• Gudoomiyaha gudiga la talinta ee ka hortaga Musuqmaasaqa Kenya oo is casilay.
• WERIYE AXMED CARAALE OO XAALADIISA CAAFIMAAD LIIDATO IYO TUHUNO ISA SOO TARAYA 
• Xuseen Ceydiid  oo sheegay inuu wali dood ka qabo Baarlamaanka...........
• Siminaar looga doodayo sidii ay saxaafadda qeyb ugu qaadan lahayd dib u dhiska dalka oo maanta.........
• Hiloowle Iimaan oo laga codsaday inuu ka laabto Musharaxnimadiisa.............
• Somali Land oo si kulul uga jawaabtay qorshaha ay wado Jabuuti ee ah.......

W/Q.Abdi Wali Ibraahim Aaden "Garyare"

Garyare20@hotmail.com   

 

 

Xuseen Ceydiid  oo sheegay inuu wali dood ka qabo Baarlamaanka...........

 

Xildhibaan Xuseen Maxamed Faarax Ceydiid  ayaa markale waxaa uu ku celiyay doodiisii ahayd inuu jiro khaladaad badan oo ku wajahan Baarlamaanka Federaalka Soomaliya,isagoo intaasi ku daray Xuseen haddii arintaasi wax laga qaban waayo ay  horsiidi doonto khaladaadyo badan oo  soo food saara  Baarlamaanka Federaalka ee khaladka aasaaskiisa lagu bilaabay waa sida uu sheegay in badan Xildhibaan Xuseen Maxamed Faarax Ceydiid.

 

Xuseen Ceydiid oo ka hadlayay kulan ay isugu yimaadan qaar kamid ah Haweenka Soomaaliyeed ee ka mid noqday Baarlamaanka Somaliya iyo kuwa aan nasiibka u yeelan kadib markii la dhinac mariyay tiradii ay ku lahaayeen Baarlamanka Somaliya ayaa waxaa uu sheegay inay jiraan waxyaabo badan oo u baahan in la saxo,laakiin  Xuseen Ceydiid waxaa uu qiray inay jirto caqabado badan oo aan arintaasi sahli karin,hadalka Xuseen ayaa waxaa uu yahay mid farxad gelin kara haweenka Soomaaliyeed ee u birtumanaya sidii ay ugu mid noqon lahaayen baarlamaankii kol hore loo dhaariyay Wadanka Soomaaliya.

 

Xildhibaan Xuseen Maxamed Faarax Ceydiid mar uu ka hadlayay halka uu ka soo bilowday khaladkan ayaa waxaa uu sheegay inuu ka soo bilowday Safiirada Wadamada safka hore,laakiin waxa uu  intaasi raaciyay inay qirteen khaladaadkii ay sameeyeen waxaana loo baahan yahay buu yir inay Soomaalida arintaasi saxaan oo aysan faraha ka laaban,xuseen waxaa uu sheegay in xitaa dacwada arintan ay gaartay Xoghayaha guud ee Q/Midoobay  Kofi Annan,waxaana uu ka digay in haddii la sixi waayo khaladkan uu baarlamaanku noqon doono mid aan socon.

 

Xuseen Ceydiid oo ka hadlayay mustaqbalka waxa ay rabaan waxaa uu sheegay inay ku rajo wayn yihiin sidii ay u dhisan lahaayeen Dowlad loo dhan yahay oo ku shaqeysa si daacad iyo sinaan ah,laakiin buuyiri si taasi lagu gaaro waa in marka hore la saxaa khaladaadka bilowga ah ee soo wajahay Baarlamanka Federaalka  oo uu sheegay inuu yahay mid ka aasaaska u ah bad-baadinta Umadda dhibaateysan ee Soomaaliyeed meelkasta oo ay joogaan.

 

Siminaar looga doodayo sidii ay saxaafadda qeyb ugu qaadan lahayd dib u dhiska dalka oo maanta.........

