa
taliska TPLF ku eedeeyay inuu isku
dayayo falal daandaansi ah, kuwaasoo
uu ku doonayo sidii uu dagaal uga
billaaban lahaa labada dhinac.
Guddiga Eritereya wuxuu bishan
seddexdeedii soo saaray bayaan uu ku
beeninayo in ciidamada Itoobiya ay
aagga Manda ee gudaha Itoobiya ku
dileen qaar ka mid ah askarta
Eritereya, arrintaasoo taliska Addis
Ababa uu daboolka ka qaaday kawdii
bishan.
Eritereya waxay taliska Addis Ababa
ku canbaaraysay inuu khalkhal iyo
degganaansho la’aan ka abuuray
nawaaxiga Bure ee aagga Manda, ka
dib markii uu ciidamada nabad
ilaalinta ee Qaramada Midoobey ku
martiqaaday inay soo arkaan dad
halkaas lagu laayay oo Itoobiya
sheegtay inay Eriteriyaan ahaayeen.
Eritereya ayaa sheegtay in dadka la
laayay ay ahaayeen kooxaha Canfarta
ah ee hubaysan ee ka soo horjeeda
xukuumadda Itoobiya.
C/Nuur Sh.Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad ka dhegaysan
kartaa Mawjadda 31 MB ee dhererkeedu
yahay 9820 KHZ, Maalmaha Talaadada
iyo Jimcaha 7: 30PM waqtiga Afrikada
Bari