DOOH! DOOH! DOOH!
(WAAR AMAY HEERYADA
DHIGAAN!)
Cumar
Cabdinuur Nuux – Nabaddoon
omarabdinur@hotmail.com
Mahad Ilaah baa leh,
Nabad iyo Naxariisna Nebi Maxamed korkiisa ha ahaato.
Khamiistii la soo
dhaafay 17/03/2005, wixii ka dhacay goobtii kulanka iyo doodda ee Golaha
Shacabka Kumeelgaarka Soomaaliyeed wuxuu ahaa faldanbiyeed. Wuxuu ahaa wixii
laga filayey in ay ku kacaan ragga damiirkoodu dhintay dadkeennuse xalka ka
sugayaan. Waxaa afarta gees ee dunida laga daawaday hardankii, hurdankii iyo
hangool isla dhicii hawlwadeennada Golaha Shacabka ee Kumeelgaarka ah.
Waxaase nasiib wanaag
ahayd in halwadeennada Golaha Shacabka Kumeelgaarka ah oo ku caanbaxay 15kii
sano ee la soo dhaafay ku dagaallanka gantaallada riddada dheer, hoobiyaha
culus iyo AK47 ay markaan hurdan iyo haraati ku hawl yareysteen!!. Maya,
maya, arrintu sidaa maaha. War wuxuu joogaa markii Xamar la iskula noqdo,
waayo Nairobi ciiddankooda lugtu masoo gaarin, saadkiyo rasaastiina waa laga
soo fogaaday.
Mid waa la dareemi karaa,
in raggu laba ra’yi oo kala duwan qabeen, laba qorshe oo kala duwanna ka
duulayeen. Waxaase nasiib darro ah in gacanta la isula tago. Waxaad mooddaa
in ragga laga sugayo in ay nidaam iyo kala danbeyn dalkii kusoo celiyaan ay
iyagu nidaam iyo kala danbeyn barasho u baahan yihiin.
Qoraalkaygaan ma aha mid
aan ku lafagurayo gunta ama wixii dhaliyey gacan ka adalkaan. Labadii qodob
ee la isku qabtay iyo qaabkii looga dooday midna uma socdo in aan ka
garsooro ama dhalleeceeyo waayo waa arrimo caalamkoo dhan isku khilaafsan
yahay. Waa aragtiyo Soomaalidu ku kala qaybsantahay. Cidda laga sugayey in
ay isu soo dhaweyso oo xal dhexdhexaad ah ka gaartana waa ragga bakooradaha,
kuraasta iyo tumburyada iskala daalay!! Ah! Ah! Aah! Waar wuxu ma bilis
carootay baa??
Waxaanse jeclahay bal in
aan wixii aragtidayda ah ama awooddayda ah uga talo bixiyo sidii ay u
dareemi lahaayeen labada gole iyo madaxweynuhu waajibka saaran.
-
Odayaal dadkeennu iyo dalkeennu waxay ku
jiraan kuwa dunida ugu saboolsan (adinku xoogaa waa ladantiihiin ee
danyarta il naxariis leh ku eegga).
-
Odayaal dadkeenna iyo dalkeenna nabad
waxaa ugu danbeysay 25 sano ka hor (tan cid idiinka waramaysaa ma jirto
oo habeen dheexaa cabsi waad ku seexateen).
-
Odayaal dadkeenna iyo dalkeennu waxay
qabaan cudurro daalshaday, oo fuustooyin sun ah baa meelkasta kusoo
caariyey (tan aad ulama socotaan waayo kiinna xanuunsadaa dibadduu u
dhoofaa ee bal dadka kale weydiiya!!)
-
Odayaal ogaada in mas’uuliyadda ummaddaan
ay maanta dushiinna saaran tahay. Haddii raggii idinka horeeyey aad
eedeyn jirteenna, maanta adinka ayey idin hoostaallaa.
-
Odayaal “maan rag waa mudacyo” oo isku
meel uma wada jeesto, ee miyir iyo xaqdhowr yeesha.
-
Odayaal “geesigu waa kan marka uu caroodo
naxariista” ee ma aha kan aargoosta.
-
Odayaal haddii aad dawladdaan fashilisaan
dhibka ka yimaada waa mid ubadkeenna iyo jiritaankeenna danbe halis
gelin kara, ee dulqaad iyo samir muujiya.
-
Odayaal haddii la kala adkaan karo horay
baa loo kala bixi lahaa, ee dagaal iyo burbur hor leh ha inoo celinina.