 

kitt oo ku qososhay hadal uu jiri md kamid ah kasoo qeyb galayaasha siminaarka cumar aadan oo wax fahansiinaya qaarka mid ah dadkii siminaarka ku jiray kitt iyo Albina oo isdhinac fadhiya

Siminaar looga hadlayo Saxaafadda iyo qeybta ugu aadan dib u dhiska Wadankan burbursan ee Soomaaliyeed ayaa maanta waxaa uu ka dhacay Hotelka Sahafi International ee ku yaala Magaalada Muqdisho,waxaana uu ahaa mid ay ka soo wada qeyb galayeen dhinacyada kala duwan ee warbaahinta ka jira Wadanka gudihiisa iyo dibadiisa intaba,iyadoo uu soconayo sida ay sheegeen Mas'uuliyiintii soo qaban qaabisay muddo laba maalmood ah.

 

Siminaarkan oo ay soo qaban qaabisay hay'adda isku xirka Suxufiyiinta Haweenka Soomaaliyeed ee Sowja ayaa waxa ka soo qeyb galay shakhsiyaad Magac ku dhex leh Bulshada Soomaaliyeed ee ku nool Magaalada Muqdisho iyo qeybo badan oo ka mid ah Gobolada Wadaka Soomaaliya,waxaana halkaasi casharadii lagu qaadanayay bixinayay inta badan aqoon-yahanka Soomaaliyeed,Cumar Aadan Qaadi,isagoo inta badan casharadiisa ay xiriir la lahaayeen sida uu wariyaha u soo tabin karo wararka ku saabsan isku dhacyadda Dalka iyo dibadda.

 

Cumar Aadan Qaadi waxa uu sharaxaad badan ka siinayay kasoo qeyb galayaashii siminaarkaasi sida uu u dhaco isu dhac,sida looga hor tago iyo sida ay Soomaalida ilaa iyo iminka uga hishiin ladahay wixii dhacay ee la wada ogyahay sidii ay u dheceen,laakiin sharaxaad dheer kadib Cumar Aadan Qaadi waxaa uu u soojeestay Su'aalo uu waydiinayo dadkii ka faa'iidaysanayay Siminaarkaasi kuwaasoo la xiriiray bal sida ay  suurta gal ku tahay in saxafiga uu ku shaqeeyo markii  uu ka soo waramayo dhacdo inuu runta ka hadlo,inuu dhexdhexaad ka noqdo waxa  dhacaya ee uu ka soo waramayo iyo inuu dadka ku hogaamin karo wax saxda ah ee jira,intaasi ka dib waxaa loo qeybiyay kasoo qeyb galayaashii siminaarkaasi shan qeybood oo midiiba ay ka kooban tahay shan qof.

 

Dood dheer kadib ayaa waxaa la isugu soo laabtay siminaarkii oo qolo walba looga dhagaystay waxa ay ku sifeeyeen sadexdii qodob ee loo diray inay ka soo doodaan kadibna ay soo gudbiyaan waxa ay isku raaceen inay kula haboon tahay sadexdaasi qodob,shantii qeybood ee loo kala qeybiyay xubnihii ka qeyb qaadanayay siminaarkaasi ayaa waxa ay iska soo dhex doorteen min hal qof oo qolo walba u noqda afhayeen u gudbiya waxa  ay isla garteen,dhagaysi dheer dabadii waxa halkaasi ka soo baxay inay aad iskula fahmeen bal sida ay u wada wajihi lahaayeen qoraalka ama ka hadalka maka uu dhaco isku dhac beel ama Kooxo iska soo hor  jeeda.

 

waxaa halkaasi ka hadashay Kitt Warnock oo ah Haweenay u dhalatay Wadanka Ingiriiska isla markaana kamid ah Mas'uuliyiinta sar sare ee Ururka Panos kaasoo xaruntiisa ugu wayn ay ku taal Magaalada London ee Caasimadda u ah Wadanka Ingiriiska oo bari Somaliya qeyb ka gumaysan jiray waxaana socdaalkeeda ah ay ku timid Soomaali kulankaasi looga Doodayay Saxaafadda iyo doorkeeda uga aadan dib u dhiska Dalka Soomaaliya,Albino Okeyn oo ah Mas'uulka Panos Eastern Africa u qaabilsan howlaheeda ku wajahan Wamada bariga Africa.

