C/llaahi Yuusuf oo warqad qoraal ah u diray Dowladda Mareykanka..

Madaxweyne C/llaahi Yuusuf Axmed ayaa Magaalada London waxa uu kulan kula yeeshay sarkaal sare oo ka socday Wasaaradda Arrimaha Dibadda ee Dowladda Mareykanka, waxaana kulankaasi la iskula soo qaaday sidii Dowladda Mareykanka ay gacan u siin lahayd Dowladda Federaalka, maadaama ay ka mid ahayd Dowladihii horey u sheegay intii uu socday shirkii dib u heshiisinta in ay hiil iyo hooba la garab istaagi doonaan Dowladda Federaalka inta ay lugaheeda isaga taagi doonto.

Madaxweynaha ayaa sarkaalkaasi u dhiibay warqad qoraal ah oo ku socotay Dowladda Mareykanka, balse wixii ku qornaa warqaddaasi inkastoo aan la faahfaahin haddana rag ku dhow dhow Madaxweynaha ayaa waxay noo sheegeen in Dowladda Mareykanka mar kasta ay kala soo xiriirto waxa loogu yeeray howlgalada kooxaha Argagixisada si labada dowlood ay isaga kaashadaan arrimahaasi, iyadoo la og yahay in Dowladda Mareykanka ay heshiis la gashay kooxo Wasiiroka tirsan Dowladda Federaalka kuwasoo dagaal la galay midowga Maxaakiimta Islaamiga ah ee ka dhisan Magaalada Muqdisho.

Madaxweyne C/llaahi Yuusuf oo horey looga wareystay arrimaha ka taagan Mareykanka ayaa waxa uu ku tilmaamay kooxaha ka wada dagaalka Magaalada Muqdisho in ay yihiin kuwo sii dhibaateynaya Bulshada Soomaaliyeed, isagoo sheegay in kooxaha Argagixisada ay yihiin kuwo tilmaaman looguna tagi karo guryahooda. Madaxweyne C/llaahi Yuusuf ayaa Dowladda Mareykanka ka cosaday in ay gacan ku siiso dhismaha guddi la magacbaxay Guddiga Qaranka ee la dagaalanka Argagixisada, inkastoo Dowladda Mareykanka ay horey u beenisay inay wax lug ah ku lahayd dagaaladii ka dhacay Magaalada Muqdisho iyo waliba sameynta isbahaysiga isku magacaabay la dagaalanka Argagixisada iyo dib u soo celinta nabadda.

C/llaahi Yuusuf oo xalay gaaray wadanka Sweden..

C/llaahi Yuusuf oo mudo labo tobaad ah ku sugnaa Magaalada London ee Cariga Ingiriiska ayaa xalay waxa uu gaaray isaga iyo wafdi uu hogaaminayo dalka Sweden.

Madaxweynaha iyo Wafdigiisa ayaa waxa ay martiqaaad ka heleen dowladda Wadaka Sweden maadaama ay dowladda Sweden ay ka mid tahay dowladihii gacanta ka gaystay shirkii dib u heshiisiinta Soomaaliyeed, waxaana la filayaa in Madaxweynaha inta uu joogo dalka Sweden uu kulamo la yeelan doono mas’uuliyiinta wadnkaasi oo ay isla soo qaadi doonaan sidii Dowladda Sweden u sii wadi lahayd gacan siinta Dowladda Federaalka, gaar ahaan dhinaca dib u dhiska iyo ammaanka.

Madaxweynaha waxaa kalloo uu booqan doonaan wadamada la ologa ah ee ay ka mid yihiin wadanka Norway, Finland iyo Denmark, kaddibna Madaxweynuhu waxa u u soo duuli doonaa wadanka Liibiya kaddib markii uu martiqaad ka helay hogaamiyaha wadanka Liibiya Mucamar Al-Qaadi.

Xildhibaan Max’ed Cabdi Yuusuf “Wali Geeddi farbaa u laaban ..

Xildhibaan Max’ed Cabdi Yuuusf ayaa waxa sheegay in Ra’isul Wasaare Geeddi uusan wali si cad u caddeynin mowqifkiisa ku aadan xafiiska ay Dowladda Itoobiya ka furatay Magaalada Hargeysa ee Maamulka Soomaaliland.

“Geeddi waxa uu noo akhriyay qoraal ka soo baxay Dowladda Itoobiya ma ahan qoraal ay ku cad yihiin waxyaabihii looga baahnaa Dowladda Itoobiya” ayuu yiri Xildhibaan Max’ed Cabdi Yuusuf oo sheegay in Dowladda itoobiya ay wali wado hagardaamada shacabka Soomaaliyeed gaar ahaan Dowladda Federaalka.

