WARARKII MAY 14, 2006
-
Cabdi Qaybdiid “waan la socdaa ballankii aan qaaday laakiin haatan waxaa
la isugu yimid..
-
Kulanka Baarlamaanada
Adduunka ee Nairobi oo lagu go’aamiyay in taageero loo fidiyo Dowladda
Federaalka Soomaaliyeed..
-
Mareykanka oo warar kala
duwan oo la xiriira Soomaaliya ay ka soo baxeen..
-
Jaamacadda Carabta oo
sheegtay in Argagixisada Soomaaliya ku sugan la qaban karo haddii la
taaageero Dowladda Federaalka..
- Madaxweye C/llaahi
Yuusuf oo Baaq u soo jeediyay Kooxaha ku dagaalamaya Muqdisho ..
- Maamul u sameynta
Gobalada Baay oo la isku maandhaafsan yahay...
-
Manhal Speciality Hospital waa cusbitaal casriya oo Hargeisa
laga furay.
- DEEQO KALA DUWAN
OO LAGU WAREJIYEY G.G.A.S
-
Manhal Specialty Hospital waa cusbitaal casriya oo Hargeisa laga
furay.
Cabdi Qaybdiid “waan la socdaa
ballankii aan qaaday laakiin haatan waxaa la isugu yimid..
Cabdi Xasan Cawaale Qaybdiid
ayaa shalay hadal ka soo saaray dagaalada ka socda Magaalada Muqdisho ee u
dhexeeya Isbahaysiga uu xubinta ka yahay ee la dagaalanka Argagixisada iyo
Midowga Maxaakiimta Islaamiga ah, waxa uuna Cabdi Qaybdiid sheegay in
dagaalkaasi uu yahay mid lagu baacsanayo kooxo iyagu doonaya in ay gabaad
siiyaan wax uu ugu yeeray Kooxo argagixiso ah. Cabdi Qaybdiid ayaa sheegay
in Isbahaysiga la dagaalanka Aragagixisada uu doonayo in uu nabad ku soo
dabaalo dalka isla markaana uu Bulshada dhibaateysan ka dul qaado kooxaha
dhibaatada ku wada oo uu ula jeeday Midowga Maxaakiimta Islaamiga ah,
wuxuuna tilmaamay in uusan isagu jecleyn in dagaal uu ka huriyo dalka
Soomaaliya isla markaana uu galo dagaal dambe laakiin uu haatan ka fursan
waayay, isagoo sheegay in uu horey uga balanqaaday shacabka Soomaaliyeed in
uusan gali doonin dagaal dambe oo dhaca. “waan la socdaa ballankii aan
qaaday, laakiin haatan Nafsadeyda ayaa la iigu yimid oo waxaa la doonayaa in
nala waxyeeleeyo Aniga iyo Shacabka” ayuu yiri Cabdi Qaybdiid oo intaa ku
daray “Waxaa soo baxay koox ujeedo gaar ah wadata balse ku gambaneysa magaca
Maxkamadaha Islaamiga ah”. Cabdi Qaybdiid ayaa ku tilmaamay in heshiis laga
gaaro Dagaalada Muqdisho ay ku imaan karto in Maxkmaduhu ku laabtaan
fariisimahooda isagoo ku eedeeyay in ay caadeysteen weeraro ay ku soo
qaadaan Isbahaysiga, dhinaca kale Maleeshiyad ka amar-qaata Isbahaysiga ayaa
la dhoobay wadooyinka ka soo gala Magaalada Muqdisho dhinacyada Afgooye,
Koontaroolka Balcad, Dayniile, wadada Xeebta iyo Ceel-Macaan ah ee Marka
taasoo cabsi weyn ku sii dhalisay dadkii awalba ka rajo qabay in ay hakadaan
dagaalada.
Kulanka Baarlamaanada
Adduunka ee Nairobi oo lagu go’aamiyay in taageero loo fidiyo Dowladda
Federaalka Soomaaliyeed..
Kulankii Baarlamaanada
Adduunka ee ka soconayay todobadii casho ee la soo dhaafay Magaalada
Nayroobi ee Dalka Kenya ayaa gebgabadiisii shalay lagu go’aansaday in la
taageero Dowladda Federaalka Soomaaliya
Mr. Kibere oo ah
Guddoomiyaha Baarlamaanka Dalka Kenya ayaa ugu baaqay xubnihii Baarlamaanada
Adduunka ee ka qaybgalay shirkaasi in ay taageeraan Dowladda Federaalka,
maadaama ay ka soo kabaneyso Dagaalo sokeeye, ayuu sheegay in ay u baahan
tahay oo keliya taageerada beesha Caalamka.
