Buug sheeko cusub oo afsoomaali ah
WAR
SAXAAFADEED – May 14, 2005 (6 Rajal Hore 1426)
RSOL-05/2005-1
Buug sheeko cusub oo afsoomaali ah (A new Somali novel)
Pisa (RSOL).
Shirkadda buugaagta ee Ponte Invisibile Ed. waxa ay ugu bishaaraynaysaa
akhristayaasha in ay maanta soo saartay buugga cusub ee la magac baxay “LADH”.
Waa sheeko Af Soomaali ah oo uu qoray Cabdillaahi Cawed Cige. (edleh@hotmail.com)
Buuggani wuxuu kow u yahay taxane sheekooyin ah oo la magac baxay “Cirsankayeedh”.
Waa suugaan dhiskeedu ku salaysan yahay hindisaha iyo male-awaalka abwaanka
curiyay.
Qoraagu waa gabayaa in badan warbaahiyayaasha internetka iyo wargeysyadu ay
daabaceen gabayadiisa. “LADH” waa buuggiisii u horeeyey. Waxa uu si
farshaxannimo leh ugu soo bandhigay sheeko male-awaal ah (novel). Waa
qiso murugo leh oo uu gebi ahaanba hindisay qoraagu, balse aad ugu dhow
xaqiiqooyin badan oo dhacay sannadihii u danbeeyey. “Waa sheeko qof wal
oo soddonkii sannadood ee u danbeeyey garaad lahaa uu iska dhex arki karo”
sidaa waxa yidhi Jama Musse Jama oo soo akhriyey buugga, kana mid ah madaxda
shirkadda Ponte Invisible Ed.
Dalabka LADH, laga bilaabo maanta, waxaa loo diri karaa e-mail ahaan slbooks@redsea-online.com.
Faahfaahin dheeraad ah iyo habka dalabaadkaba ka eeg bogga internetka ee
http://www.redsea-online.com/books/ladh
Warbixinta buugga oo kooban:
Summadda: ISBN 88-88934-04-9 (pbk)
Jimidh:
cm 12.2x19.6; 179 pp,
Daabiciddii kowaad: Rajal Hore 1426 / May 2005.
Qiimaha: US$ 14.50.
PONTE INVISIBILE Ed.
Waa
shirkad soosaarta buugaagta dhaqannada iyo afafka kala duwan oo fadhigeeda
dhexe uu yahay magaalada Pisa ee carriga talyaaniga. Xagga afsoomaaliga si
gaar ah waxay isugu howshaa ururinta, faafinta iyo dhiirrigelinta suugaanta
iyo qoraalada afsoomaaliga ah. Ka eeg faahfaahin dheeraad ah http://www.redsea-online.com.
Qoraaga Buugga:::
Cabdillahi
Cawed Cige wuxuu muddo ku beegan sannadkii 1965kii ku dhashay goob u dhow
jeexa Ceel Madoobe oo boqol iyo waxoogaa km dhinaca Hawd ka xigta magaalada
Burco.
Wuxuu waxbarashadiisii ugu horraysay ka
bilaabay mareegta maqasha halkaas oo uu ka qaybqaadanjiray qool gelinta
naylaha yaryar. Wuxuu u gudbay barashada sida Waxaraha yaryar qalwada loogu
guro. Waxa taas u xigtay raacista maqasha oo khibradihii uu ka korodhsaday
ay ka mid ahayd in marka dhalcadu kululaato maqashu haraaryo u go'do.
Muddooyinkii ku xigay wuxuu u tallaabay
mayricista adhiga, isaga oo ugu dambayntii gaadhay heer uu ka qaybgalo
aroorka.
Sannadihii u dhexeeyay 1975 - 1984 wuxuu
sida farta loo qoro ku bartay dugsiyada Shiikh Ibraahim iyo Farsamada
Gacanta ee Burco(ITB). Sannadkii 1985kii ayuu ka gudbay badaha wuxuuna u
tallaabay carriga Ingiriiska oo uu qaxooti ku yahay.
Qoraaga Cabdillaahi Cawed Cige kala xiriir emailka:
edleh@hotmail.com
IIDHEH: Daabacaad SomaliTalk.com | May 15, 2005
Kulaabo bogga www.SomaliTalk.com
Daabaco
Boggan | Print