Soomaaliya iyo Qabqablayaasha Dagaalka
Waxaa cad in adduunku ku
daalay inuu fahmo masiibada Soomaaliya ka taagan meesha ay
ka soo unkuntay. Waxaad kalood mooddaa in dadka Soomaalidu
badankood quus ka taagan yihiin arrimaha dalkooda.
Soomaaliya waxa ay noqotay unique marka loo fiiriyo
wadammada adduunka ee colaaduhu aafeeyeen.
Wax aan dhicin taariikhda
casriga ah (modern history) ayaa ka dhacay Soomaaliya. 14
shirweyne Qaran ayaa ku dhammaaday hal bacaad lagu lisay.
Sababtu waxa ay tahay marnaba gadaal looma eegin wixii la
soo maray. La isma weydiinin maxaa burburiyey
dowladnimadeenna, maxaa sababay daaduunka nagu dhacay?
Shir kasta waxaa laga
billaabaa oo mawduuca ugu horreeya looga hadlaa dhisme
dowladeed iyo sideen wax ku qaybsannaa. Xitaa la isma
weydiiyo sideen dowlad ku dhisi karnaa, nooca dowladda aan
dhisanaynaa waa tee? Qaran burburka nagu dhacay waxa ugu
weyn ee uu ina baday waxaa ka mid ah in xalka Soomaaliya
marti loogu wada noqday qabqableyaal arxan daran oo cid ay u
turayaan iyo cid ay ka turayaan aysan jirin.
Qabiil walba waxaa sutiga u
haya kii ugu aqoon yaraa, ugu caqli xumaa, ugu jaahilsanaa,
ugu macangagsanaa, ugu naxariista darnaa. Aqoonyahankii
waddanka intoodii badnaa waxay ku daba fayleen qabqablihii
ku qabiilka ahaa, waxaana ku dhacay maskax-shuban (brain
drain).
Dhismuhu waxa uu ka
billowdaa aasaaska, haddii aasaasku qaldamo way adag tahay
xaqiiqo ahaan sida dhismahaasi isu hayn lahaa. Wax walba oo
la dhisayo waxaa muhiim ah in la waafajiyo runta gudaha
taalla [reality on the ground]. Shirkii Carta dad badan ayaa
ku dooda inaan la waafajinin 'runta gudaha.' Shirkan hadda
ka socda Kenya wuxuu isna u muuqdaa in la hor boodaayo
xaqiiqada, laakiin waa fursad weli dhiman.
Marka laga hadlayo conflict
resolution, culumadu dhibaato uma arkaan in bulsho lagu
heshiisiiyo isir isir ama qabiil qabiil. Soomaaliya waxaa
dhici weyday in qabiilladu xitaa ku heshiiyaan maamul dhexe,
sida Imaaraadka Carabta, Rwanda, Burundi iyo wadammo kale oo
dunida ku yaalla.
Taas, waxa ay caddeysay in
waxa dalka isku haya aysan ahayn qabiilladii dalka deggenaa,
balse ay yihiin qabqablayaal shufto ah oo ku owrkacsanaya
qabiilkoodii oo ka dhigtay dadkii ay ka dhasheen xaabo ay
dabka ku shitaan, kuna gaaraan hankooda hoggaaminta waddanka.
Qabqablayaashu waa nimankii uu Nuuraddiin Faarax,
novelistaha Soomaaliyeed ku tilmaamay inay la mid yihiin
maafiyada Talyaaniga.
Maxkamadeyntooda
Meelo badan
oo ka mid ah dunida waxaa laga sameeyey maxkamado qaada
dambiyadii dagaalka, sida Sierra Leone, South Africa,
Rwanda, Cambodia iyo kuwo kale. Waxay u eg tahay in Qaramada
Midoobay ay aqbali doonto in sida Sierra Leone loo furo
Soomaaliya maxkamad qaada dambiyada dagaalka, kaddib markii
muddo ay u xayirnayd la sugitaanka waqtiga la helo dowlad
awooddeedu ay waddanka oo dhan ku baahsan tahay.