“Waxaan waddo dheer u soo
marnay sidii aan Soomaalida qaybaheeda kala duwan u heshiisiin lahayn,
waxaana muuqata in aan miraheedii helnay, hadidi aan nahay Beesha Caalamka,
waxaa loo baahan yahay in aan taageer-no Dowladda Federaalka” ayuu yiri Mr.
Kibere.
Guddoomiye Shariif Xasan
ayaa isna muujiyay sida ay Dowladda Federaalka ugu faraxsan tahay ka
qaybgalka kulanka Baarlamaanada Adduunka, taasi oo uu ku tilmaamay in ay
horseedi karto Dimuquraaiyad ka dhalata Geeska Afrika. Qaar ka tirsan
Wadamada Afrika ayuu ku dhaliilay Guddoomiyuhu in ay iska iloobeen arrimaha
Soomaaliya, kuwaasoo ay ka mid yihiin K/Afrika, Muzanbiik, Naamiibiya,
Eriteriya iyo Jabuuti oo uu sheegay in xornimadooda ay Soomaalidu qayb
libaax ka qaadatay.
Mareykanka oo warar kala
duwan oo la xiriira Soomaaliya ay ka soo baxeen..
Dowladda Mareykanka ayaa
waxaa ka soo baxay warar is khilaafsan oo la xiriira dhinaca Dagaalka ka
socda Magaalada Muqdisho, iyadoo horey loogu eedeeyay in uu Mareykanku lug
ku leeyahay sii socoshada dagaalka u dhexeeyay Midowga Maxaakiimta Islaamiga
ah iyo Isbahaysiga la magacbaxay la dagaalanka Argagixisada, iyadoo taasi
jirto ayaa waxaa wararkii ugu dambeeyay ee ka soo baxayay Dowladda
Mareykanka u muuqdaan kuwo iska hor imaanaya. Magaalada Washington ayaa
ninka u qaabilsan Dowladda Mareykanka Qaramada Midoobey John Bolton uu
beeniyay warar sheegayay in Mareykanku uu taageero siinayo Kooxaha
Qabqablayaasha dagaalka ee Soomaaliya, waxa uuna ku tilmaamay kuwo aan sal
iyo raad toona laheyn, waxaa iyana dhankeeda ka hadashay gabadha ku xigeenka
uga ah Mareykanka Howlgalada Geeska AFrika ee Ururka Al-Qaacidda lagula
dagaalamayo iyadoo sheegtay in Mareykanku uu taageero hiil iyo hooba la
garab taagan yahay kuwa iyagu doonaya in ay Argagixisada ka sifeeyaan
Soomaaliya, waxayna sheegtay in Mareykanku si kasta oo uu uga hortagi karo
Argagixisada ku dadaali doono.
Hadaba Wararkaan is
khilaafsan ayaa ku soo beegmay kaddib markii horey Mareykanka loogu eedeeyay
in uu taageero siinayo Kooxaha Dagaal oogayaasha ah ee Soomaaliyeed
Jaamacadda Carabta oo
sheegtay in Argagixisada Soomaaliya ku sugan la qaban karo haddii la
taaageero Dowladda Federaalka..
Samiir Xusni oo ah Mas’uulka ugu qaybsan
Jamaacadda Carabta arrimaha Soomaaliya ayaa shaaca ka qaaday in ay sahlan
tahay gacan ku dhigista ragga argagixisada ah ee Caalamka ka baadi goobayo
Soomaaliya, taasoo uu tilmaamay in la hirgelin karo haddii taageero farsamo
iyo mid dhaqaale loo fidiyo Dowladda Federaalka KMG ah fadhigeedu yahay
Baydhabo.
Mas’uulkaasi ayaa carabka ku dhiftay in
ay jirtay tababar yari haysata Xukuumadda Federaalka taasoo uu u aaneeyay
isla wasiiro Xukuumaddaasi ka tirsan oo ku dhawaaqay Isbahaysi dagaalna kula
jira Maxaakiimta Islaamiga.
Samiir Xusni oo u waramay Taleefishinka
Al-Jasiira ayaa sheegay in Caalamku uu ka gaabiyay wax ka qabshada arrimaha
Soomaaliya, “Dowladda Federaalka si ay gacanta ugu soo dhigto ragga la doon
doonayo ee baxsadka ah waa in la taageeraa” ayuu yiri Samiir Xusni, wuxuuna
rajo ka muujiyay in dagaalada Muqdisho ay soo afmeermi karaan haddii ay
gacmaha la gasho Beesha Caalmka xaaladda adag ee ka soo cusboonaatay
Soomaaliya.
