Xubno ka mid ah Jaaliyadda Soomaalida
Ethiopia(gobolka Ogaden) oo cabasho u gudbiyey Senator Coleman.
Hogaamiyeyaasha jaaliyadda Soomaalida
Ethiopia ee Minnesota ayaa waxay si rasmi ah ugu gudbiyeem senatoorkooda
cabasho dhan ka ah xukuumadda Zenawi. Madaxdaasi waxay sheegeen in Dawladda
Ethiopia ay gobolkooda iyo shacabkooda ula dhaqanto si aan loola dhaqmin
muwaadiniinta Ethiopia. Madaxdaasi waxaa ay sheegeen in doorashadii ka
dhacday Ethiopia aanay weli kaba dhicin gobolkooda weliba weriyeyaashii
caalamiga ahaa iyo kormeerayaashii caalamiga ahaaba ay ka soo dhoofeen
Ethiopia oo aanay tegi doonin gobolka marka doorashada ka dhici doonto.
Senator Coleman
|
Madaxdaasi waxaa kale oo ay sheegeen
madaxweynihii hore ee maraykanka Carter uusan fahamsanayn xaqiiqada ka jirta
Ethiopia gaar ahaan Ogaden waayo bay yiraahdeen haddii uu ogaan lahaa ma
yiraahdeen doorashada cadaalad bay ahayd. Madaxdaasi waxaa kale oo ay
xafiiska u sheegeen taariikhda gobolka iyo tacadiga waqtiga dheer lagu hayey
sida in gobolka oo dhan uu leeyahay hal dugsi sare wadooyinka iyo
isbitaalada ay aad u liitaan. Madaxda jaaliyadda Soomaaliyeed ee Ethiopia
ee Minnesota waxaa ay yiraahdeen waa been in ammaan daro loo qaban waayo
doorashada gobolka taasina ay tahay marmarsiiyo loogu diidato dadka degan
gobolkaas waxa ay xaqa u leeyihiin.
Ugu danbayntii madaxda jaaliyadda waxaa ay
codsadeen in uu senator Coleman xaqiijiyo lacagta uu maraykanku siiyo
dawladda Ethiopia in ay gaarto dadkii loogu talo galay ee aysan xukuumadda
Ethiopia ku takri falin una isticmaalin arrimaha militariga. Xafiiska Sen.
Coleman waxaa uu jaaliyadda ka balan qaaday inuu il gaar ah ku eegi doono
waxa ka socda gobolkaas.
Beryahanba waxaa aad usoo badanayey wax
tarka iyo adeega uu Senator Coleman u hayo gobolka Minnesota gaar ahaan
jaaliyadaha ka soo jeeda geeska Africa. Adeega xafiiskiisa ayaa u muuqda
inay haatan kor u dhaaftay 50% dadka loo adeego inay yihiin Soomaali sababo
badan awgeed. Arrintaaso oo yaab keentay waayo Soomaalida gobolka kama badna
3% xafiiskiina ayagaa u badan wax isticmaala.
Senator Coleman beryahanba waxaa uu aad u
maqlayey tacadiga iyo ku tumashada xuquuqal insaanka ay qowmiyadaha
Ethiopia ka sheeganayaan xukuumadda Ethiopia sida Oromada, Gambela,
Soomaalida, Eritrea iwm.
Senator Coleman waxaa kale oo dhowaan
xafiiskiisa yimid xubno ka mid ah jaaliyadda Soomaaliyeed ee Minnesota
kuwaas oo ka codsaday in uu ku dadaalo intii karaankiisa ah sidii Soomaaliya
dawlad u heli lahayd iyo in dawlada maraykanka wax tarto shacabka iyo
dawladda Soomaaliyeed ee dhowaan lagu soo dhisay Nairobi. Senator Coleman
sidoo kale dhowaan waxaa uu xafiiskiisa DC ugu yeeray madaxa state
department qaybta Africa waa haweenayda la yiraahdo Constance Newman.
Senator waxaa uu weydiiyey su’aalo kulul
sababta state department ay uga gaabisay taageerida shacabka Soomaaliyeed
iyo sida ay ku dhacday in 15 sano Soomaalia lagu eego fawdo iyo dawlad
la’aan. Senatorka waxaa uu ka codsaday inay Ms Newman kala shaqayso
arrimaha Soomaaliya gaar ahaan dhinaca horumarinta.
Waxqabadka kale ee uu qabtay senatoorka oo
quseeya Soomaalida waxaa ka mid ah.
1) Ka hortagga in la isku qasbo
baasaboor markii loo kala gudbayo maraykanka iyo canada. Hadda looma baahna
inaad haysato baasaboor. Soomaali badan oo ku kala nool Canada iyo
Maraykanka oo isaga gudba ayay caqabad ku noqonkartaa baasaboor qaadashada.
2) Inaan la dhimin dhaqaalaha ku baxa
caafimaadka dan yarta Medicaid iyo section 8 waa guryaha dan yarta.
3) In uu ka shaqeeyo sidii reer
Minnesota daawo raqiis ah u heli lahaayeem ama uga soo gadan laahyeen Canada
iyo Europe.
4) In ardada ajnabiga aan lagu dhibin
visa waayo america ayaa u baahan lacagtooda iyo maskaxdooda
5) Inuu taageeray qorshe dawladda
naraykanka ugu celiso waalidiinta canshuur celin dhan halkii canug $ 1000.00
iyo in in guurka la dhiiriyo oo laga cafiyo ragga iyo dumarka isguursnaya
canshuurta.
6) Sanadkan 2005 bulshooyinka danyarta
ah waxaa uu u soo hoyiyey dhaqaale loo isticmaalo shaqo abuuris iyo guryo
gaaraya $100 million waxaan uu ka mid yahay sanatoorada sanad walba saxiixa
in aan daryeelka laga jarin dadka saboolka ah
7) Dhinaca waxbarashada waxaa uu ka
mid yahay senatoorada u dagaalama in waxbarasha asaasiga ah (head start) aan
la joojin iyo in la kordhiyo deeqaha waxbarsho ee ardayda dan yarta ah (Pell
Grant) asagoo dawladda federaalka uga soo qaaday dhowaan $6million oo
dheeraad ah oo loo qaybiyey 19 colleges.
Ugu danbayntii Senator coleman waxaa uu ku
mashquulsan yahay mashruuc culus oo uu u bixiyey horumarinta reer miyiga iyo
dib u soo noolaynta degaanada ka fog magaalooytinka si shaqooyin badan loo
abuuro oo ay dad badan oo reer Minnesota shaqo u helaan. Mashruucaan oo la
rabo in laga dhaqan geliyo dhamaan dalka maraykanka haddii uu ogolaado
congresska iyo madaxweynaha waxaa ku bixi doona maalgelin dhan $50
billion. Waxqabadka Senator Coleman waa badan yihiin oo lama soo koobi karo
laakiin maanta intaan ayaan ku soo koobaynaa.
 Maxamuud
Nuur Wardheere
mnwardere@yahoo.com
Minneapolis, MN, USA
Faafin: SomaliTalk.com | June 13, 2005
. Senator
Coleman oo la shiray hogaamiyeyaasha Soomaalida Minnesota.
. Kulankii
Soomaalida Minnesota iyo Labada Murashax ee Aqalka Odayaasha Maraykanka (USA
Senate)
| 
Daabaco
Boggan | Print