Qabqablayaasha dagaalka Soomaaliya, waxaa la yaab leh
inaysan ka welwelsanayn in falalka ay gacmaha kula jiraan ay
yihiin wax ay maxkamad ku muteysan karaan. Dambiyada u
kaydsan waxaa ka mid ah; dambiyo dagaal, gumaadka dadweynaha,
xasuuq, qaarajin, barakicin, ka ganacsiba hubka iyo
daroogada, bixinta waraaqaha oggolaanshaha xaalufinta badda,
sunta qashinka warshadaha nuclear-ka, sameynta lacagaha
macmalka iyo etc.
"Qabqablayaasha
dagaalku waa kuwa ugu xun ee cadowga ku ah nabadda iyo dib u
heshiisiinta dalka, waxayna qaadi doonaan mas'uuliyadda
koowaad ee xanuunka Soomaaliya," sidaas waxaa yiri Prof.
Cabdulqawi Axmed Yuusuf, Tifatiraha buugga African Yearbook
of International Law, fadhigiisuna yahay Paris, horeyna
lecturer uga ahaan jiray Jaamacadda Ummadda Soomaaliya.
"Qabqablayaashu
waxay maja-xaabinayaan dadaal kasta oo lagu dejinayo
waddanka, laguna unkayo dowlad Qaran, maliishiyadooda
hubeysanna waxay dileen boqolaal kun oo Soomaali ah, hal
milyanna waxay ku qasbeen inay dibadaha soo miciinbidaan"
ayuu yiri Professor-ka oo dhowaan qoray qormada Preying
for a failed state.
Kursidoon
Xaqiiqada
ah in qabqablayaashu aysan lahayn wax ajande siyaasadeed ah
oo aan ka ahayn kursi-doon waxaa run ka dhigaya ficilladooda
la xiriira horumarinta ganacsiga aan sharciga ahayn (illicit
enrichment) iyo bililiqada dagaalka (war booty). Sida ay
qortay dhowaan jariiradda New York Times,
qabqablayaashu waxa ay ka soo horjeedaan inay dhisanto
dowlad waxtar leh (effective government), sababtoo ah waxa
ay ka walaacsan yihiin qatarta arrintaasi ay ku keeni karto
awooddooda aan xadka iyo sharciga waafaqsanayn.
Haddii
loogu yabooho midkood inuu madax ka noqdo dowlad la dhisayo
ma diidi lahayn, laakiin midna ma oggolaanayo dowlad kan
kale madaxweyne ka yahay. Sida la ogyahay "mar kasta oo ay
damcaan inay dhexdooda hoggaamiye iska doortaan waxay
doortaan shan hoggaamiye." Qaabka noocaas ah waa kan
hal-beegga u ah ama ay wax ku xushaan qabqablayaasha
dagaalku.
Dambiyada
dagaal waxaa qabqablayaasha la wadaaga xulufadooda ganacsiga.
Waa nimanka u haya qabqablayaasha raamusaalka ay ku faanaan,
sida garoomada diyaaradaha, dekedaha, kuwa ula xiriira
shirkadaha kalluumeysiga iyo muuska. Ganacsatada dagaalku,
waa kuwa dhowrkii sanaba mar soo daabaca lacagaha beenta ah.
Qaska oo idlaada iyo qabqablayaasha oo meesha ka baxa waxa
ay uga dhigan tahay gaba-gabada noloshooda.
Qabweynidooda
Caydiid,
waxa uu dhihi jiray "Waxaan metelaa 75% dadka Soomaaliyeed."
Cali Mahdi, waxa uu hadda ka hor yiri "Waxaan wakiil u ahay
98% dadka Soomaalida." Cigaal, waxa uu dhihi jiray "Dadka
aan metelo waa 2 milyan." Cabdullaahi Yuusuf, waxa uu
yiraahdaa "Puntland dadkeedu waa 2.5 milyan." Raajis, waxa
uu dhihi jiray "Dadka Soomaalida 24% waa reer Banaadir."
Mowliid Macaan, waxa uu yiraahdaa "Jileec iyo Jareer waxaa
badan Jareer."
Qoraaga
Haaruun Macruuf Xasan oo London jooga, waxa uu yiri "haddii
la isu geeyo tirooyinkaas iyo sheegashooyinkaas, 8-da milyan
ee Soomaalidu waxa ay noqonayaan 80 milyuun, taasoo
macnaheedu yahay in Soomaalidu ka badan tahay dhammaan
ummadaha ku nool bariga iyo bartamaha Africa."