Barre Hiiraale “Ragga isaga soo horjeeda Muqdisho
waa kuwo aan ka naxeyn shacabka dhibaateysan ee...
Wasiirka Dib u dhiska iyo
dib dejinta Dowlada Federaalka Barre Aadan Shire (Barre Hiraale) oo
maalintii shalay ahayd shir jaraa’id ku qabtay Magaalada Kismaayo ee Gobalka
J/hoose ayaa ka hadlay arrimo dhowr ah oo ay ku jirto Xaaladda Magaalada
Muqdisho iyo arrimo baryahan dambe ku soo kordhay Magaalada Kismaya oo Xagga
amniga la xiriira.
Barre Hiiraale ayaa wax laga
xumaado ku tilmaamay dagaalada ka soo cusboonaaday Magaalada Muqdisho,
taasoo uu sheegay in waxa wax ku noqonaya ay yihiin shacaka maatada ah ee
aan waxba galabsan, wuxuuna Barre sheegay in haddii ay dirirtaasu ay sii
socota ay keeni karto burbur cusub oo ku yaamada Magaalada Caasimadda ah ee
Muqdisho iyo dadkeeda oo barakac hor leh uu ku dhaco.
“Ragga isaga soo horjeeda
Magaalada Muqdisho, waa kuwo aan ka naxin shacabka tabaaleysan ee dagaaladu
galaafteen, ee u baahan in la samatabixyo, balse aan u baahneyn dab hor leh
oo lagu sii horiyo” ayuu yiri Barre Hiiraale oo ugu baaqay labada kooxood in
ay sida ugu dhaqsiyaha badan u joojiyaan dagaalada isla markaana ay wixii
khilaaf ah ku xaliyaan wada hadal.
Dhanka kale Barre Hiiraale
waxa uu ka hadlay amni darada soo food saartay Magaalada Kismaayo, waxa uuna
sheegay in sida ugu dhaqsiyaha badan ay ugu howlgali doonaan ciidamada Nabad
sugida deegaankaasi ayna waxyaabo badan ka bedeli doonaan xagga isku socodka
Magaalada gudaheeda, uuna maamulkoodu qorshe u sameyn doono si loo xaqiijiyo
nabadgelyada si aysan ugu soo dusin waxa uu ku tilmaamay in ay carqalado ka
dhex wadaan Maamulka Isbahaysiga Dooxada Jubba iyo waliba Shacabka.
Madaxweye C/llaahi Yuusuf oo Baaq u soo jeediyay
Kooxaha ku dagaalamaya Muqdisho ..
Madaxweynaha Dowladda Federaalka C/llaahi
Yuusuf Axmed ayaa wax laga xumaado ku tilmaamay dagaalada ka socda
Caasimadda Dalka Soomaaliya ee Muqdisho, wuxuuna madaxweynuhu sheegay in
ragga wasiirada isku sheegaya ee dagaalada ka wada Muqdisho aysan sheegan
karin Dowladda, isagoo sheegay in Dowladdu aysan waxba u dirsan, aysanna
wakiil ka noqon karin.
“Ragga Muqdisha dagaalka ka wada waa kuwo
ka goostay dowladda, oo aanna diyaar u ahayn maslaxadda ummadda Soomaaliyeed”
ayuu yiri Madaxweyne C/llaahi Yuusuf oo sheegay in sida ugu dhaqsiyaha badan
wax looga qaban doono, inkastoo uu sheegay in wixii talaabo ah ee laga
qaadayo arrintaana ay u taalo Xukumadda iyo Baarlamaanka, balse uu isagu aad
uga xun yahay dhiigga ka daadanaya shacabka aan waxba galabsan ee Magaalada
Muqdisho, iyadoo sidoo kale Madaxweynaha iyo wafdi uu hogaaminayo oo ka soo
ambabaxay Liibiya ayaa Uganda u yimid si ay uga qaybgalaan kulanka Madaxda
IGAD oo ka dhici doona halkaas.
Maamul u sameynta Gobalada Baay oo la isku
maandhaafsan yahay...
Waxaa wali uu is qabqabsi ka
taagan yahay sidii maamul loogu sameyn lahaa Gobalka Baay, iyadoo uu soo
dhawaaday waqtigii loo ballansanaa in maamulka degmooyinka la dhiso,
inkastoo darraad lagu guuleystay in maamul loo sameeyo Magaalada
Buur-Hakaba.
