ISLAAN
U DHALATAY DALKA RUUSHKA OO GAAJO AWGEED U DISHAY CUNUG AY DHASHAY
Isha: Mosco, Asharqal Awsat
Maxkamada ku taalla dalka Ruushka ayaa
xarig 14-sano ah ku xukuntay Hooyo dishay wiil ay dhashay oo 5-sano jir
ah, sidoo kale Maxkamaddu waxay xarig 9-sano ah ku xukuntay inankaas
yarka ah ayeeyadii oo lagu magacaabo Yalina Baranova oo 42-jir ah.
Sidoo kale, waxaa isna 14-sano oo xarig
ah lagu xukmay wiilka abbihiis oo lagu magacaabo Alexandar Baranov oo
45-jir ah, hooyada oo iyadana lagu magacaabo Yolina Kebaryanov oo 22-jir
ah ayaa la sheegay inay inankeeda ku xirtay silsilad illaa 2-mitir ah si
uusan marnaba u gaarin meel cunno ka dhawdahay, ugu dambeyntiina waxay
ugu dhaqaaqday garaacis illaa laftii uu qaado ay jabiso, markii uu
dhintayna waxay isku dayday inay isbitaalka ka hesho warqad ay ku
aasayso inankeeda, balse baaristii ugu horreysay ee dhaqaatiirta ayaa
soo saaray in inankaas yarka ah loo gaystay dil ee uusan caadi u dhiman.
Markii ay baaristu billaabatay ayaa
waxaa soo baxay in reerkii ay billaabeen inuu qofba midka kale ku
eedeeyo inuu dambiga isaga gaystay, taasoo keentay in ugu dambeyntii ay
muujiyaan in hooyadu ahayd qofkii garaaca ku dilay inanka, balse
maxkamaddu markii ay aragtay in dhammaantood ay doonayeen inay inanka
iska qaarijiyaan keentay in ay isku dambi noqdaan oo hooyada iyo aabaha
lagu xukumo min 14-sano oo xarig ah, halka ayeeyada lagu xukumay 9-sano.
Garyaqaankii reerkaas ayaa dhacdadaas
mas’uuliyaddeeda dusha uga riday dowladda isagoo sheegay in hay’adaha ku
shuqul leh arrimaha ilaalinta bulshada aysan u shaqeysan sidii loo
baahnaa.
Qorigii lagu dilay Benito Mussolini oo
laga helay Albania
Isha: Tirana , Reuters
Falter Adisio oo ahaa ninkii dilay
Diktatoorkii Talyaaniga ahaa ee Benito Mussolini sannadkii 1945-kii ayaa la
sheegay in markii ay ka cilladoobeen laba bistoolad oo talyaaniga lagu
sameeyay uu dilka Mussolini u adeegsaday qori yar oo lagu sameeyay dalka
Faransiiska.
Qorigaas ayaa 47-kii sano ee la soo dhaafay
ka maqnaa madxad ku yaallay caasimadda dalka Albania ee Tirana, qorigaasoo
ay hadiyad ayaan u heleen madaxdii kooxihii la oran jiray Stalion oo ka
dhisnaa dalka Albania, isagoo uu guddoonsiiyay ninkii dilay Mussolini oo ay
markaasi wehlisay gabar ay is jeclaayeen iyagoo doonayay inay ka gudbaan
buuraha loo yaqaan Alba.
Maalinnimadii dorraad ahayd ayaa weriye
Wakaaladda wararka ee Reuters u jooga magalaada Tirana ee dalka Albania lagu
tusay madxafka magaaladaasi, markaan oo ahayd markii ugu horreysay oo si
muuqata loo soo bandhigo qorigaasi kaddib markii uu burburay nidaamkii
shuuciga ahaa ee ka jiri jiray sannadkii 1991-kii.
Qorigaas wuxuu leeyahay fadhi yar oo qori
ka sameysan midabna leh, xarig maqaar ka sameysan oo gaaban, waxaa la
sameeyay sannadkii 1938-kii, noociisana waxaa lagu magacaabi jiray MIS,
wuxuuna sitay lambar taxane ah oo ah IF-20830.
Mas’uul xiriirka dadweynaha u qaabilsan
xukuumadda Albania ayaa wuxuu sheegay in ninkaas lagu magacaabo Adisio uu
qorigaasi hadiyad ahaan ugu soo diray xukuumaddii shuuciga ahayd ee uu
hoggaaminayay diktartoorkii Anwar Khoja, Adisio wuxuu ka mid ahaa 8-nin oo
loo xilsaaray dilka Mussolini.
Warqad uu u qoray Adisio Dowladda Albania
xilligaasi ayuu ku yiri: “Waxaan idiin soo diray hadiyaddan oo ah qorigii
aan ku dilay Mussolini oo ahaa mujrim dhinaca dagaalka ah anigoo fulinaya
awaamiirta madaxda sare ee ciidammada xoogga dalka Talyaaniga 28-kii April
1945-kii”.
Adisio shan rasaas oo is-daba joog ah ayuu
Mussolini ku riday, kaddib markii ay ka cilladoobeen laba bistooladood oo uu
sitay, sidoo kalena, waxaa goobtaa ku dhintay saaxiibkii Mussolini oo aan
loogu talo gelin in la dilo, hase ahaatee ay xabbadihii haleeleen.
W/D Amiin Yuusuf Khasaaro
E-Mail
amiinkhasaaro@hotmail.com