Culimada iyo ducaadda
gobolada Baay iyo Bakool oo guulo wax ku ool ah soo
hoyiyay Socdaal
dacwadeed oo qaatay 21 maalmood oo ay qayb ka mid ah
culimada iyo ducaadda gobolada Baay iyo Bokool ku tageen
magaalada Baydhabo ayaa soo hoyiyay guulo wax ku ool ah
oo ay aad ugu diirsadeen dadwaynaha daga goboladaas,
culimadu waxay duruus iyo muxaadaraad isdaba joog ah oo
lagu hagaajinayo mujtamaca ka jeedinayeen magaalada
intii ay joogeen dadweynaha deegaankuna si aad u
ballaadhan ayay culimada gacmo furan ugu soo dhoweeyeen
ugana faa'iidaysteen ,waxyaabihii hirgalay intay
culimadu gobolka booqanayeen waxaa ka mid ahaa :
1. waxay ku
guuleysteen inay soo af jaraan colaad raagtay oo ay ku
kala maqnaayeen beelaha deegaankaasi muddo laba sano ah
iyada oo la ogsoonyahay inay Ramadaankii tagay isla
culimadan iyo wax garad kale xabbad joojin ka dhex
sameeyeen dhinacyadii is hayay ee ururka RRA, culimadu
waxay heshiis u kala saxiixeen labada garab ee kala
fadhiya Baydhabo iyo Buurhakaba qodobada lagu
heshiiyayna waxaa ka mid ahaa:
a. waa in xabbad
joojintii hore la dhaqan galiyaa, ciidamadana loo
sameeyaa aagag ku meel gaadh ah, loona hawl galo sidii
loo midayn lahaa dhammaan ciidamada.
b. in la qaado
dhammaan isbaarooyinka dhammaan deegaamada Bay iyo
Bakool
c. wax hub ah
laguma qaadan karo magaalada gudeheeda.
d. Waa la dilayaa
qofkii qof si ukas ah u dila iyo qofkii ku kaca jidgooyo.
e. Waa in si deg
deg ah loo joojiyaa boobka iyo burburinta hantida guud
iyo midda gaar ahaaneedba.
f. Waxaa waajib ku
ah dadweynaha inay u laabtaan shariicada haddii ay wax
isku qabtaan
Saxiixa heshiiskan ka
dib waxay culimadu soo hoggaamiyeen ciidamada garabkii
fadhiyay Buurhakaba waxayna si nabad galyo ah ku keeneen
magaalada Baydhabo dadwenuhuna si farxad leh ayay u soo
dhoweeyeen waxaana la sameeyay guddi ka kooban todobo
xubnood oo hirgalisa maamulka iyo kala danbaynta,
heshiiskanna waxaa saxiixay dad gaadhaya 49 qof oo ka
mid ah dhinacyadii is hayay, culimo, malaaqyo iyo wax
garad kale. Dhammaan dadweynaha iyo dhinacyada
siyaasadeed ee is hayay waxay culimada ka codsadeen
inayna ka tagin inta si dhab ah loo hirgalinayo
heshiiskan.
2. waxaa magalada
Baydhabo laga furay xafiiska al amru bilmacruuf wannahyu
canil munkar o ka shaqayn doona faafinta diinta iyo kala
saaridda dadka wax dhexmaraan xukun ahaan.
3. waxaa la sameeyay
maamul kulmiya culimada deegaanka Bay iyo Bakool oo
madax looga dhigay Sh. Maxamad Baakistaani .
Waxaa xusid mudan in
gobalada Bay iyo Bakool ay ka jirto baahi dacwadeed oo
ballaadhan culimadii iyo ducaaddii in badan oo ka mid
ahna ay colaadaha awgood horaan gobolka uga soo qaxeen
maalmahan danbena dadaal la taaban karo ayay ducaaddu ka
wadaan labada gobolba.
Xafiiska dacwada iyo tarbiyada Soomaliyeed
dacwah@hotmail.com