Muranka ugu balaaran ayaa la
sheegay in uu ka taagan yahay degmooyin ay ka mid yihiin Qansax Dheere iyo
Diinsoor oo ka wada tirsan Gobalka Baay, murankaas oo ku saabsan soo xulidda
xubnihii ka mid noqon lahaa maamulka cusub ee loo sameynayo Gobalka Baay.
Warar ayaa waxay tibaaxayaan
in ay jirto rajo ah in la xaliyo murankaasi si loo meel mariyo hadafka
maamulka loogu sameynayo Gobalka Baay.
Mar sii horeysay ayuu
Madaxweynaha Dowladda Federaalka ugu baaqay Odoyaasha iyo Siyaasiyiinta Baay
in ay si deg deg ah u dhisaan maamul uu yeesho Gobalka oo wax ka tara
arrimaha amniga.
W/D: Amiin Yuusuf Khasaaro
E-Mail:
amiinkhasaaro@hotmail.com
Manhal Specialty Hospital waa cusbitaal casriya oo Hargeisa laga furay.
Indhuhu waa
nimcooyinka Rabbi bixiyo kuwa ugu qaalisan.Waxaana dareemi kara qofka
aragiisa waaya iyo qofka haya.Culayska qofka indhaha li’i kuma koobna isagoo
keliya laakiin waxuu saameeya inta la nool oo waxuu u baahan yahay qof si
joogto ah u gacan qabta oo ugu adeega. Sidaa awgeed waa culays haysta qofka,
qoyska iyo bulshadaba.
Waxaa
04/05/2006 laga hirgeliyey magaalada Hargeysa Cusbitaal Casriya oo ku
qalabaysan qalabkii ugu dambeeyey ee ah adeegga indhaha, Cusbitaalkan oo uu
maal-geliyey Ururka Samafalka ee Manhal.
Cusbitaalkan
oo laga heli doonno adeegga indhaha 95% sida uu noo xaqiijiyey Dr. Maxamuud
Axmed Maxamed Shiine oo ah dhakhtar ku takhasusay Indhaha ahna maamulaha
Cusbitaalka Manhal, mar aannu Dr. Shiine wax ka waydiinnay kharashka ku bixi
kara tusaale ahaan qofka la qalayo iyo qiimaha uu debedda ka joogo? Ayaa
wuxuu Dr. shine noo sheegay in haddii qofka loo qaado debedda uu noqonayo
kharashkiisu ugu yaraan $2000.00 halka ay iyagu ku qalaan oo qudha $30.00.
Mar aannu
wax ka waydiinnay isna Eng. C/raxmaan Xuseen Axmed oo ka tirsan madaxda
sarsare ee ururka Samafalka ee manhal oo isna goobta ku sugnaa ayaa wuxuu
sheegay in uu cusbitaalkani yahay mid casriya oo loogu talo galay inay dadka
danyarta ahi ka faa’iidaysataan, isaga oo qalabka yaallaa uu yahay kuwa ugu
dambeeya ee dunida casriga ah laga isticmaalo, waxana laga yaabaa qalabka
cusbitaalkan yaalla inaanay waddamo badan oo aduunka ka midi haysan.
Waxaa
cusbitaalka manhal iminka ka socda qalliin bilaasha oo ay maalgelinayaan
WHO, Manhal Charity Organization, Hargeisa Group Hospital, Arab Medical
Union.
Dr. Maxamuud
Shiine oo ka waramaya xaalladda indha la'aanta iyo sida wax looga qaban karo
ayaa wuxuu yidhi: "Ka warran haddii dadkaa indhaha la’ 80% in ka badan
aragoodii dib loo soo celin karo, oo weliba qiimaha aragooda loogu soo
celinayo uu ka yar yahay qiimaha aad ku qadaysiiso Asxaab aad jeceshahay
inaad maalin wada qadeysaan, mase ogtahay inta aad qadeynaysaan in ugu
yaraan labo qof aragooda la soo celin karo.
Magaalo
kasta oo dalkeenna ka mid ah waxaa laga helayaa boqolaal qof oo indhahoodu u
cadilan yihiin wax aan ka badnayn $30. Ma kula tahay inaan si wadajir ah uga
wada qayb qaadanno sidii dadkaa loo caawin lahaa,oo mugdiga ay ku jiraan
looga soo saari lahaa, ifkana dib loogu soo celin lahaa.
Intaa waxaa
dheer daaweynta qofka indhuhu bukaan waxaa lagu soo koobi karaa $1. Taa
micnaheedu waa $100 waxaad indhaha ugu jeexi kartaa Saddex qof oo indha
la’, waxaadna ku daaweyn kartaa 10 qof oo indhuhu bukaan. Miyaanay aheyn
wax lagu farxo inaad aragto qof shalay la hagayey oo maanta indhihiisii ku
soconaya aan cidna u baahnayn.
