ARDAYDA REER SOMALILAND EE MAGAALADA
KARACHI OO U DEBAAL DEGTAY CIIDUL
ADXA IYO URUR CUSUB OO AY KU
DHAWAAQEEN
Waxaa Habeenkii ay bishu ku
beegnayd 25-ka January ka dhacay
magaalada Karachi xaflad aad iyo aad
u qiimo badan oo si weyn loo soo
diyaariyey oo ardayda Reer
Somaliland ee ku dhaqan magaalada
Karachi ee waddanka Pakistan ay ugu
dabaal degayeen Farxadda Ciidul Adxa,
Xafladdani oo run ahaantii qabban
qaabadeeda laga dareemaayey daafaha
magaalada Karachi maalmahii ciidda
ka horeeyey iyo weliba maalmahii
ciidda laftigeeda ayaa waxa ay suuro
gal noqotay in dhammaan ardayda Reer
Somaliland ee ku dhaqan Xarunta
gobolka Sindh waa Magaalada Karachi
iyo weliba Magaalada Hyderabad la
isku keeno, iyada oo laga
faa’iidaysanaayey fasax gaaban oo
ardaydu ay ku jireen.
Qaban Qaabada barnaamijkani oo ay si
weyn iskugu hawleen soona abaabuleen
Cali Ibraahim Ismaciil (Ali
Dhoolayare) iyo Cabdirashiid Daahir
Aaye, ayaa lagu casuumay arday reer
Somaliland ah oo tiradoodu kor u
dhaaftay 50-meeyo Qof oo ka kala
yimid daafaha magaaladani Karachi
iyo weliba Magaalada Hyderabad.
Xafladdani oo run ahaantii lahayd
xiiso gaar ah iyadoo ay tahay markii
ugu horaysay ee ay taariikhda gashay
in arday reer Somaliland ah oo
tiradoodu intaa le’egtahay lagu
guulaysto in meel la iskugu keeno
ayaa run ahaantii waxay gelisay
dhammaan ardaydii iyo dadweynahii
ka soo qayb gallay xiiso gaar ah iyo
qiiro Wadaninimo oo si weyn ugu
baahday quluubtooda.
Dhammaan dadka ka soo qayb gallay oo
u badna arday ayaa waxay soo
gaadheen goobta lagu casuumay oo
ahayd hoteelka casriga ah ee
“LASANIA” hoolka weyn ee xafladaha
lagu qabto, waxaanay soo gaadheen
Abaaro intii u dhexaysay 8:00
Fiidnimo ilaa 9:00 fiidnimo, iyadoo
oo cimiladu ahayd mid aad u
wanaagsan roob fiicanna uu ka da’ay
magaalada Daafaheeda, Necawda Saxan
Saxada Roobkuna si weyn looga
dareemaayey dhammaan magaalada
Karachi.
Xafladda oo ku tallo galkeeda
koobaad ahaa in bal markii ugu
horaysay taariikhda la geliyo isku
keenka arday reer Somaliland ah iyo
weliba in lagu naaqisho laguna
fallan qeeyo dallad urur ah oo
midaysa ardayda Reer Somaliland ee
Magaalada Karachi iyo guud ahaan
Gobolka Sindh ayaa waxay ku
bilaabantay farxad iyo rayn rayn
weyn oo ka muuqata wejiyadii ka soo
qayb gallay, Barnaamijka oo ahaa
taxane loogu tallo gallay in lagu
maaweeliyo ka soo qayb galayaasha
iyo weliba qudbado iyo Muxadaro ayaa
waxay u dhacday sida tani
Barnaamijka ayaa wuxuu toos u
bilawday 9:15 daqiiqo wakhtiga
Magaalada Karachi waxaana Furay
Mohamed Abdi Hassan (diridhaba)
waxaanu Mikroofanka ku soo dhaweeyey
Xidhiidhiyaha barnaamijka kala
wadday Muscab Cali Xirsi, Waxaana
daadihinta barnaamijka la wareegay
Muscab oo ku soo dhaweeyey Shiekh
Cabdi Naasir Axmed Xasan oo ku furay
Aayadaha Quraanka Kariimka ah Sida
Umadda Islaamku meel kasta oo ay
iskugu timaado u caadada ah, ka dib
Aayadaha Quraanka ah wuxuu Muscab ku
soo dhaweeyey Mikrafoonka Sheikh
Aadam Xasan (Osama) oo jeediyey
Muxaadiro diini ah, wuxuu sheekhu ka
hadlay xoojinta cibaadada ilaahay
iyo inaan la iloobin markasta goob
kasta oo la iskugu yimaado xusidda
ilaahay iyo xasuusnaata Qawlka
Ilaahay (S.W) sheekhu wuxuu aad ugu
dheeraday Muxaadaro runtii
baraarujin u ah dhammaan
dhalinyarada Maadama oo qurbe
Waxbarasho la yimid, wuxuuna
xasuusiyey inaan markasta la seegin
xasuusnaata axkaamta ilaahay.
Muscab
wuxuu Mikrafoonka ku soo dhaweeyey Siciid
Cabdi Sulayman oo halka ka jeediyey
qudbad qiimo badan oo ka hadlaysay
ama tilmaamaysay ahmiyadda koobaad
ee kulankani iyo xafladdani la soo
qaban qaabiyey ardayduna iskugu
timid, Siciid Cabdi Sulayman wuxuu
ka jeediyey kelmado qiimo badan oo
kaga hadlaayey isku duubnaanta
ardayda reer Somaliland iyo weliba
in la is xaal ogaado, wuxuuna ka
hadlay faa’idada weyn ee ay lahaan
karto dallad ama urur midayaa
ardayda Reer Somaliland ee ku nool
Magaalada Karachi iyo weliba guud
ahaan gobolka Sindh oo ay soo
raacaan ardayda ku dhaqan Magaalada
Hyderabad.