Haddii ay idinku jiraan kuwo xalka iyo xasiloonida aan rabin ha lagula
dhaqmo “kaadi badane waa loo gogol badiyaa” ee yaan hogga iyo halaagga
uu rabo lagula dhicin.
Sansaanka muuqda ma aha
mid farxad gelinaya maquustayaasha Soomaaliyeed ee 29 bilood dawlad loo dhan
yahay ka sugayey meeshii Khamiistii la soo dhaafay hurdanka iyo hangoolka la
iskula dhacay!!
Dooh! Dooh! Dooh! Waar
xamuul xulus baa idin saaran ee heeryada iyo haamaha ha daadinnina! Nin
walboow dib u liq candhuuftaada oo iska ilaali in aad ku dhacdo dabin aadan
ka fiirsan!. Dawladda iyo Baarlamaanku meeshii ay tegi lahaayeen iyo
qorshaha keenista ciiddammo nabadda suga waxaa ka horeeya in aad ujeeddada
iyo waxqabadka midaysaan. Haddii kale dhibkii aad rabteen in aad xallisaan
ayaad sii kordhineysaan.
Dooh! Dooh! Dooh!
Guddoomiyaha Golaha Shacabka, nin xil qaaday eed qaad! Oday xanaaqa dhin,
xal raadi, wax isku xanja-xanjee, arrintuna yeysan noqon mid shaqsiyeed ama
xiniinyo taabasho. Haddii laguu gefo dulqaado, haddii lagu dirqiyo ha yeelin,
isku duub sharafta iyo jiritaanka qaranka sidii aad isugu duubtay sanduuqii
codbixinta habeenkii madaxweynaha la dooranayey markii nalku demay! Ogowna
bini’aadan baa tahay oo markasta ra’yigaagu sax maaha ee talo ha moogaan.
Dooh! Dooh! Dooh!
Madaxweynaha dalka, nin xil qaaday eed qaad! Oday ragga kala qabo, dhexgalka
iyo dhexdhexaadinta badi, ujeeddadu ha noqoto wax qabad ee yeysan noqon
waxaad rabto marso. “Xoog waxaa ugu liita kan xarigga kaa gooya” ee xeelad
iyo dulqaad ha moogaan. Hadday dawladdaan hagaagto sharaftaada, hadday
burburto ama dhib soo kordhisana sharaf-dhacaaga. Nin weyna wadkiis waa
yaqaan Walwaalna wadaan la’aan looma arooro.
Dooh! Dooh! Dooh!
Wasiirka Koowaad, nin xil qaaday eed qaad! Oday xasaradda iyo digashada
yaree. Waxa aad waddo waa wax rag kaala dhexeeya. Xaalxaal-mastuur ku wad
hawsha, xuuraansina ha moogaan. Hadal intuu afkaaga ku jiro buu ammaantaa
yahay. Nin carooday laga bedi, xanaaq iyo cabasho labadaba iska ogow!
Dooh! Dooh! Dooh! Golaha
shacabka iyo golaha wasiirada nin xil qaaday eed qaad. Haddii aad wada
shaqaysaan oo dalkii nabad iyo kala danbeyn ku soo dabashaan waa idiin guul
iyo sharaf. Haddii aad hurdanka iyo haraatida sii waddaan, colaad sii
hurisaan dalkiinnana sii burburisaan, waxaad sugtaanba waa wadkiina iyo
xisaabtii aakhiro!! Intaad nooshihiinna sharaf darro iyo ihaano adduun u
dulqaata. Ninkii taas shaki ka qabaana ha weydiiyo Xaaji Muuse Suudi Yalaxow
wixii uu kala kulmay xabsigii shalay, isagoo weliba ah wasiir iyo xildhibaan!!
sharaftii qaran looga haybeysto oo ka maqan darteed!!
Inj. Cumar C/nuur Nuux –
Nabaddoon
omarabdinur@hotmail.com
Afeef: Aragtida qoraalkan waxaa leh
qoraaga ku saxiixan...
Faafin: Somalitalk.com | Maarso 20, 2005
Waraysi Samsam
iyo Codsasho Caawinaad Soomaalino...
Samsam waxa ay shaaca ka qaaday in ay dacwadeeda u
gudbineyso Maxkamadaha Aduunka ee Caalamiga ah, waxana ay...
Guji...
Kulaabo bogga www.SomaliTalk.com
Daabaco
Boggan | Print