 

Kitt oo ah haweenay in badan ku soo dhex jirtay warbaahinta ayaa amaantay sida ay u shaqeyso Warbaahinta Soomaaliya oo ay shegtay inaysan lahayn Dowlad maamusha,waxaana ay intaasi ku dartay in wariyayaasha Soomaaliya jooga ee hadana wararka ka soo diraya ay yihiin kuwa u dhabar adeegaya qataro badan oo  ka soo food saari kara qolyaha hubeeysan oo ay sheegtay in haddii uu wariyaha runta ka sheego  waxa ay sameyaan macquul tahay inuu waxyeelo xoogan kala kulmo,laakiin Kitt ay sheegtay inay Wariyayaasha Soomaaliyeed ka Caawin doonaan dhinaca aqoonta iyo u doodista marka ay dhacdo in lagu xadgudbo xuquuqdooda,Waa sida ay Kitt u balan qaaday Ururka Suxufiyiinta Haweenka Soomaaliyeed ee Sowja.

 

Siminaarkan oo bari lagu wado in la soo gabagabeeyo ayaa waxaa dhaqaalaha ku baxay bixiyay Hay'adda Panos  Eastern Africa waxaana isku soo agaasimay Ururka isku xirka Suxufiyiinta Haweenka Soomaaliyeed ee Sowja,waxaana ka qeyb galay ilaa iyo suxufiyiin tiradooda ay dhan tahay 50 suxufi,kuwaasoo ka kala yimid qeybaha kala duwan ee warbaahinta gudaha iyo dibadda,wixii kasoo baxa gaba gabada siminaarkaasi wararkeena danbe ayaad ka aqrisan doontaan haddi alle idmo.

 

 

Hiloowle Iimaan oo laga codsaday inuu ka laabto Musharaxnimadiisa................

 

Xildhibaan Hilowle Iimaan Cumar oo ka mid ahaa hogaamiyayaashii ugu cad cadaa Ururka SRRC  isla markaana haatan kamid ah Musharixiinta u taagan xilka Guddoomiyaha Baarlamaanka Federaalka Soomaaliya  ayaa waxaa la soo gudboonaaday baaqyo looga codsanayo inuu uga laabto xilkaasi,iyadoo ay ugu horeeyaan cidda ka codsanaysa hilowle inuu xilkaasi ka laabto ay yihiin Odayaasha iyo Siyaasiyiinta ka so jeeda Beelaha Hawiye.

 

hadafka ay ka leeyihiin Odayaasha iyo Siyaasiyiinta Beelaha Hawiye codsiga ay Hilowle uga codsanayaan inuu ka tanaasulo xilka uu doonayo ee ah Jagada Guddoomiyaha Baarlamaanka Federaalka Somaliya ayaa waxaa uu yahay sida ay sheegeen ilo lagu kalsoonaan karo Beesha hawiye oo damacedu yahay xilka ugu sareya Dowlada Federaalka Soomaaliya oo ah Madaxwaynaha Jamhuuriyadda Soomaaliya shanta sano ee soo socota,sidaasi darteed ayaa hilowle iimaan ay ka codsadeen Odayaasah iyo Siyaasiyiinta Beel-waynta Hawiye inuu ka laabto tartanka uu gu jiro xilka Guddoomiyenimadda Baarlamaanka oo haddii uu ku guulaysto ay dhici doonto inaysan helin Hawiye xilka Madaxwaynaha Soomaaliya

 

Dalabka Odayaasah iyo Siyaasiyiinta Hawiye ayuu Siyaasiga Hilowle Iimaan ku tilmaamay inay tahay arin wanaagsan oo ay macquul tahay inuu qaato,waxaana uu u muujiyay markii ay soo hor dhigeen arintaasi dalabka ah ee looga codsanayo inuu iska dhaafo xilka Guddoomiyenimada Baarlamaanka uu u sheegay inuu arintaasi ku dhaqaaqi doono,laakiin ma cada waqtiga rasmiga ah ee uu arintaasi ku dhawaaqi doono Hilowle.