Sidoo
kale waxaa lagu soo dhaweeyey
Mikrofoonka Engineer Ibraahim Xasan
Daahir oo dhawaan ka soo laabtay
dhulkii Hooyo ee Somaliland wuxuu
ibraahim halkaasi ka jeediyey qudbad
qiimo iyo qaayo mudan oo runtii hoos
u taabatay waayaha iyo xaaladda guud
ee dalkii Hooyo Somaliland ku sugna
wakhtiyadii uu joogay, Ibraahim
wuxuu ku bilaabay hadalkiisa
taariikhdii dheerayd ee Somaliland
jiritaankeedu soo martay iyo weliba
wacdigii iyo caqabadahii Somaliland
lala soo maray, Wuxuu ibraahim
taabtay horumarka uu dalku gaadhay
isaga oo ka hadlay ilaha
horumarineed ee uu dalku gaadhay
sida nabad
gelyada,Isgaadhsiinta,waxbarashada
iyo qodobo kale, wuxuu ku soo gebo
gebayeeyey dardaaran iyo waano uu
usoo jeediyey ardayda markay
waxbarashadooda dhamaystaan in
dalkii dib loogu laabto si cilmiga
dalkii loogu maal geliyo.
Sidoo kale waxaa qudbad halkaa ka
jeediyey Cabdi Salaam Xuseen Cawaale
oo ku hadlaayey afka Ardayda
Magaalada Hyderabad ee gobolka Sindh
isagoo halkaasi ka soo jeediyey
kelmado xusuus weyn ku reebay
ardayda dhamaantood, waxaana
hadaladiisa ka mid ahaa “Wixii ardayda
reer Somaliland midaynaya ee ay isku
raacaan annaguna waxba kama qabno
haddaanu nahay Ardayda reer
Hyderabad” Cabdisalaam wuxuu ku soo
gebo gebeeyey hadalkiisa in la is
xaal ogaado oo sidani oo kale
xaflado iyo kulano kuwan la mid ah
la qaban qaabiyo mustaqbalka.
Sidoo kale waxaa meesha aan ka
maqnayn oo wacdaro muujiyey
Masrixiyad bandhigeed uu si weyn
ugu soo faro yaraystay Cabdirashiid
Daahir Aaye oo runtii aad u
madadaaliyey ka soo qayb
galayaashii barnaamijkani
Cabdirashiid wuxuu soo abaabulay
bandhig fanneed iyo Su’aalo
cilmiyeed isaga oo weydiinaayey ka
soo qayb galayaasha, waxaana ay
runtii ahayd mid qosol iyo madaadalo
badan.
Waxaa marlabaad ku soo laabtay
Masraxa (Stage) Siciid Cabdi
Sulayman oo soo jeediyey Maadama oo
la isku waafaqay in Jaaliyadda
Ardayda Somaliland lagaga dhawaaqo
goobtani la guudo galo guddi loo
sameeyo oo ka koobnaan doona
Gudoomiye ku xigeenkiisa iyo laba
guddi oo la shaqayeeya, waxaa gudida
ku meel gaadhka ah oo ka koobna
Siciid Cabdi Sulayman, Ibraahim
Xasan, Cabdisalaam Xuseen iyo Aadan
ay soo sharaxeen Seddex qof oo ay
usoo sharaxeen gudoomiye iyo ku
xigeen iyo weliba hal qof oo loo soo
sharaxay inuu gudida ku biro
seddexda Qof oo kala ahaa
-
Cali Ibraahim Ismaciil (Ali
Dhoolayare)
-
Maxamed Muxumed Diiriye (Qawdhan)
-
Cabdirashiid Daahir Aaye (A.Aye)
Waxaa loo qaaday Musharaxiinta cod
qarsoodi ah oo u dhacay si
dimuqraadi ah waxaana laga uruuriyey
ka qayb galayaasha codod waraaqo ah
oo ay ku qorayeen kolba qofka ay
dooranayaan waxaana ku guulaystay
Gudoomiyaha Jaaliyadda Somaliland ee
magaalada Karachi Mudane Cali
Ibraahim Ismaciil (Ali Dhoolayare),
sidoo kale waxaa ku xigeenka
Gudoomiyaha ku guulaystay Mudane
Maxamed Muxumed Diiriye (Qawdhan)
waxaana si weyn loogu hambalyeeyey
Gudoomiyaha iyo ku xigeenkiisa oo
ilaahay looga beryay inuu hawsha u
fududeeyo.
Cali Ibraahim Ismaciil (Ali
Dhoolayare)
Gudoomiyaha Cusub ee Jaaliyadda
Somaliland ee karachi.
Ka
dib dhammaadkii doorashada ayaa
waxaa loo kacay cashada oo diyaar u
ahayd ka qayb galayaasha, iyada oo
Gudoomiyaha cusub uu halkaasi ka
jeediyey qudbad uu ugu mahad
celinayo dadka intii u codaysay iyo
intii aan u codayn, waxaana markale
loo ballamay sidii la iskugu keeni
lahaa ardayda iyo jaaliyadda
Somaliland ee magaalada ku nool.
WARBIXINTANI WAXAA SOO DIYAARIYEY
MOHAMED ABDI HASSAN (DIRIDHABA) OO
GOOB JOOG KA AHAA XAFLADDANI. Email:
mabdihassan@yahoo.com
KARACHI, PAKISTAN.
Faafin: SomaliTalk.com | Jan 27,
2005