Ismail
Hussein Mohammed
manhalhospital@hotmail.com
Tel:
658565, 253638, 920202: Mobile: 577471, 524621, 286606
Email:
kaalmeeye@hotmail.com
Ref: G.G.A.S/43/06
Date: 13/05/2006 15/04/1427.H. Muq.Somalia.
DEEQO KALA DUWAN OO LAGU WAREJIYEY G.G.A.S
Waxaa lacago kala duwan la gudoonsiiyey G.G.A.S. Kuwaas oo wax loogu
qabanaayo dadka abaaraha & macluushu haleeshay waxeyna lacagaasi ka kala
yimaadeen:-
1.Urur dalka Holand ka dhisan oo la yiraahdo Islamic Human Relief wuxuuna
bixiyey (11630$) isagoo horeyna ku deeqay dhar 101 bandal ah dharkaas oo dib
loogu iibiyey lacag dhan (8080$) waxaana lacagtaas markii lacag kale guddigu
ku daray lagu iibiyey 1500 bacood oo loo qaybiyey qaxootiga magaalaga
muqdisho, Hadaba isu geynta labadaas lacagood ee holand ka timid waa (19710
$).
Waana dalkii labaad ee ugu deeqda badnaa dhinaca jaaliyadaha ilaa iyo hadda.
2. waxaa kale mar 3-aad g.g.a.s ku wareejiyey ururka Talyaaniga ah UNA
SCUOLA PER LA VITA, isagoo soo marsiiyey wakiilka ururkaas Sareedo cali
Abiikar, lacag gaareysa (40,000$) Taasoo raashin lagu iibiyey laguna
qaybiyey meelo ka mid ah Gobolka G/Gaduud Sida; Mareergur , Guriceel,
Ceeldheere, Matabaan, Dhuusomareeb, Gadoon, iwm.
3. Dalka UK, gaar ahaan Jaaliyadda Soomaaliyeed eek u nool Magaalada SHERFIL
ee dalka Ingiriiska waxay G.G.A.S Soo gaarsiiyeen 05/05/06, lacag tiradeedu
dhan tahay ($1857), Waxaana ku saxeexnaa lacagtaas Cali Mowlid.
Mahad celin Guddiga Gurmadka Abaaraha Soomaaliyeed waxay Jaaliyadaha
soomaaliyeed ee dalalka aan kor ku soo sheegnay uga mahad celinayaan
deeqdaas wax ku oolka ah ee ay u soo direen walaalahooda soomaaliyeed ee ku
dhibaateysan gobollada ay abaaruhu wax yeeleeyeen.
Waxaanuna balan qaadeynaa inaan si deg deg ah u gaarsiin doono meelihii
loogu talo galay deeqdaas, Inshaa’Allaah.
BAAQ XABAD JOOJIN OO DEG DEG AH.
URURKA USC\SNMC BEESHA MEHERI EE
KOONFURTA SOMALIYA CARAB YAXYE SAALAX OO BAAQ NABADEED U JEEDINAYA
LABADA ISBAHEYSI.
Waxaan baaq nabadeed oo deg deg ah ugu
baaqeynaa labada isbahaysi ee maxaakiimta islaamiga ah iyo isbahaysiga
kale in aay si rasmi ah u joojiyaan dhiiga qulqulanayo aayna
badbaadiyaan masaakiinta rayidka ah ee maatada ah kana soo qaxaya
guryahoodii iyagoo meereysanayo dariiqyada magaalada muqdishu.
Ma waadan illaah ka baqeynin ma waadan
xasuusan suuratul maa’ida aayada 31 oo dhaheysa qofkii qof dilaa waxa uu
la mid yahay in uu dadka oo dhan dilay, qofkii qof badbaadiya waxa uu la
mid yahay asaga oo dadka oo dhan badbaadiyay, hadaba alle ka baqa oo
joojiya xabada walaalayaal.
Dhiiga aad daadineyso iyo shacabka aad
dileyso waa walaalkaa, waa aabahaa, waa hooyadaa, waa owoowgaa, waa
caruurtaada, waa walaashaa, marka miyaadan damiir laheyn aad dadkaada ku
bad baadiso war xayawaankaba wuuw badbaadiyaa dadkiisa haddii la soo
weeraro caruurta aay dhaleen.
Hadaba is xisaabi intii uu alle ku
xisaabinin joojina xabada shacabkaadana badbaadi.
Wabillaahi Toowfiiq.
Assalaamu Caleeykum Wr Wb
Faafin: SomaliTalk.com | May 14, 2006