Shaafici Xassan Maxamed
E-mail:
mi99mosh@chl.chalmers.se
Toogaysi
Sannadihii kontonaadkii qarnigii dhammaaday oo hadda laga joogo konton
sannadood ku dhawaad ayaa waxaa rajo laga qabey madaxbannaani soomaaliyeed,
waxaana dadkii hawlaha rajadaas loogu gudbayey u guntanaa ka mid ahaa
Cismaan Keenaddiid.
Gabaygaan ”Toogaysi” oo nus qarniga jira waxaa la moodaa in maanta la
tiriyey marka laga eego dabeecadaha bulshada uu ka hadlayo iyo
dhaqdhaqaaqooda, waxaana yaab leh in uu canaantiisa kowaad ku bilaabay dad
badan oo maansada tirinteeda ku yaaca, kuwaas oo uu ku yar yahay mid hibo u
leh in uu maansoodo. Sida uu gabaygaan Cismaan Yuusuf-Keenadiid ugaga hadlay
maansada iyo siyaasaddu waa si dadka aan ku fiicnayn labadaas hawlood waano
ugu filan. Labada arrimood oo uu gabaygaani ku saabsan yahay midda hore
maaddaama ay farshaxan ka faalloonayso wuxuu u bilaabay qaab farshaxan ah,
arrinta danbase wuxuu uga hadlay si qayaxan, maxaa yeelay waxay ku wajahan
tahay bulshada caadiga ah.
Sangood aad u tabaraystay oo, tamashle loo haysto
Dhallinyaro tilmaamani hadday, talo ku soo fuusho
Tijaabada ayaantaas wax baa, la istusaayaaye
Mar hadday isugu tookhayaan, tabaha fuullaanka
Nin waliba baxdow uu tabcuu, toocinahayaaye
Tawalna kama hayoo waa wax ay, hor u tacliimeene
Ducaqabe tallaabsiga fudayd, togaya caynaanka
Tiigsiga kobtiyo jeenyuhuu, tarantarsiinaayo
Tumashada kul iyo xawli buu, taransanaayaaye
Tinhawleedka guudkiyo kolkuu, tiirsho madaxiisa
Tartarradiyo feeraha hadduu, tahan ka reemaayo
Aburkuu tufaa suuncalyaha, qaar tif leeyahaye
Tafta marada iyo jeedalkuu, tuhunsanaayaaye
Toogaysigii nadiga iyo, tirinta geeraarka
Tabaalahakan salawgay dheguhu, taraddamaayaane
Magaankaan tamcaarnayn haddii, looga tago boorka
Timihii qanoodiyo kolkuu, togayo haalqooqa
Sida taarka duuluu hawada, sii tafahayaaye
Taagsiga butaacada kolkuu, tahanti boobaayo
In kastuu wadaagaha tudcoo, tuumiyaha haysto
Ninkaan taabi karahayn inuu, tuuro waw halise
Gabayguna haddaan tii la marin, waa tabtoo kale’e
Tusmaduu lahaa iyo haddaad, tubaha dhaafsiisid
Ama aadan ta’wiishiis aqoon, tacaddi kaa raacye
Taftar uu ku yaal baa jiroo, loo tammadiyaaye
Temmin haddii aan loo yeelin wuu, turunturroodaaye
Toolmoonidiis waa naxwaha, inaad taqaannaaye
Xikmad lagu tebaayaan darteed, ugu tacjiilnaaye
Fahmuu nagu tallaallaa cilmina, wuu na tarayaaye
Taariikhna waw yahay raggii, tegey xusuustoode
Tif waxaan dhammayn oo yar bay, tawsi ka heshaaye
In kaskoo togguu ku habbanaa, laga tallawsiiyo
Inuu taabbaggalay buu ninkii, tiriyey moodaaye
Ninbana taagti hadalkiisa wuu, toosinahayaaye
Nimanyow turaabtaa wax la eg, tuumiyaa jira’e