Qabqablihii
ugu horreeyey ee dumar ah
"Magaalada
Muqdisho keligeed ayaa waxa ay leedahay lix qabqable dagaal,
mid kastana waxa uu koontaroolaa qayb yar oo uu deggan yahay,
laakiin waxa uu sheegtaa inuu dad badan iyo dhul badan
metelo," sidaas waxaa yiri weriye reer galbeed ah oo dhowaan
Soomaaliya booqday.
Toddobaadyadii la soo dhaafay is bedellada dhacay waxaa ka
mid ah inay soo baxday gabadhii ugu horreysay ee qabqable
dagaal ah. Waa Mina Xuseen Shibis oo dagaal la gashay
Bashiir Raage. Labaduba darajadoodu waa qab-qableyaal khadka
dhexe. Labadoodu gaar gaar waxa ay u sheegeen inay is
difaacayaan.
Waxaa kaloo
jira qabqableyaal kale oo cusub oo sidooda ah, sida Sheekh
Yuusuf Indha-cadde, Cabdulqaadir Beebe, Saciid Bulbul,
Shariif Xaaraan-ku-naax, Faarax Garam-garam,
Faataa-dhug-harawsi iyo kuwa kale. Guud ahaan,
qabqableyaasha cusub tiradoodu waa toban, waana sii
kordhayaan marba marka ka dambaysa.
Shirka
Kenya
Isku dayga
ku saabsan soo jeedinta shirka Kenya ee ah in la sameeyo
madaxtinimo wareegta oo dhex marta qabqablayaasha ayaa ah
qaab mucjiso ah (magic formula) oo aan dunida horey u soo
marin. Shir ergadiisu tahay 361 ayaa waxaa ka soo baxay 60
musharrax, taas oo macnaheedu yahay in lix meelood ay hal
meel iska sharraxeen ka qayb galayaashu.
Badankood
musharrixiintu waa qabqablayaashii xukun-jaceylku madax
maray iyo kuwii ka soo hoos shaqeeyey Maxamed Siyaad Barre.
"Waxa ay ku haminayaan madaxtinimo waarta (life-time
presidency) iyo hanti degdeg lagu helo (instant health)"
ayuu yiri Cabdulqawi Yuusuf.
David Shinn
oo ahaan jiray Isuduwaha Soomaaliya u qaabilsan Waaxda
Dibadda ee Mareykanka, waxa uu yiri "Isku dayga hadda socda
(Kenya) ee baarlamaan lagu dhisayo ayaa muujinaya in horumar
la sameeyey, tallaabna horey loo qaaday, inkastoo aan la
fulin heshiisyo horey loo saxiixay haddana Mareykanku kuma
qasbayo kooxaha is haya inay fuliyaan."
Prof. Cabdi
Ismaaciil Samater oo u warramayey barnaamijka Africa Journal
ee idaacadda layska arko ee VOA, waxa uu yiri "Runtu waxay
tahay aniga aragtideyda in awoodaha gobolka aysan qayb ka
noqon karin xalka Soomaaliya sababtoo ah dano qeexan ayay ka
leeyihiin arrimaha Soomaaliya."
Burcadnimada qabqablayaasha
Waxyaabihii
iigu yaabka badnaa ee aan kala kulmay shirka Kenya waxaa ka
mid ahaa nin ka mid ah qabqablayaasha dagaalka ayaa goor
shir laga soo baxay waxaan la yeelanayey xog-wareysi. Waxaan
u dhaqaaqnay inaan fariisanno kuraas tiillay meel cidlo ah.
Waxaa na wehliyey nin gacan-yare u ah. Meeshii kuraasta
markaan tagnay qabqablihii wuxuu dareemay inuu ku fadhiyo
wax uu u maleeyey koob.
Hadduu soo
qabtay waa cell phone (telephone-ka gacanta).
Gacan-yarihiisii ayuu isla markiiba u dhiibay oo uu ku yiri
"noo demi, kaarkana ka tuur, cidna yeysan arag." Kaarku waa
simcard chip-ka uu ku shaqeeyo mobile-ka GSM-ka ah. Dhacdadu
waa qabqable mobile xaday.