 

Arintan ayaa waxaa ay shaki badan ku abuurtay Siyaasiyiin badan oo ka soo jeeda beelaha kale ee Soomaaliyeed sida kuwa kusoo jeeda Beesha Daarood ee dadaalka ugu jira sidii ay ugu soo bixi lahaayeen xilka Guddomiyenimada Barlamaanka,iyagoo dhinaca kale ay jiraan siyaasiyiin kale oo ay isku beel ka soo wada jeedaan oo iyagana loolan ugu jira inay hantaan xilka Madaxwaynaha Soomaaliya,taasoo ah mid aan is qabanayn,waxaana ay wararku qaar sheegayaan inay macquul tahay inay tilaabada iminka lagu dhiiri gelinayo Hilowle ay qaadan iyagana Siyaasiyiin kale oo Xilka Madaxwayne la rabo Beeshooda,la argi doonee waxa ka soo baxa Doorashada Guddoomayaha Baarlamaanka Federaalka Somali ee dhawaan loo balansan yahay.

 

Somali Land oo si kulul uga jawaabtay qorshaha ay wado Jabuuti ee ah..............

 

Dowlada uu Madaxwaynaha ka yahay Daahir Riyaale Kaahin ee isku magacowday Somali Land ayaa si kulul uga jawaabtay Qorshaha ay Dowlada Jabuuti ku doonayso inay xarun u noqoto Xoolaha laga dhoofiyo Soomaaliya ee loo iibkeeyo Wadamada Khaliijka,waxaana mas'uuliyiinta Somali Land arintaasi ku tilmaameen inay tahay wax aan la aqbali karin oo ay tahay in laga hor tago.

 

Wasiirka Xannaanada Xoolaha ee Jamhuuriyadda la baxday Somali Land ayaa  ku macneeyay qorshaha ay wado Dowlad Jabuuti mid lagu cirib tirayo dhaqaalaha Somali Land iyo ganacsigii baaxadda lahaa ee ay la lahayd Wadamadda KHaliijka,waxaana uu sheegay inay sameeyn doonaan dadaalkasto oo looga hor tagi karo hindisaha ay damacsan tahay Dowlada Jabuuti ee uu madaxwaynaha ka yahay Md,Ismaaciil Cumar Geelle,isagoo sheegay inay isku dayi doonaan sidii ay arintaasi uga dhaadhicin lahaayeen Dowlada Jabuuti inay ka waantowdo,Waa sida uu hadalka u dhigay Wasiirka Xannaanada Xoolaha ee Jamhuuriyadda isku magacowday Somali Land.

 

Qorshahan ayaa ah mid ay ku kala aragti duwan yihiin Dad-waynaha Soomaaliyeed gaar ahaan ganacsatada Soomaaliyeed,iyadoo aad argayso qaarka mid ah ganacsatada oo kuu sheegayo inuu ku faraxsan yahay qorshaha ay ku guulaysatay Dowlada Jabuuti ee ah inay xarun u noqoto xoolaha laga dhoofi Soomaaliya oo dhan halka qaarka kalana ay qabaan inay haba yaraatee taageersanayn qorshaha ay Dowlada Jabuuti ku doonayso in Wadankeeda laga dhoofiyo Xoolah ka yimaada Soomaaliya,iyadoo kuwa kasoo hor jeeda arintan ay sheegayaan in Dowlada Jabuuti  dhaqaalo xoogan ay ku doonayso iyo inay xoolaha ku keeni karto laba jeer in la dhoofiyo,waxaana ay sheegeen inay sameeyn doonaan sida ugu sahlan oo ay uga hor tagi karaan arintaasi.

 

Qorshahan ayaa Dowlada Wadanka Jbuuti waxa ay ka dhameeysatay Mas'uuliyiinta iyo Shirkaddaha Wadamadda Khaliijka kuwaasoo ka aqbalay in Dowalda Jabuuti ay xarun u noqoto Xoolaha looga keeno Soomaaliya iyo Wadamada kale ee yaala Geeska Africa sida Wadamada kala ah Suudaan,Eretreya,Kenya iyo Itoobiya,waxaana dhaman xoolaha ka yimaada Wadamadaasi laga dhoofin doonaa Wadanka Jabuuti,iyadoo inta an la dhoofin halkaasi lagu marsiin doonobaaritaan Caafimaad kadibna intooda fiican loo dhoofin doono Wadamada Khaliijka halka kuwa cudur laga helo  dib loogu celin doono Dalalkii laga keenay.

 

W/Q.Abdi Wali Ibraahim Aaden "Garyare"

Garyare20@hotmail.com