Tuduc yar baa ka roon waxakan ay, tira badneeyeene
Aniguna ma tahandhaafiyee, waan tukubiyaaye
Rag goortuu taraarsiiyo baan, yara tashiilaaye
Tigimo aan u aasa jiriyo, tiirar xoog badane
Waan tabaabushayn jirey halkiyo, tabargalkaygiiye
Waxsaan taaban jirey dani kolkay, igu tahbiibtaaye
Marna waygu tiixaa anoon, kuba tashoonayne
Intii toban casho ah baan kolkaan, taxo u kaadshaaye
Sida talmiid ardaya baan laxniga, uga tiraayaaye
Goortaan tartiibshaan wax uun, kaga tiraabaaye
Laguma taago meel jiir ah iyo, taallo dhaladeede
Dhabbo uu ku tiixayn karaa, lagu taxaabaaye
Sidaydaa tastuuraha maddada, lagu tilmaamaaye
Tooraha jidkiisa ah hadduu, taako ka habaabo
In uu tacabkhasaar noqonayoo, tegayo qaabkiisu
Waatan la isku wada taxallujaye, taa ha la ogaado
Afartaa ta’da intaan ka deyey, maysku wada tiirshey
Ma tuurtuuro maansada ninkii, tirin yaqaannaaye
Ma isku taaray teelteel ma galo, tayda weligeede
Toobiyaha jidkeediyo waddada, togan ma qaadsiiyey
Ma takhtariyey soomaali waad, igu tuhmayseene
Tanna waa dhexdeenniyo rabshada, taalla gudeheenna
Istiqlaalkii lagu taami jirey, tiinki soo durugye
Haddaan tabar u leennahay xornimo timi waraaqdeede
Waakaa talyaannigu sallimay, tacabbadii qaare
Taxkuumadi ma fududee haddaan, taag u heli wayno
Tiiraayo iyo ciil hadday, taawo nagu reebto
Tagbiir xumo darteed xaal hadduu, toosi kari waayo
Toobadda iyo diintii haddii, tiginka loo qaaday
Tiirrida cad qaarkeen hadduu, taabac u ahaaday
Ajnebi aan turaynini hadduu, ina tabaaleeyey
Tabcada iyo sirtoodii haddii, taxaddar loo waayey
Sidee lacag ku tacabtaa hadday, toogadeen noqotay
Nin waliba tawaan yara hadduu, tiisa ku ekaaday
Xurmaa taqaddum keentee haddii, la istixgelin waayey
Toltol iyo qabiilnimo haddii, la ina taabsiiyey
Teersana rag baran haddii, taladii loo dhiibey
Taageerkii leegada haddii, laysku tuhumaystey
Dadkii tuunsanaan jirey hadduu, kalataggii joogo
Tallaahidiyo dhaartii haddii, la iska wada tuuray
Tafarruqa kuwii inagu ridey, toodii suubsada’e
Tacluus aan baxayn iyo bugtay, nagu tallaaleene
Tubtii inaga leexshiyo jidkii, inagu toosnaaye
Tashigiiba sida loo gafaan, weli tebaayaaye
Tawfiiq ma noqon wiilashii, taajka loo xiraye
Tahluukiyo wareer baa ka iman, tay ku kacayaane
Ninkii tiro yar maalkiisa waa, lagu takooraaye
Marakaniga nagu taagan baa, taabay jahadiiye
Amxaarana tahdiid iyo waxay, tiri na loo sheegye
Cadow soo tashaday oo cabsida, loo tawalay ruuxa
Laye tororog uun bay hayaan, tiilka madaxdiiye
Dawladnimo tabtaa lagu dhaqaa, taddi sow ma aha?!
Shaafici Xassan Maxamed
E-mail:
mi99mosh@chl.chalmers.se
Afeef: Aragtida gabaygan waxaa leh qoraaga ku saxiixan