"Qabqablayaasha dagaalku weligood kuma heshiinayaan dowlad,
hubkana ma dhigayaan haddaan la qasbin," sidaas waxaa qoray
wargeyska maalinlaha ah ee Herald Tribune oo talo
ahaan ku soo jeediyey in la qaado tallaabooyin adag sida
xayiraadda raasumaalka u yaalla dibadda, in la saaro
xayiraad dhanka socdaalka ah oo aysan dalka kaga soo bixi
karin, qoysaskooda jooga Europe iyo North America in dib
loogu celiyo waddanka iyo in cunaqabateyn la saaro
shirkadaha heshiisyada la saxiixda qabqablayaasha.
Tallaabooyinkan, waa hubaal inay dhabbaha u xaarayso nabad
rasmi ah oo Soomaaliya ay hesho. Waxaa kaloo ay yareyn
kartaa cabsida laga qabo in argagixisadu ay sii dhaafto oo
soo dhaafto Soomaaliya iyo dadka qaxaya ee ku le'anaya
badaha. Dadka qaar waxa ay la tahay inaysan dhici karin
qabqablayaasha oo qoorta la soo qabto ama qoysaskooda oo dib
loogu celiyo waddanka. Mareykanku, waxa ay yiraahdaan
"ereyga 'macquul ma aha' mararka qaar wuxuu noqdaa
'macquul'."
Dhacdo dhab
ah
Sannadkii
1995-kii ayaa Maxamed Faarax Caydiid marwadiisii rasmiga
ahayd, Khadiijo Saciid Gurxan waxa ay wareysi siisay wargeys
tabloid ah oo ka soo baxa Toronto. Tabloids, waa wargeysada
wax ka qora xumaha dadka. Crew-gii wargeysku intii ay jidka
ku soo jireen, marwada Caydiid waxa ay mashquul ku ahayd
inay guriga si aad ah u gogosho, sawirada seygeedana ay
darbiyada ku dhejiso. Waxaa kaloo ay u lebbistay
carruurteedii, miiskana waxa ay u soo dhigtay cunno, caano,
chocolate, etc. Wargeyskii, waxa uu subixii dambe soo
sawiray laba sawir. Sawir waa carruur joogta Baydhabo oo
cunaysa kab maqaar ah iyo harag, sawirna waa carruurtii
Caydiid oo Toronto joogta oo cunaysa cornflakes (waa qamadi
mararka qaar malab lagu dhex daro oo caano lagu isticmaalo).
Arrintan, waxa ay kalliftay in dowladda Canada ay dalkeeda
ka saarto marwadii Caydiid oo iyada iyo carruurtiiba ay
aabbahood Xamar ugu tagaan.
Dhinaca
Soomaalida
Soomaalida
dhankeeda waxaa laga rabaa inay xal u helaan xaaladda adag
ee xanuunka leh ee ay adkaatay ka baxsigeedu (sorrowful
predicament) oo ay iska ridaan kuwa xoogga ku cadaadinaya ee
iyaga ku dhex abuurmay (homegrown oppressors). Waxaa run ah
in dadka Soomaalidu aysan ku dhiiran karin arrintan haddii
aysan gacan ka helin Mareykanka iyo Yurub.
"Taageerada
Mareykanka iyo Midowga Yurub waa inaysan sii ahaanin mid ku
wajahan shirar dib u heshiisiineed oo aan macne sameynayn
(futile reconciliation conferences) ee waa inay diiradda
saartaa sidii dacwad loogu soo oogi lahaa dambiilayaasha
dagaalka, lana go'doomiyaa kuwa mas'uulka ka ah qalalaasaha
aan dhammaadka lahayn ee Soomaaliya" ayuu yiri Prof.
Cabdulqawi.
Tribune,
waxa ay tiri "maadaama Soomaaliya aysan lahayn hab sharci ah
oo macquul ah (credible legal system) waxaa caawin kara in
la soo afjaro dambiyada iyo dilalka qabqablayaasha in
adduunku qaado tallaabo xoog loogu fuliyo (co-ercive
measure), qabqablayaasha oo daaqadda ka baxana waxay meesha
ka saaraysaa Soomaaliya baylah u ah argagixisada."
Maxamed Xaaji (Ingiriis)
EPFC, University of Brussels
E-mail:
Ingiriis@yahoo.com
Afeef: Aragtida qoraalkan
waxaa lehqoraaga ku saxiixan.