“Dowladda Itoobiya waxay ka mid ahayd dowladihii gacanta ka gaystay shirkii dib u heshiisiinta ee Kenya ee ay ka dhalatay dowladda Federaalka ilaa iyo haddana Dowladda Itoobiya way ka lug jiideysaa in ay si buuxda u taageerto Dowadda Federaalka” ayuu yiri Max’ed Cabdi Yuusuf oo sheegay in Dowladda Itoobiya ay dalka Soomaaliya ka fuliso arrimo fara badan oo aysan ka warqabin Dowladda Federaalka oo ay ugu horeyso xafiiska haatan ay ka furatay Magaalada Hargeysa, wuxuuna intaa sii raaciyay “Haddii aan Dowladda Itoobiya laga hortagin waxaan imaan doonta in ay xafiisyo kale ay ka furato gobalo kale ee Soomaaliyeed iyadoo aysan ka warqabin Dowladda Soomaaliya”.

Inkastoo Ra’isul Wasaare Geddi uu taageero ka helay Baarlmaanka haddana Xildhibaan Max’ed Cabdi Yuusuf iyo Xildhibaano kale kuma aysan qancin hadalka Geeddi.

Ururka Daawo yaqaanada Soomaaliyeed oo dib u habeyn lagu sameeyay..

Kulan Mudo tobaad ah u socday xubnaha Ururka Daawo Yaqaanada Soomaaliyeed (Somali Pharmecist Association) loogana hadlayay sidii dardar loo gelin lahaa howlaha ururkaasi ayaa lagu soo gebagabeeyay Magaalada Muqdisho.

Xubnihii ka qaybgalay shirkaasi oo halkaasi ka hadlay ayaa waxa ay si aad ah uga doodeen sidii uu ururku howlihiisa u balaarin lahaa, waxaana dood dheere iyo falanqeyn kaddib lagu isku raacay in ururka dib u habeyn lagu sameeyo, waxaana Guddoomiye loogu doortay Shiikh Dheere Cali Dheere.

Guddoomiyaha oo doorashadiisii kaddib u waramay saxaafadda ayaa waxa uu sheegay in ururkaan wixii haatan ka dambeeya uu ku shaqeyn doono sidii Dadka Soomaaliyeed u heli lahaayeen daawo tayo leh, waxa uuna u soo jeediyay dadka ka ganacsada daawada dhacday ama midda is bedeshay in ay gubaan, waayo ayuu yiri shacabka Soomaaliyeed u adkeysan karaan dhibaato hor leh, waxa uu sheegay in Dowladda Federaalka ay kala kaashan doonaan sidii wadanka loo keeni lahaa daawo tayo leh oo dadka wax u tarta.

Odoyaal dhaqameed Soomaaliyeed oo ka qaybgalay kulan ka dhacay Maali..

Maalintii shalay ahayd ayaa xarunta Majmaca Culumada Soomaaliyeed lagu qabtay kulan ay ka soo qaybgaleen 9 xubnood oo Odoyaal Dhaqmeed ah oo ka qaybgalay kulan diimeed ka dhacay magaalada Taariikhiga ah ee Tubugto ee Wadana Maali, waxaana kulankaasi soo qaban qaabiyay Hogaamiyaha Wadanka Liibiya Mucamar Al-Qaadi.

Xubnahaan oo uu hogaaminayay Shiikh Axmed Cabdi Dhicisow ayaa waxa uu sheegay in Magaalaga Tubugto ee Maali ay tahay Magaalo taariikhda Islaamka Qiimo weyn uga fadhiya, waayo waxay xarun u ahayd faafintaanka Diinta Islaamka ee Galbeedka Afrika. Xubnihii halkaas ka hadlay waxaa kalloo ka mid ahaa Maxamuud Cali Ugaas, waxa uuna sheegay in kulankaasi Salaadihii Casirka iyo Maqribka uu tujiyay Hogaamiyaha Wadanka Liibiya Mucamar Al-Qaadir oo ah hogaamiye ay ka go’an tahay sidii uu isugu keeni lahaa Islaamka, waxa uuna Ugaasku u mahadceliyay Hogaamiyaha Liibiya Mucamar Al-Qaadi.

Waxaa kalloo ka hadlay Axmed Qani Xuseen Axmed oo isna ka qaybgalay kulankaasi ayaa waxa uu sheegay in dadkii ka qaybgalay kulanakaasi ay aad ula yaabeen waxa ay Dadka Soomaaliyeed isku haystaan maadaama ay yihiin dad isku dhaqan iyo Diin ah, waxa uuna u soo jeediyay dadka ka hurinaya colaadhaa Magaalada Muqdisho in ay dhibka ka daayaan dadka, waxaana ka mid ahaa xubnihii ka qaybgalay kulankaasi Axmed Xuseen Xaaji, Mahdi Malaaq Xaaji Nuur, Axmed Cabdi Dhicisow, Max’ed Nuur Xareed, Sayd Cumar Macallin Abshir, Cali Shiikh Max’ed, Maxamuud Cali Ugaas iyo Garaad Yuusuf Dubad Jeexow.

Sidoo kale waxay ka qaybgaleen Odoyaashaani xus loo sameeyay dhalashadii Nabiga (NNKH).

W/.D: Amiin Yuusuf Khasaaro
E-Mail: amiinkhasaaro@hotmail.com